To The Word – Day 58

₁Adoni-Tsedeke, kgoši ya Jerusalema, o ile a kwa gore Joshua o thopile motse wa Ai, a o thubaganya, a ba a bolaya kgoši ya gona le batho ba gona gotee le diphoofolo, ka mo a dirilego Jeriko le kgoši ya gona. A kwa le gore batho ba Gibeone ba dirile khutšo le Baisraele, le gore ba dula gare ga bona. ₂Batho ba Jerusalema ba ile ba tšhoga kudu, ka gobane motse wa Gibeone e be e le wo mogolo go lekana le metse ye e bego e na le magoši; o be o feta Ai, gomme banna ba wona e le bagale. ₃Ka gona Adoni-Tsedeke a romela molaetša go Kgoši Hohamo wa Hebrone, le go Kgoši Piramo wa Jarmute, le go Kgoši Jafia wa Lakishe, le go Kgoši Debire wa Eglone, a re: ₄“Tlang le nthušeng go hlasela motse wa Gibeone, ka gobane batho ba gona ba dirile khutšo le Joshua le Baisraele.” ₅Magoši a a mahlano a Baamore, kgoši ya Jerusalema le ya Hebrone le ya Jarmute le ya Lakishe le ya Eglone, ba bokana gotee le madira a bona, ba dikanetša Gibeone mme ba e hlasela.

₆Banna ba Gibeone ba romela molaetša go Joshua mešašeng kua Gilgale ba re: “Se re tlogele, rena, bahlanka ba gago! Tlaa ka pela o tle o re thuše! Re phološe! Magoši ka moka a Baamore a nageng ya dithaba a kopane gomme a re hlasetše!”

₇Ka gona Joshua le madira a gagwe ka moka, gotee le bagale ka moka, ba tloga Gilgale. ₈Morena a re go Joshua: “O se ke wa ba boifa. Ke šetše ke ba gafetše diatleng tša gago. Ga go le o tee wa bona yo a tlago go ema pele.” ₉Bošego ka moka Joshua le madira a gagwe ba sepela go tloga Gilgale go yo fihla Gibeone, gomme a hlasela Baamore ba sa itebetše. ₁₀Morena a ba dira gore ba tlalelwe ge ba bona madira a Israele. Baisraele ba ba fenya fenyang kua Gibeone, mme ba ba rakediša go ba theoša sefata sa thaba kua Bethe-Horone, ba lwa nabo go ya borwa go ba go yo fihla Aseka le Makeda. ₁₁Ge Baamore ba tšhaba Baisraele ba theoga ka sefata, Morena a dira gore sefako se sekotokoto se ba nele tseleng ka moka go ya Aseka. Sefako sa bolaya batho ba bantši go feta bao ba bolailwego ke Baisraele.

₁₂Ka letšatši leo Morena a gafetšego Baamore diatleng tša Baisraele, Joshua o ile a kgopela Morena thušo. Mo pele ga Baisraele a re:

₁₃Letšatši la ema felo gotee, le kgwedi ya se ke ya šutha go fihlela setšhaba se fentše manaba a sona. Taba ye e ngwadilwe mo Pukung ya Moloki. Letšatši la ema felo gotee gare ga leratadima, gomme la diega go dikela ya ba nke ke letšatši ka moka. ₁₄Go be go se gwa ka gwa ba le letšatši la go swana le leo, mme ka morago ga se gwa ka gwa ba le letšatši la go swana le lona, moo Morena a amogetšego kgopelo ya motho. Morena o be a hlabanela Baisraele.

₁₅Ka morago ga fao Joshua le madira a gagwe ba boela mešašeng kua Gilgale.

₁₆Dikgoši tšela tše tlhano tšona di be di tšhabile gomme di utamile ka leweng kua Makeda. ₁₇Joshua a botšwa gore dikgoši tšela tše tlhano di hweditšwe di utamile ka leweng. ₁₈Yena a re: “Kgokološetšang matlapa a magolo moo molomong wa lewa. Le beeng baleti moo, ₁₉fela lena le se ke la dula gona. Le hlomareng manaba gomme le ba hlasele ka morago; le se ke la ba lesa ba boela metseng ya bona! Morena Modimo wa lena o ba gafetše diatleng tša lena.” ₂₀Joshua le bahlabani ba Baisraele ba ba bolaya ka bontši, le ge ba bangwe ba bona ba ile ba kgona go tšhabela ka metseng ya bona ye e ageleditšwego ka merako gomme ba se bolawe. ₂₁Ke moka bahlabani bohle ba Joshua ba gomela go yena ba bolokegile mešašeng kua Makeda.

Go ile gwa se sa ba le motho yo a bolelago ka go lwa le Baisraele.

₂₂Ke moka Joshua a re: “Bulang mojako wa lewa mme le ntšheng magoši ao a mahlano le a tlišeng go nna.” ₂₃Ka gona lewa la bulwa, gomme ba ntšha kgoši ya Jerusalema le ya Hebrone le ya Jarmute le ya Lakishe le ya Eglone ₂₄mme ba di iša go Joshua. Ke moo Joshua a bokanyeditšego banna ka moka ba Israele go yena, mme a laela balaodi ba ba bego ba ile le yena gore ba tle ba gate dikgoši tšela melala ka dinao. Ba tla ba ba gata melala. ₂₅Ke gona Joshua a itšego go balaodi ba gagwe: “Le se ke la boifa goba la nolega moko. Le beng le sebete, le tie, ka gobane Morena o tlile go dira manaba a lena ka moka ka mokgwa wo.” ₂₆Ke moka Joshua a bolaya magoši ale mme a a lekeletša dikoteng tše tlhano, moo ditopo tša bona di bilego fao go fihlela mathapama. ₂₇Ge letšatši le dikela, Joshua a laela gore ditopo tša bona di kgokollwe mme di lahlelwe ka leweng lela ba bego ba utamile ka go lona. Matlapa a magolo a bewa molomong wa lewa, mme a sa le moo le lehono.

₂₈Joshua a hlasela motse wa Makeda mme a o thopa le kgoši ya gona ka letšatši leo. A bolaya batho ka moka motseng; gwa se be le yo a šalago. A dira kgoši ya Makeda se a se dirilego kgoši ya Jeriko.

₂₉Ka morago ga moo Joshua le madira a gagwe ba tloga Makeda ba ya motseng wa Libna, gomme ba o hlasela. ₃₀Motse woo le kgoši ya wona le wona Morena a o gafela diatleng tša Baisraele. Ba se ke ba šadiša motho, eupša ba bolaya yo mongwe le yo mongwe go wona. Ba dira kgoši ya ntshe se ba se dirilego kgoši ya Jeriko.

₃₁Ka morago ga moo Joshua le madira a gagwe ba tloga Libna ba ya motseng wa Lakishe, ba o dikanetša mme ba o hlasela. ₃₂Morena a gafela Lakishe diatleng tša Baisraele ka letšatši la bobedi la ntwa. Ka wona mokgwa woo ba dirilego kua Libna ba ile ba se ke ba šadiša motho, eupša ba bolaya yo mongwe le yo mongwe motseng. ₃₃Kgoši Horamo wa Gesere a tla go thuša ba Lakishe, eupša Joshua a mo fenya gotee le madira a gagwe, mme a se šadiše motho wa bona a phela.

₃₄Go tloga moo Joshua le madira a gagwe ba tloga Lakishe ba ya motseng wa Eglone, ba o dikanetša mme ba o hlasela. ₃₅Ba o thopa ka lona letšatši leo, gomme ba bolaya bohle fao, ba o dira se ba se dirilego Lakishe.

₃₆Ka morago ga moo Joshua le madira a gagwe ba tloga Eglone ba namela dithaba ba ya motseng wa Hebrone, ba o hlasela ₃₇mme ba o thopa. Ba bolaya kgoši le bohle motseng woo, gotee le metseng ya kgauswi. Joshua a thubaganya motse, a bolaya le bohle motseng, ka wona mokgwa wola a dirilego Eglone. Gwa se be le o tee go wona yo a šalago.

₃₈Ke moo Joshua le madira a gagwe ba ilego motseng wa Debire, ba o hlasela. ₃₉Ba o thopa gotee le kgoši ya gona le metse ka moka ya kgauswi. Ba bolaya bohle fao. Joshua a dira Debire le kgoši ya gona se a se dirilego Hebrone le Libna le magoši a gona.

₄₀Ka mokgwa wo mobjalo a fenya badudi ba dinaga tšohle, e lego ba naga ya dithaba, ba naga ye e omilego ya ka borwa, ba nagatlase, le ba metheogeng ya dithaba, le magoši a bona. O ile a se ke a šadiša motho; yo mongwe le yo mongwe a bolawa. Se e be e le seo Morena Modimo wa Israele a se laetšego. ₄₁Dintwa tša Joshua di ile tša mo tloša Kadeshe-Barnea ka borwa tša mo iša Gasa kgauswi le lebopo la lewatle, le tikologong ka moka ya Goshene, tša ba tša mo iša leboa go fihla Gibeone. ₄₂Joshua o ile a fenya magoši a ka moka le dinaga tša bona ka lesolo le tee, ka gobane Morena Modimo wa Israele o be a lwela Baisraele. ₄₃Ka morago ga moo Joshua le madira a gagwe ba boela mešašeng kua Gilgale.

₁Ge Jabine, kgoši ya Hatsore, a ekwa ka go fenya moo ga Baisraele, o ile a romela molaetša go Jobabe, kgoši ya Madone, le go kgoši ya Shimrone le go ya Akshafo, ₂le go magoši a nageng ya dithaba ka leboa, le a ka moeding wa Jordane ka borwa bja letsha la Genesarete, le a nagengtlase, le a mebotong ya Doro, lebopong la lewatle. ₃A o romela le go Bakanana ba ka moeding wa Jordane, le ba lebopong la lewatle, le go Baamore, le go Bahete, le go Baperise, le go Bajebuse nageng ya dithaba, le go Bahibe bao ba bego ba dula patogeng ya thaba ya Hermone, nageng ya Mitsepa. ₄Bona ba tla le bahlabani ba bona ka moka – ya ba madira a banna ba bantši bjalo ka dithorwana tša lešabašaba lebopong la lewatle. Ba be ba na le dipere tše ntšintši le makoloi a ntwa. ₅Magoši a ka moka a kopana mme ba kgobokana, ba hloma mešaša kua letsheng la Meromo gore ba tle ba lwe le Baisraele.

₆Morena a re go Joshua: “O se ke wa ba boifa. Ka yona nako ye ka moswane ke tla be ke ba gafetše go Baisraele, gomme ka moka ba tla bolawa. O ripe dipere tša bona mešifa, o tšhume le makoloi a bona a ntwa.” ₇Ka gona Joshua le bahlabani ba gagwe ka moka ba ba hlasela ba sa itebetše kua letsheng la Meromo. ₈Morena a ba gafela diatleng tša Baisraele; ba ba hlasela mme ba ba rakediša go ya leboa go yo fihla Sidone ye Kgolo le Misrefote-Maime, le go ya bohlabela go yo fihla moeding wa Mitsepa. Ba ba fetša lai gwa se sadišwe le o tee. ₉Joshua a ba dira seo Morena a mo laetšego sona: a ripa dipere tša bona mešifa, a tšhuma le makoloi a bona a ntwa.

₁₀Ke moka a boela morago, a thopa motse wa Hatsore mme a bolaya kgoši ya gona. Mehleng yeo Hatsore e be e le ketapele ya mebušo yeo ka moka. ₁₁Ba bolaya bohle fao; gwa se be le sephedi se se šalago, le motse wa tšhungwa.

₁₂Joshua a thopa metse yeo ka moka le dikgoši tša gona, a bolaya bohle, ka moo Moshe, mohlanka wa Morena, a laetšego ka gona. ₁₃Eupša Baisraele ba se ke ba tšhuma le o tee wa metse ye e bego e agilwe godimo ga marope, ntle le Hatsore, yeo Joshua a e tšhumilego. ₁₄Baisraele ba tšea dilo tše bohlokwa ka moka le diruiwa metseng yeo, mme ba ipolokela tšona. Eupša ba bolaya batho bohle, gwa se be le yo a šalago. ₁₅Morena o be a laetše Moshe, mohlanka wa gagwe; Moshe yena a laela Joshua, mme Joshua a phetha ditaelo, a dira tšohle tše Morena a bego a di laetše Moshe.

₁₆Joshua a thopa naga tšeo ka moka – naga ya dithaba, le nagatlase ya ka leboa le ya ka borwa, tikologo ka moka ya Goshene, naga ye e omilego ya ka borwa bja yona, gotee le moedi wa Jordane. _17-18Dinaga tšeo di be di tloga Thabeng ye e se nago Mehlare ye e rotogelago Edomo, di fihla Baale-Gade ka leboa, ka moeding wa Lebanone ka borwa bja thaba ya Hermone. Joshua o lwele le magoši a dinaga tše lebaka le letelele, mme mafelelong a ba thopa ka moka a ba bolaya. ₁₉Ga se gwa ba le motse wo o dirago kwano le Baisraele, ntle le Gibeone, moo go bego go dula Bahibe. Ba metse ye mengwe ka moka ba ile ba fenywa ntweng. ₂₀Morena a ba thatafatša dipelo gore ba lwe le Baisraele, gore ba tle ba fedišetšwe sa ruri le gore bohle ba bolawe ntle le kwelobohloko. Se e be e le seo Morena a se laetšego Moshe.

₂₁Mehleng yeo Joshua a tloga a yo fediša morafe wa ditšitširipa wo o bego o bitšwa Baanake wa go dula kua nageng ya dithaba – motseng wa Hebrone, wa Debire, wa Anabe, le nageng ya dithaba yohle ya Juda le ya Israele. Joshua a ba fedišetša sa ruri le metse ya bona. ₂₂Gwa se ke gwa ba le Moanake yo a tlogelwago nageng ya Israele. Fela kua Gasa le Gathe le Ashdode gwa tlogelwa ba se ba kae.

₂₃Joshua a thopa naga ka moka, bjalo ka ge Morena a laetše Moshe. A e fa Baisraele ya ba lefa la bona, mme a e arola dikarolo, kgoro ye nngwe le ye nngwe ya ba le karolo ya yona.

Ka gona naga ya lala.

₁Setšhaba sa Israele se be se šetše se thopile naga ya ka bohlabela bja Jordane mme se dutše go yona, go tloga nokaneng ya Arnone go akaretša moedi wa Jordane go ya leboa go yo fihla thabeng ya Hermone. Ba ile ba fenya dikgoši tše pedi; ₂yo mongwe e be e le Sihone, kgoši ya Baamore, yo a bego a buša Heshbone. Mmušo wa gagwe o be o tloga Aroere, ka thoko ga moedi wa nokana ya Arnone, le motseng wo o lego gare ga moedi, go akaretša seripagare sa naga ya Gileade go yo fihla nokaneng ya Jaboko, mollwaneng wa Amone; ₃le ka bohlabela bja moedi wa Jordane, go tloga letsheng la Genesarete go ya borwa go fihla Bethe-Jeshimote, ka bohlabela bja Lewatle le le Hwilego, le go fetela patogeng ya thaba ya Pisga.

₄Ba ile ba fenya le Kgoši Ogo wa Bashane, yo e bego e le yo mongwe wa ba mafelelo wa Barafa; o be a buša kua motseng wa Ashtarote le wa Edrei. ₅Mmušo wa gagwe o be o akaretša thaba ya Hermone, le motse wa Salka, le naga ka moka ya Bashane go yo fihla mollwaneng wa Bageshure le Bamaaka le seripa sa Gileade, go yo fihla nageng ya Kgoši Sihone wa Heshbone.

₆Dikgoši tše pedi tše di ile tša fenywa ke Moshe le setšhaba sa Israele. Moshe, mohlanka wa Morena, a tšea naga ya bona a e fa kgoro ya Rubene le ya Gade le seripa sa kgoro ya Manase.

₇Joshua le setšhaba sa Israele ba ile ba fenya dikgoši ka moka tša nageng ye e lego ka bodikela bja Jordane, go tloga Baale-Gade moeding wa Lebanone go yo fihla ka borwa Thabeng ye e se nago Mehlare ye e rotogelago Edomo. Joshua a arola naga ye go ya ka dikgoro tša bona, gomme a ba fela yona sa ruri. ₈Seripa se se be se akaretša naga ya dithaba, le nagatlase, le moedi wa Jordane, le metheoga ya dithaba, le naga ye e omilego ya ka borwa. Naga ye e be e kile ya ba ya Bahete, ya Baamore, ya Bakanana, ya Baperise, ya Bahibe, le ya Bajebuse. ₉Setšhaba sa Israele se ile sa fenya magoši a metse ye: Jeriko, Ai, kgauswi le Bethele, ₁₀Jerusalema, Hebrone, ₁₁Jarmute, Lakishe, ₁₂Eglone, Gesere, ₁₃Debire, Gedere, ₁₄Horma, Arade, ₁₅Libna, Adulamo, ₁₆Makeda, Bethele, ₁₇Tapuage, Hefere, ₁₈Afeke, Sharone, ₁₉Madone, Hatsore, ₂₀Shimrone-Merone, Akshafo, ₂₁Taanake, Megido, ₂₂Kedeshe, Jokneamo, kua Karmele, ₂₃Doro, kua lebopong la lewatle, Goime, kua Galilea, ₂₄le Tirtsa. Ka moka ke magoši a masome a mararo le o tee.

₁Kua motseng wa Kesarea go be go na le monna yo mongwe yo ba bego ba re ke Korneliose. E be e le ralekgolo wa sehlopha sa bahlabani se se bego se bitšwa sehlopha sa Italia. ₂Yena le ba lapa la gagwe e be e le barapedi mme ba khunamela Modimo. O be a katana kudu le go thuša bahloki ba Bajuda, le gona a dula a rapela Modimo. ₃E rile ka tšatši le lengwe, ka nako ya boraro mathapama, a ba le pono yeo go yona a ilego a bona morongwa wa Modimo gabotse a etla go yena a re: “Korneliose!”

₄Yena a mo hlaba ka mahlo a tšhogile a re: “Ke eng, morena?”

Morongwa yoo a mo fetola a re: “Modimo o šeditše dithapelo tša gago le dimpho tše o di filego bahloki, gomme o go kwele. ₅Bjale ge, roma batho Jope gore ba ye ba bitše monna yo mongwe yo ba rego ke Simone, le lengwe ba re ke Petrose. ₆Yena o etetše ka ga mošogamatlalo yo mongwe yo le yena ba rego ke Simone, yo a agilego go bapela le lewatle.” ₇Morongwa yoo a re go tloga, Korneliose a bitša ba babedi ba badiredi ba lapa la gagwe le mohlabani yo mongwe, monna wa morapedi, yo e bego e le yo mongwe wa ba ba šikago le yena. ₈A re go ba laodišetša tšohle tše di diregilego, a ba roma Jope.

₉Ka le le latelago, ge banna bao ba swere tsela ba šetše ba batametše Jope, Petrose a namelela tlhakeng ya ntlo go yo rapela, e le ka nako ya mosegare wo mogolo. ₁₀A kwa a swerwe ke tlala a duma sa go ja. Ya re ge ba sa apeile, a tsenwa ke moya a bona pono. ₁₁A bona legodimo le bulegile gomme selo se nkego ke lešela le legolo se etšwa gona se theošetšwa fase ka dikhutlo tša sona tše nne. ₁₂Mo go sona go be go na le mehutahuta ya diphoofolo tša maoto a mane le ya digagabi le ya dinonyana. ₁₃Gwa kwagala lentšu le mmotša le re: “Petrose, tsoga o hlabe, o je!”

₁₄Petrose a re: “Le gatee, Morena! Ga se nke ka ja seila goba selo se se tšhilafetšego.”

₁₅Lentšu leo la bolela gape, e le la bobedi, la re go yena: “Se Modimo a rego ga se seila wena o se ke wa re ke seila.” ₁₆Taba ye e boeleditšwe gararo, ya ba gona selo seo se bušetšwago legodimong.

₁₇Petrose o rile a sa tlabilwe ke gore na pono yeo e šupang, ya ba banna bale ba go rongwa ke Korneliose ba šetše ba eme lesorong, ba kwele gore ka ga Simone ke kae. ₁₈Ba goelela ba botšiša ge ka moo go se na moeng yo ba rego ke Simone, le lengwe ba rego ke Petrose.

₁₉Petrose yena o be a sa gopodišiša ka pono yeo, ge Moya wo Mokgethwa o mmotša o re: “Theeletša! Go tlile banna ba bararo ba a go nyaka. ₂₀Bjale ge, ema o theoge o sepele nabo, o se ke wa ba le maseme, gobane ke nna ke ba romilego.” ₂₁Petrose a theogela go banna bao, a re go bona: “Ke nna yo le mo nyakago. Ke efe taba ye le tlilego ka yona?”

₂₂Bona ba mo fetola ba re: “Re romilwe ke Korneliose, molaodi wa bahlabani, monna wa go loka, wa go khunamela Modimo, wa go tuma setšhabeng sa Bajuda ka moka. O laetšwe ke morongwa yo mokgethwa wa Modimo gore a go bitše o tle ga gagwe, a tle a kwe ditaba go wena.” ₂₃Petrose a ba iša ka gae, a ba fa marobalo.

Ka le le latelago a ema a sepela le bona; le badumedi ba bangwe ba motse wa Jope ba ya le yena. ₂₄Ka tšatši le le latelago ba fihla Kesarea, ba hwetša Korneliose a ba letetše, a na le meloko le bagwera ba gagwe ba bagolo ba a bego a ba laleditše. ₂₅E rile ge Petrose a fihla, Korneliose a mo gahlanetša, a itahlela fase maotong a gagwe, a mo lotšha. ₂₆Fela Petrose a mo emiša a re: “Emelela, le nna ke motho wa nama.” ₂₇Petrose ge a tsena ka ntlong o be a bolela le Korneliose. A hwetša go kgobokane batho ba bantši. ₂₈A re go bona: “Lena le a tseba gore Mojuda ga se a dumelelwa go ikopanya le moditšhaba le ge e le go mo etela. Fela nna Modimo o ntaeditše gore ke se ke ka re motho ofe goba ofe ke seila goba o tšhilafetše. ₂₉Ke ka lebaka leo e rilego ge ke bitšwa ka tla, ka se gane. Bjale ke botšiša gore na le mpileditšeng.”

₃₀Korneliose a mo fetola a re: “Gohlwamaloba, ka tšona nako tše tša boiri ya boraro mathapama ke rile ke rapela ka mo ntlong ya ka, gateetee ka bona monna wa diaparo tše ditšhweu tša mabaibai e eme pele ga ka, ₃₁a mpitša a re: ‘Korneliose, Modimo o kwele thapelo ya gago, o šeditše le dimpho tše o di filego bahloki. ₃₂Roma batho Jope ba yo bitša monna yo ba rego ke Simone, le lengwe ba rego ke Petrose. Yena o etetše ka ga mošogamatlalo yo mongwe yo ba rego ke Simone, yo a agilego go bapela le lewatle.’ ₃₃Ke ka moo ke romilego batho le semeetseng gore ba go late, gomme o dirile gabotse ge o tlile. Bjale re mo pele ga Modimo gore re kwe tše Morena a go laetšego tšona.”

₃₄Petrose ge a thoma go bolela a re: “Ruri, bjale ke a bona gore Modimo ga a kgetholle motho. ₃₅O kgahlwa ke yo a mmoifago mme a dirago tše di lokilego, a sa šetše gore ke wa setšhaba sefe. _36-37Molaetša wo a o rometšego Baisraele le a o tseba, wa ge ba begelwa Taba ye Botse ya go boelanywa le yena ka Jesu Kriste, yena Morena wa bohle. Le tseba taba yela e ilego ya hlaga nageng yohle ya Bajuda, ya go thoma Galilea ge Johanese a seno bega molaetša wa gagwe wa kolobetšo. ₃₈Ke yona taba ya Jesu wa Nasaretha, ya ge Modimo a mo tloditše a mo fa Moya wo Mokgethwa le maatla. Yena o sepetše gohle a dira tše dibotse, a fodiša bohle ba ba gateletšwego ke Diabolose, gobane Modimo o be a na le yena. ₃₉Rena re dihlatse tša tšohle tše a di dirilego nageng ya Bajuda le Jerusalema. Ka morago ba ile ba mmolaya ka go mo kokotela sefapanong. ₄₀Fela Modimo a mo tsoša bahung ka letšatši la boraro, a ba a dira gore a itšweletše, ₄₁e sego go setšhaba ka moka, eupša go dihlatse tše Modimo a bego a šetše a di kgethile, e lego rena re ilego ra ja, ra ba ra nwa le yena ge a seno tsoga bahung. ₄₂Gomme o re laetše gore re begele setšhaba Ebangedi, re be re hlatsele gore ke yena yo Modimo a mmeilego Moahlodi wa ba ba phelago le ba ba hwilego. ₄₃Ke yena yo baprofeta bohle ba bolelago ka yena, ba re mang le mang yo a dumelago go yena o tla swarelwa dibe tša gagwe ka tše Jesu a di dirilego.”

₄₄Ya re Petrose a sa bolela, Moya wo Mokgethwa wa theogela go bohle ba ba bego ba theeleditše molaetša woo. ₄₅Badumedi bale ba Bajuda ba go tla le Petrose ge a etšwa Jope ba tlabega ge le baditšhaba ba filwe mpho ye e lego wona Moya wo Mokgethwa. ₄₆Gobane ba be ba ba kwa ba bolela mantšu a a sa kwešišwego ba tumiša Modimo. Petrose a bolela a re: ₄₇“Batho ba ba amogetše Moya wo Mokgethwa bjalo ka rena. Bjale ke mang yo a ka ba thibelago go kolobetšwa ka meetse?” ₄₈Ke moka a laela gore ba kolobetšwe e be ba Jesu Kriste. Batho bao ba mo kgopela gore a dule le bona matšatšinyana.

₁Baapostola le badumedi ba naga ya Judea ba ile ba kwa gore baditšhaba le bona ba amogetše lentšu la Modimo. ₂Ya re ge Petrose a ile Jerusalema, babotalebollo ba mo sola ₃ba re: “Etse o be o etetše batho ba go se bolle, wa ba wa ja le bona!” ₄Ke mo Petrose a ba laodišeditšego ditaba tšohle ka mo di hlagilego ka gona go tloga mathomong a tšona a re:

₅“Ke rile ke rapela kua motseng wa Jope ka tsenwa ke moya ka bona pono. Ka bona selo se nkego ke lešela le legolo se etšwa legodimong se theošwa ka dikhutlo tša sona tše nne, sa ba sa fihla mo go nna. ₆Ge ke se lebelediša ka gare ka bona diphoofolo tša maoto a mane, tša gae le tša nageng, le digagabi le dinonyana. ₇Ke moka ka kwa lentšu le mpotša le re: ‘Petrose, tsoga o hlabe, o je!’ ₈Fela nna ka re: ‘Le gatee, Morena! Ga se ka ka ka iša seila goba selo se se tšhilafetšego ganong.’ ₉Lentšu leo la mpotša la bobedi le etšwa legodimong la re: ‘Se Modimo a rego ga se seila wena o se ke wa re ke seila.’ ₁₀Taba ye e boeleditšwe gararo, ya ba gona dilo tšeo ka moka di bušetšwago legodimong. ₁₁Ka yona nako yeo ke ge go fihla banna ba bararo ntlong yeo ke bego ke dula go yona ba romilwe go nna ba etšwa Kesarea. ₁₂Moya wo Mokgethwa wa mpotša gore ke sepele nabo ke se na maseme. Badumedi bao ba go selela ba go tšwa Jope le bona ba ile ba ya le nna, gomme ra fihla ra tsena ka ga Korneliose. ₁₃Yena a re laodišetša ka mo a bonego morongwa a eme ka ntlong ya gagwe, a re go yena: ‘Roma batho Jope ba yo bitša monna yo mongwe yo ba rego ke Simone, le lengwe ba rego ke Petrose. ₁₄Yena o tla go botša mantšu ao wena le bohle ba lapa la gago le tlago phološwa ka ona.’ ₁₅E rile ge ke thoma go bolela, Moya wo Mokgethwa wa theogela go bona go no swana le mola o theogela go rena mathomong. ₁₆Ka napa ka gopola sela Morena a bego a se boletše a re: ‘Johanese o be a kolobetša ka meetse, fela lena le tla kolobetšwa ka Moya wo Mokgethwa.’ ₁₇Modimo o file baditšhaba mpho yela a e filego rena mola re dumela go Morena Jesu Kriste; bjale nna ke nna mang nkago thibela Modimo?”

₁₈Ge ba ekwa a realo, ba lesa go mo sola, ba reta Modimo ba re: “Gona le baditšhaba Modimo o ba file sebaka sa gore ba sokologe mme ba phele!”

₁₉Badumedi ba bangwe ba ba bego ba šwalalantšwe ke go hlomarwa mola ga go tla ka morago ga go bolawa ga Stefane, ba be ba sepetše le naga ba ba ba fihla Fenikia le Saeprose le Antiokia, ba begela fela Bajuda molaetša wa Modimo, e sego ba bangwe. ₂₀Eupša ba bangwe ba bona, ba go tšwa Saeprose le Sirene, bona ba ya Antiokia, ba fihla ba bolela le baditšhaba, ba ba begela Taba ye Botse ya Morena Jesu. ₂₁Morena a ba thuša, gomme batho ba bantši ba dumela ba sokologela go Morena.

₂₂Taba ya bona ya ba ya fihla le phuthegong ya Jerusalema. Ke moka ba roma Barnabase Antiokia. ₂₃Ge a fihla gona a bona tše Modimo a di dirilego ka botho bja gagwe, a thaba, gomme a ba kgothatša bohle gore ba botegele Morena ka pelo tša bona ka moka, ₂₄gobane yo Barnabase e be e le moloki yo a tletšego Moya wo Mokgethwa le tumelo, gomme batho ba bantši ba dumela ba sokologela go Morena.

₂₅Barnabase a ya Tarsose go nyaka Saulo. ₂₆A re go mo hwetša a mo tliša Antiokia, gomme ka babedi ga bona ba fetša ngwaga ka moka ba šoma mmogo phuthegong ya gona, ba ruta batho ba bantši. Ke gona moo Antiokia mo badumedi ba thomilego go bitšwa Bakriste.

₂₇Lebakeng leo ke ge moo Antiokia go fihla baprofeta ba bangwe ba go tšwa Jerusalema. ₂₈Yo mongwe wa bona, yo ba rego ke Agabose, a ema a porofeta ka maatla a Moya wo Mokgethwa gore go tlilo wa tlala ye kgolo lefaseng ka moka. Ke yona yela ya go wa mehleng ya Kesare Klaudiose. ₂₉Badumedi ba kwana gore mongwe le mongwe wa bona a romele mpho ye a kago e kgona go thuša badumedikayena ba ba dulago Judea. ₃₀Ba dira bjalo, ba romela tšhelete ka Barnabase le Saulo go bagolo ba phuthego.

₁Ka tšona nako tšeo Kgoši Heroda a thoma go hlomara ba bangwe ba phuthego. ₂A bolaya Jakobose, morwarragoJohanese, ka tšhoša. ₃Ge a bona gore seo se kgahlile Bajuda, a boeletša a swara le Petrose. E be e le ka nako ya Monyanya wa Dinkgwa tše di se nago komelo. ₄A re go mo swara a mo iša kgolegong, a mo gafela dihlopha tše nne tša bahlabani, ba bane ba bane, gore ba mo lete. O be a gopotše go mo sekiša phatlalatša ge go fetile Monyanya wa Paseka. ₅Ka gona Petrose a bewa ka kgolegong; phuthego yona ya fela e mo rapelela e kgothetše.

₆Bošego bjo Heroda a bego a tlilo tsoga a tliša Petrose tshekong, Petrose o be a robetše mokgahlo ga bahlabani ba babedi, a kgokilwe ka diketane tše pedi, gomme le kua lesorong la kgolego a beetšwe baleti. ₇Gateetee ke ge go bonala morongwa wa Morena a eme moo, gomme ka moo phapošing go taga seetša. Morongwa yoo a šikinya Petrose lehlakoreng, a mo tsoša a re: “Nanoga!” Diketane tšela tša bofologa diatleng tša Petrose tša wela fase. ₈Ke moka morongwa yoo a re: “Ipofe letheka, o rwale le dieta.” Petrose a dira bjalo. Morongwa a re: “Apara kobo, o ntšhale morago.” ₉Petrose a tšwa ka kgolegong a mo šetše morago, fela a sa tsebe ge tše di dirwago ke morongwa di direga ka mmakgonthe. Yena o be a nagana gore o bona pono. ₁₀Ba feta baleti ba mathomo, le ba bobedi, ba feleletša ka go fihla lesorong la tshipi le le išago motseng; lona la ipula, gomme ba tšwa, ba sepela ka tsela. Gateetee morongwa yola a timelela Petrose.

₁₁Ke mo Petrose a lemogilego tše di diregilego, gomme a re: “Bjale ke gona ke tsebago gore ruri Morena o romile morongwa wa gagwe go tlo ntlhakodiša diatleng tša Heroda le go tše setšhaba sa Bajuda se bego se ikemišeditše go ntira tšona.”

₁₂Ge a seno kwešiša taba ye a ya ga Maria, mmagoJohanese yo leina la gagwe le lengwe ba bego ba re ke Markose. Ke mo go bego go kgobokane batho ba bantši ba rapela. ₁₃A kokota lesorong, gomme gwa tla lekgoba la ngwanenyana yo leina la gagwe ba rego ke Rode. ₁₄Yena a re go tseba lentšu la Petrose a thaba mo a ilego a ba a goma a se a bula, a yo ba tsebiša gore Petrose o eme ka kua lesorong. ₁₅Bona ba re: “O a gafa, wena!” Eupša yena a tiiša gore ke nnete. Gomme bona ba re: “Gona ke morongwa wa gagwe!”

₁₆Petrose yena ke ge a le gare a kokota. Ba ba ba bula, gomme ge ba mmona ba kgotsa. ₁₇A ba laetša ka seatla gore ba homole, ba re tuu, gomme a ba laodišetša ka mo Morena a mo ntšhitšego ka kgolegong ka gona. A re: “Le tsebiše Jakobose le badumedi ba bangwe.” Ke moka a tloga a ya felwanatsoko.

₁₈Ge go esa, ya ba kgakanego fela mo go bahlabani, ba botšišana ba re: “Go diregileng ka Petrose?” ₁₉Heroda a laela gore a nyakwe, fela ba se mmone. Ka gona baleti ba sekišwa; Heroda a laela gore ba bolawe. Ka morago ga moo Heroda a tloga Judea a yo dula lebakanyana kua Kesarea.

₂₀Heroda o be a galefetše batho ba Tirose le ba Sidone kudu. Bona ba nama ba roma baemedi go yena. Ge ba seno itswalanya le Blastose, mokgomana wa mošate, ba ya go Heroda, ba fihla ba mo kgopela kagišano ka ge naga ya bona e be e phela ka tše di lengwago nageng ya kgoši.

₂₁Ya re ka tšatši le le beilwego Heroda a apara tša bogoši, a dula setulong sa gagwe sa bogoši, a bolela le bona. ₂₂Lešaba la goa la re: “Yo a bolelago yo ga se motho, ke modimo!” ₂₃Gateetee morongwa wa Morena a otla Heroda, ka ge a be a dirile gore batho ba tumiše yena bakeng sa go tumiša Modimo. A longwa ke dinogana ka maleng a ba a hwa.

₂₄Lentšu la Modimo lona la fela le phatlalala le keka.

₂₅BoBarnabase le Saulo ba rile go phetha se ba bego ba se rometšwe Jerusalema, ba boa, ba tla le Johanese yola wa go tsebja le ka la Markose.