To The Word – Day 57

₁Baisraele ba ile ba se botegele Morena ba tshela taelo ya gagwe ya gore ba se ke ba tšea selo se se bego se swanetše go fedišwa. Monna yo mongwe yo a bego a bitšwa Akane o ile a tshela taelo yeo, ka fao Morena a tukela Baisraele bogale. Akane e be e le morwa wa Karmi, Karmi morwa wa Sabdi, wa kgorwana ya Serage, ya kgoro ya Juda.

₂Joshua o ile a roma banna ba bangwe go tloga Jeriko go ya Ai, motse wa ka bohlabela bja Bethele, kgauswi le Bethe-Abene. A ba botša gore ba ye ba hlole naga yeo. Ge ba e hlotše, ₃ba boa ba begela Joshua ba re: “Ga go nyakege gore ka moka re ye. Romela fela bahlabani ba e ka bago ba dikete tše pedi goba tše tharo, gomme ba tla thopa Ai. O se ke wa lapiša madira ka moka ka leeto la go yo hlabana; ga se motse wo mogolo.” ₄Ka gona bahlabani ba e ka bago ba dikete tše tharo ba hlasela Ai, eupša ba gapeletšega go tšhaba. ₅Banna ba Ai ba rakediša Baisraele go tloga kgorong ya motse go ba go yo fihla kua go epšago maswika, gomme ba bolaya ba e ka bago ba masome a mararo le metšo ye e selelago tseleng ge ba theoga mmoto. Baisraele ba nolega moko, mme ba boifa.

₆Joshua le baetapele ba Baisraele ba gagola diaparo tša bona ka manyami, ba itahlela fase ka difahlego pele ga Polokelo ya Kgwerano ya Morena, gomme ba patlama go fihlela mantšiboa, ba itšhetše dihlogo ka mobu go laetša manyami a bona. ₇Ke moo Joshua a itšego: “Joo, Morena, Mong wa ka! O reng o tshedišitše setšhaba se noka ya Jordane? Kgane o be o re tshedišetša go tlo re gafela diatleng tša Baamore gore ba re fediše? Nkabe re no itulela ka mošola wa Jordane. ₈A nka reng, Mong wa ka, ka gore Baisraele ba tšo tšhaba manaba a bona? ₉Bakanana le bohle ba ba agilego mo nageng ba tla kwa taba ye. Ba tla re dikanetša gomme ba re fediša! Bjale ke eng se o tlago se dira gore batho ba se ke ba go nyatša?”

₁₀Morena a re go Joshua: “Tsoga! Ke ka lebaka lang o itahletše fase ka sefahlego? ₁₁Baisraele ba dirile sebe! Ba lahlile kgwerano yela ba e dirilego le nna ye ke ba laetšego gore ba e botegele. Ba tšere tše dingwe tša dilo tšela di ilego tša gafelwa go fedišwa. Ba di utswitše, gomme ba ipolokela tšona ka sephiring le dilo tša bona. ₁₂Lebaka ke lona leo ge Baisraele ba šitwa ke go ema ba fenya manaba a bona. Ba a ba tšhaba, ka gobane bona ka bobona ba gafetšwe go fedišwa! Nka se sa ba le lena go iša pele, ge e se ge le ka fediša dilo tše le laetšwego gore le se ke la di tšea! ₁₃Tsoga! Hlwekiša setšhaba gomme o se lokišetše go tla pele ga ka. Ba botše gore ba itokišetše go tla go nna ka moswane, ka gobane nna, Modimo wa Baisraele, ke re: ‘Baisraele, le swere dilo tše dingwe tše ke le laetšego gore le di fediše! Le ka se kgone go ema la fenya manaba a lena ge le sa tloše dilo tšeo!’ ₁₄Ka gona mosong le batamele pele ga ka, kgoro ka kgoro. Kgoro yeo ke e ntšhago ka matengwa e batamele, kgorwana ka kgorwana. Kgorwana ye ke e ntšhago e batamele, lapa ka lapa. Lapa le ke le ntšhago le batamele, monna ka monna. ₁₅Monna yo a ka hwetšwago a swere phahlo ye e gafetšwego go fedišwa a tšhungwe, gotee le lapa la gagwe le tšohle tše e lego tša gagwe, ka gobane o dirile taba ya dihlong mo go Baisraele, mme o lahlile kgwerano ya ka.”

₁₆Joshua a tsoga e sa le bošego mosong wo o latelago, gomme a tliša Baisraele, kgoro ka kgoro. Gwa swarwa kgoro ya Juda. ₁₇A tliša ba dikgorwana tša Juda, gomme gwa tanywa kgorwana ya Serage. A tliša ba kgorwana ya Serage, lapa ka lapa, gomme gwa swarwa lapa la Sabdi. ₁₈A tliša lapa la Sabdi, monna ka monna, gomme gwa ntšhwa Akane. E be e le morwa wa Karmi, Karmi morwa wa Sabdi, wa kgorwana ya Serage, ya kgoro ya Juda. ₁₉Joshua a re go yena: “Ngwanaka, bolela therešo mo pele ga Morena, Modimo wa Israele, mme o ipolele. Mpotše bjale se o se dirilego. O se ke wa leka go nkutela sona.”

₂₀Akane a mo fetola a re: “Ee, ke dirile sebe pele ga Morena, Modimo wa Israele, mme se ke se dirilego sese: ₂₁Gare ga dilo tše re di thopilego ke ile ka bona seaparo se sebotse sa Sebabilonia, le silibera ya dikilokramo tše e ka bago tše pedi, le setena sa gauta sa boima bja go feta seripagare sa kilokramo. Ke ile ka di duma, ka di tšea. O tla di hwetša ke di epetše ka mošašeng wa ka, silibera e le ka fase.”

₂₂Ka gona Joshua a roma batseta ba bangwe ba kitimela mošašeng, mme ba hwetša gore ka therešo dilo tšela tša go gafelwa go fedišwa di epetšwe ka fao, silibera e le ka fase. ₂₃Ba di ntšha ka mošašeng, ba di iša go Joshua le go Baisraele ka moka, gomme ba di phatlalatša pele ga Morena. ₂₄Joshua gotee le setšhaba ka moka sa Israele ba tšea Akane le silibera yela le seaparo sela le setena sela sa gauta le barwa le barwedi ba gagwe le dikgomo tša gagwe le dipokolo le dihuswane le mošaša wa gagwe, le se sengwe le se sengwe se e bego e le sa gagwe, ba di iša Moeding wa Matshwenyego. ₂₅Ke moo Joshua a itšego: “Ke ka lebaka lang o re tlišeditše matshwenyego a mabjalo? Morena bjale o tla go tlišetša wena matshwenyego.” Setšhaba ka moka sa bolaya Akane ka maswika; ba bolaya le ba lapa la gagwe gotee le thoto ya gagwe, mme ba ba tšhuma. ₂₆Ba dira mokgobo wo mogolo wa maswika godimo ga gagwe wo o sa lego moo le lehono. Ke ka lebaka leo felo fao go sa bitšwago Moedi wa Matshwenyego.

Ka gona Morena a se sa tuka bogale.

₁Morena a re go Joshua: “Tloga le bahlabani ka moka le rotogele Ai. O se ke wa boifa goba wa nolega moko. Ke tla gafela kgoši ya Ai le setšhaba sa gagwe le motse le naga ya gagwe diatleng tša gago. ₂O dire Ai le kgoši ya yona se o se dirilego Jeriko le kgoši ya yona, fela fao le ka itšeela dithoto le diruiwa. Le ba laleleng ka morago ga motse.”

₃Ka gona Joshua a itokišetša go ya Ai le bahlabani ba gagwe ka moka. A hlaola bahlabani ba dikete tše masome a mararo, ba bagale madireng a gagwe, mme a ba ntšha mešašeng bošego. ₄A ba laela a re: “Le ba laleleng ka morago ga motse, fela e sego kgole kudu le wona; le dule le itokišeditše go hlasela. ₅Nna le bahlabani ba ka re tla batamela motse. Ge bahlabani ba Ai ba etla go lwa le rena, re tla tšhaba, bjalo ka mola lekgeng la pele. ₆Ba tla re rakediša go fihlela ge re ba išitše kgole le motse. Ba tla gopola gore re a ba tšhaba, bjalo ka mola ga pele. ₇Ke moka lena le tšwe mo le laletšego gona le thope motse. Morena Modimo wa lena o tla le gafela wona. ₈Ka morago ga ge le tšere motse woo le o tšhumeng, bjalo ka ge Morena a laetše. Ke ka moo ke le laelago ka gona.” ₉Ka gona Joshua a ba ntšha mešašeng, gomme ba ya mo ba yogo lalela ntshe mme ba leta ba le fao, ka bodikela bja Ai, gare ga Ai le Bethele. Joshua yena a robala mešašeng.

₁₀Eitše e sa le bošego Joshua a tsoga mme a rapa dira. Yena le baetapele ba Baisraele ba eta bahlabani pele go ya Ai. ₁₁Bahlabani ba ba bego ba na le yena ba ya ka pele ga motse mme ba hloma mešaša ka thoko ya ka leboa, bona le Ai ba kgaoganywa ke moedi. ₁₂A tšea banna ba e ka bago ba dikete tše tlhano a dira gore ba lalele ka bodikela bja motse, gare ga Ai le Bethele. ₁₃Bahlabani ba ile ba beakanyetšwa ntwa ka mokgwa wo: mešaša ye mentši e ile ya ba ka bohlabela bja motse, mme bahlabani ba ba šetšego ba ba ka bodikela. Joshua a robala ka moeding. ₁₄Ge kgoši ya Ai e bona bahlabani ba Joshua, e ile ya itlhaganela – yena le bahlabani ba gagwe ka moka ba tsoga e sa le bošego ba tšwa ba leba moeding wa Jordane go yo lwa le Baisraele lona lefelong lela ba go lwa nabo pele. O be a sa tsebe gore o laletšwe ka morago ga motse. ₁₅Joshua le bahlabani ba gagwe bohle ba dira mo nkego ba boela morago, mme ba tšhaba ba leba lešokeng. ₁₆Bahlabani ka moka motseng ba be ba biditšwe gore ba ba rakediše, gomme ge ba rakediša Joshua, ba katologa motse. ₁₇Bahlabani ka moka ba Ai ba rakediša Baisraele. Motse wa tlogelwa o ahlame.

₁₈Ke moo Morena a itšego go Joshua: “Šupa Ai ka lerumo la gago; ke e gafela diatleng tša gago.” Joshua a dira ka moo a botšwago ka gona, ₁₉gomme ge a seno emiša seatla, bahlabani bale ba bego ba laletše ba ema ka potlako, ba kgorogela motseng, ba o thopa. Ba o tšhuma ka bjako. ₂₀Ge bahlabani ba Ai ba lebelela morago, ba bona muši o kuelelela godimo. Go be go se moo ba ka tšhabelago gona, ka gobane Baisraele ba ba bego ba tšhabetše lešokeng bjale ba ile ba retologa gore ba ba hlasele. ₂₁Ge Joshua le bahlabani ba gagwe ba bona gore bale ba bangwe ba thopile motse le gore motse o a swa, ba retologa mme ba thoma go bolaya bahlabani ba Ai. ₂₂Baisraele bale ba lego motseng ba theoga go tlo kopana le madira a gabobona. Ka gona bahlabani ba Ai ba ikhwetša ba dikologilwe ke Baisraele ka mathoko ohle, mme ba bolawa ka moka. Ga go yo a ilego a phonyokga goba a tšhaba ₂₃ka ntle le kgoši ya Ai. Yena o ile a thopša, mme a išwa go Joshua.

₂₄Baisraele ba bolaya yo mongwe le yo mongwe wa manaba lešokeng mola ba ilego ba ba rakedišetša gona. Ka morago Baisraele ba gomela Ai mme ba bolaya yo mongwe le yo mongwe fao. _25-26Joshua a fela a šupile Ai ka lerumo la gagwe, mme a se ke a le iša fase go fihlela ge batho bohle fao ba bolailwe. Bohle ba ba bolailwego tšatšing leo, banna le basadi, e be e le ba dikete tše lesome le tše pedi, badudi bohle ba Ai. ₂₇Baisraele ba itšeela fela diruiwa le thoto ye e thopilwego motseng, bjalo ka ge Morena a boditše Joshua. ₂₈Joshua a tšhuma Ai, mme a e tlogela e le maroperope. E sa le ka mokgwa woo le lehono. ₂₉A lekeletša kgoši ya Ai koteng, gomme a lesa setopo sa gagwe se lekeletše fao go fihlela mantšiboa. Ge letšatši le dikela Joshua a laela gore setopo seo se tlošwe, gomme se ile sa lahlelwa kgorong ya motse. Ba dira mokgobo wo mogolo wa matlapa godimo ga sona woo o sa lego moo le lehono.

₃₀Mehleng yeo Joshua a agela Morena, Modimo wa Israele, aletare thabeng ya Ebale. ₃₁A e aga go ya ka ditaelo tše Moshe, mohlanka wa Morena, a ilego a di fa Baisraele, bjalo ka ge go bolelwa melaong ya Moshe go re: “E be aletare ye e agilwego ka matlapa ao a sego a betlwa ka dilo tša tshipi.” Ba direla Morena dihlabelo tša go tšhungwa ka moka godimo ga yona, ba tliša le dihlabelo tša bona tša kagišano. ₃₂Moo Joshua a ngwalolla melao ye e ngwadilwego ke Moshe, a e ngwalolla matlapeng Baisraele ba mo lebeletše. ₃₃Baisraele ka moka le baetapele ba bona le balaodi le baahlodi gotee le bafaladi ba ba lego gare ga bona ba ile ba ema ka mahlakoreng a mabedi a Polokelo ya Kgwerano ya Morena, ba lebane le baprista ba Balefi bao ba bego ba e rwele. Seripa sa setšhaba sa ema se lebane le thaba ya Gerisime, mme se sengwe se lebane le thaba ya Ebale, bjale ka ge Moshe, mohlanka wa Morena, a be a kile a ba laela gore ba dire ge nako e fihla ya gore ba amogele tšhegofatšo. ₃₄Ke moka Joshua a bala melao ka moka ka go hlaboša lentšu, gammogo le ditšhegofatšo le dithogako, bjalo ka ge di ngwadilwe ka pukung ya melao. ₃₅Wo mongwe le wo mongwe wa melao ya Moshe wa balwa ke Joshua pele ga setšhaba ka moka se se bego se akaretša basadi le bana, gotee le bafaladi ba ba bego ba dula gare ga bona.

₁Go fenya ga Baisraele go ile gwa tsebja ke magoši ka moka a ka bodikela bja Jordane – kua dithabeng le nagengtlase le go ipata le molala wa lebopong la Lewatle la Mediteraniene go ya leboa go ba go fihla Lebanone; ao e be e le magoši a Bahete, Baamore, Bakanana, Baperise, Bahibe le Bajebuse. ₂Ka moka ga bona ba kopana ba ipopa gore ba yo lwa le Joshua le Baisraele.

₃Batho ba Gibeone ba e bego e le Bahibe ba kwa se Joshua a se dirilego Jeriko le Ai, ₄gomme ba kwana go mo radia. Ba ile ba ya ba tšea dijo, gomme ba rweša dipokolo tša bona mekotla ya maratha le makuka a beine ao a pharilwego digaswa. ₅Ba apara diaparo tša mankgeretla mme ba rwala dieta tše di onetšego tše di rokilwego. Dinkgwa tša bona tša mefago di be di omeletše, di rathagane. ₆Ba ya go Joshua mešašeng kua Gilgale gomme ba re go yena le go banna ba Israele: “Re tlile mo re etšwa nageng ya kgole. Re nyaka gore le dire kwano le rena.”

₇Eupša banna ba Israele ba re: “Ke ka lebaka lang re swanetše go dira kwano le lena? Mogongwe le dula gona mo kgauswi.”

₈Banna bao ba re go Joshua: “Re diatleng tša gago.”

Joshua a ba botšiša a re: “A ke lena bomang? Le tšwa kae?”

₉Ke moo ba rilego go yena: “Re tšwa nageng ya kgole kudu, morena, ka gobane re kwele ka Morena Modimo wa gago. Re kwele ka tšohle tše a di dirilego Egepeta ₁₀le se a se dirilego dikgoši tšela tše pedi tša Baamore kua bohlabela bja Jordane: Kgoši Sihone wa Heshbone le Kgoši Ogo wa Bashane, yo a bego a dula Ashtarote. ₁₁Baetapele ba rena le batho ka moka ba ba dulago nageng ya rena ba ile ba re botša gore re tšee mefago re tle re le gahlanetše. Re boditšwe gore re ipee diatleng tša lena mme re le kgopele gore le dire kwano le rena. ₁₂Bona dinkgwa tša rena. Ge re thoma leeto la go tlo le gahlanetša mme re tloga gae le tšona, di be di sa le tše borutho. Bjale bonang! Di omeletše ebile di rathagane. ₁₃Ge re tlatša makuka a a beine e be e sa le a mafsa, eupša bjale bonang! A gagogile. Diaparo tša rena le dieta di onaditšwe ke leeto la rena le letelele.”

₁₄Banna ba Israele ba amogela ye mengwe ya mefago yeo ya bona, fela ba se ke ba botšiša Morena ka taba yeo. ₁₅Ka gona Joshua a dira kwano ya khutšo le bona ya go re a ba lese ba phele. Baetapele ba setšhaba sa Israele ba ba enela gore ba tla botegela kwano yeo.

₁₆Ka morago ga matšatši a mararo ge kwano yeo e dirilwe, Baisraele ba kwa gore ka kgonthe batho bale ba dula mo kgauswi. ₁₇Ka gona setšhaba sa Israele sa fetela pele, gomme ka morago ga matšatši a mararo ba fihla metseng ye batho bale ba bego ba dula go yona: Gibeone, Kefira, Beerote le Kiriate-Jearime. ₁₈Eupša Baisraele ba šitwa ke go ba bolaya, ka gobane baetapele ba bona ba be ba ba enetše ka leina la Morena, Modimo wa Israele. Setšhaba ka moka sa tla sa ngongoregela baetapele ka taba ye, ₁₉eupša bona ba ba fetola ba re: “Re ba enetše ka leina la Morena, Modimo wa Israele. Bjale re ka se kgone go ba kweša bohloko. ₂₀Re swanetše go ba lesa ba phele ka lebaka la keno ya rena; ge re ka se ba lese Modimo o tla re otla. ₂₁Ba leseng ba phele, fela ba tla swanelwa ke go re rwalelela dikgong le go re gela meetse.” Gwa ba ka mo baetapele ba boletšego ka gona.

₂₂Joshua a laela gore batho ba Gibeone ba tlišwe go yena, gomme a ba botšiša a re: “Ke ka lebaka lang le re radiile la re botša gore le tšwa kgole kudu, mola e le gore le dula gona mo? ₂₃Ka gobane le dirile taba yeo, le rogakilwe! Ka mehla le tla ba makgoba a go rwalela dikgong le a go ga meetse a sekgethwa sa Modimo wa ka.”

₂₄Ba mo fetola ba re: “Re dirile taba ye, morena, ka gobane re ile ra kwa gore ka nnete Morena Modimo wa lena o ile a laela mohlanka wa gagwe, Moshe, gore a le fe naga ye ka moka, le go bolaya batho ba ba dulago go yona ge le goroga. Re dirile taba yeo ka gobane re be re tšhogile kudu – re boifa gore re tlile go bolawa. ₂₅Bjale re diatleng tša gago; dira ka rena ka moo o bonago go swanetše.” ₂₆Ka gona Joshua a ba šireletša, gomme Baisraele ba se ke ba ba bolaya. ₂₇Eupša ka lona letšatši leo a ba dira barwaledi ba dikgong le bagi ba meetse a setšhaba sa Israele le a aletare ya Morena. Le lehono ba sa dira mošomo woo felong fao Morena a kgethago gore a khunamelwe gona.

₁Moprista yo Mogologolo a botšiša Stefane a re: “Na go bjalo?”

₂Stefane ge a fetola a re: “Bagešo, le lena botate, ntheeletšeng! Pele ga ge rakgolokhukhu wa rena, Abrahama, a hudugela Harane, Modimo wa letago o ile a iponagatša go yena kua Mesopotamia, ₃a re go yena: ‘Tlogela naga ya geno le meloko yeno o ye nageng ye ke tlago go bontšha yona.’ ₄Ke ge Abrahama a tloga nageng ya Bakaldea a eya go dula Harane. Ge tatagwe a seno hwa Modimo o ile a mo hudušetša mo nageng ye bjale lena le dulago go yona. ₅A se mo arolele le seripanyana sa yona, le ge e ka ba kgato. A mo holofetša gore o tla mo fa yona ya ba ya gagwe le ditlogolo tša gagwe. Ke ge Abrahama a sešo a ba le bana. ₆Se Modimo a mmoditšego sona sese: ‘Ditlogolo tša gago e tla ba bafaladi nageng e šele moo ba tlago ba makgoba ba hlakišwa mengwaga ye makgolo a mane. ₇Eupša setšhaba seo se tlago ba dira makgoba a sona ke tla se otla.’ A ba a re: ‘Ka morago ba tla tšwa nageng yeo, ba tla ba nkhunamela felo mo.’ ₈Ya ba Modimo o dira kgwerano le Abrahama, a ba a e tiišetša ka lebollo. Ka gona Abrahama a re go tswala Isaka a mmolotša ka letšatši la seswai go ba a tswalwa. Isaka a tla a bolotša Jakobo; Jakobo le yena a tla a bolotša barwa ba gagwe, bona bale ba lesome le ba babedi ba ba tlilego ba ba borakgolokhukhu ba setšhaba sa gaborena.

₉“Borakgolokhukhu bao ba ile ba hufegela Josefa, gomme ba mo rekiša a yo ba lekgoba Egepeta, fela Modimo a ba le yena. ₁₀A mo hlakodiša mathateng a gagwe ka moka. A mo fa bohlale mo a ilego a kgahla Farao, kgoši ya Egepeta, a ba a mmea mmušiši wa gagwe nageng le ka mošate. ₁₁Nageng ya Egepeta le ya Kanana gwa wa tlala ya go hlola tlalelo ye kgolo. Borakgolokhukhu ba rena ba hloka tša go ja, ₁₂gomme Jakobo a re go kwa gore kua Egepeta go na le mabele, a roma borakgolokhukhu ba rena, ba ya gona la mathomo. ₁₃E rile mohla ba eya la bobedi, Josefa a itsebiša banababo, gomme ya ba gona kgoši ya Egepeta a tsebago ba lapa la gaboJosefa. ₁₄Josefa a roma ba go yo tšea Jakobo, tatagwe, le ba lapa labo ka moka ba e bego e ka ba ba masome a a šupago le ba bahlano gore ba tle Egepeta. ₁₅Ke moka Jakobo a hudugela Egepeta mo yena le barwa ba gagwe, borakgolokhukhu ba rena, ba hwetšego gona. ₁₆Ditopo tša bona tša bušetšwa Shekeme moo di fihlilego tša bolokwa ka lebitleng le Abrahama a bego a le rekile ka tšhelete go barwa ba Hamore gona Shekeme.

₁₇“Ge nako e batamela ya gore Modimo a phethe se a se enetšego Abrahama, ke ge palo ya setšhaba sa gaborena Egepeta e oketšegile kudu. ₁₈Mafelelong kua Egepeta gwa buša kgoši ye e bego e sa tsebe Josefa. ₁₉Yona e ile ya radia setšhaba sa gaborena, ya se tlaiša, ya se gapeletša go lahla masea a bona gore a hwe. ₂₀Ke gona mo nakong ye mo Moshe a ilego a tswalwa, e le ngwana yo mobotse kudu. A fepša ka gabo dikgwedi tše tharo, ₂₁gomme ya re ge a ntšhitšwe ka gae, a thwalwa ke morwedi wa kgoši yo a ilego a mo godiša bjalo ka morwagwe. ₂₂Moshe a rutwa mahlale ohle a Baegepeta gomme ya ba senatla dipolelong le medirong ya gagwe.

₂₃“E rile ge a na le mengwaga ye masome a mane, a gopola go yo bona ka mo Baisraele ba gabo ba swerwego ka gona. ₂₄A bona yo mongwe wa bona a tlaišwa ke Moegepeta, gomme a ya go mo lamolela, a mo lefeletša ka go bolaya Moegepeta yoo. ₂₅Gape o be a nagana gore setšhaba sa gabo se tla kwešiša gore Modimo o tlilo se phološa ka yena, fela bona ba se kwešiše. ₂₆Ka le le latelago a hwetša Baisraele ba babedi ba elwa, gomme a leka go ba lamola a re: ‘Banna, le reng la re le le batho ba tee la lwa seng sa lena?’ ₂₇Yola a rumotšego mongwekayena a kgorometša Moshe, a mmotšiša a re: ‘Ke mang yo a go beilego molaodi le moahlodi wa rena? ₂₈Kgane le nna o nyaka go mpolaya bjalo ka ge o bolaile Moegepeta maabane?’ ₂₉Moshe a re go kwa a realo, a tšhaba a falalela nageng ya Midiane moo a fihlilego a tswala barwa ba babedi.

₃₀“Ge go fetile mengwaga ye masome a mane, morongwa wa Morena a itšweletša go yena lešokeng kgauswi le thaba ya Sinai a le ka kgabong ya mollo wo o laumago ka sehlašaneng sa meetlwa. ₃₁Moshe a tlabja ke se a se bonago. Ge a batamela gore a bone gabotse, a kwa lentšu la Morena le re: ₃₂‘Ke nna Modimo wa borakgolokhukhu ba gago, Modimo wa Abrahama le Isaka le Jakobo.’ Moshe a thothomela, a šia le go lebelela. ₃₃Morena a re go yena: ‘Rola dieta tša gago, gobane felo mo o emago gona ke mo gokgethwa. ₃₄Ruri, ke bone gabotse ka mo setšhaba sa ka se tlaišwago ka gona kua Egepeta. Ke kwele go tsetla ga bona, gomme ke theogetše go tlo ba lamolela. Bjale ge, etla ke go rome Egepeta.’

₃₅“Gape yo Moshe ke yola setšhaba sa Israele se mo gannego sa re: ‘Ke mang yo a go beilego molaodi le moahlodi wa rena?’ Ke yena yo Modimo a mo romilego go yo ba mmuši wa setšhaba le molokolli wa sona a thušwa ke morongwa yola wa go itšweletša go yena ka sehlašaneng seo sa meetlwa. ₃₆A ntšha setšhaba Egepeta, a dira dimakatšo le mehlolo gona Egepeta le Lewatlengkhubedu le kua lešokeng mengwaga ye masome a mane. ₃₇Yo Moshe ke yena yola a ilego a botša setšhaba sa Israele a re: ‘Modimo o tla le romela moprofeta wa go swana le nna a etšwa setšhabeng sa gabolena.’ ₃₈Moshe ke yena yola a bego a na le setšhaba sa Israele ge se kgobokane lešokeng; o be a na le borakgolokhukhu ba rena le morongwa yola a ilego a bolela le yena thabeng ya Sinai, gomme a amogela molaetša wa bophelo go tlo re fa wona.

₃₉“Eupša borakgolokhukhu ba rena ba gana go mo theeletša; ba mo tshwa ba duma ge ba ka be ba ka boela Egepeta. ₄₀Ba re go Arone: ‘Re direle medimo ya go re eta pele, ka gobane ga re tsebe gore yola Moshe wa go re ntšha Egepeta o hlagetšwe ke eng.’ ₄₁Ke mo ba dirilego modingwana wa powana, ba o tlišetša dihlabelo, ba ketekela se ba se bopilego ka diatla tša bona. ₄₂Ke ge Modimo a ba furalela, a ba gafela go khunamela dinaledi tša leratadima, bjalo ka ge go ngwadilwe ka pukung ya baprofeta gwa thwe:

₄₄“Borakgolokhukhu ba rena bona ba be ba šika le Tente ya bodulo bja Morena kua lešokeng. E be e dirilwe ka mo Modimo a bego a laetše Moshe, go ya ka mohlala wa yona wo a bego a o bone o thadilwe. ₄₅E rile ka morago borakgolokhukhu ba rena ba ba bego ba amogetše Tente ye go botatagobona ba sepela le yona mola ba etla le Joshua go thopa naga ye ditšhabeng tšela Modimo a ilego a di raka ge bona ba batamela. Tente e ile ya dula mo go bona go fihlela mehleng ya Dafida. ₄₆Yena o be a kgahla Modimo, gomme o ile a mo kgopela gore a mo dumelele go agela Modimo ntlo ya go tlo šomišwa ke ditlogolo tša Jakobo. ₄₇Fela ntlo yeo ya Modimo e tlile ya agwa ke Solomone.

₄₈“Fela Modimo Yogodimodimo ga a dule ka dintlong tše di agilwego ke batho, bjalo ka ge moprofeta a bolela a re:

₅₁“Lena dinganga, ga le na tumelo ka dipelong tša lena, le ditsebe di thibane! Ka mehla le ganetša Moya wo Mokgethwa, le etša borakgolokhukhu ba lena. ₅₂Kgane ke ofe moprofeta yo borakgolokhukhu ba lena ba sego ba ka ba mo hlomara? Etse ba bolaile bao kgale ba bego ba bega go tla ga Moloki. Gomme bjale lena le mo ekile la ba la mmolaya. ₅₃Etse ke lena ba le filwego melao ya Modimo wo o tlišitšwego ke barongwa, fela la se o phethe.”

₅₄Ge ba Kgorokgolo ba ekwa Stefane a realo, ba betwa ke dipelo, ba lomanya meno ba mo galefetše. ₅₅Stefane yena a lelalela legodimong a tletše Moya wo Mokgethwa, a bona letago la Modimo, a bona le Jesu a eme madulong a bogoši kgauswi le Modimo. ₅₆A re: “Bonang! Ke bona legodimong le bulegile gomme Morwamotho a eme madulong a bogoši kgauswi le Modimo!”

₅₇Ke ge ba Kgorokgolo ba goa ba ithiba ditsebe ka diatla. Ke moka ba mo phuthuma, ₅₈ba mo kgoromeletša ka ntle ga motse, ba mmolaya ka maswika. Dihlatse tšela tša bea diaparo tša tšona go lesogana le ba rego ke Saulo. ₅₉Ba mo keketa ka maswika, yena a fela a goelela Morena a re: “Morena Jesu, amogela moya wa ka!” ₆₀A khunama a goelela kudu a re: “Morena, o se ke wa ba balela sebe se!” A re go realo a ikhwela.

₁Ge e le Saulo yena o be a kwana le bokebeka bjo bja polao ya Stefane.

Lona tšatšing leo badumedi ba Jerusalema ba thoma go tlaišwa kudu. Badumedi ka moka ntle le baapostola ba phatlalala le selete sa Judea le sa Samaria. ₂Banna ba bangwe ba barapedi ba boloka Stefane, ba mo llela kudu.

₃Saulo yena a leka go fediša kereke, a tsena ntlwana ka ntlwana, a goga banna le basadi a ba lahlela ka kgolegong.

₄Badumedi bale ba go phatlalatšwa ba ya gohle ba tšama ba bega molaetša wa Modimo. ₅Filipi a ya mošate wa naga ya Samaria a fihla a begela batho ba gona tša Kriste. ₆Mašaba a batho a mo theeletša ge ba ekwa tše a di bolelago, ba bona le mehlolo ye a e dirago. ₇Meoya ye mebe e be e etšwa bathong ba bantši ka go goelela, le barephaditho ba bantši le digole tše dintši ba be ba fodišwa. ₈Ka gona gwa thakgalwa kudu motseng woo.

₉Gona motseng woo go go be go na le monna yo mongwe yo ba bego ba re ke Simone, yo e bego e šetše e le lebakanyana a tlaba batho ba Samaria ka maleatlana a gagwe, mme a itirile motho yo mogolo, ₁₀a theeletšwa ke batho ka moka, ba bagolo le ba bannyane. Ba re: “Ke yena yo e lego maatla a Modimo a go thwego ke ‘Magolo’.” ₁₁Ba be ba mo hlwaela tsebe ka ge e be e šetše e le kgale a ba tlaba ka maleatlana a gagwe. ₁₂Fela e rile ge ba seno kgolwa Filipi ge a ba begela Taba ye Botse ya mmušo wa Modimo le wa Jesu Kriste, ba kolobetšwa, e le banna le basadi. ₁₃Yo Simone le yena o ile a dumela, gomme a re go kolobetšwa a hlwa le Filipi, a tlabega kudu ge a bona mehlolo le dimakatšo tše dikgolo tše di dirwago.

₁₄Jerusalema baapostola ba kwa gore Basamaria ba amogetše lentšu la Modimo, ka gona ba roma Petrose le Johanese go bona. ₁₅Ba fihla ba ba rapelela gore ba amogele Moya wo Mokgethwa, ₁₆gobane o be o sešo wa theogela go bona, ba be ba kolobeditšwe go ba ba Morena Jesu ya ba moka. ₁₇Baapostola bao ba ba bea diatla, gomme bona ba amogela Moya wo Mokgethwa.

₁₈Simone ge a bona gore badumedi ba filwe Moya wo Mokgethwa ka go bewa diatla ke baapostola, a leka go ba reka ka tšhelete ₁₉a re: “Le nna mpheng maatla ao gore yo ke mmeago diatla a amogele Moya wo Mokgethwa.”

₂₀Petrose a mo fetola a re: “Nke o ka hwa mmogo le tšhelete yeo ya gago, ka ge o nagane gore o ka reka mpho ya Modimo ka tšhelete! ₂₁Le gatee o ka se šome le rena mo modirong wa rena, ka gobane Modimo o a bona gore o na le pelo ye mpe. ₂₂Ka gona, sokologa bobeng bjoo bja gago, o rapele Modimo gore a go swarele ge o nagane taba ya mohuta wo. ₂₃Gobane ke a bona gore o tletše lehufa, gomme sebe sa gago se go fetošitše mogolegwa wa sona.”

₂₄Simone a re: “Nthapeleleng go Morena gore ke se ke ka hlagelwa ke se sengwe sa tše le di boletšego tše.”

₂₅Baapostola ba rile go fetša go hlatsela le go bega molaetša wa Morena ba gomela Jerusalema, ba tšama ba bega ditaba tše dibotse tšeo metseng ye mentši ya Samaria.

₂₆Morongwa wa Morena a re go Filipi: “Ema o ye ka thoko ya borwa tseleng ye e tšwago Jerusalema e leba Gasa.” Tsela ye ga e sa sepelwa kudu. ₂₇Filipi a ema a tloga. Mo tseleng a hwetša moamogwabonna yo mongwe wa Moetopia, mohlankedi yo mogolo wa go hlokomela mahumo a kandase, kgošigadi ya Etopia. Yena o be a etšwa Jerusalema go rapela, ₂₈gomme a boela gae ka koloi, a tšama a bala puku ya moprofeta Jesaya. ₂₉Moya wo Mokgethwa wa re go Filipi: “Batamela koloi yela o e tle phaphi.” ₃₀Filipi a phakiša a ya go yona, gomme a kwa monna yoo a bala ka pukung ya moprofeta Jesaya. A mmotšiša a re: “Na seo o se balago o a se kwešiša?”

₃₁Mohlankedi yoo a mo fetola a re: “Nka se kwešiša bjang ke se na wa go ntlhalošetša?” A kgopela Filipi gore a namele a dule le yena ka koloing. ₃₂Temana ye a bego a e bala ka Mangwalong a Makgethwa še:

₃₄Mohlankedi yoo a botšiša Filipi a re: “Nke o mpotše gore moprofeta ge a realo o ra mang. O ra yena mong goba o ra yo mongwe?”

₃₅Ke ge Filipi a thoma go mo hlalošetša; go tloga ka yona temana ye a mo anegela Taba ye Botse ya Jesu Kriste. ₃₆Ge ba ntše ba swere tsela bjalo ba fihla mo go nago le meetse, gomme mohlankedi yoo a re: “Meetse šea. Bjale ke sa šitišwa ke eng go kolobetšwa?”

₃₈A laela gore koloi e emišwe, ba theogela ka meetseng ka babedi, Filipi le mohlankedi yoo, gomme Filipi a mo kolobetša. ₃₉Ge ba etšwa ka moo meetseng, Moya wo Mokgethwa wa široša Filipi. Mohlankedi yola a se sa mmona, fela a tšwela pele ka leeto la gagwe a thabile. ₄₀Filipi o ile a ikhwetša a le kua Ashdode; a sepela le metse yohle, a eta a bega Taba ye Botse ya Jesu, a ba a yo fihla Kesarea.

₁Saulo yena ke ge a sa galefile a tšhošetša badumedi ba Morena ka polao. A ya go Moprista yo Mogologolo ₂a mo kgopela mangwalo a go itsebiša disinagogeng tša motse wa Damaskose, gore ge a ka hwetša ba bangwe ba balatedi ba Jesu, banna goba basadi, a ba sware a ba tliše Jerusalema.

₃O rile ge a le leetong la go ya gona Damaskose, a šetše a batametše motse woo, seetša se se tšwago legodimong sa mo gadimela ka mathoko ohle. ₄A wela fase, a kwa lentšu le re: “Saulo, Saulo, o ntlhomaretšeng?”

₅A botšiša a re: “Ke wena mang, Morena?”

Lentšu leo la re: “Ke nna Jesu yo o mo hlomerego. ₆Bjale ge, emelela o ye ka mola motseng moo o tlago botšwa se o swanetšego go se dira.”

₇Banna ba ba bego ba sepela le yena ba be ba eme ba rile tuu. Gobane lentšu lona ba be ba le kwa, fela ba sa bone motho. ₈Saulo a emelela, a re o a lebaleba, fela o be a sa bone. Ka gona ba mo hlahla ka seatla ba mo iša ka Damaskose. ₉A fetša matšatši a mararo a sa bone, a sa je a bile a sa nwe selo.

₁₀Moo Damaskose go be go na le modumedi yo mongwe yo leina la gagwe e bego e le Ananiase. Yena o ile a bona pono, Morena a re go yena: “Ananiase!”

Yena a araba a re: “Morena!”

₁₁Morena a re go yena: “Ema, o ye tseleng ye ba rego ke Tselathwii, gomme ge o fihla ga Judase o nyake monna yo mongwe wa go tšwa Tarsose yo ba rego ke Saulo. Yena o a rapela, ₁₂gomme mo ponong o bone monna yo mongwe yo ba rego ke Ananiase a tsena a mmea diatla gore a boele a bone.”

₁₃Ananiase a mo fetola a re: “Morena, ke kwele ka batho ba bantši tša monna yoo, le ka mo a tlaišitšego badumedi ba gago gampe ka gona kua Jerusalema. ₁₄Gomme bjale o tlile mo a filwe ke baprista ba bagolo maatla a go swara bohle ba ba go khunamelago.”

₁₅Morena a re go yena: “Eya go yena, ka gobane ke mo kgethile gore e be mohlanka wa ka, a ntsebagatše go baditšhaba, le go magoši, le go Baisraele. ₁₆Gomme nna mong ke tla mmontšha tšohle tše a swanetšego go tlaišwa ka tšona ka lebaka la ka.”

₁₇Ananiase a ya, a fihla a tsena ka lapeng leo Saulo a bego a le ka go lona, a mmea diatla a re: “Saulo, ngwanešo, Morena – yena Jesu yo a itšweleditšego go wena tseleng ge o etla mono – o nthomile gore wena o boele o bone, le gore o tlatšwe Moya wo Mokgethwa.” ₁₈Ya re a sa realo, dilo tše nkego dikgapetla tša kgomarologa mahlong a Saulo, gomme a boela a bona. A emelela a kolobetšwa, ₁₉a re go ja a ikwa a tieletše.

Saulo a fetša matšatši a se makae moo Damaskose le badumedi ba gona. ₂₀A thoma le gona moo semeetseng go bega ka disinagogeng gore Jesu ke Morwa wa Modimo.

₂₁Bohle ba ba mo kwago ba botšišana ba tlabegile ba re: “Na ga se yena yola wa go bolaya ba ba khunamelago mongleina le kua Jerusalema? Ga ke re le bjale mono o tletše gona go ba swara a ba iša go baprista ba bagolo?”

₂₂Dithero tša Saulo e ile ya fela e eba tše maatla mme di tlaba Bajuda ba Damaskose ka go ba bontšha gore Jesu ke Mesia.

₂₃Ge go šetše go fetile lebakanyana, Bajuda ba lakana go mmolaya, ₂₄eupša a sebelwa maano a bona. Gape ba be ba dula ba dišitše masoro a motse bošego le mosegare gore ba tle ba mmolaye. ₂₅Ya re bošegong bjo bongwe balatedi ba gagwe ba mo ntšha ka lešoba morakong wa motse ba mo theošetša fase ka sešego.

₂₆Saulo o ile a ya Jerusalema a fihla a leka go itswalanya le balatedi ba Jesu, fela ka moka ba be ba mmoifa ba sa kgolwe gore le yena e ka ba molatedi wa Jesu. ₂₇A ba a thušwa ke Barnabase yo a ilego a mo iša go baapostola mme a ba laodišetša ka mo Saulo a bonego Morena tseleng, le gore Morena o boletše le yena. Barnabase a ba botša le ka mo Saulo a bego a ruta batho ka leina la Jesu ka mafolofolo kua motseng wa Damaskose. ₂₈Saulo a dula le bona a thetha le motse wa Jerusalema, a ruta ka leina la Morena ka mafolofolo. ₂₉Le gona o be a dula a boledišana a bile a phegišana le Bajuda ba go bolela Segerike, eupša bona ba leka go mmolaya. ₃₀Badumedi ba rile go lemoga taba ye ba iša Saulo Kesarea ba ba ba mo fetišetša Tarsose.

₃₁Ke ka mo kereke nageng yohle ya Judea le Galilea le Samaria e ilego ya ikhutša. Ya tia ya hlompha Morena, gomme ya gola e thušwa ke Moya wo Mokgethwa.

₃₂Petrose ge a fela a etela gohle, o kile a fihla go badumedi ba ba agilego motseng wa Lida. ₃₃Moo a hwetša monna yo mongwe yo ba rego ke Enease yo a bego a rephile ditho mme a feditše mengwaga ye seswai a sa tsoge. ₃₄A re go yena: “Enease, Jesu Kriste o a go fodiša. Tsoga, o ikalolele malao.” Enease a akgofa a tsoga. ₃₅Bohle ba ba agilego moo Lida le Sharone ba re go mmona ba sokologela go Morena.

₃₆Kua motseng wa Jope go be go na le modumedi yo mongwe wa mosadi ba re ke Thabitha, ka Segerike ke Dorkase, ke go re “tshephe”. Yena o be a dula a dira tše dibotse, le gona a thuša bahloki. ₃₇Lebakeng leo a hlabega, a ba a hlokafala. Ba re go hlapiša setopo sa gagwe ba se bea ka phapošing ye nngwe ya ka godimo. ₃₈Jope e be e se kgole le Lida, gomme ya re ge badumedi ba Jope ba ekwa gore Petrose o Lida, ba roma banna ba babedi go yena go mo kgopela ba re: “Nke o kgaoletše o tle mono go rena.” ₃₉Ka gona Petrose a ema a tloga nabo. Ge a fihla ba mo iša ka phapošing yela ya ka godimo mo a fihlilego a kgobokanelwa ke bahlologadi bohle ba eme ba lla, ba mmontšha diaparo tša ka gare le tša ka ntle tše Thabitha a di rokilego ge a sa phela. ₄₀Petrose a re go ba ntšhetša ntle ka moka a khunama a rapela; ke moka a retologela go setopo, a re go sona: “Thabitha, tsoga!” Thabitha a ponyologa, a re go bona Petrose a tsoga, a dula. ₄₁Petrose a mo swara ka seatla a mo emiša. A bitša badumedi bale gotee le bahlologadi bale, a ba neela yena a phedile. ₄₂Taba ye ya kwala motseng ka moka wa Jope, gomme batho ba bantši ba dumela go Morena. ₄₃Petrose a tšea lebaka moo Jope ka ga monna yo mongwe wa go šoga matlalo yo ba rego ke Simone.