SEFELA SA DIFELA 8

₁Nke nkabe o le kgaetšedi ya ka ye e nyantšego letswele la mma.

Gona ke be nka re ge ke kopana nago,

ka go atla mme ka se solwe ke motho.

₂Ke be ke tla go iša lapeng la mma,

mo o bego o tla nthuta tša lerato.

Ke be ke tla go fa beine ya leno,

le matutu a digarenate tša ka,

gore o nwe.

₃O nthekgile hlogo ka la nngele,

gomme ka la go ja o nkgokere.

₄Nkaneleng, lena makgarebe a Jerusalema,

gore le ka se re tutuetše go ratana –

rena re tla ratana ka borena.

₅Ke mang yo wa go tšwa lešokeng

a ithekgile ka moratiwa wa gagwe?

Ke go tsošitše o le ka fase ga moapola

moo mmago, yena motswadi wa gago,

a ilego a thoma go šokwa a le gona.

₆Nkapare molaleng goba monwaneng

bjalo ka papetlana ya go šupetša gore ke wa gago,

gobane lerato le ne maatla, le etša lehu;

tumo ga e ne kwelobohloko, e swana le bodulabahu.

Lerato ke mollo wo o laumago kgabo,

le tuka bjalo ka mollo wo o galefilego.

₇Maphaaphaa a meetse a ka se le time,

le tšona dinoka di ka se le tšee.

Le ge motho a ka re o le reka ka mahumo ohle a gagwe,

o tla nyatšwa kudu.

₈Re na le kgaetšedinyana,

ke gona e thoka matswele.

Na re mo direle eng mohla a gokwa ke masogana?

₉Ge a ka ikageletša ka morako,

re tla o hlomela sekgabišo sa silibera;

eupša ge a ka etša lesoro le le ahlamego,

re tla le pheka ka diphaphathi tša mesedere.

₁₀Nna ke morako,

matswele a ka ke ditora tša wona;

ka gona moratiwa wa ka o mpona

ke le wa go mo kgotsofatša.

₁₁Solomone o be a na le serapa sa merara kua Baale-Hamone.

A se hirišetša bahlokomedi,

mohiri ka hlogwana a lefa papetlana tše sekete tša silibera, a lefela tše a di bunnego.

₁₂Serapa sa ka, sa ka tiitii, se re nna wee!

Wena, Solomone, o ka no itshwarela dipapetlana tšeo tša gago tše sekete,

le bahlokomedi ba itshwarela tša bona tše makgolo a mabedi.

₁₃Wena, modulakaserapeng,

bagwera ba ka ba nyaka go go kwa o bolela;

a ke kwe lentšu la gago!

₁₄Kitima, moratiwa, o etše tshephe,

o swane le kgamana dithabeng tša dinoko.