DITIRO 9

₁Saulo yena ke ge a sa galefile a tšhošetša badumedi ba Morena ka polao. A ya go Moprista yo Mogologolo ₂a mo kgopela mangwalo a go itsebiša disinagogeng tša motse wa Damaskose, gore ge a ka hwetša ba bangwe ba balatedi ba Jesu, banna goba basadi, a ba sware a ba tliše Jerusalema.

₃O rile ge a le leetong la go ya gona Damaskose, a šetše a batametše motse woo, seetša se se tšwago legodimong sa mo gadimela ka mathoko ohle. ₄A wela fase, a kwa lentšu le re: “Saulo, Saulo, o ntlhomaretšeng?”

₅A botšiša a re: “Ke wena mang, Morena?”

Lentšu leo la re: “Ke nna Jesu yo o mo hlomerego. ₆Bjale ge, emelela o ye ka mola motseng moo o tlago botšwa se o swanetšego go se dira.”

₇Banna ba ba bego ba sepela le yena ba be ba eme ba rile tuu. Gobane lentšu lona ba be ba le kwa, fela ba sa bone motho. ₈Saulo a emelela, a re o a lebaleba, fela o be a sa bone. Ka gona ba mo hlahla ka seatla ba mo iša ka Damaskose. ₉A fetša matšatši a mararo a sa bone, a sa je a bile a sa nwe selo.

₁₀Moo Damaskose go be go na le modumedi yo mongwe yo leina la gagwe e bego e le Ananiase. Yena o ile a bona pono, Morena a re go yena: “Ananiase!”

Yena a araba a re: “Morena!”

₁₁Morena a re go yena: “Ema, o ye tseleng ye ba rego ke Tselathwii, gomme ge o fihla ga Judase o nyake monna yo mongwe wa go tšwa Tarsose yo ba rego ke Saulo. Yena o a rapela, ₁₂gomme mo ponong o bone monna yo mongwe yo ba rego ke Ananiase a tsena a mmea diatla gore a boele a bone.”

₁₃Ananiase a mo fetola a re: “Morena, ke kwele ka batho ba bantši tša monna yoo, le ka mo a tlaišitšego badumedi ba gago gampe ka gona kua Jerusalema. ₁₄Gomme bjale o tlile mo a filwe ke baprista ba bagolo maatla a go swara bohle ba ba go khunamelago.”

₁₅Morena a re go yena: “Eya go yena, ka gobane ke mo kgethile gore e be mohlanka wa ka, a ntsebagatše go baditšhaba, le go magoši, le go Baisraele. ₁₆Gomme nna mong ke tla mmontšha tšohle tše a swanetšego go tlaišwa ka tšona ka lebaka la ka.”

₁₇Ananiase a ya, a fihla a tsena ka lapeng leo Saulo a bego a le ka go lona, a mmea diatla a re: “Saulo, ngwanešo, Morena – yena Jesu yo a itšweleditšego go wena tseleng ge o etla mono – o nthomile gore wena o boele o bone, le gore o tlatšwe Moya wo Mokgethwa.” ₁₈Ya re a sa realo, dilo tše nkego dikgapetla tša kgomarologa mahlong a Saulo, gomme a boela a bona. A emelela a kolobetšwa, ₁₉a re go ja a ikwa a tieletše.

Saulo a fetša matšatši a se makae moo Damaskose le badumedi ba gona. ₂₀A thoma le gona moo semeetseng go bega ka disinagogeng gore Jesu ke Morwa wa Modimo.

₂₁Bohle ba ba mo kwago ba botšišana ba tlabegile ba re: “Na ga se yena yola wa go bolaya ba ba khunamelago mongleina le kua Jerusalema? Ga ke re le bjale mono o tletše gona go ba swara a ba iša go baprista ba bagolo?”

₂₂Dithero tša Saulo e ile ya fela e eba tše maatla mme di tlaba Bajuda ba Damaskose ka go ba bontšha gore Jesu ke Mesia.

₂₃Ge go šetše go fetile lebakanyana, Bajuda ba lakana go mmolaya, ₂₄eupša a sebelwa maano a bona. Gape ba be ba dula ba dišitše masoro a motse bošego le mosegare gore ba tle ba mmolaye. ₂₅Ya re bošegong bjo bongwe balatedi ba gagwe ba mo ntšha ka lešoba morakong wa motse ba mo theošetša fase ka sešego.

₂₆Saulo o ile a ya Jerusalema a fihla a leka go itswalanya le balatedi ba Jesu, fela ka moka ba be ba mmoifa ba sa kgolwe gore le yena e ka ba molatedi wa Jesu. ₂₇A ba a thušwa ke Barnabase yo a ilego a mo iša go baapostola mme a ba laodišetša ka mo Saulo a bonego Morena tseleng, le gore Morena o boletše le yena. Barnabase a ba botša le ka mo Saulo a bego a ruta batho ka leina la Jesu ka mafolofolo kua motseng wa Damaskose. ₂₈Saulo a dula le bona a thetha le motse wa Jerusalema, a ruta ka leina la Morena ka mafolofolo. ₂₉Le gona o be a dula a boledišana a bile a phegišana le Bajuda ba go bolela Segerike, eupša bona ba leka go mmolaya. ₃₀Badumedi ba rile go lemoga taba ye ba iša Saulo Kesarea ba ba ba mo fetišetša Tarsose.

₃₁Ke ka mo kereke nageng yohle ya Judea le Galilea le Samaria e ilego ya ikhutša. Ya tia ya hlompha Morena, gomme ya gola e thušwa ke Moya wo Mokgethwa.

₃₂Petrose ge a fela a etela gohle, o kile a fihla go badumedi ba ba agilego motseng wa Lida. ₃₃Moo a hwetša monna yo mongwe yo ba rego ke Enease yo a bego a rephile ditho mme a feditše mengwaga ye seswai a sa tsoge. ₃₄A re go yena: “Enease, Jesu Kriste o a go fodiša. Tsoga, o ikalolele malao.” Enease a akgofa a tsoga. ₃₅Bohle ba ba agilego moo Lida le Sharone ba re go mmona ba sokologela go Morena.

₃₆Kua motseng wa Jope go be go na le modumedi yo mongwe wa mosadi ba re ke Thabitha, ka Segerike ke Dorkase, ke go re “tshephe”. Yena o be a dula a dira tše dibotse, le gona a thuša bahloki. ₃₇Lebakeng leo a hlabega, a ba a hlokafala. Ba re go hlapiša setopo sa gagwe ba se bea ka phapošing ye nngwe ya ka godimo. ₃₈Jope e be e se kgole le Lida, gomme ya re ge badumedi ba Jope ba ekwa gore Petrose o Lida, ba roma banna ba babedi go yena go mo kgopela ba re: “Nke o kgaoletše o tle mono go rena.” ₃₉Ka gona Petrose a ema a tloga nabo. Ge a fihla ba mo iša ka phapošing yela ya ka godimo mo a fihlilego a kgobokanelwa ke bahlologadi bohle ba eme ba lla, ba mmontšha diaparo tša ka gare le tša ka ntle tše Thabitha a di rokilego ge a sa phela. ₄₀Petrose a re go ba ntšhetša ntle ka moka a khunama a rapela; ke moka a retologela go setopo, a re go sona: “Thabitha, tsoga!” Thabitha a ponyologa, a re go bona Petrose a tsoga, a dula. ₄₁Petrose a mo swara ka seatla a mo emiša. A bitša badumedi bale gotee le bahlologadi bale, a ba neela yena a phedile. ₄₂Taba ye ya kwala motseng ka moka wa Jope, gomme batho ba bantši ba dumela go Morena. ₄₃Petrose a tšea lebaka moo Jope ka ga monna yo mongwe wa go šoga matlalo yo ba rego ke Simone.