To The Word – Day 208

₁Mo ponong ye nngwe ka bontšhwa dikoloi tše nne tša ntwa di etla di etšwa mokgahlo ga dithaba tše pedi tša mphiri. ₂Koloi ya mathomo e be e gogwa ke dipere tše dikhunou, ya bobedi e gogwa ke tše dintsho, ₃ya boraro e gogwa ke tše ditšhweu, gomme ya bone e gogwa ke tše diphaswa. ₄Ke mo ke botšišitšego morongwa yo a bego a bolela le nna ka re: “Mong wa ka, na dikoloi tše di šupang?”

₅Yena a mphetola a re: “Tšeo ke diphefo tše nne tša legodimo di a tloga ge di seno rongwa ke Morena wa lefase lohle.”

₆Koloi ye e gogwago ke dipere tše dintsho e ya nageng ya ka leboa, ya dipere tše ditšhweu e ya nageng ya ka bodikela, gomme ya tše diphaswa e ya nageng ya ka borwa.

₇Ge dipere tše diphaswa di etšwa di be di fela pelo ya go yo lekola lefase. Morena a re go tšona: “Eyang go lekola lefase!” Gomme tša ya. ₈Ke moka a nkgoelela a re: “Dipere tšela tša go ya nageng ya ka leboa di okobaditše kgalefo ya ka.”

₉Morena a ntaetša a re: ₁₀“Amogela dimpho tše di ntšhitšwego ke mathopša a a boilego Babilonia, e lego boHeldai le Tobia le Jedaya. Tšatšing le o di amogetšego ka lona o ye ga Josia, morwa wa Sofonia. ₁₁O dire mphapahlogo ka silibera le gauta ye ba e neetšego, gomme o o rweše Moprista yo Mogolo, Joshua, morwa wa Jotsadaka. ₁₂O mmotše gore Morena Ramaatlaohle o re: ‘Go na le monna yo a bitšwago Lehlogedi; o tla hloga mo a lego gona, gomme a tsošološa Tempele ya Morena. ₁₃Ke yena yo a tlago e aga, a buša setšhaba sa gagwe, gomme a hlomphiwa ka mo go lebanego kgoši. O tla thušwa ke moprista, gomme bobedi ba tla šomišana ka kwano.’ ₁₄Mphapahlogo woo e tla ba segopotšo ka Tempeleng ya Morena sa go hlompha boHeldai, Tobia, Jedaya le Josia. ₁₅Batho ba kgole ba tla tlo thuša go tsošološa Tempele ya Morena.”

Ke mo le tlago tseba gore Morena Ramaatlaohle o nthomile go lena. Tšeo di tla phethega ge le ka hlompha Morena Modimo wa lena ka botlalo.

₁Ka ngwaga wa bone wa ge Dariose e le kgoši, ka letšatši la bone la kgwedi ya senyane, kgwedi ya Kislebe, Morena a bolela le Sakaria.

₂Batho ba Bethele ba be ba romile Saretsere le Regeme-Meleke le banna ba gabobona Tempeleng ya Morena Ramaatlaohle go yo kgopela tšhegofatšo ya Morena, ₃le go yo botšiša baprista le baprofeta ba re: “Na re no tšwela pele le go ilela le go ikona dijo ka kgwedi ya bohlano go etša mengwageng ye mentši ye e fetilego?”

₄Ke mo Morena a ntaetšego ₅gore ke botšiše batho bohle ba naga ye le baprista ke re: “Kgane mola le ikona dijo ebile le ilela ka kgwedi ya bohlano le ya bošupa mengwageng ye masome a a šupago le be le direla nna? ₆Le mola le eja, le enwa, na e be e se go itšela le go inwela?”

₇Tšeo ke tšona tše Morena a bego a di bolela ka baprofeta bale ba pele mola Jerusalema le metseng ye e bapilego nayo go sa na le badudi ba bantši, go dutšwe ka boiketlo, le mola seleteng sa ka borwa se se omilego le nagengtlase go sa dula batho.

₈Morena a re go Sakaria: ₉“Nna, Morena Ramaatlaohle, ke laile setšhaba sa ka ka re: Le hlokomele gore go dirwe toka, le gona le swarane ka botho le ka lešoko. ₁₀Le se ke la gatelela bahlologadi le ditšhiwana le bafaladi le bahloki. Le gona le se ke la logelana maanomabe.

₁₁“Eupša setšhaba sa ka se ngangabetše sa gana go ntheeletša. Ba ithibile ditsebe gore ba se nkwe. ₁₂Ba ithatafaditše le dipelo tša ba bjalo ka leswika. Ka ge ba be ba gana go phetha melao le ditaelo tše ke bego ke ba romela tšona ka Moya wa ka di išwa ke baprofeta bale ba pele, ke ile ka ba galefela. ₁₃Ka ge ba be ba sa ntheeletše ge ke be ke ba bitša, le nna ke be ke sa ba theeletše ge ba be ba nthapela. Ke realo, nna, Morena Ramaatlaohle. ₁₄Ke ile ka ba hlothola bjalo ka ledimo, ka ba šwalalanyetša ditšhabeng tšohle tše ba bego ba sa di tsebe. Ya ba ge naga ye e šala e se na badudi le ba go e sepela, mme naga yela ye botse ya fetoga lešoka.”

₁Morena Ramaatlaohle a re go Sakaria: ₂“Ke tshwenyegile kudu ka motse wa Jerusalema, mo ke bilego ke galefetše manaba a bona. Ke realo, nna, Morena Ramaatlaohle. ₃Ke tla boela thabeng ya Sione, ka dula motseng wa Jerusalema. Wona o tla bitšwa motse wo o botegago, gomme thaba ya Morena Ramaatlaohle e tla bitšwa thaba ye kgethwa. ₄Bakgalabje le bakgekolo ba lehlotlo ba tla buša ba itulela mapatlelong a Jerusalema. Ke realo, nna, Morena Ramaatlaohle. ₅Mapatlelo a motse le ona a tla tlala bašemane le banenyana ba ba ralokago.

₆“Le ge mašaledi a setšhaba se bjale a bona nke tše dibjalo di ka se kgonege, na le nna nka bona di sa kgonege? Go botšiša nna, Morena Ramaatlaohle. ₇Nna, Morena Ramaatlaohle, ke re ke tla hlakodiša setšhaba sa ka dinageng tša ka bohlabatšatši le tša ka bodikelatšatši, ₈gomme ka se buša sa tlo dula Jerusalema. E tla ba setšhaba sa ka, gomme nna ka ba Modimo wa sona, ka se buša ka potego le ka toka.

₉“Nna, Morena Ramaatlaohle, ke re: Tiang maatla, lena bjale le kwago taba ye ka baprofeta ba ba bego ba le gona mola go thewa motheo wa go tsošološa Tempele, e lego ntlo ya ka, nna, Morena Ramaatlaohle. ₁₀Pele ga moo go be go se na yo a nago le tšhelete ya go thwala motho, goba go lefela seruiwa sa go dirišwa. Batho ba be ba sa dire mešomo ya bona ka polokego ka lebaka la manaba a bona, gobane ke be ke lwiša motho le moagelani wa gagwe. ₁₁Eupša go tloga bjale mašaledi a setšhaba se nka se sa a swara bjalo ka pele. Ke realo, nna, Morena Ramaatlaohle. ₁₂Ba tla bjala dipeu tša bona ba iketlile. Merara ya bona e tla enywa, mobu o tla ntšha dibjalo, le legodimo le tla wiša phoka. Tše ka moka ke tla di fa mašaledi a setšhaba se. ₁₃Lena batho ba Juda le lena ba Israele, pele le be le le sešupo sa thogako go baditšhaba, eupša ke tla le phološa, mme la ba sešupo sa tšhegofatšo. Ka gona, betang dipelo le se boife.”

₁₄Morena Ramaatlaohle o re: “Ka ge borakgolokhukhu ba lena ba ile ba nkgalefiša, ke ile ka ikemišetša go le hlokofatša, gomme ka se buše pelo. ₁₅Fela bjale ke hlaname, mme ke ikemišeditše go atla batho ba Jerusalema le ba Juda. Ka gona le se boife. ₁₆Tše le swanetšego go di dira ke go botšana nnete, le ahlole ka toka le ka therešo ka dikgorong tša tsheko, gore go be le khutšo. ₁₇Le se ke la rerelana tše mpe. Le se ikane ka bohlatse bja maaka, gobane tša mohuta woo ke tše ke di hloilego. Ke realo, nna, Morena.”

₁₈Morena Ramaatlaohle a re go nna: ₁₉“Nna, Morena Ramaatlaohle, ke re go ikona dijo ka kgwedi ya bone, ya bohlano, ya bošupa, le ya lesome go tla fetoga mabaka a lethabo le tlhalalo, go tla fetoga menyanya bathong ba Juda. Ka gona, le rate nnete le khutšo.”

₂₀Morena Ramaatlaohle o re: “Ka moso Jerusalema go tlilo tla batho ba go tšwa metseng ye mentši. ₂₁Ba motse wo mongwe ba tla ya go ba wo mongwe ba re: ‘A re yeng re yo khunamela Morena Ramaatlaohle, re mo rapeleng gore a re šegofatše!’ ₂₂Ditšhaba tše dintši le merafe ye maatla ba tla tla Jerusalema go khunamela Morena Ramaatlaohle, le go mo rapela gore a ba šegofatše. ₂₃Mehleng yeo banna ba lesome ba maleme a a fapanego le ditšhaba tše di fapanego ba tla swara monna wa Mojuda ka morumo wa seaparo sa gagwe ba re: ‘E re re sepeleng le lena, ka gobane re kwele gore Modimo o na le lena.’ Ke realo, nna, Morena Ramaatlaohle.”

₁Morena o begile molaetša wa gore o tla otla naga ya Hadrake le motse wa Damaskose. Ga se dikgoro tša Israele fela tše e lego tša Morena, eupša le wona motsemošate wa Siria ke wa gagwe. ₂Motse wa Hamate, wo o beelanego mellwane le wa Hadrake, le wona ke wa gagwe, le motse wa Tirose le wa Sidone, gotee le boramahlale ba metse yeo. ₃Motse wa Tirose o ikagetše sebo wa ba wa kgobela silibera ye ntšintši, le mekgobokgobo ya gauta. ₄Eupša Morena o tla amoga motse woo tšohle tše o nago le tšona. O tla lahlela mahumo a wona ka lewatleng, gomme motse wona a o fiša thokgethokge.

₅Ba motse wa Ashkelone ge ba bona tšeo ba tla tšhoga. Ba motse wa Gasa ge ba di bona le bona ba tla thothomela ka letšhogo. Ba Ekrone ge ba di bona le bona ba tla nolega moko. Kgoši ya motse wa Gasa e tla bolawa; Ashkelone e tla šala e se na badudi. ₆Kua Ashdode go tla dula mahlakanasela. Morena o re: “Ke tla fediša boikgogomošo bja Bafilista. ₇Ke tla ba lahliša go ja nama ye e sa nago le madi, le dijo tše dingwe tše di iletšwago. Mašaledi a bona e tla ba a ka, nna, Modimo wa bona, ba etša ba kgorwana ya kgoro ya Juda. Le ba Ekrone e tla ba ba setšhaba sa ka, ba etša Bajebuse. ₈Ke tla leta naga ya ka, gomme ka iletša madira go putla mo go yona. Setšhaba sa ka se ka se sa šwahlelwa ke bagateledi, gobane bjale ke bone ka mo ba tlaišitšwego ka gona.”

₃Morena o re: