Bible Society of South Africa
Leesplanne
Dagboek 2021
Dagboek 2021 – 26 Maart

Dagboek 2021 – 26 Maart

Dankie vir die kruis!

Bybelteks(te)

MARKUS 15

Jesus word gekruisig

21Die soldate het iemand wat daar verbygekom het, gekommandeer om Jesus se kruis te dra. Dit was Simon van Sirene, wat van buite die stad af gekom het, die pa van Aleksander en Rufus.

22Hulle bring Jesus toe na 'n plek Golgota, wat Kopbeenplek beteken. 23Hulle wou vir Hom wyn gee met mirre daarin, maar Hy wou dit nie hê nie. 24Toe kruisig hulle Hom en verdeel sy klere onder mekaar deur te loot oor wat elkeen moet kry.

25Dit was nege-uur die môre toe hulle Hom gekruisig het. 26En die rede waarom Hy gekruisig is, was op 'n bordjie aan die kruis geskrywe: “Die koning van die Jode.”

27Saam met Hom het hulle ook twee rowers gekruisig, een regs en een links van Hom.

29Die mense wat daar verbygeloop het, het Jesus gelaster. Hulle het die kop geskud en gesê: “Toe, jy wat die tempel afbreek en in drie dae weer opbou! 30Red jouself en kom van die kruis af.”

31Net so het die priesterhoofde en die skrifgeleerdes ook spottend vir mekaar gesê: “Ander het hy gered; homself kan hy nie red nie! 32Laat die Christus, die koning van Israel, nou van die kruis af kom, sodat ons dit kan sien en in hom glo!”

Die twee wat saam met Hom gekruisig is, het Hom ook beledig.

Jesus sterwe

33Teen twaalfuur die middag het daar duisternis oor die hele land gekom en dit het tot drie-uur geduur. 34Om drie-uur het Jesus hard uitgeroep: “Eloï, Eloï, lemá sabagtani?” Dit beteken: My God, my God, waarom het U My verlaat?

35Toe party van die mense wat daar naby gestaan het, dit hoor, sê hulle: “Hoor daar, hy roep vir Elia.”

36Een van hulle het toe gehardloop, 'n spons in suur wyn gesteek en dit vir Hom op 'n stok gehou om te drink. Hy het gesê: “Wag, kom ons kyk of Elia hom van die kruis kom afhaal.”

37Daarna het Jesus hard uitgeroep en die laaste asem uitgeblaas.

38Die voorhangsel in die tempel het van bo tot onder middeldeur geskeur.

39Toe die offisier, wat reg voor Jesus gestaan het, Hom die laaste asem só sien uitblaas het, het hy gesê: “Hierdie man was werklik die Seun van God.”

40Daar het ook vroue op 'n afstand gestaan en kyk. Onder hulle was Maria Magdalena en Maria die moeder van Klein-Jakobus en Joses, en Salome. 41Toe Jesus nog in Galilea was, het hulle oral saam met Hom gegaan en Hom versorg. Baie ander vroue wat saam met Hom na Jerusalem toe gekom het, was ook daar.

MARKUS 15:21-41AFR83Maak oop in die Bybelleser

Vrydag was die dag voor die Joodse paasfees. Markus beskryf die gebeure in drie fases. Jesus is die derde uur gekruisig, dit beteken negeuur die oggend. Waarskynlik die grootste gebeurtenis wat elke mens se lewe bewustelik of onbewustelik raak, word buitengewoon eenvoudig beskryf met Toe kruisig hulle Hom… (Mark 15: 24). Die aanklag teen Hom was boaan die kruis geskryf, naamlik dat Hy die koning van die Jode is. Dit is raar dat die Jode daarteen beswaar gemaak het, maar dat dit ’n nie-Jood was – Pilatus – wat die klag laat aanbring het. Toe dit die sesde uur word, om twaalfuur dus, het dit oor die hele aarde donker geword, en op die negende uur, drieuur die middag, het Jesus uitgeroep: Eloï, Eloï, lemá sabagtani? Dit beteken: My God, my God, waarom het U My verlaat? Toe het Hy gesterf. Verder het die voorhangsel van die heiligdom in die tempel in twee geskeur, van bo na onder.

Jesus se uitroep is ’n aanhaling uit Psalm 22. In die verlede is dié woorde van Jesus gewoonlik verstaan as die verwoording van sy mensheid, sy benoudheid. Tog is ’n meer aanvaarbare verklaring dat Jesus uit die Psalm aanhaal om sy omstanders daarop te wys dat die toonaard van die Psalm verander. Dit eindig in ’n danklied as lofuiting omdat God op die noodroep van die Psalmdigter antwoord (Ps 22: 23-32). Daarmee het Jesus aan die omstanders en sodoende aan die hele wêreld getoon dat die kruis tekenend van die woede van die weerbarstige wêreld was, maar dat God se wil nie deur die woede van die wêreld aan bande gelê word nie.

Dit is merkwaardig dat nie ’n Jood, ’n skrifgeleerde of ’n Fariseër nie, maar ’n Romeinse offisier die waarheid, die hartslag van die evangelie, verkondig met sy opmerking: Waarlik, hierdie man was die Seun van God! (Mark 15: 39, NDV). Dit is die uitdaging: Jesus het die kruis in oorwinning omskep. Dit is vir elke gelowige sedertdien die waarborg en troos: Jesus het die laaste woord!

Dr Barry van Wyk, Emeritus/Waterberg/Zoutpansberg

Bible Society of South Africav.4.26.9
VOLG ONS