Week

Ons ken die week as ʼn vaste, ewigdurende siklus van sewe dae. Die ritme van die week is onafhanklik van die siklus van die seisoene (die jaar) en van die maansiklus (die maanmaand). Die week, soos ons dit ken, het sy oorsprong in die Ou Testament, maar daar is ʼn storie daaragter. Ou Israel was bekend met die sewedag-ritme uit die ploeg- en oestyd. Daar was ook godsdienstige feeste wat sewe dae geduur het. Na die Babiloniese ballingskap het die sewedag-week die basis vir die Joodse kalender geword.

Volgens die ou sosiale wetgewing kon landbouwerkers na ʼn aantal werksdae ʼn dag af hê. Hierdie wetgewing het die armes teen die rykes beskerm. In Mesopotamië het werkers die agtste dag af gehad, en by ander volke was dit die tiende dag. In Israel het werkers die sewende dag af gehad.