To The Word – Day 60

₁Mollwane wa naga ye e aroletšwego ditlogolo tša Josefa o be o thoma nokeng ya Jordane kgauswi le Jeriko, lefelong la ka bohlabela bja methopo ya Jeriko, mme o leba lešokeng. O be o tloga Jeriko o rotogela nageng ya dithaba go ba go yo fihla Bethele. ₂Go tloga Bethele o be o eya Luse, o fetela Atharote, moo go bego go dula Baaraki. ₃Go tloga moo o be o eya bodikela tikologong ya Bajaflete, go ba go yo fihla tikologong ya Bethe-Horone ya ka Tlase. Go tloga moo o be o tšwela pele o eya Gesere, mme wa felela Lewatleng la Mediteraniene.

₄Ditlogolo tša Josefa, kgoro ya Efraime le seripa sa kgoro ya Manase sa ka bodikela, ba ile ba fiwa naga ye.

₅Naga ya dikgorwana tša Baefraime e bile ka mokgwa wo: Mollwane wa bona wa ka bohlabela o be o tloga Atrote-Adare go yo fihla Bethe-Horone ya ka Tletlolo, ₆mme go tloga moo o be o eya Lewatleng la Mediteraniene. Motse wa Mikemetate o be o le ka leboa la bona. Ka bohlabela bja moo mollwane o be o mena legopo go leba Taanate-Shilo, mme o e feta ka bohlabela go ya Janoage. ₇Ke mo o bego o theoga go tloga Janoage go ya Atharote le Naara, o fihla Jeriko mme o felela Jordane. ₈Mollwane o be o eya bodikela go tloga Tapuage go ya nokaneng ya Kana, mme o felela Lewatleng la Mediteraniene. Ye ke naga ye e ilego ya fiwa dikgorwana tša kgoro ya Efraime, ₉gotee le metse le metsana ye e filwego Baefraime ye e bego e le ka gare ga mellwane ya naga ya Manase. ₁₀Fela ba ile ba se ke ba leleka Bakanana ba ba bego ba dula Gesere, ka gona Bakanana bao ba ile ba dula gare ga Baefraime go fihlela le lehono, eupša ba ile ba gapeletšwa go šoma e le makgoba.

₁Seripa sa naga se ile sa arolelwa dikgorwana tše di tšwilego go morwa wa Josefa wa mathomo. Makire, yo e bego e le yena morwa wa mathomo wa Manase, e bile tatagoGileade, gomme e be e le mogale ntweng, ka gona naga ya Gileade le ya Bashane di ile tša arolelwa yena. ₂Tše dingwe dikgorwana tša Manase tše di ilego tša fiwa naga šedi: Abiesere, Heleke, Asriele, Shekeme, Hefere le Shemida. Ke tše di reetšwego barwa ba Manase, morwa wa Josefa, bao e bego e le dihlogo tša malapa. ₃Tselofohade, morwa wa Hefere, Hefere morwa wa Gileade, Gileade morwa wa Makire, Makire morwa wa Manase, o ile a se ke a ba le barwa, a ba le barwedi fela. Maina a bona e be e le Magla, Noa, Hogla, Milka le Tirtsa. ₄Bona ba ile ba ya go moprista Eleasara le go Joshua, morwa wa Nunu, le go baetapele ba re: “Morena o laetše Moshe go re fa karolo ya naga, go swana le meloko ya borena ya banna.” Ka gona, bjalo ka ge Morena a laetše, ba ile ba fiwa karolo ya naga go swana le bomorwarragotatagobona. ₅Ke ka moo Manase a ilego a fiwa dikarolo tše lesome, go sa balwe Gileade le Bashane ka bohlabela bja Jordane, ₆ka ge ditlogolo tša gagwe tša basadi gotee le barwa ba gagwe ba ile ba arolelwa naga. Naga ya Gileade e ile ya arolelwa ditlogolo tša Manase tše di šetšego.

₇Naga ya Manase e be e tloga Asere e fihla Mikemetate, ka bohlabela bja Shekeme. Go tloga moo mollwane o be o eya borwa go akaretša batho ba Ene-Tapuage. ₈Naga ya Tapuage e be e le ya Manase, eupša motse wa Tapuage, wo o lego mollwaneng, e le wa ditlogolo tša Efraime. ₉Mollwane o be o theogela nokaneng ya Kana. Metse ye e bego e le ka borwa bja nokana ye e be e le ya ba Efraime, le ge e be e le ka nageng ya Bamanase. Mollwane wa Bamanase o be o tšwela pele ka lehlakoreng la ka leboa la nokana, mme o felela Lewatleng la Mediteraniene. ₁₀Baefraime ba be ba le ka thoko ya borwa, mme Bamanase ba le ka thoko ya leboa, Lewatle la Mediteraniene e le mollwane wa bona wa ka bodikela. Baasere ba be ba le ka thoko ya leboabodikela, mme Baisakara ba le ka thoko ya leboabohlabela. ₁₁Ka gare ga naga ya Isakara le ya Asere Bamanase ba be ba filwe motse wa Bethe-Sheane le wa Jibleamo, gotee le metsana ye e bego e e dikologile, le Doro, Endoro, Taanake, Megido, le metsana ye e bego e e dikologile. ₁₂Fela kgoro ya Manase ga se ya ka ya kgona go leleka batho bao ba bego ba dula metseng yeo, ka gona Bakanana ba ile ba ikgethela go dula moo. ₁₃Le ge Baisraele ba eba le maatla go feta pele, ga se ba ka ba raka Bakanana ka moka, eupša ba ile ba ba gapeletša go ba šomela.

₁₄Ditlogolo tša Josefa di ile tša re go Joshua: “Ke ka lebaka lang o re file fela karolo e tee ya naga? Re setšhaba se sentši, ka gobane Morena o re šegofaditše.”

₁₅Joshua a ba fetola a re: “Ge eba le le setšhaba se sentši gomme naga ya dithaba ya Efraime e sa le lekane, gona eyang sethokgweng le ikgoreleng lefelo nageng ya Baperise le Barafa.”

₁₆Bona ba mo fetola ba re: “Naga ye ya dithaba ga se ye kgolo mo e ka re lekanago, fela Bakanana ba kua melaleng ba na le makoloi a ntwa a tshipi, le bale ba kua Bethe-Sheane le metsaneng ye e e dikologilego, le ba kua molaleng wa Jesriele le bona ba nao.”

₁₇Joshua a re go ba kgoro ya Efraime le go ba seripa sa kgoro ya Manase sa ka bodikela: “Le tloga le le ba bantši, gomme le na le maatla kudu. Le tla fiwa karolo ye nngwe. ₁₈Naga ya dithaba e tla ba ya lena. Le ge e le sethokgwa le e kgore mme selete sohle e tla ba sa lena. Ge e le Bakanana bona le ba leleke, le ge ba ka hlwa ba na le makoloi a ntwa a tshipi, mme ba na le maatla.”

₁Setšhaba ka moka sa Israele se ile sa bokana kua Shilo, mme sa hloma Tente ya bodulo bja Morena ge se seno thopa naga. ₂Go be go sa na le dikgoro tše di šupago tša setšhaba sa Israele tšeo di bego di se tša tšwe di arolelwa karolo ya naga. ₃Ka gona Joshua a re go setšhaba sa Israele: “A le tlile go tšea nako ye kaakang le tšwafa go thopa naga ye Morena, Modimo wa borakgolokhukhu ba lena, a le filego yona? ₄Mpheng banna ba bararo kgorong ye nngwe le ye nngwe. Ke tla ba roma nageng ka moka go yo lekanya le go ngwala naga ye ba ratago gore e be ya bona. Ka morago ba boe go nna. ₅Naga yeo ba swanetše go e arogana, e tšwe diripa tše di šupago; ba Juda ba dule nageng ya bona ka borwa, mme ba Josefa ba dule go ya bona ka leboa. ₆Le ngwaleng dikarolo tše di šupago tše mme le di tlišeng go nna. Ke moo ke tlago dira matengwa ka le botšišetša Morena Modimo wa rena. ₇Balefi bona ba ka se fiwe karolo ya naga bjalo ka lena ka moka, ka gobane karolo ya bona ke go hlankela Morena e le baprista ba gagwe. Gomme ge e le kgoro ya Gade le ya Rubene le seripa sa kgoro ya Manase sa ka bohlabela bona ba šetše ba hweditše dikarolo tša bona ka bohlabela bja Jordane tšeo Moshe, mohlanka wa Morena, a ba filego tšona.”

₈Banna bao ba ile ba wela tsela go yo lekanya le go ngwala naga ge Joshua a ba laetše a re: “Yang nageng ka moka le e lekanyeng, le e ngwale, mme le boeleng mo go nna. Ka morago ke tla dira matengwa go le botšišetša Morena mo Shilo.” ₉Ka gona banna bao ba ya nageng ka moka, mme ba thala ka moo ba e arotšego diripa tše di šupago, ba ngwala le lenaneo la metse ya gona. Ke moo ba boetšego go Joshua mešašeng kua Shilo. ₁₀Joshua a dira matengwa go ba botšišetša Morena, gomme a fa ye nngwe le ye nngwe ya dikgoro tša Israele karolo ya naga.

₁₁Naga ye e ilego ya ba ya dikgorwana tša kgoro ya Benjamene e bile ya mathomo ya go arolwa. Naga ya bona e be e ikadile gare ga ya ba kgoro ya Juda le ya ba Josefa. ₁₂Ka leboa mollwane wa bona o be o thoma Jordane mme wa rotoga mototolo wa ka leboa la Jeriko, wa leba bodikela go putla naga ya dithaba go yo fihla lešokeng la Bethe-Abene. ₁₃Go tloga moo mollwane o be o eya mototolong wa ka borwa bja Luse ye gape e bitšwago Bethele, mme wa theogela Atrote-Adare, godimo ga thaba ka borwa bja Bethe-Horone ya ka Tlase. ₁₄Fao mollwane o be o phamogela ka thoko ye nngwe, o mena legopo go ya borwa go tloga ka thoko ya bodikela ya thaba ye, mme wa ya Kiriate-Baale goba Kiriate-Jearime, ye e lego ya kgoro ya Juda. Wo e be e le mollwane wa ka bodikela. ₁₅Mollwane wa ka borwa o be o thoma ka mafelelong a Kiriate-Jearime mme o eya methopong ya Neftoage. ₁₆Moo o be o theogela patogeng ya thaba ye e okametšego moedi wa Hinomo, ka mafelelong a ka leboa a molala wa Barafa. Go tloga moo o be o eya borwa ka moedi wa Hinomo, motheogeng wa ka borwa wa mmoto wa Jebuse, go ya mothopong wa Rogele. ₁₇Moo o be o tepogela leboa go ya Ene-Shemeshe mme o fetela pele go ya Gelilote, go lebana le sefata sa Adumime. Go tloga moo mollwane o be o theogela letlapeng la Bohane, morwa wa Rubene, ₁₈gomme wa feta ka leboa la motheoga wo o okametšego moedi wa Jordane. Moo o be o theogela ka moeding, ₁₉o feta ka leboa la mototolo wa Bethe-Hogla, mme o felela ka leboa Lewatleng le le Hwilego leo noka ya Jordane e tšhollelago metse ka go lona. Wo e be e le mollwane wa ka borwa. ₂₀Jordane e be e le mollwane wa ka bohlabela. Ye e be e le mellwane ya naga ye dikgorwana tša kgoro ya Benjamene di ilego tša e fiwa.

₂₁Metse ye e bego e le ya dikgorwana tša kgoro ya Benjamene e be e le Jeriko, Bethe-Hogla, Emeke-Ketsitse, ₂₂Bethe-Araba, Tsemaraime, Bethele, ₂₃Abime, Para, Ofra, ₂₄Kefare-Amoni, Ofni le Geba, e le metse ye lesome le ye mebedi, gotee le metsana ya yona. ₂₅Ye mengwe metse e be e le Gibeone, Rama, Beerote, ₂₆Mitsepa, Kefira, Motsa, ₂₇Rekeme, Jirpeele, Tarala, ₂₈Tsela, Elefe, Jebuse, goba Jerusalema, Gibea le Kiriate-Jearime, e le metse ye lesome le ye mene, gotee le metsana ya yona. Ye ke naga ye dikgorwana tša kgoro ya Benjamene di e filwego.

₁Paulose a fetela Derbe le Listra, mo go bego go dula modumedi yo mongwe yo ba rego ke Timotheose. Mmagwe, yo le yena e bego e le modumedi, e be e le Mojuda, tatagwe yena e le Mogerike. ₂Badumedi ba Listra le ba Ikoniomo ba be ba bolela gabotse ka Timotheose. ₃Paulose o be a nyaka go tloga le Timotheose, ka gona a mmolotša. Seo a se dira ka lebaka la Bajuda bao ba bego ba dula mafelong ao, ka ge bohle ba be ba tseba gore tatagoTimotheose ke Mogerike. ₄Ge ba thetha le metse ba be ba efa badumedi melao ye e beilwego ke baapostola le bagolo ba phuthego kua Jerusalema, gomme ba ba laya gore ba e phethe. ₅Ka mokgwa woo diphuthego tša fela di tia tumelong di bile di oketšega ka mehla.

₆Ba ile ba putla naga ya Frigia le ya Galatia ka gobane Moya wo Mokgethwa o be o se wa ba dumelela go bega lentšu la Modimo nageng ya Asia. ₇Ge ba fihla mollwaneng wa Misia ba leka go selela ka nageng ya Bithinia, fela Moya wa Jesu wa se ba dumelele. ₈Ka gona ba putla Misia ba fetela Troase. ₉Bošegong bjoo Paulose a lala a bone pono. A bona monna wa go tšwa Matsedonia a eme a mo rapela a re: “Selela ka mono Matsedonia o re thuše!” ₁₀Paulose o rile go bona pono yeo ra itokišetša go ya Matsedonia, ka gobane re be re kgolwa gore re bitšwa ke Modimo gore re yo begela batho ba gona Taba ye Botse ya gagwe.

₁₁Re tlogile Troase ka leselawatle ra ya Samotrake, gomme ka le le latelago ra ya Neapolise. ₁₂Go tloga moo ra fetela Filipi, e lego wona motse wa selete sa mathomo sa Matsedonia; ebile ke koloni ya Baroma. Ra tšea matšatši re le moo. ₁₃Ka tšatši la Sabatha ra tšwa motseng ra ya nokeng moo re bego re gopola gore ke felo mo Bajuda ba tlwaetšego go rapela gona. Ra dula fase ra bolela le basadi ba ba bego ba kgobokane moo. ₁₄Yo mongwe wa ba ba bego ba re theeleditše e be e le Lidia, e le mmapatši wa lešela la bohwibidu bja moretele, wa go tšwa Tiatira. Yena o be a khunamela Modimo, gomme Morena a mo fa gore a ele tše Paulose a di bolelago hloko. ₁₅Ge yena le ba lapa la gagwe ba seno kolobetšwa, o ile a re mema a re: “Ge eba le mpona ke le modumedi wa Morena, a re yeng le yo dula ka ga ka.” A phegelela go re mema.

₁₆Ka tšatši le lengwe ge re eya felong ga thapelo ra gahlana le ngwanenyana yo mongwe wa lekgoba yo a bego a tsenwe ke moya wa bodupe. O be a tlišetša beng ba gagwe tšhelete ye ntši ka bodupe. ₁₇A fela a šetše Paulose le rena morago, a goelela a re: “Banna ba ke bahlanka ba Modimo Yogodimodimo! Ba le begela ka mo le kago phološwa ka gona!” ₁₈O ile a fela a dira bjalo matšatši a mantši, Paulose a ba a tenega mo a ilego a retologa a re go moya woo: “Ke go laela ka maatla a Jesu Kriste gore o tšwe mo go yena!” Moya woo wa tšwa go yena le semeetseng.

₁₉Beng ba gagwe ge ba bona gore ba lobile mokgwa woo wa go ikgobokeletša tšhelete, ba swara Paulose le Silase ba ba gogela go baetapele ba motse kua kgorong. ₂₀Ba ba iša go mantona a Baroma ba re: “Banna ba ke Bajuda, gomme ba hlola mmudubudu mo motseng wa gaborena. ₂₁Ba ruta batho mekgwa ye rena, re le Baroma, re ka se kego ra e amogela goba ra phela ka yona.” ₂₂Batho ba motse le bona ba ba tsogela maatla.

Mantona a laela gore ba kgeilelwe diaparo, ba be ba bethwe ka thupa. ₂₃Ba re go ba betha gasehlogo ba ba lahlela kgolegong, gomme ba laela rakgolego gore a ba diše gabotse. ₂₄Yena o rile go laiwa bjalo, a ba lahlela ka phapošing ya ka garegare, a ba pataganya maoto ka dikota.

₂₅E rile mo gare ga bošego Paulose le Silase ba rapela ba opelela Modimo difela, gomme bagolegwa ba bangwe ba be ba theeleditše. ₂₆Gatee gwa ba le tšhikinyego ye kgolo ya lefase ya go šikinya le metheo ya kgolego. Mejako yohle ya bulega le semeetseng; ditlemo tša bohle ba ba tlemilwego tša tlemologa. ₂₇Rakgolego a phafoga, gomme ge a bona mejako ya kgolego e bulegile a gopola gore bagolegwa ba tšhabile. Ka gona a gwanyolla tšhoša ya gagwe a re o a ipolaya. ₂₈Fela Paulose a mo goelela a re: “O se ke wa ikgobatša! Ka moka ga rena re sa le gona!”

₂₉Rakgolego a re go tlišwe lebone; a tla a itlhaganetše, a itahlela pele ga Paulose le Silase a thothomela. ₃₀A ba ntšhetša ka ntle, a ba botšiša a re: “Barena, na nka dirang gore ke phološwe?”

₃₁Bona ba mo fetola ka go re: “Dumela go Morena Jesu, gomme o tla phološwa – wena le ba lapa la gago.” ₃₂Ke ge ba mmegela lentšu la Morena, yena le bohle ba ba bego ba le ka lapeng la gagwe. ₃₃Ka yona nako yeo ya bošego a ba tšea a yo a ba hlapiša dintho; gomme yena le bohle ba lapa la gagwe ba kolobetšwa le semeetseng. ₃₄Ke mo a ba išitšego ka ntlong ya gagwe, a fihla a ba fa tša go ja. Yena le ba lapa la gagwe ba be ba thabile kudu ka gobane bjale ba be ba dumetše go Modimo.

₃₅Ge go sele mantona a Baroma a roma maphodisa a re: “Lokolla banna bao.”

₃₆Ke ge rakgolego a tsebiša Paulose a re: “Mantona a rometše molaetša wa gore le lokollwe. Ka gona etšwang le itshepelele gabotse.”

₃₇Paulose a fetola maphodisa ao a re: “Ba re bethile pepeneneng re se ra sekišwa, mokagona ebile re le ba go bušwa Roma. Morago ga moo ba re lahlela ka kgolegong. Gomme bjale ba nyaka go re ntšha ka sephiring. O gane! A go tle bona beng ba re ntšhe.”

₃₈Maphodisa ao a ya go begela mantona taba ye; gomme bona ge ba ekwa gore Paulose le Silase ke badudi ba go bušwa Roma, ba tšhoga. ₃₉Ba ya ba kgopela tshwarelo go bona; ba ba ntšha ka kgolegong mme ba ba kgopela gore ba tloge moo motseng. ₄₀Paulose le Silase ge ba tloga moo kgolegong ba ya ga Lidia. Ba hwetša badumedikabona; ba ba kgothatša ya ba ba a tloga.

₁Paulose le Silase ba phatša Amfipolise le Apolonia ba fetela Thesalonika moo go bego go na le sinagoge ya Bajuda. ₂Go ya ka setlwaedi sa gagwe Paulose a ya sinagogeng. Ya re mo Disabatheng tše tharo tša go latelana a tšea kgang le bona, a boledišana nabo ka tša Mangwalo a Makgethwa, ₃a bile a ba hlalošetša ditemana tša ona, a ba bontšha ka tšona gore Mesia o be a swanetše go tlaišwa le go tsoga bahung. A re: “Yena Jesu yo ke le begelago yena yo ke yena Mesia.” ₄Ba bangwe ba bona ba ile ba kgolwa mme ba sepela le Paulose le Silase, le sehlopha se segolo sa Bagerike ba e bego e le barapedi ba Modimo, le basadi ba bantši ba maemo.

₅Fela Bajuda ba ba tsebafela gomme ba rapa difelele tša metlapa ba kgoboketša lekoko. Ba tsoša mmudubudu motseng, ba hlasela lapa la monna yo ba rego ke Jasone, ba nyaka Paulose le Silase gore ba ba ntšhetše ntle bathong. ₆E rile ge ba sa ba hwetše, ba gogela Jasone le badumedi ba bangwe go baetapele ba motse, ba goelela ba re: “Batho ba ba go tsoša mpherefere lefaseng lohle bjale ba tlile mono, ₇gomme Jasone o ba beile ka ga gagwe. Ka moka ga bona ba tshela melao ya Kesare, ba re kgoši ke yo mongwe, leina la gagwe ke Jesu.” ₈Go realo ya ba ge ba ferekantše lešaba le baetapele ba motse. ₉Baetapele bao ba rile go phethiša Jasone le ba ba bangwe tše di nyakegago gore ba lokollwe, ba ba lesa ba sepela.

₁₀Ge leswiswi le seno swara badumedi ba romela Paulose le Silase Berea. Bona ge ba fihla ba ya sinagogeng ya Bajuda. ₁₁Batho ba gona ba be ba phala ba Thesalonika ka go amogela tše di begwago ke Paulose. Ba be ba theeletša molaetša wa Modimo ka ditsebe tše pedi, gomme ka mehla ba be ba ithuta Mangwalo a Makgethwa go bona ge eba tše di bolelwago ke Paulose ke tšona. ₁₂Ba bantši ba bona ba ile ba dumela; le basadi ba bantši ba maemo ba Bagerike le banna ba bantši ba Bagerike le bona ba ile ba dumela. ₁₃Fela e rile ge Bajuda ba Thesalonika ba ekwa gore Paulose o bega molaetša wa Modimo le kua Berea, ba tla gona ba fihla ba ferehla batho ba ba ferekanya. ₁₄Badumedi ba akgofa ba tloša Paulose ba mo iša lebopong la lewatle, fela Silase le Timotheose ba šala Berea. ₁₅Banna ba ba bego ba felesetša Paulose ba ile ba mo fihliša Athene, ya ba gona ba boelago Berea, Paulose a ba laetše gore Silase le Timotheose ba mo latele ka pelapela.

₁₆E rile ge Paulose a sa letetše Silase le Timotheose kua Athene, a ferekana kudu ge a bona motse o tletše medingwana. ₁₇Ka gona a tšea kgang le Bajuda ka sinagogeng le batho ba e lego bakhunamedi ba Modimo. Le kua lepatlelong la motse ka mehla a tšea kgang le ba a kopanago le bona. ₁₈Le dihlalefi tše dingwe tša Baepikure le tša Bastoike di be di tšea kgang le yena. Ba bangwe ba botšiša ba re: “Etse mmalabadi yo o leka go re botšang?”

Ba bangwe ba fetola ba re: “O ka re o bolela ka medimo e šele.” Ba be ba realo ka gobane Paulose o be a bega tša Jesu le tsogo ya bahu. ₁₉Ba tšea Paulose ba mo iša kgorong ya motse, e lego Areopagose, ba re: “Re nyaka go tseba gore na thuto ye mpsha ye o bolelago ka yona ye ke thutomang. ₂₀Tše dingwe ditaba tše o di bolelago ke tše difsa ka ditsebeng tša rena, gomme re nyaka go tseba gore na di iša kae.” ₂₁Gape badudi bohle ba Athene le bafaladi ba gona ba be ba hlwa ba duletše go anega le go kwa tše difsa.

₂₂Paulose a ema kgorong a re: “Lena banna ba Athene, ke a bona gore dilong tšohle ke lena barapedi ba mmakgonthe. ₂₃Gobane ge ke ntše ke sepelasepela ke lebeletše mafelo a le khunamelago medimo ya lena go ona, ke bone le aletare ye nngwe ye e ngwadilwego go re: ‘Go modimo yo a sa tsebjego.’ Bjale ge, se le se khunamelago etšwe le sa se tsebe ke sona se bjale nna ke le begelago sona. ₂₄Modimo yo a hlodilego lefase le tšohle tše di lego mo go lona, yo e lego yena Morena wa legodimo le lefase, ga a dule ka ditempeleng tše di agilwego ke batho. ₂₅Le gona ga a nyake selo se batho ba kago mo fa sona ka go mo direla, ka ge e le yena ka noši yo a phedišago bohle le gona a fago bohle tšohle. ₂₆O hlodile ditšhaba tšohle ka motho o tee, gore di phele gohle lefaseng. Ke yena a di beetšego dinako le mafelo ao di tlago dula go ona. ₂₇Seo o be a se direla gore ba mo nyake, mohlomongwe ba mo hwetše ge ba mo phophola. Gape ga a kgole le yo mongwe le yo mongwe wa rena; ₂₈gobane mo go yena re a phela, re a ithokgonya, ebile re gona. Go bjalo ka ge direti tše dingwe tša gabolena di boletše tša re: ‘Le rena re bana ba gagwe.’ ₂₉Ka ge re le bana ba Modimo, re se ke ra gopola gore yena a ka swana le seswantšho sa gauta goba sa silibera goba sa leswika se se betlilwego ka bothakga le bokgoni bja motho. ₃₀Modimo o ile a hlokomologa mehla yela go yona batho ba bego ba sa mo tsebe, eupša bjale o ba laela bohle mo gohle gore ba sokologe. ₃₁Gobane o beile letšatši la ge a tlilo ahlola batho ba lefase ka toka ka monna yo a mo kgethilego. O tiišeditše taba ye ka go tsoša monna yoo bahung.”

₃₂E rile ge ba ekwa Paulose a bolela ka tša go tsošwa bahung, ba bangwe ba bona ba mo gegea, fela ba bangwe ba re: “Re nyaka gore o tle o re botše gape ka taba ye.” ₃₃Ke moka Paulose a tloga moo go bona. ₃₄Banna ba bangwe ba thoma go sepela naye mme ya ba badumedi; yo mongwe wa bona e be e le Dionisiose, wa lekgotla la motse, le mosadi yo mongwe yo ba rego ke Damarise, le ba bangwe.

₁Ka morago ga moo Paulose a tloga Athene a ya Korinte. ₂Moo a kopana le Mojuda yo mongwe yo ba rego ke Akhwila, yo a tswaletšwego Pontose. Yena o be a sa tšo tla a etšwa Italia gotee le Prisila, mosadi wa gagwe, gobane Kesare Klaudiose o be a laetše gore Bajuda ka moka ba tloge Roma. Paulose a ya go ba bona, ₃a dula le bona, a šoma le bona ka ge a be a phela ka go dira ditente bjalo ka bona. ₄Ka Disabatha o be a tšea kgang le batho ka sinagogeng, a leka go kgodiša Bajuda le Bagerike.

₅Ge Silase le Timotheose ba fihla ba etšwa Matsedonia, Paulose a ikgafela go begela Bajuda molaetša wa Modimo, a ba hlatselela gore Jesu ke Mesia. ₆E rile ge ba mo ganetša ebile ba mo roga, a hlohlora marole diaparong tša gagwe, a re go bona: “Ge le timetše, molato ke wa lena, nnaena ke hlapile diatla! Go tloga bjale ke napile ke ya go baditšhaba.” ₇Ke moka a tloga a ya ka ga monna yo ba rego ke Titose Justose, yo e bego e le mokhunamedi wa Modimo. Lapa la gagwe le be le kgauswi le sinagoge. ₈Krispose, yo e bego e le mookamedi wa sinagoge, o be a dumetše go Morena, yena le bohle ba lapa la gagwe. Le batho ba bangwe ba bantši kua Korinte ba rile go kwa molaetša wa Modimo ba dumela, gomme ba kolobetšwa.

₉E rile bošegong bjo bongwe Morena a botša Paulose ka pono a re: “O se ke wa šia, o fele o bolela, o se ke wa homola, ₁₀gobane ke na le wena. Ga go yo a tlago go dira selo, gobane ba bantši mo motseng wo ke ba ka.” ₁₁Paulose a dula moo ngwaga le dikgwedi tše di selelago, a ruta batho lentšu la Modimo.

₁₂E rile ge Galio e le mmušiši wa Agaya, Bajuda ba kgobokana, ba swara Paulose ba mo iša kgorong. ₁₃Ba re: “Monna yo o hlohleletša batho go khunamela Modimo ka mokgwa wo o ganwago ke molao.”

₁₄Paulose o rile a sa re o a bolela, Galio a botša Bajuda a re: “Ge taba ye e ka be e le ya bokebeka goba bosenyi bjo bogolo, lena Bajuda, nkabe ke tlemegile go le theeletša ke sa le felele pelo. ₁₅Eupša ka ge e le kgang ya mantšu le maina le molao wa lena, ke taba ye lena beng le swanetšego go iponela yona. Nna ga ke nyake go ba moahlodi wa taba tša mohuta wo.” ₁₆Ke moka a ba raka kgorong. ₁₇Bona ka moka ba swara Sostenese, mookamedi wa sinagoge, ba mmetha gona moo kgorong. Fela Galio yena a se re selo mo tabeng yeo.

₁₈Paulose a tšea lebakanyana a na le badumedi Korinte, a kgona a laelana nabo mme a eya Siria ka leselawatle, a na le Prisila le Akhwila. Pele ga ge a tloga Kenegrea, o ile a boolwa hlogo ka lebaka la ge a be a ikanne. ₁₉Ba rile go fihla Efeso a tlogela Prisila le Akhwila. A ya ka sinagogeng a fihla a tšea kgang le Bajuda. ₂₀Batho ba mo kgopela gore a dule nabo sebakanyana, fela yena a se dumele. ₂₁Gomme ge a sepela a ba botša a re: “Ge eba e le thato ya Modimo, ke tla boa ka tla mo go lena.” Ke moka a tloga Efeso ka leselawatle.

₂₂E rile ge a fihla Kesarea a rotogela Jerusalema a yo dumediša phuthego, ya ba o fetela Antiokia. ₂₃A re go fetša labaka gona, a feta a phatša naga ya Galatia le ya Frigia a tiiša badumedi bohle.

₂₄Kua Efeso go kile gwa tla Mojuda yo mongwe yo ba rego ke Apolose, yo a bego a tswaletšwe Aleksandria. Yena e be e le seboledi se segolo, a tseba Mangwalo a Makgethwa gabotse. ₂₅O be a rutilwe thuto ya Morena, gomme a begela batho a bile a ba ruta ka go nepa ditaba tša Jesu ka mafolofolo. Ge e le kolobetšo o be a tseba fela ya Johanese. ₂₆A thoma go bolela a sa boife ka sinagogeng. Prisila le Akhwila ba rile go mo kwa ba ya le yena ga gabobona, ba mo hlalošetša gabotse thuto ya Modimo. ₂₇E rile ge a nyaka go ya Agaya badumedi ba Efeso ba mo thuša ka go ngwalela badumedi ba gona gore ba mo amogele. Ge a fihla gona a thuša kudu bao e bego e le badumedi ka kgaugelo ya Modimo. ₂₈Gobane ge Bajuda ba tšea kgang le yena phatlalatša o be a ba phala ka dipolelo tša gagwe tše maatla, a bontšha ka Mangwalo a Makgethwa gore Jesu ke yena Mesia.