Bible Society of South Africa
Leesplanne
Dagboek 2021
Dagboek 2021 – 11 Julie

Dagboek 2021 – 11 Julie

Ek glo in die Heilige Gees

Bybelteks(te)

1 JOHANNES 5

Liefde en geloof

1Elkeen wat glo dat Jesus die Christus is, is 'n kind van God; en elkeen wat vir die Vader liefhet, het ook die ander lief wat kinders van die Vader is. 2Hiéraan weet ons dat ons die kinders van God liefhet: wanneer ons God liefhet en sy gebooie onderhou. 3Die liefde vir God bestaan dan daarin dat ons sy gebooie gehoorsaam. Sy gebooie is ook nie moeilik om te gehoorsaam nie, 4want enigeen wat 'n kind van God is, kan die sondige wêreld oorwin. En die oorwinning wat ons oor die wêreld behaal het, is deur ons geloof. 5Wie anders is dit wat die wêreld oorwin as hy wat glo dat Jesus die Seun van God is?

Die getuienis oor Jesus Christus

6Die Een wat deur die water van sy doop en die bloed van sy dood na ons toe gekom het, is Jesus Christus; nie net deur die water nie, maar deur die water én die bloed. Die Gees is die getuie daarvan, en die Gees is die waarheid. 7Daar is dus drie wat getuig: 8die Gees en die water en die bloed, en die drie se getuienis stem ooreen. 9Ons aanvaar mense se getuienis, hoeveel te meer die getuienis van God, want dit is God wat getuig, en die getuienis handel oor sy Seun. 10Wie in die Seun van God glo, besit die getuienis in sy hart; wie God nie glo nie, maak Hom tot leuenaar, omdat hy nie die getuienis glo wat God oor sy Seun gelewer het nie. 11En die getuienis behels dít: God het ons die ewige lewe gegee, en dié lewe is deur sy Seun. 12Wie die Seun het, het die lewe; wie nie die Seun van God het nie, het ook nie die lewe nie.

Die doel van die brief

13Hierdie brief skrywe ek vir julle, sodat julle kan weet dat julle die ewige lewe het, julle wat in die Seun van God glo.

1 JOHANNES 5:1-13AFR83Maak oop in die Bybelleser

Ons bely elke Sondag in die erediens: Ek glo in die Heilige Gees. Die Heidelbergse Kategismus behandel hierdie geloofsartikel oor die Heilige Gees in Vraag 53:

Wat glo jy van die Heilige Gees?

Eerstens, dat Hy saam met die Vader en die Seun waaragtig en ewig God is. Tweedens, dat Hy ook aan my gegee is, sodat Hy my (a) deur ’n ware geloof deel laat kry aan Christus en al sy weldade, (b) my troos en (c) ewig by my bly.

Om hierdie formulering te staaf, verwys die Kategismus onder andere na 1 Johannes 5, die gedeelte wat ons vandag gelees het. In die antwoord van die Kategismus leer ons eerstens dat die Heilige Gees saam met die Vader en die Seun één God is. Dit is opvallend dat die Kategismus nie oor die Drie-eenheid filosofeer nie. Dit word op grond van die Bybel gestel dat God Homself as Vader, Seun en Heilige Gees aan ons openbaar.

Dikwels is die dinge wat ons nie sê nie, belangriker as dit wat ons wel sê. Wanneer ons oor die Persoon van God praat, is dit veral waar. Hoe minder ons sê, hoe beter. Juis omdat God so anders as ons is, so totaal anders as wat ons met ons menslike verstand en vermoëns kan uitredeneer, moet ons baie beskeie wees wanneer ons oor die Drie-enige God en die Heilige Gees praat. Moses het dit in die woestyn ontdek toe hy vra wie God is. Hy moes tevrede wees met ’n kort antwoord: Ek is.

Dit is opmerklik hoe beskeie en terughoudend die Heidelbergse Kategismus is wanneer daar oor die Heilige Gees gepraat word. Ons bely gewoon: Ek glo in die Heilige Gees. Dit is asof die Kategismus terugdeins voor die misterie van God en erken dat die menslike verstand en logika God nie kan verklaar nie. Dit maak geloof anders as kennis: Geloof is bereid om God te aanvaar vir wie Hy is, om God te vertrou vir wie Hy is.

Gesang 431: 1

Prof Wim Dreyer, Universiteit van Pretoria

Bible Society of South Africav.4.26.9
VOLG ONS