Barnabase le Saulo ba a kgethwa ba rongwa
1Phuthegong ya Antiokia go be go na le baprofeta le baruti ba bangwenyana, e lego boBarnabase, le Simeone wa go bitšwa Ramoso, le Lutsiose wa go tšwa Sirene, le Manaene yola wa go gola gotee le Mmušiši Heroda, le Saulo. 2E rile ge ba ntše ba rapela ba itima dijo, Moya wo Mokgethwa wa re go bona: “Mpeeleng Barnabase le Saulo thoko, ba ye modirong wo ke ba bileditšego wona.”
3Ba itima dijo ba rapela le go iša pele, ba ba bea diatla, ba laelana le bona.
Barnabase le Saulo ba etela Saeprose
4Bona, ka ge ba be ba romilwe ke Moya wo Mokgethwa, ba ile ba theogela Seleutsia, go tloga gona ba ya sehlakahlakeng sa Saeprose ka leselawatle. 5Ge ba fihla motseng wa Salamise ba begela batho molaetša wa Modimo ka disinagogeng tša Bajuda, ba na le Johanese, mothuši wa bona.
6Ba phatša sehlakahlaka sohle go yo fihla Pafose, moo ba hweditšego Mojuda yo mongwe wa maselamose, moprofeta wa maaka, yo ba rego ke Barjesu. 7Yena e be e le mohlankedi wa Mmušiši Sergiose Paulose, monna wa bohlale, kua mošate. Mmušiši a bitša Barnabase le Paulose gore a tle a kwe molaetša wa Modimo. 8Fela ramaselamose yoo leina la gagwe la Segerike ba bego ba re ke Elimase, a ba ganetša a leka go thibela mmušiši gore a se dumele. 9Ke mo Saulo, yo a bego a tsebja le ka la Paulose, a tomoletšego ramaselamose yoo mahlo a tletše Moya wo Mokgethwa a re: 10“Hee, wena wa ga Diabolose! Hee, wena ramathaithai, mokadikadi wa morara towe! Wena lenaba la tšohle tše di lokilego! O reng o sa lese go šitiša Modimo go phetha thato ya gagwe? 11Tseba ge, Morena o a go otla, gomme o tla foufala sebaka wa se bone letšatši.”
Gateetee Elimase a welwa ke kgodi mahlong ya mo re pii, gomme a sepela a tlaruma, a nyaka yo a kago mo hlahla ka seatla. 12Mmušiši ge a bona se se diregilego a dumela; gobane o be a tlabilwe ke tše a di rutilwego mabapi le Morena.
Paulose le Barnabase Antiokia ya Pisidia
13Paulose le ba ba bego ba sepela le yena ba tloga Pafose ka leselawatle ba ya Perge, motseng wo o lego Pamfilia. Gona moo Johanese a kgaogana nabo a boela Jerusalema. 14Go tloga Perge ba fetela Antiokia ya Pisidia, gomme ka tšatši la Sabatha ba ya sinagogeng ba fihla ba dula. 15Ge go seno balwa melao ya Moshe le mangwalo a baprofeta, bahlankedi ba sinagoge ba roma motho go bona a fihla a re: “Banna ba gešo, ge le na le tše le nyakago go kgothatša batho ka tšona, le bolele.” 16Ke ge Paulose a emelela, a emiša seatla go ba homotša a re:
“Lena Baisraele le lena ba bangwe ba go khunamela Modimo, ntheeletšeng! 17Modimo wa setšhaba se sa Baisraele o kgethile borakgolokhukhu ba rena a ba dira setšhaba se segolo mehleng ya mola ba falaletše Egepeta. A ba ntšha gona ka maatla a gagwe a magolo, 18a tšea mengwaga ye e ka bago ye masome a mane a ba kgotleletše kua lešokeng. 19A fediša ditšhaba tše di šupago nageng ya Kanana, gomme a fa Baisraele naga ya tšona. 20Tšeo ka moka di diregile nakong ye e ka bago mengwaga ye makgolo a mane le masome a mahlano.
“Ka morago ga moo a ba fa baahlodi go fihlela nakong ya moprofeta Samuele. 21Ya re ge ba kgopela go ba le kgoši, Modimo a ba fa Saulo, morwa wa Kishe, wa kgoro ya Benjamene, gomme yena ya ba kgoši ya bona mengwaga ye masome a mane. 22A re go mo tloša a bea Dafida kgoši ya bona, gomme ge a mmolela a re: ‘Ke bone gore Dafida, morwa wa Isai, ke yena monna yo a nkgahlago, monna yo a tlago phetha tšohle tše ke nyakago gore a di phethe.’ 23Ke yena yo molokong wa gagwe Modimo a phethilego se a bego a rile o tla se phetha, a dira Jesu Mophološi wa šetšhaba sa Baisraele. 24Pele ga ge Jesu a thoma modiro wa gagwe, Johanese o ile a begela batho bohle ba Israele gore ba sokologe dibeng tša bona ba kolobetšwe. 25Johanese ge a feleletša modiro wa gagwe o ile a re: ‘Na le gopola gore ke nna mang? Ga se nna yo le mo letetšego. Fela theeletšang mo: Yena o tla tla ka morago ga ka, gomme go mo hunolla dieta nna le go ntshwanela ga go ntshwanele.’
26“Banna ba gešo, lena ditlogolo tša Abrahama, le lena ba bangwe ba go khunamela Modimo le lego mo: Molaetša wo wa phološo o rometšwe rena. 27Gobane batho ba ba dulago Jerusalema le baetapele ba bona ba be ba sa tsebe ge Jesu e le yena Mophološi, le gona ba be ba sa kwešiše mantšu a baprofeta a a balwago tšatši le lengwe le le lengwe la Sabatha. Bona ba phethagatša mantšu a baprofeta ka go mo ahlolela lehu. 28Ešita le mola ba sa hwetše lebaka la go mo ahlolela lehu, ba ile ba kgopela Pilato gore a bolawe. 29Ba rile go phetha tšohle tše di ngwadilwego ka Mangwalong a Makgethwa ka yena, ba mo fegolla sefapanong, ba mmoloka ka lebitleng. 30Eupša Modimo a tla a mo tsoša bahung, 31gomme a bonwa matšatši a mantši ke bale ba bego ba sepela naye ge ba etšwa Galilea ba eya Jerusalema. Bjale ke bona ba e lego dihlatse tša gagwe setšhabeng sa Israele. 32-33Gomme bjale rena re le begela Taba ye Botse, e lego gore se Modimo a ilego a se holofetša borakgolokhukhu ba rena bjale o se diretše ditlogolo tša bona ka go tsoša Jesu bahung, bjale ka ge go ngwadilwe ka Pesalomeng ya bobedi gwa thwe:
“ ‘O Morwa wa ka, lehono ke go tswetše.’
34“Mabapi le go mo tsoša bahung gore a se ke a bola, Modimo o rile:
“ ‘Ke tla le fa ditšhegofatšo tše dikgethwa tše di tshepagalago tše ke di holofeditšego Dafida.’
35“Ke ka lebaka leo a boletšego le ka temaneng ye nngwe a re:
“ ‘O ka se lese mohlanka wa gago yo a botegago a eya boyabahu.’
36“Ge e le Dafida yena mehleng ya gagwe o rile go phetha thato ya Modimo a ithobalela, a bolokwa le borakgolokhukhu ba gagwe, mme setopo sa gagwe sa bola. 37Kganthe yo Modimo a mo tsošitšego bahung yena ga se a bola. 38-39Bjale ge, tsebang, lena banna ba gešo, gore ke ka Jesu mo le begelwago molaetša wa tshwarelo ya dibe, le gore mang le mang yo a dumelago o lokollwa dibeng tšohle tše melao ya Moshe o bego o šitwa ke go le lokolla go tšona. 40Ka gona, le hlokomele gore tše di boletšwego ke baprofeta di se le hlagele, mola ba re:
41“ ‘Lebelelang, lena bakweri!
Tlabegang, le hwe.
Gobane se ke se dirago mehleng yeno ya lena ke taba ye le ka se kego
la e kgolwa ge le e botšwa!’ ”
42E rile ge Paulose le Barnabase ba etšwa ka sinagogeng, batho ba ba kgopela gore ka Sabatha se se latelago ba boe ba tle ba ba botše ditaba tšeo ka botlalo. 43Phuthego e rile go phatlalala Bajuda ba bantši le batho ba bangwe ba bantši ba ba bego ba sokologetše tumelong ya Sejuda ba latela Paulose le Barnabase. Bona ba bolela le bona, ba ba kgothatša gore ba phele ba botile go loka ga Modimo.
44Ka Sabatha se se latelago batho ba ba bego ba kgobokanetše go tlo kwa lentšu la Modimo e be e nyakile go ba motse ka moka. 45Bajuda ge ba bona lešaba leo ba tsebafa; ba phegiša Paulose go tše a di bolelago ba ba ba mo roga. 46Fela Paulose le Barnabase bona ba bolela ba sa šie ba re: “E be e le tshwanelo gore lentšu la Modimo le begelwe lena pele. Fela ka gore le a le gana mme ga le bone le swanelwa ke bophelo bjo bo sa felego, re ya go baditšhaba. 47Gobane Morena o re laile a re:
“ ‘Ke go dirile seetša sa ditšhaba,
gore bohle ba lefaseng ba phološwe ka wena.’ ”
48Baditšhaba ba rile go di kwa ba thaba ba reta molaetša wa Morena; gomme ba ba kgethetšwego bophelo bjo bo sa felego ba dumela.
49Lentšu la Morena la phatlalala seleteng seo ka moka. 50Fela Bajuda ba hlohleletša bommamaemo ba motse woo ba barapedi le boramaemo ba gona. Bona ba thoma go hlomara Paulose le Barnabase ba ba raka seleteng sa gabobona. 51Baapostola bao ba hlohlora marole dinaong tša bona ba fetela Ikoniomo. 52Badumedi ba Antiokia ba tlala lethabo le Moya wo Mokgethwa.
