Morena o laela setšhaba sa gagwe gore se sokologe
1Ka kgwedi ya seswai ya ngwaga wa bobedi wa ge Dariose e le kgoši, Morena o ile a fa moprofeta Sakaria molaetša. Sakaria e be e le morwa wa Berekia, Berekia e le morwa wa Ido. 2Morena Ramaatlaohle a laela Sakaria gore a botše setšhaba a re: “Nna, Morena, ke ile ka galefela borakgolokhukhu ba lena, 3eupša bjale ke le botša ke re: Boelang go nna, gomme le nna ke tla boela go lena. 4Le se ke la swana le borakgolokhukhu ba lena bao baprofeta ba mehleng ya kgale ba bego ba ba begela molaetša wa go re nna, Morena Ramaatlaohle, ke re ba tlogele mekgwa le ditiro tša bona tše mpe. Eupša ba ile ba se ke ba ntheeletša, goba ba phetha tše ke ba laelago tšona. 5Bjale ba kae bona borakgolokhukhu bao ba lena? Baprofeta bao bona ba sa phela? 6Ke be ke laela bahlanka ba ka, baprofeta, go begela borakgolokhukhu ba lena melao le ditaelo tša ka, eupša bona ba di tšeiša phefo gomme ba otlwa. Ka morago ba itshola, gomme ba dumela gore ba otlilwe ke nna, Morena Ramaatlaohle, go ya ka mekgwa le ditiro tša bona, bjalo ka ge ke be ke rerile.”
Pono ya dipere
7Ka letšatši la masome a mabedi le metšo ye mene la kgwedi ya lesome le motšo o tee, kgwedi ya Shebate, ka ngwaga wa bobedi wa ge Dariose e le kgoši, Morena a bolela le moprofeta Sakaria ponong. Sakaria e be e le morwa wa Berekia, Berekia e le morwa wa Ido. Sakaria o laodišitše tša pono yeo ya gagwe a re: 8E rile e le bošego ka bona monna yo mongwe a nametše pere ye khunou, a le gare ga mehlakola ka legageng. Ka morago ga gagwe go be go na le dipere tše dingwe – tše dikhunou, tše ditsothwa, le tše ditšhweu. 9Ka botšiša morongwa yo a bego a bolela le nna ka re: “Mong wa ka, na dipere tše di šupa eng?”
Yena a mphetola a re: “Ke tla go bontšha se di se šupago.” 10Ke ge monna yola a bego a le gare ga mehlakola a re: “Di romilwe ke Morena gore di yo lekola lefase.”
11Tša begela morongwa wa Morena yo a bego a eme gare ga mehlakola tša re: “Re lekotše lefase, gomme ra hwetša lohle le letše le iketlile.”
12Ke moka morongwa yoo a re: “Aowii, Morena Ramaatlaohle, e šetše e le mengwaga ye masome a a šupago o galefetše motse wa Jerusalema le metse ya naga ya Juda. O tla feletša kae le go se ba gaugele?”
13Morena a fetola morongwa yoo a bego a bolela le nna, a bolela le yena ka mantšu a botho le a go mmea pelo, 14gomme morongwa yoo a mpotša gore ke bege gore Morena Ramaatlaohle o re: “Ke tshwenyegile kudu ka Jerusalema le thaba ya Sione. 15Ge e le ditšhaba tše di dutšego ka boiketlo tšona ke di galefetše e le ruri, ka gobane mola ke be ke befeletše setšhaba sa ka gosenene, bona ba ile ba se okeletša matshwenyego. 16Ke ka lebaka leo nna, Morena, ke rego ke boetše mo motseng wa Jerusalema go o šokela. Tempele ya ka e tla agwa ka bofsa, motse le wona wa tsošološwa. Ke realo, nna, Morena Ramaatlaohle.”
17Morongwa yoo a mpotša le gore ke bege ke re: “Morena Ramaatlaohle o re metse ya gagwe e tla buša ya atlega kudu, le gona o tla buša a homotša badudi ba motse wa Jerusalema, gomme a o dira bodulo bja gagwe gape.”
