SEFELA SA DIFELA 5

₁Ke tlile serapaneng sa ka, moratiwa,

mmeeletšwa wa ka.

Ke kga mira wa ka le dinoko;

ke ja mamapo le todi ya ka;

ke nwa beine ya ka le maswi.

Ejang, bagwera, le nweng,

le phonkgele maratong!

₂Le ge ke be ke robetše pelo yona e be e hlobaela,

ka kwa moratiwa a kokota.

Mpulele, moratiwa, leebana la ka,

wena wa lebopo le le se nago bosodi.

Hlogo ya ka e wetšwe ke phoka,

le leetse la ka le boeditšwe

ke monola wa bošego.

₃Ke šetše ke apotše;

o ra gore ke boele ke apare?

Ke šetše ke hlapile maoto;

o ra gore ke a tšhilafatše gape?

₄E rile ge moratiwa a tsenya seatla lešobeng la lebati,

pelo ya ka ya thebatheba ka lethabo.

₅Ka tsoga ke re ke yo mmulela.

Diatla tša ka tša rotha mira,

wa elela menwaneng, o etšwa mokgokong

wa sekgonyo sa lebati.

₆Ka bulela moratiwa wa ka,

fela ya ba o tlogile, o ile.

Ke be ke mo thabetše mola a bolela.

Ka yo mo nyaka, fela ka mo hloka;

ka mmitša, a se nkarabe.

₇Ka bonwa ke baleti ba motse ge ba o potologa;

ba nkeketa ba nkgobatša;

baleti bao ba morako ba nkamoga tšajana ya ka.

₈Lena basadi ba Jerusalema,

nkaneleng gore ge le ka bona moratiwa wa ka,

le tla mmotša gore ke lwatšwa ke lerato.

₉Na moratiwa wa gago o phala bangwe ka eng,

wena wa go phala basadi bohle ka botse?

Moratiwa wa gago o phala bangwe ka eng,

ge o re re go anele bjalo?

₁₀Moratiwa wa ka o edile sefahlego,

o phedile gabotse;

o phala ba diketekete.

₁₁Sefahlego sa gagwe ke sa mmala wa mphiri,

se boreledi;

moriri wa gagwe ke leetse, wa boso bja legokobu.

₁₂Mahlo a gagwe a taga bjalo ka a maeba dinokaneng tše di elago,

maeba a a hlapišwago ka lebese a eme kgauswi le mothopo wa meetse a mantši.

₁₃Dithama tša gagwe di nkga bose bjalo ka serapa sa dinoko.

Dipounama tša gagwe nke ke matšoba,

di rotha mira.

₁₄Matsogo a gagwe a bopegile,

o apere maseka

a a kgabišitšwego ka magakabje.

Mmele wa gagwe o botse boka nakatlou ye e tlokilwego ka mabenyabje.

₁₅Maoto a gagwe ke dikokwane tša mmabole tše di hlometšwego mekotianeng ya gauta ye e sego ya tswakwa.

O bopegile wa dithaba tša Lebanone tša mesedere ye e letlilego.

₁₆Molomo wa gagwe o ntsefela kudu ge ke mo atla,

gomme tšohle tša gagwe di a dumiša.

Lena makgarebe a Jerusalema, moratiwa wa ka,

yena mogwera wa ka, o bjalo.