Pesalome 81

₁Hlalalelang Modimo,

yena e lego maatla a rena;

gobelang Modimo wa Jakobo megobo.

₂Kgerešang koša,

le pidinyeng meropa;

letšang koša ye bose ka dikgapa le diharepa.

₃Kgabubudišang phalafala ge ngwedi o dutše le ge o ile swiswing –

mohla wa monyanya wa rena.

₄Gobane ye ke taelo mo go Baisraele,

ke molao wa Modimo wa Jakobo.

₅Modimo o o beetše ditlogolo tša Josefa e le taelo

mola a hlasela naga ya Egepeta.

Ke kwa lentšu le ke sa le tsebego le re:

₆“Ke le rotše morwalo magetleng,

seroto sela la kgona go se bea fase.

₇Mola le tlaletšwe le be le ntelela,

mme nna ke le hlakodiša.

Ke ile ka le araba ke iphihlile ka lerung la mekidimetšo.

Ke ile ka le leka kua meetseng a Meriba. Sela

₈Lena tšhaba sa ka,

theeletšang ge ke le laya.

Lena Baisraele,

nke nkabe le ka theeletša!

₉Le se khunamele medimo ye mengwe;

le se obamele medimo e šele.

₁₀Ke nna Morena Modimo wa lena yo ke le ntšhitšego nageng ya Egepeta.

Ke tla le fa tše le di hlokago.

₁₁“Fela setšhaba sa ka sa se ntheeletše,

Baisraele ba gana go nkwa.

₁₂Ka gona nna ka ba lesa ba gogwa ke bonganga bja bona.

₁₃Nke nkabe tšhaba sa ka se ntheeletša,

nke nkabe Baisraele ba phetha thato ya ka!

₁₄Ke be ke tla potlaka ka hlasela bahloi ba bona,

ka kokobetša manaba a bona.

₁₅Bantlhoi ba be ba tla ithapeletša go nna,

eupša kotlo ya bona e be e ka se fele.

₁₆Tšhaba sa ka sona ke be ke tla se fepa ka dijo tše dibotse,

ka ba khoriša le todi,

setšwamaswikeng.”