To The Word – Day 207

₁Ka kgwedi ya seswai ya ngwaga wa bobedi wa ge Dariose e le kgoši, Morena o ile a fa moprofeta Sakaria molaetša. Sakaria e be e le morwa wa Berekia, Berekia e le morwa wa Ido. ₂Morena Ramaatlaohle a laela Sakaria gore a botše setšhaba a re: “Nna, Morena, ke ile ka galefela borakgolokhukhu ba lena, ₃eupša bjale ke le botša ke re: Boelang go nna, gomme le nna ke tla boela go lena. ₄Le se ke la swana le borakgolokhukhu ba lena bao baprofeta ba mehleng ya kgale ba bego ba ba begela molaetša wa go re nna, Morena Ramaatlaohle, ke re ba tlogele mekgwa le ditiro tša bona tše mpe. Eupša ba ile ba se ke ba ntheeletša, goba ba phetha tše ke ba laelago tšona. ₅Bjale ba kae bona borakgolokhukhu bao ba lena? Baprofeta bao bona ba sa phela? ₆Ke be ke laela bahlanka ba ka, baprofeta, go begela borakgolokhukhu ba lena melao le ditaelo tša ka, eupša bona ba di tšeiša phefo gomme ba otlwa. Ka morago ba itshola, gomme ba dumela gore ba otlilwe ke nna, Morena Ramaatlaohle, go ya ka mekgwa le ditiro tša bona, bjalo ka ge ke be ke rerile.”

₇Ka letšatši la masome a mabedi le metšo ye mene la kgwedi ya lesome le motšo o tee, kgwedi ya Shebate, ka ngwaga wa bobedi wa ge Dariose e le kgoši, Morena a bolela le moprofeta Sakaria ponong. Sakaria e be e le morwa wa Berekia, Berekia e le morwa wa Ido. Sakaria o laodišitše tša pono yeo ya gagwe a re: ₈E rile e le bošego ka bona monna yo mongwe a nametše pere ye khunou, a le gare ga mehlakola ka legageng. Ka morago ga gagwe go be go na le dipere tše dingwe – tše dikhunou, tše ditsothwa, le tše ditšhweu. ₉Ka botšiša morongwa yo a bego a bolela le nna ka re: “Mong wa ka, na dipere tše di šupa eng?”

Yena a mphetola a re: “Ke tla go bontšha se di se šupago.” ₁₀Ke ge monna yola a bego a le gare ga mehlakola a re: “Di romilwe ke Morena gore di yo lekola lefase.”

₁₁Tša begela morongwa wa Morena yo a bego a eme gare ga mehlakola tša re: “Re lekotše lefase, gomme ra hwetša lohle le letše le iketlile.”

₁₂Ke moka morongwa yoo a re: “Aowii, Morena Ramaatlaohle, e šetše e le mengwaga ye masome a a šupago o galefetše motse wa Jerusalema le metse ya naga ya Juda. O tla feletša kae le go se ba gaugele?”

₁₃Morena a fetola morongwa yoo a bego a bolela le nna, a bolela le yena ka mantšu a botho le a go mmea pelo, ₁₄gomme morongwa yoo a mpotša gore ke bege gore Morena Ramaatlaohle o re: “Ke tshwenyegile kudu ka Jerusalema le thaba ya Sione. ₁₅Ge e le ditšhaba tše di dutšego ka boiketlo tšona ke di galefetše e le ruri, ka gobane mola ke be ke befeletše setšhaba sa ka gosenene, bona ba ile ba se okeletša matshwenyego. ₁₆Ke ka lebaka leo nna, Morena, ke rego ke boetše mo motseng wa Jerusalema go o šokela. Tempele ya ka e tla agwa ka bofsa, motse le wona wa tsošološwa. Ke realo, nna, Morena Ramaatlaohle.”

₁₇Morongwa yoo a mpotša le gore ke bege ke re: “Morena Ramaatlaohle o re metse ya gagwe e tla buša ya atlega kudu, le gona o tla buša a homotša badudi ba motse wa Jerusalema, gomme a o dira bodulo bja gagwe gape.”

₁Mo ponong ye nngwe ke ile ka bontšhwa manaka a mane. ₂Ka botšiša morongwa yoo a bego a bolela le nna ka re: “Manaka a a šupa eng?”

Yena a mphetola a re: “A emela maatla a mebušo ya lefase ye e šwalalantšego batho ba Juda le ba Israele le ba Jerusalema.”

₃Ke moka Morena a mpontšha barulatshipi ba bane. ₄Ka mmotšiša ka re: “Banna ba ba tlilo dirang?”

Yena a mphetola a re: “Mebušo yela ke yona ye e šwalalantšego batho ba Juda ya ba kokobetša. Banna ba ba tletše go e tšhoša le go fenya ditšhaba tše di šwalalantšego batho ba Juda ka sehlogo se sekaaka.”

₅Mo ponong ye nngwe ka bontšhwa monnatsoko a swere thapo ya go ela. ₆Ka mmotšiša ka re: “O ya kae?”

Yena a mphetola a re: “Ke yo ela motse wa Jerusalema gore ke bone bophara le botelele bja wona.”

₇Ke moka ka bona morongwa yola a bego a bolela le nna a batamela, gomme a gahlanetšwa ke yo mongwe morongwa. ₈Yola a bego a bolela le nna a re go yoo: “Kitima o yo botša lesogana lela le swerego thapo ya go ela o re Jerusalema e tlilo ba motse wa go se ageletšwe ka morako, ka lebaka la bontši bja batho ba gona le diruiwa. ₉Morena a re yena mong e tla ba morako wa mollo go dikologa motse, le gona o tla dula go wona ka letago la gagwe.”

₁₀Morena o re go setšhaba sa gagwe: “Ke le šwalalanyeditše mathokong ohle. Hee! Hee! Tšhabang nageng ya ka leboa! ₁₁Hee, lena le phelago bothopša Babilonia, tšhabelang Jerusalema! ₁₂Nna, Morena Ramaatlaohle, ke re wena Sakaria ke go romile ditšhabeng tše di le hutšego, lena setšhaba sa ka, gore o ba botša o re: ‘Yo a ba kgomago o tla be a kgoma selo sa ka se bohlokwa.’ ₁₃Ba tsebe gore ke tla lwa le bona, gomme ba tla hlakolwa ke ba e kilego ya ba makgoba a bona.”

Ke mo le tlago tseba gore ke romilwe ke Morena Ramaatlaohle.

₁₄Morena o re: “Opelang ka lethabo, lena batho ba Jerusalema! Ke tlilo dula le lena.”

₁₅Mehleng yeo ditšhaba tše dintši di tla tla go Morena gomme ya ba setšhaba sa gagwe. Yena o tla dula le lena. Ke mo le tlago tseba gore yena Ramaatlaohle o nthomile go lena. ₁₆Batho ba Juda ba tla boela ya ba ba Morena mo nageng ye kgethwa, gomme Jerusalema e tla boela ya ba bodulo bja gagwe.

₁₇Iphutheng bohle ge le le pele ga Morena, gobane yena o tšwa bodulong bja gagwe bjo bokgethwa.

₁Mo ponong Morena a mpontšha Joshua, Moprista yo Mogolo, a eme pele ga morongwa wa Morena. Ka letsogong la go ja la Joshua go be go eme Sathane a letetše go phara moprista yoo ka molato. ₂Morongwa yoo wa Morena a re go Sathane: “A Morena a go kgale, wena Sathane, a Morena yo a ikgethetšego Jerusalema a go kgale! Monna yo o swana le serumola se se ubutšwego mollong.”

₃Joshua o be a eme moo, a apere diaparo tša ditšhila. ₄Morongwa yoo a re go badiredi ba gagwe: “Apolang monna yo diaparo tše tša ditšhila.” Ke moka a re go Joshua: “Ke phumotše molato wa gago gomme ke tla go apeša diaparo tše boleta.”

₅Ke moka ka re badiredi bao ba apeše Joshua seala sa boprista se se hlwekilego. Ba dira bjalo, mme ba mo apeša le diaparo tšela tše boleta morongwa yoo wa Morena a eme moo.

₆Ke moka morongwa a botša Joshua a tiišitše a re: ₇“Morena Ramaatlaohle o rile: ‘Ge o ka phela ka mo ke nyakago ka gona wa dira le mediro ye ke go filego yona, gona o tla no fela o le molebeledi wa Tempele ya ka le dikgoro tša yona, gomme ke tla kwa dithapelo tša gago, go swana le ge ke ekwa tša barongwa ba ba lego pele ga ka. ₈Bjale ge, theeletša, wena Joshua, Moprista yo Mogolo, le lena bapristakayena, lena le lego sešupo sa bokamoso bjo bobotse, theeletšang: Ke tlilo tliša mohlanka wa ka yo a bitšwago Lehlogedi. ₉Ke beile leswika la mahlakore a a šupago pele ga Joshua. Ke tla le tloka mantšu, gomme ka phumola molato wa naga ye ka letšatši le tee. ₁₀Mohla tšatši leo le fihla, batho ba tla laletša baagišani ba bona gore ba tle ba thabe le bona ka khutšo le polokego, ba dutše ka dirapeng tša bona tša merara le ka fase ga mego ya bona.’ ”

₁Morongwa yola a bego a bolela le nna a tla gape, a ntsoša bjalo ka motho ge a tsošwa borokong. ₂A mpotšiša a re: “O bonang?”

Ka mo fetola ka re: “Ke bona sehlomamabone sa gauta. Godimo ga sona go na le sebjana sa makhura a mohlware. Sehlomamabone seo se na le mabone a a šupago, lengwe le lengwe le na le lešobana la thapo. ₃Go na le mehlare ye mebedi ya mehlware ka thoko ga sehlomamabone, wo mongwe ka mo, wo mongwe ka mo.” ₄Ke moka ka botšiša morongwa yola ka re: “Na dilo tše di šupang, mong wa ka?”

₅Yena a mphetola a re: “O ra gore ga o tsebe gore dilo tše di šupang?”

Ka mo fetola ka re: “Aowa, mong wa ka, ga ke tsebe.”

_10bMorongwa yola a re go nna: “Mabone a a šupago ao ke mahlo a a šupago a Morena, a a bonago tša lefaseng ka moka.”

₁₁Ke moo ke mmotšišitšego ka re: “Mehlare ye mebedi ye ya mehlware ka mo le ka mo ga sehlomamabone e šupang?” ₁₂Ka tšwela pele ka re: “Na makala a mabedi a a mohlware ka thoko ga dipompi tše pedi tša gauta tša go tšhela makhura a mohlware a mmala wa gauta ona a šupang?”

₁₃Yena a re go nna: “O ra gore ga o tsebe gore dilo tše di šupang?”

Ka mo fetola ka re: “Aowa, mong wa ka, ga ke tsebe.”

₁₄Ke moka a re: “Dilo tše di emetše batlotšwa ba babedi ba go hlankela yena Morena, Mong wa lefase ka moka.”

₆Morongwa yola a ntaela gore ke botše Serubabele gore Morena o re: “O tla atlega, fela e sego ka maatla a gago goba a madira a gago, eupša ka go tutuetšwa ke moya wa ka. ₇Wena thabakgolo, o selo mang go Serubabele? O tla fetoga molala ge a go batamela. Serubabele, wena o tla tsošološa Tempele, gomme ya re ge o bea leswika la mafelelo, batho ba goa ba re: ‘Ga se ka botse! Ke le lebotse bjang!’ ”

₈Morena a mpotša gape a re: ₉“Tempele ye e theilwe ke Serubabele, gomme e tla ba ya phethwa ke yena. Mohla seo se direga ke gona setšhaba sa ka se tlago tseba gore ke nna ke go romilego go sona. _10aBa se nyamišwe ke ge go se ne tema ye e bonalago. Ba tla thaba ge ba bona Serubabele a tšwela pele le go aga Tempele.”

₁Mo ponong ye nngwe ka bontšhwa lengwalo le tšewa ke phefo lefaufaung. ₂Morongwa a mpotšiša a re: “O bonang?” Nna ka mo fetola ka re: “Ke bona lengwalo le tšewa ke phefo lefaufaung; ke la dimetara tše lesome ka botelele, le tše tlhano ka bophara.”

₃Ke moka a re go nna: “Mo go lona go ngwadilwe thogako ye e tlago wela naga ka moka. Ka thoko ye nngwe ya lengwalo go ngwadilwe gore mahodu ohle a tla ntšhwa mo nageng; ka thoko ye nngwe go ngwadilwe gore bohle ba ba ikanago ka maaka le bona ba tla tlošwa. ₄Morena Ramaatlaohle o re o tla romela thogako ye gomme ya tsena ka lapeng la lehodu le lengwe le le lengwe, le ka go la yo a ikanago ka maaka ka leina la gagwe. E tla lala ka dintlong tša bona, ya hlahlamolla marulelo a tšona, ya kgereša le maboto.”

₅Morongwa yola a bego a bolela le nna a mpatamela a re: “Bona selo sela se etla!”

₆Ka mmotšiša ka re: “Ke eng?”

Yena a mphetola a re: “Ke seroto, gomme se swantšha molato wa batho bohle mo nageng.”

₇Sekhurumelo sa morodi sa seroto seo sa khuromologa. Ka moo serotong go be go dutše mosadi.

₈Morongwa a re: “Mosadi yo o swantšha bokgopo.” Ke moka a mo kgoromeletša ka serotong, gomme a khurumela seroto ka sekhurumelo sela sa morodi. ₉Ge ke lebelela ka bona basadi ba babedi ba fofa ba ntebantšhitše ba na le diphego tše di phurolotšwego moyeng tše di swanago le tša tlhame. Ba kuka seroto sela ba fofa le sona.

₁₀Ka botšiša morongwa yola wa go bolela le nna ka re: “Ba se iša kae?”

₁₁Yena a mphetola a re: “Ba se iša Babilonia, mo ba tlago se agela tempele. Ge e fedile seroto seo se tla bewa bodulong bja sona ka gare ga yona.”