JOSHUA 8

₁Morena a re go Joshua: “Tloga le bahlabani ka moka le rotogele Ai. O se ke wa boifa goba wa nolega moko. Ke tla gafela kgoši ya Ai le setšhaba sa gagwe le motse le naga ya gagwe diatleng tša gago. ₂O dire Ai le kgoši ya yona se o se dirilego Jeriko le kgoši ya yona, fela fao le ka itšeela dithoto le diruiwa. Le ba laleleng ka morago ga motse.”

₃Ka gona Joshua a itokišetša go ya Ai le bahlabani ba gagwe ka moka. A hlaola bahlabani ba dikete tše masome a mararo, ba bagale madireng a gagwe, mme a ba ntšha mešašeng bošego. ₄A ba laela a re: “Le ba laleleng ka morago ga motse, fela e sego kgole kudu le wona; le dule le itokišeditše go hlasela. ₅Nna le bahlabani ba ka re tla batamela motse. Ge bahlabani ba Ai ba etla go lwa le rena, re tla tšhaba, bjalo ka mola lekgeng la pele. ₆Ba tla re rakediša go fihlela ge re ba išitše kgole le motse. Ba tla gopola gore re a ba tšhaba, bjalo ka mola ga pele. ₇Ke moka lena le tšwe mo le laletšego gona le thope motse. Morena Modimo wa lena o tla le gafela wona. ₈Ka morago ga ge le tšere motse woo le o tšhumeng, bjalo ka ge Morena a laetše. Ke ka moo ke le laelago ka gona.” ₉Ka gona Joshua a ba ntšha mešašeng, gomme ba ya mo ba yogo lalela ntshe mme ba leta ba le fao, ka bodikela bja Ai, gare ga Ai le Bethele. Joshua yena a robala mešašeng.

₁₀Eitše e sa le bošego Joshua a tsoga mme a rapa dira. Yena le baetapele ba Baisraele ba eta bahlabani pele go ya Ai. ₁₁Bahlabani ba ba bego ba na le yena ba ya ka pele ga motse mme ba hloma mešaša ka thoko ya ka leboa, bona le Ai ba kgaoganywa ke moedi. ₁₂A tšea banna ba e ka bago ba dikete tše tlhano a dira gore ba lalele ka bodikela bja motse, gare ga Ai le Bethele. ₁₃Bahlabani ba ile ba beakanyetšwa ntwa ka mokgwa wo: mešaša ye mentši e ile ya ba ka bohlabela bja motse, mme bahlabani ba ba šetšego ba ba ka bodikela. Joshua a robala ka moeding. ₁₄Ge kgoši ya Ai e bona bahlabani ba Joshua, e ile ya itlhaganela – yena le bahlabani ba gagwe ka moka ba tsoga e sa le bošego ba tšwa ba leba moeding wa Jordane go yo lwa le Baisraele lona lefelong lela ba go lwa nabo pele. O be a sa tsebe gore o laletšwe ka morago ga motse. ₁₅Joshua le bahlabani ba gagwe bohle ba dira mo nkego ba boela morago, mme ba tšhaba ba leba lešokeng. ₁₆Bahlabani ka moka motseng ba be ba biditšwe gore ba ba rakediše, gomme ge ba rakediša Joshua, ba katologa motse. ₁₇Bahlabani ka moka ba Ai ba rakediša Baisraele. Motse wa tlogelwa o ahlame.

₁₈Ke moo Morena a itšego go Joshua: “Šupa Ai ka lerumo la gago; ke e gafela diatleng tša gago.” Joshua a dira ka moo a botšwago ka gona, ₁₉gomme ge a seno emiša seatla, bahlabani bale ba bego ba laletše ba ema ka potlako, ba kgorogela motseng, ba o thopa. Ba o tšhuma ka bjako. ₂₀Ge bahlabani ba Ai ba lebelela morago, ba bona muši o kuelelela godimo. Go be go se moo ba ka tšhabelago gona, ka gobane Baisraele ba ba bego ba tšhabetše lešokeng bjale ba ile ba retologa gore ba ba hlasele. ₂₁Ge Joshua le bahlabani ba gagwe ba bona gore bale ba bangwe ba thopile motse le gore motse o a swa, ba retologa mme ba thoma go bolaya bahlabani ba Ai. ₂₂Baisraele bale ba lego motseng ba theoga go tlo kopana le madira a gabobona. Ka gona bahlabani ba Ai ba ikhwetša ba dikologilwe ke Baisraele ka mathoko ohle, mme ba bolawa ka moka. Ga go yo a ilego a phonyokga goba a tšhaba ₂₃ka ntle le kgoši ya Ai. Yena o ile a thopša, mme a išwa go Joshua.

₂₄Baisraele ba bolaya yo mongwe le yo mongwe wa manaba lešokeng mola ba ilego ba ba rakedišetša gona. Ka morago Baisraele ba gomela Ai mme ba bolaya yo mongwe le yo mongwe fao. _25-26Joshua a fela a šupile Ai ka lerumo la gagwe, mme a se ke a le iša fase go fihlela ge batho bohle fao ba bolailwe. Bohle ba ba bolailwego tšatšing leo, banna le basadi, e be e le ba dikete tše lesome le tše pedi, badudi bohle ba Ai. ₂₇Baisraele ba itšeela fela diruiwa le thoto ye e thopilwego motseng, bjalo ka ge Morena a boditše Joshua. ₂₈Joshua a tšhuma Ai, mme a e tlogela e le maroperope. E sa le ka mokgwa woo le lehono. ₂₉A lekeletša kgoši ya Ai koteng, gomme a lesa setopo sa gagwe se lekeletše fao go fihlela mantšiboa. Ge letšatši le dikela Joshua a laela gore setopo seo se tlošwe, gomme se ile sa lahlelwa kgorong ya motse. Ba dira mokgobo wo mogolo wa matlapa godimo ga sona woo o sa lego moo le lehono.

₃₀Mehleng yeo Joshua a agela Morena, Modimo wa Israele, aletare thabeng ya Ebale. ₃₁A e aga go ya ka ditaelo tše Moshe, mohlanka wa Morena, a ilego a di fa Baisraele, bjalo ka ge go bolelwa melaong ya Moshe go re: “E be aletare ye e agilwego ka matlapa ao a sego a betlwa ka dilo tša tshipi.” Ba direla Morena dihlabelo tša go tšhungwa ka moka godimo ga yona, ba tliša le dihlabelo tša bona tša kagišano. ₃₂Moo Joshua a ngwalolla melao ye e ngwadilwego ke Moshe, a e ngwalolla matlapeng Baisraele ba mo lebeletše. ₃₃Baisraele ka moka le baetapele ba bona le balaodi le baahlodi gotee le bafaladi ba ba lego gare ga bona ba ile ba ema ka mahlakoreng a mabedi a Polokelo ya Kgwerano ya Morena, ba lebane le baprista ba Balefi bao ba bego ba e rwele. Seripa sa setšhaba sa ema se lebane le thaba ya Gerisime, mme se sengwe se lebane le thaba ya Ebale, bjale ka ge Moshe, mohlanka wa Morena, a be a kile a ba laela gore ba dire ge nako e fihla ya gore ba amogele tšhegofatšo. ₃₄Ke moka Joshua a bala melao ka moka ka go hlaboša lentšu, gammogo le ditšhegofatšo le dithogako, bjalo ka ge di ngwadilwe ka pukung ya melao. ₃₅Wo mongwe le wo mongwe wa melao ya Moshe wa balwa ke Joshua pele ga setšhaba ka moka se se bego se akaretša basadi le bana, gotee le bafaladi ba ba bego ba dula gare ga bona.