JOSHUA 13

₁Joshua bjale o be a tšofetše kudu. Morena a re go yena: “O tšofetše kudu, eupša go sa na le naga ye kgolo ye e swanetšego go thopša: ₂naga ka moka ya Filistia le Geshure, ₃gotee le naga ka moka ya Baaba go ya borwa. Naga ya go tloga moetšaneng wa Shihore, mollwaneng wa Egepeta, go ya leboa go yo fihla mollwaneng wa Ekrone e be e tšewa gore ke ya Bakanana; babuši ba Bafilista ba be ba dula Gasa, Ashdode, Ashkelone, Gathe le Ekrone. ₄Go sa na le naga ya Bakanana ka moka, le Meara ye e lego ya Basidone, go fihla Afeke, mollwaneng wa Baamore; ₅naga ya Bagebale; naga ka moka ya Lebanone go ya bohlabela, go tloga Baale-Gade patogeng ya thaba ya Hermone, go ya sefateng sa Hamate. ₆Naga ye e akaretša naga ka moka ya Basidone, ba ba dulago nageng ya dithaba ya gare ga dithaba tša Lebanone le Misrefote-Maime. Nna ke tla leleka ditšhaba tše ka moka ge setšhaba sa Israele se goroga. O swanetše go arolela Baisraele naga ye, ka mo ke go laetšego ka gona. ₇Bjale ge, arolela dikgoro tše dingwe tše senyane le seripa sela se sengwe sa kgoro ya Manase, gore e be lefa la bona.”

₈Kgoro ya Rubene le ya Gade le seripa se sengwe sa kgoro ya Manase di be di šetše di hweditše naga ye Moshe, mohlanka wa Morena, a ilego a di fa yona; naga ye e be e le ka lehlakoreng la ka bohlabela la noka ya Jordane. ₉Naga ya bona e be e fihla kua Aroere, ka thoko ga moedi wa nokana ya Arnone, le motseng wa gare ga moedi, mme e akaretša molala ka moka go tloga Medeba go fihla Dibone. ₁₀E be e fihla mollwaneng wa Amone, gomme e akaretša metse ka moka ye e bego e bušwa ke Kgoši Sihone wa Baamore, yo a bego a buša a le Heshbone. ₁₁E be e akaretša Gileade, le dilete ka moka tša Geshure le Maaka, le thaba ya Hermone ka moka, le Bashane ka moka go yo fihla Salka. ₁₂E be e akaretša mmušo wa Ogo, yo a bego a kile a buša a le Ashtarote le Edrei. Ogo e be e le wa mafelelo wa Barafa. Moshe o be a fentše ditšhaba tše, mme a di lelekile nageng. ₁₃Le ge go le bjalo, Baisraele ba ile ba se ke ba leleka batho ba Geshure le ba Maaka; ba sa dula gare ga Baisraele le lehono.

₁₄Moshe o be a se a fa kgoro ya Lefi naga. Bjalo ka ge Morena a ile a botša Moshe, ba be ba tlile go amogela karolo ye e lego ya bona ya dihlabelo le dikabelo tše di bego di tlile go tšhumelwa Morena Modimo wa Israele aletareng.

₁₅Moshe o be a file dikgorwana tša kgoro ya Rubene seripa sa naga. ₁₆Naga ya bona e be e fihla Aroere, ka thoko ga moedi wa nokana ya Arnone, le motseng wa gare ga moedi, gomme e akaretša molala ka moka go fihla Medeba. ₁₇E be e akaretša Heshbone le metse ka moka ya moo molaleng: Dibone, Bamothe-Baale, Bethe-Baale-Meone, ₁₈Jahatse, Kedemote, Mefaate, ₁₉Kiriathaime, Sibma, Tserete-Shahare thabeng ye e lego molaleng, ₂₀Bethe-Peore, metheoga ya thaba ya Pisga, le Bethe-Jeshimote. ₂₁E be e akaretša metse ka moka ya molaleng, le mmušo ka moka wa Kgoši Sihone wa Baamore, yo a bego a kile a buša a le Heshbone. Moshe o ile a mo fenya, a fenya le babuši ba Midiane: Ebi, Rekeme, Tsure, Hure le Reba. Ka moka ga bona e be e le dintona tša Kgoši Sihone. ₂₂Gare ga bao setšhaba sa Israele se ba bolailego go be go le sedupe sela, Bileamo, morwa wa Beore. ₂₃Jordane e be e le mollwane wa ka bodikela wa kgoro ya Rubene. Yeo e be e le metse le metsana ye e ilego ya fiwa dikgorwana tša kgoro ya Rubene.

₂₄Moshe o be a file le dikgorwana tša kgoro ya Gade seripa sa naga. ₂₅Naga ya bona e be e akaretša Jasere le metse ka moka ya Gileade, le seripa sa naga ya Amone go yo fihla Aroere, ye e lego ka bohlabela bja Raba; ₂₆naga ya bona e be e tloga Heshbone e fihla Ramate-Mitsepa le Betonime, e tloga Mahanaime e fihla mollwaneng wa Lo-Dabare. ₂₇Ka moeding wa Jordane e be e akaretša Bethe-Haramo, Bethe-Nimra, Sukote le Safone, ke go re naga ye e šetšego ya mmušo wa Kgoši Sihone wa Heshbone. Mollwane wa bona wa ka bodikela e be e le noka ya Jordane go ya leboa go yo fihla letsheng la Genesarete. ₂₈Ye e be e le metse le metsana ye e bego e filwe dikgorwana tša kgoro ya Gade.

₂₉Moshe o be a file dikgorwana tša seripa sa kgoro ya Manase karolo ya naga. ₃₀Naga ya bona e be e fihla Mahanaime gomme e akaretša Bashane ka moka – mmušo wohle wa Ogo, kgoši ya Bashane, gotee le metse ye masome a a selelago, e lego metse ka moka ya Jaire kua Bashane. ₃₁E be e akaretša seripagare sa Gileade, e akaretša le Ashtarote le Edrei, le metse ya mmušo wa Ogo kua Bashane. Yona e ile ya fiwa seripagare sa dikgorwana tše di tšwilego go Makire, morwa wa Manase.

₃₂Ke ka moo Moshe a arotšego naga ya ka bohlabela bja Jeriko le Jordane ka gona kua melaleng ya Moaba. ₃₃Eupša Moshe o ile a se ke a arolela ba kgoro ya Lefi naga. Morena o ile a ba botša gore ya bona karolo ke seripa sa dihlabelo le dikabelo tše di fiwago yena Morena Modimo wa Israele.