To The Word – Day 56

₁Ge setšhaba ka moka se tshetše Jordane Morena a re go Joshua: ₂“Kgetha banna ba lesome le ba babedi, kgorong ye nngwe le ye nngwe le kgethe o tee, ₃gomme o ba laele gore ba tšee matlapa a lesome le a mabedi gare ga noka ya Jordane, gona mola baprista ba bego ba eme gona. O ba botše ba tshele ba rwele matlapa ao mme ba a role moo le tlago lala gona bošego bja lehono.”

₄Ke moo Joshua a biditšego banna bale ba lesome le ba babedi a go ba kgetha, ₅mme a re go bona: “Theogelang ka Jordane le etile Polokelo ya Kgwerano ya Morena Modimo wa lena pele. Yo mongwe le yo mongwe wa lena a šikare letlapa legetleng, le lengwe le le lengwe le emele kgoro e tee ya Israele. ₆Matlapa a a tla gopotša Baisraele seo Morena a se dirilego. Ka moso ge bana ba lena ba le botšiša gore matlapa a a šupang go lena, ₇le ba botše gore meetse a Jordane a ile a ema a se sa ela ge Polokelo ya Kgwerano ya Morena e tshela noka. Matlapa a a tla gopotša setšhaba sa Israele ka mehla ka ga seo se diragetšego fa.”

₈Banna bao ba dira seo Joshua a se laetšego. Bjalo ka ge Morena a boditše Joshua ba ile ba tšea matlapa a lesome le a mabedi gare ga Jordane, le lengwe le le lengwe le emela kgoro e tee ya Israele, ba a iša moo ba tlago robala gona, mme ba a rola fao. ₉Joshua le yena a hloma matlapa a lesome le a mabedi gare ga Jordane, moo baprista bale ba bego ba rwele Polokelo ya Kgwerano ba bego ba eme gona. Matlapa ao le bjale a sa le fao. ₁₀Baprista bao ba ile ba ema gare ga Jordane go fihlela se sengwe le se sengwe se dirwa seo Morena a laetšego Joshua gore setšhaba se se dire. Seo ke se Moshe le yena a ilego a se botša Joshua.

Setšhaba se ile sa itlhaganela sa tshela. ₁₁Ge ka moka ba tshetše, baprista ba ba bego ba rwele Polokelo ya Kgwerano ya Morena ba tshela setšhaba se ba lebeletše. ₁₂Banna ba kgoro ya Rubene le ba Gade le ba seripa sa kgoro ya Manase ba tshela pele ga setšhaba ka moka ba itlhametše ntwa, bjalo ka ge Moshe a be a ba boditše. ₁₃Fao pele ga Morena banna ba e ka bago ba dikete tše masome a mane ba tshelela molaleng wo o lego kgauswi le Jeriko ba itlhametše ntwa. ₁₄Se Morena a se dirilego letšatši leo se ile sa dira gore setšhaba sa Israele se hlomphe Joshua mme se mo tšee gore ke motho yo mogolo. Ba mo hlomphile bophelong bja gagwe ka moka, bjalo ka ge ba be ba hlompha Moshe.

₁₅Ke moo Morena a boditšego Joshua ₁₆gore a laele baprista ba ba rwelego Polokelo ya Kgwerano gore ba rotoge ba tšwe ka nokeng ya Jordane. ₁₇Joshua a dira bjalo. ₁₈Ge baprista ba rotogetše mo go omilego, noka ya thoma go ela gape, mme ya falalela ka ntle ga mabopo a yona bjalo ka pele.

₁₉Setšhaba se tshetše Jordane ka letšatši la lesome la kgwedi ya mathomo, gomme sa hloma mešaša kua Gilgale, ka bohlabela bja Jeriko. ₂₀Moo Joshua a tsema matlapa ale a lesome le a mabedi a ba bego ba a tšere ka nokeng ya Jordane. ₂₁Ka morago ga moo a re go setšhaba sa Israele: “Ka moso ge bana ba lena ba le botšiša gore matlapa a a šupa eng, ₂₂le ba botše ka tiragalo ya ge Baisraele ba tshela Jordane mobung wo o omilego. ₂₃Le ba botše gore Morena Modimo wa lena o le gopišeditše meetse a Jordane go fihlela ge le tshetše, bjalo ka ge a gopišitše Lewatle la Mahlaka go fihlela ge re le tshetše, ₂₄gore ditšhaba tšohle tša lefase di tsebe ka mo Morena e lego yo maatla, le gore le boife Morena Modimo wa lena go ya go ile.”

₁Magoši ka moka a Baamore ka bodikela bja Jordane le magoši ka moka a Bakanana go ipata le Lewatle la Mediteraniene a ile a kwa gore Morena o gopišitše Jordane go fihlela setšhaba sa Israele se e tshetše. Ba ile ba boifa mme ba nolega moko ka lebaka la go tšhaba Baisraele.

₂Ka yona nako yeo Morena a botša Joshua a re: “Itirele dithipa ka magakabje, gomme o bolotše Baisraele. Ba boele e be setšhaba se se bolotšego.” ₃Ka gona Joshua a dira dithipa tšeo gomme a ba bolotša felo fa go bitšwago Mmotong wa Lebollo. _4-6Ge setšhaba sa Israele se tloga Egepeta banna ka moka ba be ba šetše ba boloditšwe. Fela mo mengwageng ye masome a mane ye setšhaba se e feditšego ge se putla lešoka, ga go mošemanyana yo a kilego a bolotšwa. Le gona go ya mafelelong a nako yeo banna ka moka ba ntwa bao ba tšwilego Egepeta ba be ba šetše ba hwile, ka gobane ba be ba ile ba se theeletše Morena. Bjalo ka ge a be a enne, ga se ba ka ba dumelelwa go bona naga yela ya mokhora le monono ye a bego a enetše borakgolokhukhu ba bona gore o tla ba fa yona. ₇Barwa ba banna bao ba be ba se ba bolotšwa ge ba ralala le lešoka. Ke wona moloko woo wo mofsa wo Joshua a o boloditšego.

₈Ka morago ga ge a ba boloditše setšhaba ka moka sa dula mešašeng go fihlela dintho di fodile. ₉Morena a re go Joshua: “Lehono ke le tlošitše kgobogo ya go ba makgoba Egepeta.” Ke ka lebaka leo felo fao go ilego gwa fiwa leina la Gilgale, bjalo ka ge le lehono go sa bitšwa ka leina leo.

₁₀Ge Baisraele ba hlomile mešaša Gilgale molaleng kgauswi le Jeriko, ba ile ba swara Monyanya wa Paseka mantšiboeng a letšatši la lesome le metšo ye mene la kgwedi. ₁₁Ka lona letšatši le le latelago ba ja dijo tše di lemilwego Kanana: dinkgwa tše di se nago komelo, le dithuthupe tša mabele. ₁₂Ka morago ga moo manna a ile a se sa wa, gomme Baisraele ba se sa ba nao. Go thoma ka nako yeo ba ile ba ja dijo tše di lemilwego Kanana.

₁₃Ge Joshua a le kgauswi le Jeriko, ka bjako o ile a bona monna a eme pele ga gagwe a swere tšhoša. Joshua a ya go yena, a mmotšiša a re: “A o yo mongwe wa bahlabani ba rena, goba o lenaba?”

₁₄Monna yoo a mo fetola a re: “Ga ke yo mongwe wa bao o ba boletšego. Ke mo ka gobane ke le molaodi wa madira a Morena.”

Joshua a itahlela fase ka sefahlego, a re: “Mong wa ka, a o na le se o nyakago go mpotša sona, nna, mohlanka wa gago?”

₁₅Molaodi wa madira a Morena a re: “Rola dieta tša gago; o eme felo mo gokgethwa.” Gomme Joshua a dira ka moo a botšwago ka gona.

₁Dikgoro tša Jeriko di be di dula di tswaletšwe di kgontšwe gore Baisraele ba se ke ba tsena. Go be go se yo a ka kgonago go tsena goba go tšwa motseng. ₂Morena o ile a re go Joshua: “Ke gafela motse wa Jeriko le kgoši ya wona le bahlabani ba wona ba bogale ka moka diatleng tša gago. ₃Wena le bahlabani ba gago le dikologe motse gatee ka letšatši matšatši a a selelago. ₄Baprista ba ba šupago ba sepele pele ga Polokelo ya Kgwerano yo mongwe le yo mongwe wa bona a swere phalafala. Ka letšatši la bošupa wena le bahlabani ba gago le dikologe motse gašupa mola baprista ba letša diphalafala. ₅Ge le ekwa ba letša diphalafala gatee nako ye telele, bahlabani ka moka ba goe, mme morako wa motse o tla kgerega. Ke moka ba šwahlele motse, mongwe le mongwe a tloga mo a emego gona.”

₆Ka gona Joshua a bitša baprista a re go bona: “Rwalang Polokelo ya Kgwerano; ba ba šupago ba lena ba sepele pele ga yona ba swere diphalafala.” ₇A laela bahlabani ba gagwe gore ba dikologe motse, bahlabani ba ka pele ba sepele pele ga Polokelo ya Kgwerano ya Morena.

_8-9Bjalo ka ge Joshua a laetše, bahlabani ba ka pele ba sepela pele ga baprista ba ba bego ba letša diphalafala; ka morago ga bona gwa tla baprista ba ba rwelego Polokelo ya Kgwerano, gwa latela bahlabani ba ka morago. Nako yeo ka moka diphalafala di be di letšwa. ₁₀Fela Joshua o be a laetše banna ba gagwe gore ba se ke ba goa, ba se ke ba bolela selo, go fihlela ge a ba laela gore ba goe. ₁₁Ka gona a roma sehlopha seo sa banna gore se rwale Polokelo ya Kgwerano ya Morena se dikologe motse gatee. Ka morago ba boela mešašeng mme ba robala gona.

_12-13Ka letšatši le le latelago Joshua a tsoga e sa le bošego, gomme baprista le bahlabani ba dikologa motse gape ba latelana bjalo ka maabane a gona: gwa thoma bahlabani ba ka pele, gwa tla baprista ba ba šupago ba ba letšago diphalafala tše di šupago, gwa latela baprista ba ba rwelego Polokelo ya Kgwerano, mme mafelelong gwa tla bahlabani ba ka morago. Nako yeo ka moka diphalafala di be di letšwa. ₁₄Ka letšatši leo la bobedi ba dikologa motse gatee gape, mme ba boela mešašeng. Ba ile ba dira bjalo matšatši a a selelago.

₁₅Ka letšatši la bošupa ba tsoga ge letšatši le hlaba, mme ba dikologa motse gašupa ka wona mokgwa wola. E bile letšatši leo fela leo ka lona ba dikologilego motse gašupa. ₁₆Ka lekga la bošupa ge ba rarela, ge baprista ba batametše go letša diphalafala, Joshua a laela bahlabani ba gagwe a re: “Goang! Morena o le file motse wo! ₁₇Thubang motse wo, le bolaye batho le diphoofolo tša wona e le kabelo go Morena. Le phološe fela Rahaba, segwebakathobalo, le bohle ba ba nago le yena ka ntlong, ka gobane o utile dihlodi tša rena. ₁₈Fela lena le ileng tšohle tše di swanetšego go fedišwa, gore le se itlholele matshwenyego le dikotsi mo mešašeng ya Baisraele. ₁₉Eupša se sengwe le se sengwe se se dirilwego ka silibera, goba gauta, goba mphiri, goba tshipi se hlaoletšwe Morena. Se swanetše go bewa ka polokelong ya Morena.”

₂₀Ka gona baprista ba letša diphalafala. Ge bahlabani ba seno di kwa ba goa, gomme morako wa kgerega. Ke moo bahlabani ka moka ba šwahletšego motse mme ba o thopa. ₂₁Ba bolaya yo mongwe le yo mongwe motseng, banna le basadi, bafsa le batšofadi, ka tšhoša. Ba bolaya le dikgomo le dinku le dipokolo.

₂₂Ke moo Joshua a boditšego banna bale ba babedi ba e bego e le dihlodi a re: “Yaang ngwakong wa segwebakathobalo sela, mme le mo ntšheng gotee le ba ba nago le yena, bjalo ka ge le enne.” ₂₃Ka gona ba ya ba ntšha Rahaba gotee le tatagwe le mmagwe le dikgaetšedi le bohle ba ba nago le yena. Ba tšea lapa leo labo ka moka ba le iša mo go bolokegilego kgauswi le mešaša ya Israele. ₂₄Ka morago ba tšhuma motse thokgethokge gotee le se sengwe le se sengwe go wona, ntle le dilo tše di dirilwego ka gauta, goba silibera, goba mphiri, goba tshipi. Dilo tše ba ile ba di bea polokelong ya Morena. ₂₅Ge e le Rahaba, segwebakathobalo sela, le meloko yabo ka moka, Joshua o ile a ba phološa, ka gobane Rahaba o be a ile a uta dihlodi tšela tše pedi tše Joshua a bego a kile a di roma Jeriko. Ditlogolo tša Rahaba di dutše gare ga Baisraele go fihlela le lehono.

₂₆Ka nako yeo Joshua a eniša setšhaba a re: “Yo a kago leka go tsošološa motse wa Jeriko o tla lebanwa ke thogako ya Morena.

₂₇Ka gona Morena a ba le Joshua, gomme setumo sa gagwe sa phatlalala nageng ka moka.

₁E rile ge Petrose le Johanese ba sa bolela le batho, gwa fihla baprista ba bangwe le letona la baleti ba Tempele ba na le Basadusei ba bangwe. ₂Ba selekwa ke ge baapostola bao ba botša batho gore Jesu o tsogile bahung, e lego taba ye e šupago gore bahu ba tla tsoga. ₃Ka gona ba ba swara, ba ba iša kgolegong, ba ba latša gona, ka ge e be e šetše e le mathapama. ₄Fela ba bantši ba ba bego ba kwele molaetša wa bona ba ile ba dumela; gomme bjale palo ya ba ba dumelago e be e šetše e ka ba dikete tše tlhano.

₅Ka le le latelago bagolo ba Bajuda le bakgomana le boramangwalo ba kgobokana Jerusalema. ₆Ba rerišana le Hanase, Moprista yo Mogologolo, le Khayafase le Johanese le Aleksandere le bohle ba gaboMoprista yo Mogologolo. ₇Ba emiša baapostola bao mo pele ga bona, ba ba botšiša ba re: “Se le se dirile ka maatla a mang, gona le se kgontšhitšwe ke mang?”

₈Petrose a ba fetola a tletše Moya wo Mokgethwa a re: “Lena bagolo ba setšhaba le lena bakgomana, ₉lehono le re sekišetša modiro wo mobotse wo re o diretšego motho wa segole, le re o fodišitšwe bjang. ₁₀Bjale ge, lena ka moka le setšhaba sohle sa Israele, tsebang gore motho yo o eme mo pele ga lena a fodišitšwe ka maatla a Jesu Kriste wa Nasaretha, yola lena le mmapotšego sefapanong mme Modimo a mo tsoša bahung. ₁₁Ke yena

₁₃Ba Kgorokgolo ya Bajuda ba ile ba tlabega ge ba bona Petrose le Johanese ba bolela ka go se boife, mola bona ba kwele gore banna bao ga se ba go rutega, ga se ba maemo. Le gona ba be ba lemoga gore banna bao ke ba bangwe ba bale ba bego ba šika le Jesu. ₁₄Fela ka ge ba be ba bona monna yola wa go fodišwa a eme nabo, ba ile ba hloka se ba ka kgonago go se ganetša. ₁₅Ka gona ba ba laela gore ba tšwe ka Kgorongkgolo, mme bona ba šala ba botšišana ₁₆ba re: “Na banna ba re ka ba dirang? Batho ka moka mo Jerusalema ba tseba gabotse gore mohlolo wo mogolo wo o dirilwe ke bona, gomme re ka se ganetše. ₁₇Fela gore taba ye e se phatlalale mo setšhabeng, a re ba tšhošetšeng, re re ba se sa botša motho ka Jesu.”

₁₈Ke ge ba ba bitša, ba ba laya gore le ka mohla o tee ba se bolele goba ba ruta tša Jesu. ₁₉Eupša Petrose le Johanese ba ba fetola ka go re: “Ikahloleleng, lena beng, gore go Modimo se se lokilego ke go theeletša lena goba yena na. ₂₀Ge e le rena re ka se lese go bolela tše rena beng re di bonego le gona re di kwelego.” ₂₁Ba rile go ba tšhošetša le go feta, ba ba lesa ba sepela. Gape ba be ba bona gore go ba otla ba ka se kgone, ka ge batho ka moka ba be ba reta Modimo ka lebaka la taba tše di diregilego. ₂₂Monna yo mohlolo woo o bego o dirilwe go yena o be a na le mengwaga ye e fetago ye masome a mane.

₂₃Petrose le Johanese ba rile go lokollwa moo ba boela go badumedi ba bangwe, ba ba anegela tše baprista ba bagolo le bagolo ba setšhaba ba di boletšego. ₂₄Bona ba rile go di kwa ba rapela Modimo mmogo ba re:

₃₁Ya re ge ba fetša go rapela, lefelo leo ba bego ba kgobokane mo go lona la šikinyega. Bohle ba tlala Moya wo Mokgethwa, gomme ba thoma go bega molaetša wa Modimo ka go se boife.

₃₂Badumedi bjale e be e šetše e le ba bantši, mme e le ba pelo e tee le moya o tee. Go be go se yo a rego tše a nago le tšona ke tša gagwe a nnoši, eupša tšohle e be e le tša bona ka moka. ₃₃Baapostola bona ba be ba hlatsela ka mafolofolo a magolo gore Morena Jesu o tsogile bahung, gomme bohle Modimo o ba atlile kudu. ₃₄Mo go bona go be go se mohloki. Bao ba bego ba na le mašemo goba dintlo ba be ba di rekiša, ba tliše tšhelete ya gona, ₃₅ba e neele baapostola; gomme yona e abelwe bohle go ya ka mo motho a hlokago ka gona.

₃₆Ke ka mo Josefa, Molefi yo ka matswalo e bego e le wa Saeprose, yo baapostola ba bego ba mmitša ka la Barnabase, ke go re “Mokgothatši”, ₃₇le yena a ilego a rekiša tšhemo ya gagwe, a tliša tšhelete ya gona, a e neela baapostola.

₁Monna yo mongwe yo ba rego ke Ananiase le mosadi wa gagwe, Safira, le bona ba rekiša tšhemo ya bona. ₂Ananiase a ipeela tšhelete ye nngwe ye e lefetšwego tšhemo yeo, mosadi le yena a tseba, gomme ye nngwe a e neela baapostola. ₃Petrose a mmotšiša a re: “Ananiase, o reng o dumeletše Sathane a laola pelo ya gago a go dira gore o botše Moya wo Mokgethwa maaka, o ipeele tšhelete ye nngwe ye e lefetšwego tšhemo ya gago? ₄Tšhemo yela ge e sešo ya rekišwa e be e le ya gago. Ešita le ge e seno rekišwa tšhelete ya gona o ka be o dirile se o se ratago ka yona. Bjale o naganetšeng taba ya mohuta wo? Maaka ga se wa a botša batho, o a boditše Modimo!” ₅Ananiase o rile go kwa mantšu ao a wela fase a hwa. Bohle ba ba kwago taba ye ba tšhoga kudu. ₆Masogana a tla, a mo phutha, a mo ntšhetša ntle, a yo mmoloka.

₇Ge go fetile diiri tše e ka bago tše tharo gwa tsena mosadi wa gagwe a sa tsebe se se diregilego. ₈Petrose a mmotšiša a re: “Nke o mpotše mo: Na tšhemo ya lena le e rekišitše bokaa?”

Yena a mo fetola a re: “Ee, ke bokaalo.”

₉Ke ge Petrose a re go yena: “Le reng le lakane go leka Moya wa Morena? Tseba ge gore bao ba sa tšogo boloka monna wa gago ba mo mojako, gomme le wena ba tlilo go rwala!” ₁₀Gateetee Safira ke ge a wela mo pele ga Petrose a ehwa. Masogana ale ge a tsena a mmona a hwile, gomme a mo rwala a yo mmoloka kgauswi le monna wa gagwe. ₁₁Phuthego le bohle ba ba kwelego taba ye ba tšhoga kudu.

₁₂Modimo o be a dira mehlolo ye mentši le dika tše dintši mo bathong ka baapostola. Badumedi bohle ba be ba kopanela mathuding a Solomone. ₁₃Go be go se motho yo a ka rego e se modumedi a beta pelo a ikopanya le bona, le ge mokagona batho ba be ba ba hlompha kudu. ₁₄Ba ile ba fela ba oketšwa ke batho ka bontši – banna le basadi ba ba bego ba eba badumedi ba Morena. ₁₅Ka lebaka la mehlolo ye baapostola ba bego ba e dira, balwetši ba be ba išwa ditseleng ba robatšwe malaong le magogweng, gore e re ge Petrose a feta, ba bangwe ba bona ba upše ba kgongwe ke moriti wa gagwe. ₁₆Le batho ba ba tšwago metseng ya ka mathoko a Jerusalema ka bontši ba tliša ba ba lwalago le ba ba tlaišwago ke meoya ye mebe, gomme bohle ba fodišwa.

₁₇Moprista yo Mogologolo gotee le bathekgi ba gagwe, ba mokgatlo wa Basadusei, ba tsebafela baapostola e le ruri; ka gona ba ikemišetša go ba hlokofatša. ₁₈Ba ba swara ba ba iša kgolegong yeo go yona go išwago bagolegwa ka moka. ₁₉Fela ya re bošego morongwa wa Morena a tla a bula mejako ya kgolego, a ntšha baapostola, a re go bona: ₂₀“Sepelang Tempeleng le fihle le botše setšhaba ditaba tšohle tša bophelo bjo bofsa bjo.” ₂₁Baapostola ba kwa taelo yeo, gomme ge go esa ba ya Tempeleng ba fihla ba ruta batho.

Moprista yo Mogologolo le bathekgi ba gagwe ba rile go fihla ba rapa pitšo ya Kgorokgolo, e lego ya bagolo ka moka ba Baisraele; ba roma bahlanka go yo lata baapostola kgolegong. ₂₂Fela bahlanka bao ge ba fihla kgolegong ba se hwetše baapostola, gomme ba gomela Kgorongkgolo ba fihla ba bega ba re: ₂₃“Re hweditše kgolego e tswaletšwe kgwehle, baleti ba yona bona ba eme mejako; ya re ge re bula ra hwetša go se motho ka gare.” ₂₄Baprista ba bagolo le letona la baleti ba Tempele ge ba ekwa taba ye ba tlabega, ba maketše gore na ekaba baapostola ba hlagetšwe ke eng. ₂₅Ke ge go fihla monna yo mongwe, a re go bona: “Theeletšang! Banna bale le ba išitšego kgolegong šebale kua Tempeleng ba ruta batho!” ₂₆Letona la baleti ba Tempele la ya le bahlanka ba lona go lata baapostola, fela e sego ka go ba gapeletša, ka gobane ba be ba šia gore setšhaba se ka ba bolaya ka maswika.

₂₇Ba ba tliša ba ba emiša mo pele ga Kgorokgolo, gomme Moprista yo Mogologolo a ba botšiša a re: ₂₈“Na ga ke re re le laile tsebegokwa gore le se sa ruta batho tše di bego di rutwa ke monna yo? Eupša ke gona le tladitše motse wa Jerusalema ka thuto ya lena, gomme le nyaka go re rweša molato wa polao ya monna yo!”

₂₉Petrose le baapostola bale ba bangwe ba ba fetola ba re: “Re swanetše go theeletša Modimo go feta ge re theeletša batho. ₃₀Modimo wa borakgolokhukhu ba rena o tsošitše Jesu yola le mmolailego ka go mo kokotela sefapanong. ₃₁Modimo o mo phagamišitše a mmea madulong a bogoši kgauswi le yena ya ba Moetapele le Mophološi, gore Baisraele ba sokologe gomme ba swarelwe dibe ka yena. ₃₂Mo tabeng tše re dihlatse, rena le Moya wo Mokgethwa wo Modimo a o filego ba ba mo hlomphago.”

₃₃E rile ge ba Kgorokgolo ba ekwa baapostola ba realo, ba galefa mo ba ilego ba rata ge ba ka bolawa. ₃₄Eupša yo mongwe wa bona, Mofarisei yo ba rego ke Gamaliele, yo e bego e le ramangwalo wa go hlompšha ke setšhaba ka moka, a ema moo Kgorongkgolo a re baapostola ba ntšhetšwe ka ntle lebakanyana. ₃₅Ke moka a botša Kgorokgolo a re: “Baisraele, le hlokomele se le nyakago go se dira batho ba. ₃₆Ga se kgale kudu go ile gwa tšwelela Theudase, a itira motho yo maatla, gomme a latelwa ke batho ba e ka bago ba makgolo a mane. Fela o rile go bolawa balatedi bale ba gagwe ka moka ba gašagana, gomme mokgatlo wa gagwe wa hwa. ₃₇Ka morago ga moo gwa tšwelela Judase wa Mogalilea ka nako yela go balwa batho; a hlohleletša batho ba bantši ba mo latela, fela le yena a re go bolawa balatedi ba gagwe ba gašagana. ₃₈Bjale nna ke re le bona ba ba leseng ba sepele, le se ba dire selo. Ge eba tše ba di rerilego le tše ba di dirilego tše ke tša batho, di tla hwelela moyeng. ₃₉Fela ge eba ke tše di tšwago go Modimo gona le ka se kgone go ba thibela. Ge le ka leka, e tla be e le ge le elwa le Modimo.”

Ba Kgorokgolo ba mo dumela.

₄₀Ke ge ba bitša baapostola, ba laela gore ba otlwe ka tshelane, ba ba ba ba laya gore ba se sa ruta batho tše di bego di rutwa ke Jesu; ke moka ba ba lesa ba tloga. ₄₁Bapostola bona ge ba tloga moo Kgorongkgolo ba be ba thabile ka gobane Modimo o be a bone go ba loketše gore ba gobošwe ka lebaka la Jesu. ₄₂Gomme ka mehla ba hlwela go ruta batho Tempeleng le ka malapeng, ba bega Taba ye Botse ya go re Jesu ke yena Mesia.

₁Mabakeng ao, ge badumedi ba ntše ba ata, gwa tsoga dingongorego mo go Bajuda ba ba bolelago Segerike, ba lla ka Bajuda ba ba bolelago Seheberu. Sello sa bona e be e le gore bahlologadi ba gabobona ga ba šetšwe ge go abiwa dimpho ka mehla. ₂Ke ge baapostola bale ba lesome le ba babedi ba kgoboketša badumedi ka moka ba re: “Ga se tshwanelo gore rena re hlokomologe go bega lentšu la Modimo, re abele batho dimpho. ₃Ka gona, banabešo, kgethang banna ba ba šupago mo go lena ba go tuma ba ba nago le Moya wo Mokgethwa le bohlale, ba re kago ba fa modiro wo. ₄Ke mo rena beng re tlago ikgafela go rapela le go bega molaetša wa Modimo.”

₅Taba ye e ile ya kgahla badumedi ka moka, gomme ba kgetha Stefane, monna wa tumelo ye kgolo yo a tletšego Moya wo Mokgethwa, le Filipi le Progorose le Nikanoro le Timone le Parmenase, le Nikolase wa go tšwa Antiokia, yo a bego a sokologetše tumelong ya Sejuda. ₆Ba ba tliša go baapostola, gomme ba ba rapelela ba ba bea diatla.

₇Gomme lentšu la Modimo la fela le phatlalala, palo ya badumedi Jerusalema ya fela e gola kudu, baprista le bona ba dumela go Jesu Kriste ka bontši.

₈Stefane, monna yo a bego a šegofaditšwe kudu ke Modimo mme a tletše maatla, o be a dira dimakatšo tše dikgolo le mehlolo ye megolo mo bathong. ₉Fela o be a lwantšhwa ke banna ba bangwe ba sehlopha se go thwego ke sa sinagoge ya Balokollwa, e le Bajuda ba go tšwa Sirene le Aleksandria. Bona bao gotee le Bajuda ba bangwe ba go tšwa seleteng sa Tsilitsia le sa Asia ba tla ba ngangišana le Stefane. ₁₀Fela ba palelwa ke go mo phala ka dipolelo ka lebaka la bohlale bjo a bego a bo filwe ke Moya wo Mokgethwa. ₁₁Ka gona ba hlohleletša banna ba bangwe gore ba re: “Rena re mo kwele ge a bolela ditaba tša go goboša Moshe le Modimo.” ₁₂Ka go realo ya ba ge ba hlohleleditše setšhaba le bagolo ba sona le boramangwalo. Ba mo wela godimo, ba mo swara, ba mo iša Kgorongkgolo. ₁₃Ke moka ba tliša dihlatse tša maaka tša re: “Motho yo ka mehla o bolela gampe ka Tempele ye ye kgethwa le melao ya Moshe. ₁₄Gape re mo kwele ge a re Jesu wa Nasaretha o tla kgereša Tempele, a fetoša le ditlwaedi tše re di filwego ke Moshe.” ₁₅Bohle ba ba bego ba le moo Kgorongkgolo ba rile ba sa mo tomoletše mahlo bjalo ba bona sefahlego sa gagwe se swana le sa morongwa.