To The Word – Day 59

₁Joshua bjale o be a tšofetše kudu. Morena a re go yena: “O tšofetše kudu, eupša go sa na le naga ye kgolo ye e swanetšego go thopša: ₂naga ka moka ya Filistia le Geshure, ₃gotee le naga ka moka ya Baaba go ya borwa. Naga ya go tloga moetšaneng wa Shihore, mollwaneng wa Egepeta, go ya leboa go yo fihla mollwaneng wa Ekrone e be e tšewa gore ke ya Bakanana; babuši ba Bafilista ba be ba dula Gasa, Ashdode, Ashkelone, Gathe le Ekrone. ₄Go sa na le naga ya Bakanana ka moka, le Meara ye e lego ya Basidone, go fihla Afeke, mollwaneng wa Baamore; ₅naga ya Bagebale; naga ka moka ya Lebanone go ya bohlabela, go tloga Baale-Gade patogeng ya thaba ya Hermone, go ya sefateng sa Hamate. ₆Naga ye e akaretša naga ka moka ya Basidone, ba ba dulago nageng ya dithaba ya gare ga dithaba tša Lebanone le Misrefote-Maime. Nna ke tla leleka ditšhaba tše ka moka ge setšhaba sa Israele se goroga. O swanetše go arolela Baisraele naga ye, ka mo ke go laetšego ka gona. ₇Bjale ge, arolela dikgoro tše dingwe tše senyane le seripa sela se sengwe sa kgoro ya Manase, gore e be lefa la bona.”

₈Kgoro ya Rubene le ya Gade le seripa se sengwe sa kgoro ya Manase di be di šetše di hweditše naga ye Moshe, mohlanka wa Morena, a ilego a di fa yona; naga ye e be e le ka lehlakoreng la ka bohlabela la noka ya Jordane. ₉Naga ya bona e be e fihla kua Aroere, ka thoko ga moedi wa nokana ya Arnone, le motseng wa gare ga moedi, mme e akaretša molala ka moka go tloga Medeba go fihla Dibone. ₁₀E be e fihla mollwaneng wa Amone, gomme e akaretša metse ka moka ye e bego e bušwa ke Kgoši Sihone wa Baamore, yo a bego a buša a le Heshbone. ₁₁E be e akaretša Gileade, le dilete ka moka tša Geshure le Maaka, le thaba ya Hermone ka moka, le Bashane ka moka go yo fihla Salka. ₁₂E be e akaretša mmušo wa Ogo, yo a bego a kile a buša a le Ashtarote le Edrei. Ogo e be e le wa mafelelo wa Barafa. Moshe o be a fentše ditšhaba tše, mme a di lelekile nageng. ₁₃Le ge go le bjalo, Baisraele ba ile ba se ke ba leleka batho ba Geshure le ba Maaka; ba sa dula gare ga Baisraele le lehono.

₁₄Moshe o be a se a fa kgoro ya Lefi naga. Bjalo ka ge Morena a ile a botša Moshe, ba be ba tlile go amogela karolo ye e lego ya bona ya dihlabelo le dikabelo tše di bego di tlile go tšhumelwa Morena Modimo wa Israele aletareng.

₁₅Moshe o be a file dikgorwana tša kgoro ya Rubene seripa sa naga. ₁₆Naga ya bona e be e fihla Aroere, ka thoko ga moedi wa nokana ya Arnone, le motseng wa gare ga moedi, gomme e akaretša molala ka moka go fihla Medeba. ₁₇E be e akaretša Heshbone le metse ka moka ya moo molaleng: Dibone, Bamothe-Baale, Bethe-Baale-Meone, ₁₈Jahatse, Kedemote, Mefaate, ₁₉Kiriathaime, Sibma, Tserete-Shahare thabeng ye e lego molaleng, ₂₀Bethe-Peore, metheoga ya thaba ya Pisga, le Bethe-Jeshimote. ₂₁E be e akaretša metse ka moka ya molaleng, le mmušo ka moka wa Kgoši Sihone wa Baamore, yo a bego a kile a buša a le Heshbone. Moshe o ile a mo fenya, a fenya le babuši ba Midiane: Ebi, Rekeme, Tsure, Hure le Reba. Ka moka ga bona e be e le dintona tša Kgoši Sihone. ₂₂Gare ga bao setšhaba sa Israele se ba bolailego go be go le sedupe sela, Bileamo, morwa wa Beore. ₂₃Jordane e be e le mollwane wa ka bodikela wa kgoro ya Rubene. Yeo e be e le metse le metsana ye e ilego ya fiwa dikgorwana tša kgoro ya Rubene.

₂₄Moshe o be a file le dikgorwana tša kgoro ya Gade seripa sa naga. ₂₅Naga ya bona e be e akaretša Jasere le metse ka moka ya Gileade, le seripa sa naga ya Amone go yo fihla Aroere, ye e lego ka bohlabela bja Raba; ₂₆naga ya bona e be e tloga Heshbone e fihla Ramate-Mitsepa le Betonime, e tloga Mahanaime e fihla mollwaneng wa Lo-Dabare. ₂₇Ka moeding wa Jordane e be e akaretša Bethe-Haramo, Bethe-Nimra, Sukote le Safone, ke go re naga ye e šetšego ya mmušo wa Kgoši Sihone wa Heshbone. Mollwane wa bona wa ka bodikela e be e le noka ya Jordane go ya leboa go yo fihla letsheng la Genesarete. ₂₈Ye e be e le metse le metsana ye e bego e filwe dikgorwana tša kgoro ya Gade.

₂₉Moshe o be a file dikgorwana tša seripa sa kgoro ya Manase karolo ya naga. ₃₀Naga ya bona e be e fihla Mahanaime gomme e akaretša Bashane ka moka – mmušo wohle wa Ogo, kgoši ya Bashane, gotee le metse ye masome a a selelago, e lego metse ka moka ya Jaire kua Bashane. ₃₁E be e akaretša seripagare sa Gileade, e akaretša le Ashtarote le Edrei, le metse ya mmušo wa Ogo kua Bashane. Yona e ile ya fiwa seripagare sa dikgorwana tše di tšwilego go Makire, morwa wa Manase.

₃₂Ke ka moo Moshe a arotšego naga ya ka bohlabela bja Jeriko le Jordane ka gona kua melaleng ya Moaba. ₃₃Eupša Moshe o ile a se ke a arolela ba kgoro ya Lefi naga. Morena o ile a ba botša gore ya bona karolo ke seripa sa dihlabelo le dikabelo tše di fiwago yena Morena Modimo wa Israele.

₁Naga ya Kanana ka bodikela bja Jordane e ile ya arolelwa dikgoro tša Israele ka mokgwa wo: Moprista Eleasara le Joshua, morwa wa Nunu, le dihlogo tša malapa a dikgoro tša Baisraele ba ile ba arolela setšhaba naga. ₂Bjalo ka ge Morena a be a laetše Moshe, dinaga tša dikgoro tše senyane le seripa sa kgoro se tee sa ka bodikela bja Jordane di ile tša abja ka go dira matengwa. _3-4Moshe o be a šetše a aroletše dikgoro tšela tše dingwe tše pedi le seripa sela sa kgoro naga ya ka bohlabela bja Jordane. Ditlogolo tša Josefa di be di arotšwe dikgoro tše pedi, e lego Manase le Efraime. Le ge go le bjalo, Moshe ga se a arolela Balefi seripa se sengwenyana sa naga. Bakeng sa seo ba ile ba newa metse ye ba tlago dula go yona, le mafulo a dikgomo le dihuswane tša bona. ₅Setšhaba sa Israele se ile sa arola naga ka moo Morena a laetšego Moshe.

₆Ka letšatši le lengwe batho ba bangwe ba kgoro ya Juda ba ile ba tla go Joshua kua Gilgale. Kalebe, Mokenase, morwa wa Jefune, a re go yena: “O tseba se Morena a se boditšego Moshe, monna wa Modimo, kua Kadeshe-Barnea ka nna le wena. ₇Ke be ke na le mengwaga ye masome a mane ge Moshe, mohlanka wa Morena, a nthoma go tloga Kadeshe-Barnea go tlo hlola naga ye. Ke ile ka mmoela le pego ya ka mo ke bonego ditaba. ₈Banna ba ba bego ba ile le nna ba ile ba nola setšhaba moko. Eupša nna ke be ke botile Morena Modimo wa ka ka pelo ya ka yohle. ₉Ka ge ke dirile bjalo, Moshe o ile a nkenela gore nna le bana ba ka re tla fiwa naga yeo ke e sepetšego gore e be lefa la rena go ya go ile. ₁₀Fela bjale, bona. Ke mengwaga ye masome a mane a metšo ye mehlano ge Morena a boditše Moshe taba yeo. Ke mehleng yela Baisraele ba be ba sa putla lešoka, gomme Morena o mphedišitše go fihla bjale bjalo ka ge a boletše. Ntebelele! Ke na le mengwaga ye masome a seswai le metšo ye mehlano, ₁₁gomme le lehono ke sa na le maatla go no swana le mohlang wola Moshe a nthoma. Ke sa tiile mo e lego gore nka ya ntweng, goba ka dira se ke se ratago. ₁₂Bjale ge, mphe naga ye ya dithaba yeo Morena a nkholofeditšego yona ka letšatši lela rena le dihlodi tšela tše dingwe re begela Moshe tše re di bonego. Wena ka noši o bone gore morafe wa ditšitširipa wo o bitšwago Baanake o dula fao, metseng ye megolo ye e ageleditšwego ka merako. Mohlomongwe Morena o tla ba le nna mme ka ba leleka, bjalo ka ge a boletše.”

₁₃Joshua a šegofatša Kalebe, morwa wa Jefune, gomme a mo fa motse wa Hebrone. ₁₄Hebrone e sa le lefa la ditlogolo tša Kalebe, Mokenase, morwa wa Jefune, go fihla le lehono, ka gobane o ile a bota Morena Modimo wa Israele ka pelo ya gagwe ka moka. ₁₅Pele ga fao Hebrone e be e bitšwa motse wa Arba. Arba e be e le yena mohlomphegi yo mogolo gare ga Baanake.

Ka morago ga moo naga e ile ya lala.

₁Dikgorwana tša kgoro ya Juda di ile tša hwetša seripa se se latelago sa naga:

Naga yeo e be e eya borwa go fihla lešing la ka borwaborwa la lešoka la Tsine, mollwaneng wa Edomo. ₂Mollwane wo wa ka borwa o be o tloga magomong a ka borwa a Lewatle le le Hwilego, ₃o leba borwa go tloga Sefateng sa Diphepheng mme o fetela Tsine. O be o eya borwa bja Kadeshe-Barnea, o feta Hetserone go yo fihla Adara, o tepogela go leba Karka, ₄o fetela Atsmone, mme o latela nokana ya mollwaneng wa Egepeta, o eya Lewatleng la Mediteraniene, moo o bego o felela gona. Woo e be e le mollwane wa ka borwa wa Juda.

₅Mollwane wa ka bohlabela e be e le Lewatle le le Hwilego go ya godimo go yo fihla moo Jordane e tšhollelago meetse ka go lona.

Mollwane wa ka leboa o be o thoma moo ₆mme o leba Bethe-Hogla, o fetela leboa la Bethe-Araba. O be o rotogela letlapeng la Bohane, morwa wa Rubene, ₇o tloga Moeding wa Matshwenyego o eya Debire, mme o tepogela leboa go leba Gilgale, ye e lebanego le sefata sa Adumime ka thoko ya ka borwa ya leope. Go tloga moo o be o eya methopong ya Ene-Shemeshe, o tšwela pele go ya mothopong wa Rogele, ₈mme wa rotoga ka moedi wa Hinomo motheogeng wa ka borwa wa mmoto wo go wona go bego go le motse wa Bajebuse wa Jerusalema. Go tloga moo mollwane o be o tšwela pele o namelela godimo ga thaba ka lehlakoreng la ka bodikela la moedi wa Hinomo, kua magomong a ka leboa a molala wa Refaime. ₉Go tloga moo o be o eya methopong ya Neftoage mme o tšwela pele go ya metseng ye e lego kgauswi le thaba ya Efrone. Moo o be o tepoga go ya Baala, goba Kiriate-Jearime, ₁₀fao o dikologela bodikela bja Baala go ya nageng ya dithaba ya Edomo, wa tla ka metheogeng ya ka leboa ya thaba ya Jearime, goba Kesalone, go theoga go fihla Bethe-Shemeshe, mme wa tšwela pele wa feta Timna. ₁₁Fao mollwane o be o tšwela pele o leba metheogeng ye e lego ka leboa la Ekrone, wa tepogela go ya Shikarone, wa feta thaba ya Baala, mme wa fetela Jabne. O be o felela Lewatleng la Mediteraniene, ₁₂leo le bego le dira mollwane wa ka bodikela.

Batho ba dikgorwana tša Juda ba be ba dula ka gare ga mellwane yeo.

₁₃Bjalo ka ge Morena a be a laetše Joshua, seripa sa naga ya Juda se ile sa fiwa Kalebe, morwa wa Jefune. A abelwa Hebrone, motse wa Arba, tatagoAnake. ₁₄Kalebe o ile a raka ditlogolo tša Anake motseng woo – e lego kgorwana ya Sheshai, le ya Ahimane, le ya Talmai. ₁₅Go tloga moo a yo hlasela batho ba ba bego ba dula Debire. Motse wo o be o bitšwa Kiriate-Sefere. ₁₆Kalebe a re: “Monna yo a ka thopago Kiriate-Sefere ke tla mo neela morwedi wa ka, Aksa, gore e be mosadi wa gagwe.” ₁₇Otniele, morwa wa Kenase, ngwanaboKalebe, o ile a thopa motse woo. Ka gona Kalebe a mo neela Aksa, morwediagwe, gore e be mosadi wa gagwe. ₁₈Ge ngwetši e goroga mošašeng wa Otniele, yena a e tutuetša gore e kgopele tatagoyona tšhemo. Aksa a fologa pokolo, gomme Kalebe a mmotšiša gore o nyaka eng. ₁₉Yena a mo fetola a re: “Mphe mpho ya taelano. Ka ge karolo ye o mphilego yona e le nageng ye e omilego, mphe le methopo.” Ka gona Kalebe a mo fa methopo ya ka godimo le ya ka fase.

₂₀Še naga ye dikgorwana tša kgoro ya Juda di e amogetšego. ₂₁Metse ya ka borwaborwa ye e bego e le ya bona, ya kgauswi le Edomo, e be e le Kabtsiele, Edere, Jagure, ₂₂Kina, Dimona, Adada, ₂₃Kedeshe, Hatsore, Jitnane, ₂₄Sife, Teleme, Bealote, ₂₅Hatsore-Hadata, Keriote-Hetserone, goba Hatsore, ₂₆Amamo, Shema, Molada, ₂₇Hatsare-Gada, Heshmone, Bethe-Pelete, ₂₈Hatsare-Shuale, Beresheba le metsana ya yona, ₂₉Baala, Ijimi, Etseme, ₃₀Eltolade, Kesile, Horma, ₃₁Tsikelage, Madimana, Sansana, ₃₂Bethe-Lebaote, Shilehime, Aine le Rimone, ka moka e le metse ye masome a mabedi a metšo ye senyane, gotee le metsana ya yona.

₃₃Metse ye e lego nagengtlase e be e le Eshtaolo, Tsora, Ashna, ₃₄Sanoa, Ene-Ganime, Tapuage, Enaime, ₃₅Jarmute, Adulamo, Soko, Aseka, ₃₆Shaharaime, Aditaime, Gedera le Gederotaime, e le metse ye lesome le metšo ye mene, gotee le metsana ya yona.

₃₇Ye mengwe metse e be e le Tsenane, Hadasha, Migdale-Gade, ₃₈Dileane, Mitsepa, Jokotiele, ₃₉Lakishe, Botsekate, Eglone, ₄₀Kabone, Lagmase, Kitlishe, ₄₁Gederote, Bethe-Dagone, Naama le Makeda, e le metse ye lesome le metšo ye e selelago, gotee le metsana ya yona.

₄₂Ye mengwe metse e be e le Libna, Etere, Ashane, ₄₃Jiftage, Ashna, Netsibe, ₄₄Keila, Akesibe le Maresha, e le metse ye senyane, gotee le metsana ya yona.

₄₅Wo mongwe motse e be e le Ekrone le metse le metsana ya wona, ₄₆ye mengwe metse le metsana e le ya kgauswi le Ashdode, go tloga Ekrone go ya Lewatleng la Mediteraniene.

₄₇Ye mengwe metse e be e le Ashdode le Gasa, le metse le metsana ya yona, go ba go yo fihla nokaneng ya mollwaneng wa Egepeta le lebopong la Lewatle la Mediteraniene.

₄₈Kua nageng ya dithaba metse e be e le Shamire, Jatire, Soko, ₄₉Dana, Kiriate-Sana, goba Debire, ₅₀Anabe, Eshtemo, Anime, ₅₁Goshene, Holone le Gilo, e le metse ye lesome le motšo o tee, gotee le metsana ya yona.

₅₂Ye mengwe metse e be e le Arabe, Duma, Eshane, ₅₃Janime, Bethe-Tapuage, Afeka, ₅₄Humta, Hebrone le Tsiore, e le metse ye senyane, gotee le metsana ya yona.

₅₅Ye mengwe metse e be e le Maone, Karmele, Sife, Juta, ₅₆Jesriele, Jokodeamo, Sanoage, ₅₇Kaine, Gibea le Timna, e le metse ye lesome, gotee le metsana ya yona.

₅₈Ye mengwe metse e be e le Halhule, Bethe-Tsure, Gedoro, ₅₉Maarate, Bethe-Anote le Eltekone, e le metse ye e selelago, gotee le metsana ya yona.

₆₀Ye mengwe metse e be e le Kiriate-Baale, goba Kiriate-Jearime, le Raba, e le metse ye mebedi, gotee le metsana ya yona.

₆₁Kua lešokeng metse e be e le Bethe-Araba, Midine, Sekaka, ₆₂Nibshane, Motse wa Letswai, le Engedi, e le metse ye e selelago, gotee le metsana ya yona.

₆₃Fela batho ba Juda ba ile ba se ke ba kgona go leleka Bajebuse, bao ba bego ba dula Jerusalema. Bajebuse ba sa dula fao le batho ba Juda.

₁Phuthegong ya Antiokia go be go na le baprofeta le baruti ba bangwenyana, e lego boBarnabase, le Simeone wa go bitšwa Ramoso, le Lutsiose wa go tšwa Sirene, le Manaene yola wa go gola gotee le Mmušiši Heroda, le Saulo. ₂E rile ge ba ntše ba rapela ba itima dijo, Moya wo Mokgethwa wa re go bona: “Mpeeleng Barnabase le Saulo thoko, ba ye modirong wo ke ba bileditšego wona.”

₃Ba itima dijo ba rapela le go iša pele, ba ba bea diatla, ba laelana le bona.

₄Bona, ka ge ba be ba romilwe ke Moya wo Mokgethwa, ba ile ba theogela Seleutsia, go tloga gona ba ya sehlakahlakeng sa Saeprose ka leselawatle. ₅Ge ba fihla motseng wa Salamise ba begela batho molaetša wa Modimo ka disinagogeng tša Bajuda, ba na le Johanese, mothuši wa bona.

₆Ba phatša sehlakahlaka sohle go yo fihla Pafose, moo ba hweditšego Mojuda yo mongwe wa maselamose, moprofeta wa maaka, yo ba rego ke Barjesu. ₇Yena e be e le mohlankedi wa Mmušiši Sergiose Paulose, monna wa bohlale, kua mošate. Mmušiši a bitša Barnabase le Paulose gore a tle a kwe molaetša wa Modimo. ₈Fela ramaselamose yoo leina la gagwe la Segerike ba bego ba re ke Elimase, a ba ganetša a leka go thibela mmušiši gore a se dumele. ₉Ke mo Saulo, yo a bego a tsebja le ka la Paulose, a tomoletšego ramaselamose yoo mahlo a tletše Moya wo Mokgethwa a re: ₁₀“Hee, wena wa ga Diabolose! Hee, wena ramathaithai, mokadikadi wa morara towe! Wena lenaba la tšohle tše di lokilego! O reng o sa lese go šitiša Modimo go phetha thato ya gagwe? ₁₁Tseba ge, Morena o a go otla, gomme o tla foufala sebaka wa se bone letšatši.”

Gateetee Elimase a welwa ke kgodi mahlong ya mo re pii, gomme a sepela a tlaruma, a nyaka yo a kago mo hlahla ka seatla. ₁₂Mmušiši ge a bona se se diregilego a dumela; gobane o be a tlabilwe ke tše a di rutilwego mabapi le Morena.

₁₃Paulose le ba ba bego ba sepela le yena ba tloga Pafose ka leselawatle ba ya Perge, motseng wo o lego Pamfilia. Gona moo Johanese a kgaogana nabo a boela Jerusalema. ₁₄Go tloga Perge ba fetela Antiokia ya Pisidia, gomme ka tšatši la Sabatha ba ya sinagogeng ba fihla ba dula. ₁₅Ge go seno balwa melao ya Moshe le mangwalo a baprofeta, bahlankedi ba sinagoge ba roma motho go bona a fihla a re: “Banna ba gešo, ge le na le tše le nyakago go kgothatša batho ka tšona, le bolele.” ₁₆Ke ge Paulose a emelela, a emiša seatla go ba homotša a re:

“Lena Baisraele le lena ba bangwe ba go khunamela Modimo, ntheeletšeng! ₁₇Modimo wa setšhaba se sa Baisraele o kgethile borakgolokhukhu ba rena a ba dira setšhaba se segolo mehleng ya mola ba falaletše Egepeta. A ba ntšha gona ka maatla a gagwe a magolo, ₁₈a tšea mengwaga ye e ka bago ye masome a mane a ba kgotleletše kua lešokeng. ₁₉A fediša ditšhaba tše di šupago nageng ya Kanana, gomme a fa Baisraele naga ya tšona. ₂₀Tšeo ka moka di diregile nakong ye e ka bago mengwaga ye makgolo a mane le masome a mahlano.

“Ka morago ga moo a ba fa baahlodi go fihlela nakong ya moprofeta Samuele. ₂₁Ya re ge ba kgopela go ba le kgoši, Modimo a ba fa Saulo, morwa wa Kishe, wa kgoro ya Benjamene, gomme yena ya ba kgoši ya bona mengwaga ye masome a mane. ₂₂A re go mo tloša a bea Dafida kgoši ya bona, gomme ge a mmolela a re: ‘Ke bone gore Dafida, morwa wa Isai, ke yena monna yo a nkgahlago, monna yo a tlago phetha tšohle tše ke nyakago gore a di phethe.’ ₂₃Ke yena yo molokong wa gagwe Modimo a phethilego se a bego a rile o tla se phetha, a dira Jesu Mophološi wa šetšhaba sa Baisraele. ₂₄Pele ga ge Jesu a thoma modiro wa gagwe, Johanese o ile a begela batho bohle ba Israele gore ba sokologe dibeng tša bona ba kolobetšwe. ₂₅Johanese ge a feleletša modiro wa gagwe o ile a re: ‘Na le gopola gore ke nna mang? Ga se nna yo le mo letetšego. Fela theeletšang mo: Yena o tla tla ka morago ga ka, gomme go mo hunolla dieta nna le go ntshwanela ga go ntshwanele.’

₂₆“Banna ba gešo, lena ditlogolo tša Abrahama, le lena ba bangwe ba go khunamela Modimo le lego mo: Molaetša wo wa phološo o rometšwe rena. ₂₇Gobane batho ba ba dulago Jerusalema le baetapele ba bona ba be ba sa tsebe ge Jesu e le yena Mophološi, le gona ba be ba sa kwešiše mantšu a baprofeta a a balwago tšatši le lengwe le le lengwe la Sabatha. Bona ba phethagatša mantšu a baprofeta ka go mo ahlolela lehu. ₂₈Ešita le mola ba sa hwetše lebaka la go mo ahlolela lehu, ba ile ba kgopela Pilato gore a bolawe. ₂₉Ba rile go phetha tšohle tše di ngwadilwego ka Mangwalong a Makgethwa ka yena, ba mo fegolla sefapanong, ba mmoloka ka lebitleng. ₃₀Eupša Modimo a tla a mo tsoša bahung, ₃₁gomme a bonwa matšatši a mantši ke bale ba bego ba sepela naye ge ba etšwa Galilea ba eya Jerusalema. Bjale ke bona ba e lego dihlatse tša gagwe setšhabeng sa Israele. _32-33Gomme bjale rena re le begela Taba ye Botse, e lego gore se Modimo a ilego a se holofetša borakgolokhukhu ba rena bjale o se diretše ditlogolo tša bona ka go tsoša Jesu bahung, bjale ka ge go ngwadilwe ka Pesalomeng ya bobedi gwa thwe:

₄₂E rile ge Paulose le Barnabase ba etšwa ka sinagogeng, batho ba ba kgopela gore ka Sabatha se se latelago ba boe ba tle ba ba botše ditaba tšeo ka botlalo. ₄₃Phuthego e rile go phatlalala Bajuda ba bantši le batho ba bangwe ba bantši ba ba bego ba sokologetše tumelong ya Sejuda ba latela Paulose le Barnabase. Bona ba bolela le bona, ba ba kgothatša gore ba phele ba botile go loka ga Modimo.

₄₄Ka Sabatha se se latelago batho ba ba bego ba kgobokanetše go tlo kwa lentšu la Modimo e be e nyakile go ba motse ka moka. ₄₅Bajuda ge ba bona lešaba leo ba tsebafa; ba phegiša Paulose go tše a di bolelago ba ba ba mo roga. ₄₆Fela Paulose le Barnabase bona ba bolela ba sa šie ba re: “E be e le tshwanelo gore lentšu la Modimo le begelwe lena pele. Fela ka gore le a le gana mme ga le bone le swanelwa ke bophelo bjo bo sa felego, re ya go baditšhaba. ₄₇Gobane Morena o re laile a re:

₄₈Baditšhaba ba rile go di kwa ba thaba ba reta molaetša wa Morena; gomme ba ba kgethetšwego bophelo bjo bo sa felego ba dumela.

₄₉Lentšu la Morena la phatlalala seleteng seo ka moka. ₅₀Fela Bajuda ba hlohleletša bommamaemo ba motse woo ba barapedi le boramaemo ba gona. Bona ba thoma go hlomara Paulose le Barnabase ba ba raka seleteng sa gabobona. ₅₁Baapostola bao ba hlohlora marole dinaong tša bona ba fetela Ikoniomo. ₅₂Badumedi ba Antiokia ba tlala lethabo le Moya wo Mokgethwa.

₁Paulose le Barnabase ge ba le Ikoniomo ba ile ba ya sinagogeng ya Bajuda go etša mola ba le Antiokia, gomme ba bolela ka mo Bajuda ba bantši le baditšhaba ba bantši ba ilego ba dumela. ₂Bajuda ba ba ilego ba se dumele bona ba ile ba hlohleletša baditšhaba ba ba fapantšha le badumedi. ₃Baapostola ba ile ba dula moo lebaka le letelele, ba bolela ka sebete ka Morena yo a ilego a hlatsela gore molaetša wa bona mabapi le kgaugelo ya gagwe ke nnete ka go ba kgontšha go dira mehlolo le dimakatšo. ₄Badudi ba motse woo ba ile ba tšwa dihlopha: ba bangwe ba ema le Bajuda, ba bangwe ba ema le baapostola.

₅Ke moka baditšhaba ba bangwe le Bajuda gotee le baetapele ba bona ba ikemišetša go swara baapostola gampe le go ba bolaya ka maswika. ₆Baapostola ba rile go di kwa ba tšhabela Likaonia motseng wa Listra le go wa Derbe le tikologong ya gona. ₇Le gona moo ba fihla ba bega Ebangedi.

₈Motseng wa Listra go be go na le monna yo mongwe yo a bego a bolawa ke maoto, a tswetšwe a golofetše, mme a sa kgone go sepela. ₉Yena o be a theeleditše Paulose ge a bolela. Paulose ge a mo hlaba ka mahlo, a bona gore o na le tumelo ya gore a ka fodišwa. ₁₀A mo goelela a re: “Emelela ka maoto o hlophologe!” Monna yoo a nanoga mme a thoma go sepelasepela. ₁₁Lešaba ge le bona se se dirilwego ke Paulose, la goelela ka polelo ya Selikaonia la re: “Medimo e iphetotše batho mme e theogetše go rena!” ₁₂Ba thea Barnabase ba re ke Zeose, Paulose yena ba re ke Hermese, ka ge e be e le yena mmoledi yo mogolo wa ditaba. ₁₃Moprista wa modingwana yo go thwego ke Zeose yo a bego a agetšwe tempele pele ga motse a tliša dipoo le dikgare tša matšoba kgorong, gobane yena le lešaba leo ba be ba nyaka go direla baapostola bao didimo.

₁₄Baapostola, Barnabase le Paulose, ba rile go kwa taba yeo ba gagola diaparo tša bona, ba kitimela ka gare ga lešaba leo, ba goelela ba re: ₁₅“Banna, le dirang? Gape le rena re batho ba nama bjalo ka lena! Re le begela Taba ye Botse ye e rego le tlogele dilo tše tša lefeela le boele go Modimo yo a phelago yo a hlodilego legodimo le lefase le lewatle le tšohle tše di lego go tšona. ₁₆Kgale Modimo o be a lesa ditšhaba tšohle di itirela se di se ratago ₁₇le ge a be a sa lese go itlhatsela se yena a lego sona ka go dira tše dibotse: o le nešetša pula ya go tšwa legodimong, a le fa le dibjalo ka dihla tša gona; o le fa dijo ka bontši, dipelo tša lena a di tlatša lethabo.” ₁₈Baapostola le ge ba be ba realo ba nyakile ba paletšwe ke go thibela lešaba leo go ba direla didimo.

₁₉Gwa tla Bajuda ba bangwe ba go tšwa Antiokia le Ikoniomo; bona ba fenya lešaba ka dipolelo, ba keketa Paulose ka maswika, ba mo gogela ka ntle ga motse ba re o hwile. ₂₀Fela e rile ge badumedi ba mmokanetše a tsoga a boela motseng. Ka le le latelago yena le Barnabase ba ya Derbe.

₂₁Paulose le Barnabase ba rile go bega Taba ye Botse kua Derbe ba sokolla batho ba bantši gore e be barutiwa. Ke moka ba gomela Listra le Ikoniomo ba ba ba fetela le Antiokia. ₂₂Ba tiiša badumedi ba ba kgothatša gore ba kgotlelele tumelong. Ba ba ruta ba re: “Go tsena legodimong re swanetše go feta mathateng a mantši.” ₂₃Mo phuthegong ye nngwe le ye nngwe ba ba beela bagolo, ba ba gafela go Morena ka dithapelo le ka go itima dijo, gobane bagolo bao ba be ba šetše ba dumela go yena.

₂₄Ba rile go phatša naga ya Pisidia ba fihla Pamfilia. ₂₅Motseng wa Perge ba fihlile ba bega molaetša wa Modimo, ba kgona ba fetela Athalia, ₂₆gomme ba tloga moo ba boela Antiokia ka leselawatle, mola ba ilego ba gafelwa Morena gore e be yo botho go bona ka lebaka la modiro wo bjale ba bego ba o phethile.

₂₇Ba rile go fihla Antiokia ba kgoboketša phuthego ba e anegela tšohle tše Modimo a di dirilego le bona, le ka mo a filego baditšhaba sebaka sa gore ba dumele. ₂₈Ba dula le badumedi moo nako ye telele.

₁Banna ba bangwe ba go tšwa Judea ba ile ba tla, ba botša badumedi ba re: “Ge le sa bolle go ya ka mokgwa wa Moshe, le ka se phološwe.” ₂Paulose le Barnabase ba fapana le bona kudu mo tabeng ye; ka gona gwa kwanwa gore Paulose le Barnabase le ba bangwenyana moo Antiokia ba ye Jerusalema go boledišana le baapostola le bagolo ba phuthego ka taba ye.

₃Phuthego ya ba ntšha ka difata. Ba phatša naga ya Fenikia le ya Samaria, ba tšama ba bega tša tshokologo ya baditšhaba, gomme taba yeo ya thabiša badumedi bohle kudu. ₄Ge ba fihla Jerusalema ba amogelwa ke phuthego le baapostola le bagolo ba phuthego. Ba ba laodišetša tšohle tše Modimo a di dirilego ka bona. ₅Fela badumedi ba bangwe ba e bego e le ba lekgotla la Bafarisei ba ema ba re: “Badumedi ba go sokologa seditšhabeng ba swanetše go bolotšwa le go laelwa gore ba latele melao ya Moshe.”

₆Baapostola le bagolo ba phuthego ba kopana gore ba rerišane taba ye. ₇Ge ba seno phegišana nako ye telele, Petrose a ema a re: “Banna ba gešo, le a tseba gore e šetše e le kgale Modimo a nkgethile mo go lena gore ke begele baditšhaba Taba ye Botse gore ba e kwe mme ba dumele. ₈Gomme Modimo, yena Motsebadipelo, o bontšhitše gore o amogela baditšhaba ka go ba fa Moya wo Mokgethwa go no swana le ge a o file rena. ₉Ga se a ka a bontšha kgethollo mo go rena le go bona; o ba hlwekišitše dipelo ka ge ba dumetše. ₁₀Bjale lena le reng le nyaka go leka Modimo ka go rweša badumedi morwalo wo o paletšego borakgolokhukhu ba rena le rena? ₁₁Gape re dumela gore re phološwa ka kgaugelo ya Morena Jesu, go no swana le bona.”

₁₂Kopanong yeo go be go rile kgwathaa, ba theeleditše ge Barnabase le Paulose ba anega mehlolo yohle le dika tšohle tše Modimo a bego a di dirile ka bona mo go baditšhaba. ₁₃E rile ge ba fetša go bolela, Jakobose a re: “Banna ba gešo, ntheeletšeng! ₁₄Simone o sa tšo re laodišetša ka mo Modimo a thomilego go bontšha go šetša baditšhaba ga gagwe ka go ikgethela mo go bona ba ba tlilogo ba setšhaba sa gagwe. ₁₅Baprofeta ba kwana le taba ye, go etša Mangwalo a Makgethwa ge a re:

₁₉“Nna ke bona gore re se ke ra tlaletša baditšhaba ba ba sokologelago go Modimo. ₂₀A re upšeng re ba ngwalele lengwalo re ba botšeng gore ba ile dinama tša didimo, tšona di tšhilafetšego, ba ile le go nyalana ga lešika, le nama ya phoofolo ye e kgamilwego, le bobete. ₂₁Gobane tše Moshe a di boletšego di begilwe metseng yohle go tloga kgale, le melao ya gagwe e balwa ka disinagogeng tšatši le lengwe le le lengwe la Sabatha.”

₂₂Baapostola le bagolo ba phuthego le phuthego ka moka ba kwana gore go kgethwe banna ba bangwe mo go bona ba rongwe le Paulose le Barnabase Antiokia. Ba ntšha banna ba maemo mo phuthegong, e lego Judase, yo a tsebjago le ka la Barsabase, le Silase, ₂₃gomme ba ba roma gore ba iše lengwalo le le rego:

₃₀Baromiwa ba rile go laela ba tloga ba ya Antiokia, moo ba fihlilego ba kgoboketša badumedi ba gona ka moka, ba ba fa lengwalo lela. ₃₁Badumedi ba re go le bala ba thabela go kwa mantšu a kgothatšo ya lona. ₃₂Judase le Silase, bona e bego e le baprofeta, ba bolela le bona lebaka le letelele, ba ba kgothatša, ba ba tiiša. ₃₃Ba tšea lebaka ba dutše le bona, badumedi ba kgona ba laelana le bona ka khutšo ba boela go ba ba ba romilego.

₃₅Paulose le Barnabase ba tšea lebaka ba le Antiokia, ba begela batho lentšu la Morena, ba ba ruta lona ba na le ba bangwe ba bantši.

₃₆Ka morago Paulose a bolela le Barnabase a re: “A re boelele re yo bona bana ba borena metseng ka moka ye re ilego ra yo kwatša lentšu la Morena go yona, re yo bona gore na ba swere bjang.” ₃₇Barnabase o be a rata ge ba tloga le Johanese yola wa go tsebja le ka la Markose. ₃₈Paulose yena a bona go se gwa lebana gore ba tloge le motho yo a ilego a ba lahletša kua Pamfilia, a se dule le bona go fihlela mafelelong a modiro wa bona. ₃₉Gwa tsoga kgang ye kgolo mo go bona, ba ba ba arogana. Barnabase a sepela le Markose ba ya Saeprose ka leselawatle, ₄₀mola Paulose yena a ikgethela Silase, mme phuthego ya ba gafela Morena gore e be yo botho go bona. ₄₁Paulose a putla Siria le Tsilitsia, a tiiša diphuthego.