Jakin en Boas

Jakin en Boas is die name van die twee bronspilare in die tempel van Salomo. Hulle het by die ingang van die tempel gestaan. Jakin was aan die regterkant, en Boas was aan die linkerkant. Die pilare is deur die kopersmid in bronswerk, Hiram, gemaak.

Die pilare word in 1 Konings 7:15-22 beskryf. Elke pilaar was omtrent 8,3 meter hoog met ʼn omtrek van omtrent 5,5 meter. Bo-op is die pilare versier met omtrent 2,3 meter hoë kapitele in die vorm van blomkelke. Die kapitele is nog verder versier met gevlegte kettingwerk en rye granate.

Die twee pilare was daar om die grootsheid van die tempel te vertoon, wat duidelik word uit hulle name: die woord Boas is die Hebreeus vir “in Hom is sterkte”, en Jakin beteken “Hy sal oprig” in Hebreeus. Beide woorde word dikwels gebruik om God te beskryf, soos in Psalm 93:1.

Volgens 2 Konings 25:13 en Jeremia 52:17 het koning Nebukadnesar die tempel in Jerusalem in 586 v.C. met al sy bronsvoorwerpe, insluitende die pilare, verwoes. Hy het die brons na Babilonië toe teruggeneem. Dit was die begin van die Babiloniese ballingskap.