To The Word – Day 72

₂Nke o nkatle leboelela,

gobane lerato la gago le phala beine ka bose.

₃Senkgabose sa gago se a ratega;

wena o senkgabose se se tšhologilego.

Ke ka lebaka leo o ratwago ke makgarebe.

₄Ntšee, re kitime mmogo.

Kgoši, nkiše ka diphapošing tša gago.

A re hlalale re thabe mmogo,

re rete rato la gago go phala beine.

Ga go makatše ge o ratwa ke makgarebe ohle!

₅Lena makgarebe a Jerusalema,

nna le ge ke fifaditšwe ke letšatši ke botse;

ke fifetše wa mešaša ya Kedara,

eupša ke botse wa diširo tša ga Solomone.

₆Se nkgeruleleng go fifala ga ka ge ke fifaditšwe ke letšatši.

Dikgaetšedi tša ka di be di dula di nkgalefetše,

di ntlhokomediša dirapa tša merara,

mme nako ya go hlokomela sa ka serapa,

ke ra nako ya go itlhokomela, nnamong,

ke e hloka.

₇Mpotše, hle, wena ke go ratago ratirati,

mo o fudišago dihuswane tša gago,

mo o di robatšago gona mosegare.

Ke reng ke swanetše go ebela le mehlape ya badiša ba bangwe ke go nyaka?

₈Ge o sa go tsebe,

wena wa go phala basadi bohle ka botse,

sepela o latele dihuswane;

diša dihuswanyana tša gago

merakeng ya badiša.

₉Wena, moratiwa,

go nna o etša pere ya tshadi

ge e kitimiša dipere tša dipoo madi,

dipere tša dikoloi tša Farao tša ntwa.

₁₀Dithama tša gago di kgabišitšwe ke mangina,

molala wa gago o kgabišwe ke dipheta.

₁₁Rena re tla go direla mangina a gauta a a kgabišitšwego ka dipheta tša silibera.

₁₂E tla re ge kgoši a sekame bosekamong,

gwa kwagala monkgo wa senkgabose sa ka.

₁₃Moratiwa wa ka o nkga bose bjalo ka mira

ge a patlame kgareng ya ka.

₁₄Moratiwa wa ka o nkga bose go swana le matšoba

ge a khukhuša ka dirapeng tša merara tša Engedi.

₁₅Na o botse bjang, moratiwa, o botse bjang!

Mahlo a gago ga se ka go taga

bjalo ka a leeba!

₁₆Yo mobotse ke wena, moratiwa;

o nkgahla e le ruri!

Re patlame bjanyengbotala;

₁₇mesedere ke dikota tša ntlo ya rena,

mephaene ke mahlomo a rena.

₁Ke nna tšoba la naga mo Sharone,

ke nna tšoba la molapo.

₂Moratiwa wa ka gare ga makgarebe

nke ke letšoba gare ga meetlwa.

₃Moratiwa wa ka gare ga masogana

o etša moapola gare ga mehlare ya sethokgwa.

Ke ipshina ka go dula moriting wa mohlare wo,

le dikenywa tša wona di a ntsefela.

₄O ntlišitše ntlong ya menyaka,

a mpea pelo ka lerato la gagwe.

₅Ntapološeng ka makwapi a diterebe,

le mmaatlafatšeng ka diapola,

gobane ke lwatšwa ke lerato.

₆O nthekgile hlogo ka la nngele,

gomme ka la go ja o nkgokere.

₇Nkaneleng ka ditshephe le dikgama,

lena makgarebe a Jerusalema,

gore le ka se re tutuetše go ratana –

rena re tla ratana ka borena.

₈Theeletšang!

Ke kwa lentšu la moratiwa wa ka.

Šolee! O tla a taboga kua dithabeng,

a tshela le mebotong!

₉Moratiwa wa ka nke ke tshephe,

o swana le kgamana.

Šolee! O eme ka morago ga morako.

O hlodimela ka lefasetere,

o leka go lebelela ka seširo.

₁₀Moratiwa wa ka o bolela le nna.

Emelela, hle, moratiwa;

masebotsana wa ka, etla.

₁₁Marega a fetile, dipula di khudile,

di iketše.

₁₂Kua nageng matšoba a thuntše.

Nako ya go opela e fihlile,

le nageng ya rena go lla mekuru.

₁₃Mago a thoma go butšwa;

matšoba a merara a nkgiša moya bose.

Emelela, hle, moratiwa;

masebotsana wa ka, etla.

₁₄O swana le leeba le le khutago

ka mphatšeng.

Nke ke bone sebopego sa gago

se sebotsana,

ke kwe lentšwana la gago

le lebosana.

₁₅Re tanyetšeng diphukubje,

diphukubjana tšela di re senyetšago

dirapa tša merara,

gobane merara ya rena e thuntše.

₁₆Moratiwa wa ka ke wa ka,

le nna ke wa gagwe.

O thabišwa ke ge a le gare ga matšoba

₁₇go fihlela phefšana ya masa e foka,

mme leswiswi le apoga.

Boa, moratiwa wa ka, o etše tshephe,

o swane le kgamana

dithabeng tša maswika a magolo.

₁Pele ge ke robetše bošego

ke be ke lora yo ke mo ratago,

ke lora ke mo nyaka,

ke sa mmone.

₂Ke lora ke tsoga borokong ke thetha

le motse,

ke ralala le mekgotha le mapatlelo,

ke nyaka yo ke mo ratago;

ke mo nyaka,

fela ke sa mmone.

₃Baleti ba motse ba ba sepelago le wona ba gahlana le nna.

Ka ba botšiša ka re:

“Na ga se la bona moratiwa wa ka?”

₄Ge ke seno tloga go bona ka mo hwetša.

Ka mo swara ka se mo lese,

go fihlela ke mo iša go mma ka ntlong,

ka phapošing ya yo a mpelegego.

₅Nkaneleng ka ditshephe le dikgama,

lena basadi ba Jerusalema,

gore le ka se re tutuetše go ratana –

rena re tla ratana ka borena.

₆Ke eng sela se tšwago lešokeng

nke ke mokubega wa muši,

se nkgago bose bja mira le bja seorelo,

le bja dinkgabose tša mehutahuta tša go rekišwa ke babapatši?

₇Ke Solomone o tla a rwelwe ka setulo sa gagwe sa bogoši;

bahlabani ba masometshela ke bona baleti ba gagwe,

ke ba bangwe ba bagalegale mo Israele.

₈Bohle ke bakgoni ba tšhoša;

ke batsebi ba ntwa.

Mongwe le mongwe o itlhamile ka tšhoša,

ba itokišeditše go lwantšha bahlasedi ba bošego.

₉Kgoši Solomone o rwelwe ka setulo sa gagwe sa bogoši

se a laetšego gore a se direlwe ka dikota tša sethokgwa sa Lebanone.

₁₀Dikota tša go thekga tlhaka ya sona di manegilwe ka silibera;

boithekgo bja sona bo manegilwe ka gauta;

mosamelo wa sona o apešitšwe lešela la bohwibidu bja moretele.

Bokagare bja sona bo kgabišitšwe gabotse ke makgarebe a Jerusalema,

e le sešupo sa lerato la bona.

₁₁Lena basadi ba Sione,

etlang le bone Kgoši Solomone.

O rwele mphapahlogo wo a o rwešitšwego ke mmagwe tšatšing lela a nyala,

mohlang wola a nyakaletše.

₁Na o botse bjang, moratiwa,

o botse bjang!

Mahlo a gago ga se ka go taga ka lešireng la gago,

a etša a leeba!

Moriri wa gago o tlolatlola bjalo ka mohlape wa dipudi ge o theoga thabeng ya Gileade.

₂Meno a gago a šweufetše bjalo ka dinku tše di sa tšogo kotwa tša hlapišwa.

A bapetše ka go lekanela, ga go le le kgolegilego.

₃Dipounama tša gago di swana le thapo ye khwibidu;

molomo wa gago ga se ka botse.

Dithama tša gago ka lešireng

di swana le bokagare bja garenate.

₄Molala wa gago nke ke tora ya Dafida

ye e agilwego ka go hlatlaganya maswika;

pheta ya gago e etša dikotse tše sekete tše di leketlago toreng yeo,

e le tša bagale.

₅Matswele a gago ka mabedi a swana le dikgamana tša mafahla

tše di fulago gare ga matšoba.

₆Ke tla dula thabeng ya mira,

gona mmotong wa seorelo,

go fihlela phefšana ya masa e foka,

le leswiswi le apoga.

₇O botse mo gohle, moratiwa,

ga go mo o hlaelelwago gona.

₈A re tloge mo dithabeng tša Lebanone,

hle, mmeeletšwa wa ka;

a re tloge mo Lebanone.

Theoga ntlhoreng ya thaba ya Amana,

ntlhoreng ya Senire le ya Hermone,

matšabeng a ditau,

thabeng tša dinkwe.

₉O nkutswitše pelo, moratiwa, mmeeletšwa wa ka,

o nkutswitše pelo ka go nkgadima,

le ka pheta e tee ya moruka wa gago.

₁₀Lerato la gago le nkgahla kudu,

moratiwa, mmeeletšwa wa ka.

Lerato la gago le phala beine ka bose;

monkgo wa senkgabose sa gago o phala wa ditlolo tšohle.

₁₁Mmeeletšwa wa ka, dipounama tša gago di rotha todi;

leleme la gago nke ke todi le maswi.

Diaparo tša gago di nkga bose wa dimela tša Lebanone.

₁₂Moratiwa, mmeeletšwa wa ka,

ke serapana se se tswaletšwego,

ke serapana sa legora, mothopo wo o ageleditšwego.

₁₃Mahlogedi a gago nke tšhemo ya megarenate

ye e enywago dikenywa tše dibosebose.

Hena le narete di mela gona,

₁₄le safrone le kalamose le sinamone,

le dimela tša mehutahuta tša diorelo,

le tša mira le tša dikgopha,

le tše dingwe tša go dira ditlolo tše dibotse kudu.

₁₅Wena o mothopo wa go nošetša dirapa,

o sediba sa meetse a a elago,

o moela wo o phororago thabeng tša Lebanone.

₁₆Tsoga, wena phefo ya leboa!

Etla, wena phefo ya borwa!

Fokang ka serapaneng sa ka,

le phatlalatše monkgo wa sona wo mobose.

Moratiwa wa ka a a tle ka serapaneng sa gagwe,

a je dikenywa tše dibosebose.

₁Ke tlile serapaneng sa ka, moratiwa,

mmeeletšwa wa ka.

Ke kga mira wa ka le dinoko;

ke ja mamapo le todi ya ka;

ke nwa beine ya ka le maswi.

Ejang, bagwera, le nweng,

le phonkgele maratong!

₂Le ge ke be ke robetše pelo yona e be e hlobaela,

ka kwa moratiwa a kokota.

Mpulele, moratiwa, leebana la ka,

wena wa lebopo le le se nago bosodi.

Hlogo ya ka e wetšwe ke phoka,

le leetse la ka le boeditšwe

ke monola wa bošego.

₃Ke šetše ke apotše;

o ra gore ke boele ke apare?

Ke šetše ke hlapile maoto;

o ra gore ke a tšhilafatše gape?

₄E rile ge moratiwa a tsenya seatla lešobeng la lebati,

pelo ya ka ya thebatheba ka lethabo.

₅Ka tsoga ke re ke yo mmulela.

Diatla tša ka tša rotha mira,

wa elela menwaneng, o etšwa mokgokong

wa sekgonyo sa lebati.

₆Ka bulela moratiwa wa ka,

fela ya ba o tlogile, o ile.

Ke be ke mo thabetše mola a bolela.

Ka yo mo nyaka, fela ka mo hloka;

ka mmitša, a se nkarabe.

₇Ka bonwa ke baleti ba motse ge ba o potologa;

ba nkeketa ba nkgobatša;

baleti bao ba morako ba nkamoga tšajana ya ka.

₈Lena basadi ba Jerusalema,

nkaneleng gore ge le ka bona moratiwa wa ka,

le tla mmotša gore ke lwatšwa ke lerato.

₉Na moratiwa wa gago o phala bangwe ka eng,

wena wa go phala basadi bohle ka botse?

Moratiwa wa gago o phala bangwe ka eng,

ge o re re go anele bjalo?

₁₀Moratiwa wa ka o edile sefahlego,

o phedile gabotse;

o phala ba diketekete.

₁₁Sefahlego sa gagwe ke sa mmala wa mphiri,

se boreledi;

moriri wa gagwe ke leetse, wa boso bja legokobu.

₁₂Mahlo a gagwe a taga bjalo ka a maeba dinokaneng tše di elago,

maeba a a hlapišwago ka lebese a eme kgauswi le mothopo wa meetse a mantši.

₁₃Dithama tša gagwe di nkga bose bjalo ka serapa sa dinoko.

Dipounama tša gagwe nke ke matšoba,

di rotha mira.

₁₄Matsogo a gagwe a bopegile,

o apere maseka

a a kgabišitšwego ka magakabje.

Mmele wa gagwe o botse boka nakatlou ye e tlokilwego ka mabenyabje.

₁₅Maoto a gagwe ke dikokwane tša mmabole tše di hlometšwego mekotianeng ya gauta ye e sego ya tswakwa.

O bopegile wa dithaba tša Lebanone tša mesedere ye e letlilego.

₁₆Molomo wa gagwe o ntsefela kudu ge ke mo atla,

gomme tšohle tša gagwe di a dumiša.

Lena makgarebe a Jerusalema, moratiwa wa ka,

yena mogwera wa ka, o bjalo.

₁Hee, wena wa go phala basadi bohle ka botse,

moratiwa wa gago o ile kae?

Re botše tsela ye a tšerego ka yona,

gore re tle re go nyakiše yena.

₂Moratiwa wa ka o ile serapeng sa gagwe

moo go nago le dimelana tša dinoko,

go ya go thaba gona le go kga matšoba.

₃Nna ke wa moratiwa wa ka,

moratiwa wa ka le yena ke wa ka.

O thabišwa ke ge a le gare ga matšoba.

₄Hee, moratiwa, o botse bjalo ka motse wa Tirtsa,

o botse go etša wa Jerusalema,

wa go gakgamatša boka madira a a swerego difoka.

₅Tlogela go ntebelela,

gobane o a nkgakantšha.

Moriri wa gago o tlolatlola bjalo ka mohlape wa dipudi

ge o theoga thabeng ya Gileade.

₆Meno a gago a šweufetše bjalo ka dinku tša ditshadi tše di sa tšogo hlapišwa.

Ka moka a bapetše ka go lekanela,

ga go le le kgolegilego.

₇Dithama tša gago ka lešireng nke bokagare bja garenate.

₈Le ge bahumagadi ba kgoši e le ba masometshela,

metlabo e le ye masomeseswai, mathari e le a a sa balwego,

₉nna wa ka ke o tee;

ke yena leebana la ka,

yena wa lebopo le le se nago bosodi.

Ke morwedi a le tee wa mmagwe,

ke yena mmamoratwe wa mmagwe.

Mathari ge a mmona a re ke yo lehlogonolo,

bahumagadi le metlabo ya kgoši ba a mo reta.

₁₀Ke mang yo wa go tšwelela bjalo ka masa?

O botse go swana le ngwedi,

o taga go etša letšatši,

o gakgamatša boka madira a a swerego difoka.

₁₁Ke theogetše mono serapeng sa mehlare ya dikoko,

ka tlo bona mahlogedi ka moeding,

ka tlo bona ge merara e khukhuša,

le megarenate ge e thunya.

₁₂Ke rile ke sa itebetše ka ikwa nke ke nametše koloi ya Aminadibe ya ntwa.

₁Retologa, retologa,

kgarebe ya Shulamo,

retologa, retologa,

gore re go bogele!

Le reng le nyaka go mpogela ke bina

ka gare ga melokoloko ye mebedi ya dibini?

₂Wena kgarebe la mošate,

nao tša gago ga se ka botse ge o apere dieta,

le matheka a gago a botse boka lebenyabje le le dirilwego ke sethakga.

₃Mokhubo wa gago e dio ba sebjana sa nkgokolwana

se se sa kgarihlwego beine ya leno.

Mpana ya gago nke mokgobo wa mabele

wo o dikaneditšwego ke matšoba.

₄Matswele a gago ka mabedi a swana le dikgamana tša mafahla.

₅Molala wa gago e dio ba tora ya nakatlou.

Mahlo a gago a etša megobe ya motse wa Heshbone,

ya kgauswi ga lesoro la Bate-Rabime.

Nko ya gago nke tora ye e lego godimo ga Lebanone,

ye e lebanego le Damaskose.

₆Hlogo ya gago e leletše go etša thaba ya Karmele.

Leetse la gago le tsetsema bjalo ka lešela la bohwibidu bja moretele;

botse bja lona bo goka kgoši.

₇O yo mobotse, moratiwa,

o nkgahla e le ruri, wena mmalethabo!

₈Seemo sa gago ke sa mopalema,

matswele a gago nke dintšhuhlana tša dikenywa tša wona.

₉Ke ile ka gopola gore ke namele mopalema woo

ke sware dintšhuhlana tšeo.

Matswele a gago go nna a a be bjalo ka dintšhuhlana tša diterebe,

lehema la gago e be monkgo wo mobose wa diapola,

₁₀gomme molomo wa gago e be beine ye bosebose.

Beine yeo e ele bosele e etšwa dipounameng tša ka le menong,

e elele go moratiwa wa ka.

₁₁Nna ke wa moratiwa wa ka,

gomme o duma go mphopholaphophola.

₁₂Etla, moratiwa, re ye lešokeng,

re lale re le kua matšobeng.

₁₃Re tsogele dirapeng tša merara,

re yo bona ge merara e khukhuša,

goba e paleša,

le ge megarenate e thunya.

Ke gona mo ke tlago go bontšha gore ke a go rata.

₁₄Go kwagala monkgo wa dikenywa tša moratišo,

le dikenywa tše dibosebose,

tša mongwaga le tša ngwagola,

di mo kgauswi le ga gešo.

Ke go beetše tšona, moratiwa.

₁Nke nkabe o le kgaetšedi ya ka ye e nyantšego letswele la mma.

Gona ke be nka re ge ke kopana nago,

ka go atla mme ka se solwe ke motho.

₂Ke be ke tla go iša lapeng la mma,

mo o bego o tla nthuta tša lerato.

Ke be ke tla go fa beine ya leno,

le matutu a digarenate tša ka,

gore o nwe.

₃O nthekgile hlogo ka la nngele,

gomme ka la go ja o nkgokere.

₄Nkaneleng, lena makgarebe a Jerusalema,

gore le ka se re tutuetše go ratana –

rena re tla ratana ka borena.

₅Ke mang yo wa go tšwa lešokeng

a ithekgile ka moratiwa wa gagwe?

Ke go tsošitše o le ka fase ga moapola

moo mmago, yena motswadi wa gago,

a ilego a thoma go šokwa a le gona.

₆Nkapare molaleng goba monwaneng

bjalo ka papetlana ya go šupetša gore ke wa gago,

gobane lerato le ne maatla, le etša lehu;

tumo ga e ne kwelobohloko, e swana le bodulabahu.

Lerato ke mollo wo o laumago kgabo,

le tuka bjalo ka mollo wo o galefilego.

₇Maphaaphaa a meetse a ka se le time,

le tšona dinoka di ka se le tšee.

Le ge motho a ka re o le reka ka mahumo ohle a gagwe,

o tla nyatšwa kudu.

₈Re na le kgaetšedinyana,

ke gona e thoka matswele.

Na re mo direle eng mohla a gokwa ke masogana?

₉Ge a ka ikageletša ka morako,

re tla o hlomela sekgabišo sa silibera;

eupša ge a ka etša lesoro le le ahlamego,

re tla le pheka ka diphaphathi tša mesedere.

₁₀Nna ke morako,

matswele a ka ke ditora tša wona;

ka gona moratiwa wa ka o mpona

ke le wa go mo kgotsofatša.

₁₁Solomone o be a na le serapa sa merara kua Baale-Hamone.

A se hirišetša bahlokomedi,

mohiri ka hlogwana a lefa papetlana tše sekete tša silibera, a lefela tše a di bunnego.

₁₂Serapa sa ka, sa ka tiitii, se re nna wee!

Wena, Solomone, o ka no itshwarela dipapetlana tšeo tša gago tše sekete,

le bahlokomedi ba itshwarela tša bona tše makgolo a mabedi.

₁₃Wena, modulakaserapeng,

bagwera ba ka ba nyaka go go kwa o bolela;

a ke kwe lentšu la gago!

₁₄Kitima, moratiwa, o etše tshephe,

o swane le kgamana dithabeng tša dinoko.