To The Word – Day 206

₁Nna, Paulose, le Silbanose le Timotheose re dumediša lena phuthego ya Bathesalonika le lego ba Modimo, Tatagorena, le Morena Jesu Kriste, re re:

₂Nke Modimo, Tatagorena, le Morena Jesu Kriste ba le gaugele, ba le fe khutšo.

₃Banabešo, re swanetše go leboga Modimo ka mehla ka lebaka la lena. Ke tshwanelo gore re dire bjalo, ka gobane tumelo ya lena šemo e tielela e eya pele, go ratana ga lena ka moka le gona go thupela go eya. ₄Ke ka lebaka leo rena beng re le kgantšhago mo diphuthegong tša Modimo ka ge le dula le kgotleletše le bile le dumetše mo gare ga go hlomarwa le go tlaišwa.

₅Tšeo ka moka di bontšha gore kahlolo ya Modimo e lokile; ka gona le tla lokela mmušo wa gagwe wo le o tlaišetšwago. ₆Modimo o tla dira ka toka: O tla tlaiša ba ba le tlaišago, ₇gomme a khutšiša rena le lena le tlaišwago. Seo o tla se dira mohla Morena Jesu a etla ka borena a etšwa legodimong a na le barongwa ba gagwe ba maatla, ₈a le ka gare ga mollo wo o tukago. O tla otla ba ba ganago Modimo le ba ba sa theeletšego Taba ye Botse ya Morena wa rena, Jesu. ₉Modimo o tla ba otla ka go ba lahlela sa ruri. Ba ka se bone Morena le maatla a gagwe a letago. ₁₀Mohlang a etla bakgethwa ba gagwe ba tla mo tumiša; bohle ba ba dumelago go yena ba tla kgotsa borena bja gagwe. Le lena le tla be le le gare ga bona, gobane le dumetše molaetša wola re le boditšego wona.

₁₁Ke ka lebaka leo re dulago re le rapelela. Re kgopela Modimo wa rena gore a le dire ba le swanelwago ke se le se bileditšwego. Nke a ka phethagatša ka maatla a gagwe tše dibotse tše le nyakago go di dira, le tše le di dirago ka ge le dumela. ₁₂Ke ka mo Morena wa rena, Jesu Kriste, a tlago tumišwa ke lena, le lena la tumišwa ke yena, go ya ka kgaugelo ya Modimo wa rena le Morena Jesu Kriste.

₁Mabapi le taba ya go boa ga Morena wa rena, Jesu Kriste, le go tlo kgoboketšwa ga rena mme ra ba mmogo le yena, ke a le kgopela, banabešo, ₂gore le se ferekanywe gabonolo goba la tlaletšwa ke bao ba rego Letšatši la Morena le šetše le tlile. Mohlomongwe ba gopola gore re ile ra bolela bjalo re tsenwe ke moya mola re bega molaetša wa Modimo, goba re ile ra ngwala ka lengwalong. ₃Le se forwe ke motho ka mokgwa ofe le ofe. Gobane Letšatši leo le ka se tle go sešo gwa tla bokgelogi bja mafelelo, le Rabokgopo a sešo a tšwelela, yena yo a tswaletšwego tahlego. ₄Yena o tla lwantšha sengwe le sengwe se go thwego ke medimo goba se se khunamelwago ke batho, gomme a ipona a di feta ka moka. O tla ba a yo dula ka Tempeleng ya Modimo a ipitša Modimo.

₅Kgane ga le sa gopola gore tše ke ile ka le botša tšona mola ke na le lena? ₆Se se šitišago gore a senoge gonabjale le a se tseba. Rabokgopo o tla tšwelela ka nako ye e swanelago. ₇Bokgopo bjo bo iphihlilego bo šetše bo šoma. Yo a mo šitišago go itšweletša o tla tšwela pele le go mo šitiša go fihlela a tlošwa. ₈Ke gona Rabokgopo a tlago utollwa, fela ge Morena Jesu a etla o tla mmolaya ka moya wo o tšwago ka molomong wa gagwe, a mo fediša ka letago le a tlago ka lona.

₉Go tla ga Rabokgopo ke modiro wa Sathane. Rabokgopo yo o tla dira mehlolo yohle ye maatla ya bofora le dimaka tšohle tše maatla tša bofora, ₁₀a šomiša boradia bjo bobe bja mehuta yohle mo go ba ba lahlegago. Bona ba lahlega ka ge ba se ba amogela therešo ba e rata gore ba phološwe. ₁₁Ka gona Modimo o ba romela maatla a boradia gore ba dumele tše di fošagetšego, ₁₂gore bohle ba ba sa dumelego therešo eupša ba kgahlwago ke bokgopo ba bonwe molato.

₁₃Ge e le rena, banabešo, re swanetše go le lebogela go Modimo ka mehla, lena le ratwago ke Morena. Gobane Modimo o le kgethile la ba ba mathomo Thesalonika ba go phološwa ka maatla a Moya wo Mokgethwa yo a le kgethwafatšago, le ka go botegela nnete ga lena. ₁₄Seo ke se Modimo a le bileditšego sona ka Taba ye Botse ye re le begetšego yona, gore le tle le hwetše letago la Morena wa rena, Jesu Kriste. ₁₅Ka gona, banabešo, tiišetšang, le itshwarelele ka dithuto tšela re le rutilego tšona ka molomo le ka lengwalo.

₁₆A Morena wa rena, Jesu Kriste ka noši, le Modimo, Tatagorena, yo a re ratilego mme ka kgaugelo ya gagwe a dulago a re kgothatša a bile a re tiiša kholofelong, ₁₇a le kgothatše a be a le tiiše go dira le go bolela tšohle tše dibotse.

₁Banabešo, ke fetša ka go re le re rapelele, gore molaetša wa Morena o phatlalale ka lebelo mme o amogelwe ka tlhompho, go no swana le moo go lena. ₂Le re rapelele le gore Modimo a re hlakodiše bathong ba babe le ba bakgopo, gobane ga se mang le mang yo e lego modumedi.

₃Ge e le Morena yena ke mmotegi, gomme o tla le tiiša a le emela go Rabobe. ₄Morena o dira gore re le bote gore le dire tše re le laelago tšona, ebile le tla no tšwela pele le go di dira.

₅Morena a le dire gore le kwešiše lerato la Modimo le kgotlelelo ye le e fiwago ke yena Kriste.

₆Banabešo, re le laya legatong la Morena wa rena, Jesu Kriste, gore le kgaogane le badumedi bohle ba dulago ka diatla le gona ba sa phelego ka dithuto tše re ba rutilego tšona. ₇Lena beng le tseba ka mo le swanetšego go re ekiša ka gona. Rena re be re sa dule ka diatla mola re le moo go lena. ₈Re be re sa phele ka mphiwafela. Sa rena e be e le go itapiša le go katana; re be re šoma bošego le mosegare gore re se tshwenye motho wa lena, ₉e se ka gobane re se na tokelo ya go babalelwa, eupša e le ka ge re nyaka gore le tle le re ekiše. ₁₀Le gona mola re le moo go lena re be re hlwa re le botša re re: “Maganagošoma le dijo a se di fiwe.”

₁₁Re realo ka ge re ekwa ba re ba bangwe ba lena ke metlapa ye e sa dirego selo ge e se go tsenatsena ditaba tša ba bangwe. ₁₂Ba mohuta woo re ba laya re ba kgothatša legatong la Morena Jesu Kriste gore ba se itšharakantšhetše bophelo, ba upše ba šomele tša go iphediša.

₁₃Ge e le lena, banabešo, le se ke la lapa go dira tše dibotse. ₁₄Ge go ka ba le yo a ganago go kwa ditaelo tše re le romelago tšona ka lengwalo le, le mmee leihlo, gomme le kgaogane naye gore a inyatše. ₁₅Fela le se mo tšee gore ke lenaba, le upše le mo kgale bjalo ka ngwanabolena.

₁₆Yena Morena wa khutšo a fele a le fa khutšo le ka mekgwa yohle. Morena a be le lena ka moka.

₁₇Ka seatla sa ka ke ngwala gore: Paulose o re le dumele. Ke ka mokgwa wo ke swayago mangwalo a ka ohle go bontšha gore ka nnete a tšwa go nna.

₁₈Morena wa rena, Jesu Kriste, a le gaugele bohle.

₁Nna, Paulose, mogolegwa ka lebaka la Kriste Jesu, le ngwanaborena, Timotheose, re a le dumediša, wena Filemone, mogwera wa rena le modirikarena, ₂le wena Apefia, modumedikarena wa mosadi, le wena Argipose, mokatanikarena, le phuthego ye e tsenelago ka ga gago, re re:

₃Nke Modimo, Tatagorena, le Morena Jesu Kriste ba le gaugele, ba le fe khutšo.

₄Ka mehla ge ke go gopola ke rapela ke leboga Modimo, ₅ka gobane ke fela ke ekwa ka mo o ratago badumedi bohle le ka mo o dumetšego go Morena Jesu ka gona. ₆Nna ke rapela gore botee bja rena le wena bja ge re le badumedi nke bo ka tšweletša kwešišo ya tše dibotse tše re nago le tšona ka lebaka la Kriste. ₇Gobane, ngwanešo, lerato la gago le tloga le nthabišitše le bile le mpeile pelo. O kgothaditše badumedi.

₈Ka fao, ka ge Kriste a mphile maatla, ke be nka no se šie go go laya gore o dire se se swanetšego. ₉Eupša ka ge ke go rata, ke ikgethela go go kgopela fela. Ke a go kgopela, le ge ke le Paulose, motseta wa Kriste Jesu, yo gonabjale ke bilego ke le sebofša ka lebaka la gagwe. ₁₀Go wena ke kgopelela Onesimose, morwa wa ka ka tša tumelo, yo ke mo sokolotšego ke le ka kgolegong. ₁₁Pele o be a sa go hole ka selo, fela bjale o re hola kudu, nna le wena.

₁₂Ke mmušetša go wena, yena yo ke mo ratago ka pelo ya ka ka moka. ₁₃Ke be ke dumile ge a ka be a ka dula le nna a nthuša legatong la gago ge ke sa le ka mo kgolegong ka lebaka la Ebangedi. ₁₄Fela ga se ka rata go dira selo ke se ka dumelelwa ke wena. Ga ke rate go go gapeletša gore o dumelele Onesimose go nthuša; ke rata ge o mo dumelela ka go lokologa.

₁₅Yo Onesimose ge a kgaogane le wena sebakanyana, mohlomongwe e be e le gore a tle a boele ruri go wena, ₁₆e se sa le lekgoba, e le wa go phala lekgoba, e le ngwaneno yo o mo ratago. Nna ke mo rata kudu, fela wena o tla mo rata le go feta, ka bokgoba bja gagwe le ka Bokriste bja gagwe.

₁₇Bjale ge eba o mpona ke le modirišananago, mo amogele go no swana le ge o be o tla amogela nna. ₁₈Ge eba a go fošeditše goba a jele molato go wena, lefiša nna. ₁₉Ke ngwala ka seatla sa ka mo ke re: Nna ke tla go bušetša.

Ke be ke sa nyake go go gopotša gore wena ka noši o a nkolota, ka gobane o se o lego sona ka nna.

₂₀Ka gona, hle, ngwanešo, ka ge o le ngwanešo ka Morena, nke o ntšwele mohola, o nthabiše, ka ge o le Mokristekanna.

₂₁Ke go ngwalela ke holofetše gore o tla dira ka mo ke go kgopelago ka gona; gabotsebotse ke a tseba gore o tla dira le go feta ka mo ke go kgopelago. ₂₂Le gona o ntokišetše phapoši, ka ge ke holofela gore Modimo o tla le phethela ka mo le kgopelago ka gona, a mpušetša go lena.

₂₃Ephafrase yo e lego sebofšakanna ka lebaka la Kriste Jesu o re o dumele; ₂₄le badirišanikanna, Markose le Aristargose le Demase le Lukase, le bona ba a go dumediša.

₂₅A Morena wa rena, Jesu Kriste, a le gaugele.