Fees van die ongesuurde brood

Die fees van die ongesuurde brood het heel waarskynlik sy wortels in ʼn landbouritueel, wat later met die paasfeesvieringe saamgesmelt het. Die fees het sewe dae geduur en op die 15de dag van die eerste maand begin.

Die fees het saamgeval met die graanoes. Voordat brood met die nuwe graan gebak is, moes die ou suurdeeg eers uit die mense se huise verwyder word en vir ʼn week lank het hulle ongesuurde brood geëet. Daarna is brood weer met nuwe suurdeeg gemaak. Hierdie ritueel simboliseer ʼn “nuwe begin” en ʼn afsluiting van die verlede.

In Levitikus 23:5-6 word die fees van die ongesuurde brood afsonderlik vermeld. Maar in Eksodus 12:15 word die fees vervleg met die paasfees. Vanaf daardie oomblik het suurdeeg begin om sowel die “groot haas” van die Eksodus asook die tyd toe Israel God se uitverkore volk geword het, te simboliseer.