DITIRO 5

₁Monna yo mongwe yo ba rego ke Ananiase le mosadi wa gagwe, Safira, le bona ba rekiša tšhemo ya bona. ₂Ananiase a ipeela tšhelete ye nngwe ye e lefetšwego tšhemo yeo, mosadi le yena a tseba, gomme ye nngwe a e neela baapostola. ₃Petrose a mmotšiša a re: “Ananiase, o reng o dumeletše Sathane a laola pelo ya gago a go dira gore o botše Moya wo Mokgethwa maaka, o ipeele tšhelete ye nngwe ye e lefetšwego tšhemo ya gago? ₄Tšhemo yela ge e sešo ya rekišwa e be e le ya gago. Ešita le ge e seno rekišwa tšhelete ya gona o ka be o dirile se o se ratago ka yona. Bjale o naganetšeng taba ya mohuta wo? Maaka ga se wa a botša batho, o a boditše Modimo!” ₅Ananiase o rile go kwa mantšu ao a wela fase a hwa. Bohle ba ba kwago taba ye ba tšhoga kudu. ₆Masogana a tla, a mo phutha, a mo ntšhetša ntle, a yo mmoloka.

₇Ge go fetile diiri tše e ka bago tše tharo gwa tsena mosadi wa gagwe a sa tsebe se se diregilego. ₈Petrose a mmotšiša a re: “Nke o mpotše mo: Na tšhemo ya lena le e rekišitše bokaa?”

Yena a mo fetola a re: “Ee, ke bokaalo.”

₉Ke ge Petrose a re go yena: “Le reng le lakane go leka Moya wa Morena? Tseba ge gore bao ba sa tšogo boloka monna wa gago ba mo mojako, gomme le wena ba tlilo go rwala!” ₁₀Gateetee Safira ke ge a wela mo pele ga Petrose a ehwa. Masogana ale ge a tsena a mmona a hwile, gomme a mo rwala a yo mmoloka kgauswi le monna wa gagwe. ₁₁Phuthego le bohle ba ba kwelego taba ye ba tšhoga kudu.

₁₂Modimo o be a dira mehlolo ye mentši le dika tše dintši mo bathong ka baapostola. Badumedi bohle ba be ba kopanela mathuding a Solomone. ₁₃Go be go se motho yo a ka rego e se modumedi a beta pelo a ikopanya le bona, le ge mokagona batho ba be ba ba hlompha kudu. ₁₄Ba ile ba fela ba oketšwa ke batho ka bontši – banna le basadi ba ba bego ba eba badumedi ba Morena. ₁₅Ka lebaka la mehlolo ye baapostola ba bego ba e dira, balwetši ba be ba išwa ditseleng ba robatšwe malaong le magogweng, gore e re ge Petrose a feta, ba bangwe ba bona ba upše ba kgongwe ke moriti wa gagwe. ₁₆Le batho ba ba tšwago metseng ya ka mathoko a Jerusalema ka bontši ba tliša ba ba lwalago le ba ba tlaišwago ke meoya ye mebe, gomme bohle ba fodišwa.

₁₇Moprista yo Mogologolo gotee le bathekgi ba gagwe, ba mokgatlo wa Basadusei, ba tsebafela baapostola e le ruri; ka gona ba ikemišetša go ba hlokofatša. ₁₈Ba ba swara ba ba iša kgolegong yeo go yona go išwago bagolegwa ka moka. ₁₉Fela ya re bošego morongwa wa Morena a tla a bula mejako ya kgolego, a ntšha baapostola, a re go bona: ₂₀“Sepelang Tempeleng le fihle le botše setšhaba ditaba tšohle tša bophelo bjo bofsa bjo.” ₂₁Baapostola ba kwa taelo yeo, gomme ge go esa ba ya Tempeleng ba fihla ba ruta batho.

Moprista yo Mogologolo le bathekgi ba gagwe ba rile go fihla ba rapa pitšo ya Kgorokgolo, e lego ya bagolo ka moka ba Baisraele; ba roma bahlanka go yo lata baapostola kgolegong. ₂₂Fela bahlanka bao ge ba fihla kgolegong ba se hwetše baapostola, gomme ba gomela Kgorongkgolo ba fihla ba bega ba re: ₂₃“Re hweditše kgolego e tswaletšwe kgwehle, baleti ba yona bona ba eme mejako; ya re ge re bula ra hwetša go se motho ka gare.” ₂₄Baprista ba bagolo le letona la baleti ba Tempele ge ba ekwa taba ye ba tlabega, ba maketše gore na ekaba baapostola ba hlagetšwe ke eng. ₂₅Ke ge go fihla monna yo mongwe, a re go bona: “Theeletšang! Banna bale le ba išitšego kgolegong šebale kua Tempeleng ba ruta batho!” ₂₆Letona la baleti ba Tempele la ya le bahlanka ba lona go lata baapostola, fela e sego ka go ba gapeletša, ka gobane ba be ba šia gore setšhaba se ka ba bolaya ka maswika.

₂₇Ba ba tliša ba ba emiša mo pele ga Kgorokgolo, gomme Moprista yo Mogologolo a ba botšiša a re: ₂₈“Na ga ke re re le laile tsebegokwa gore le se sa ruta batho tše di bego di rutwa ke monna yo? Eupša ke gona le tladitše motse wa Jerusalema ka thuto ya lena, gomme le nyaka go re rweša molato wa polao ya monna yo!”

₂₉Petrose le baapostola bale ba bangwe ba ba fetola ba re: “Re swanetše go theeletša Modimo go feta ge re theeletša batho. ₃₀Modimo wa borakgolokhukhu ba rena o tsošitše Jesu yola le mmolailego ka go mo kokotela sefapanong. ₃₁Modimo o mo phagamišitše a mmea madulong a bogoši kgauswi le yena ya ba Moetapele le Mophološi, gore Baisraele ba sokologe gomme ba swarelwe dibe ka yena. ₃₂Mo tabeng tše re dihlatse, rena le Moya wo Mokgethwa wo Modimo a o filego ba ba mo hlomphago.”

₃₃E rile ge ba Kgorokgolo ba ekwa baapostola ba realo, ba galefa mo ba ilego ba rata ge ba ka bolawa. ₃₄Eupša yo mongwe wa bona, Mofarisei yo ba rego ke Gamaliele, yo e bego e le ramangwalo wa go hlompšha ke setšhaba ka moka, a ema moo Kgorongkgolo a re baapostola ba ntšhetšwe ka ntle lebakanyana. ₃₅Ke moka a botša Kgorokgolo a re: “Baisraele, le hlokomele se le nyakago go se dira batho ba. ₃₆Ga se kgale kudu go ile gwa tšwelela Theudase, a itira motho yo maatla, gomme a latelwa ke batho ba e ka bago ba makgolo a mane. Fela o rile go bolawa balatedi bale ba gagwe ka moka ba gašagana, gomme mokgatlo wa gagwe wa hwa. ₃₇Ka morago ga moo gwa tšwelela Judase wa Mogalilea ka nako yela go balwa batho; a hlohleletša batho ba bantši ba mo latela, fela le yena a re go bolawa balatedi ba gagwe ba gašagana. ₃₈Bjale nna ke re le bona ba ba leseng ba sepele, le se ba dire selo. Ge eba tše ba di rerilego le tše ba di dirilego tše ke tša batho, di tla hwelela moyeng. ₃₉Fela ge eba ke tše di tšwago go Modimo gona le ka se kgone go ba thibela. Ge le ka leka, e tla be e le ge le elwa le Modimo.”

Ba Kgorokgolo ba mo dumela.

₄₀Ke ge ba bitša baapostola, ba laela gore ba otlwe ka tshelane, ba ba ba ba laya gore ba se sa ruta batho tše di bego di rutwa ke Jesu; ke moka ba ba lesa ba tloga. ₄₁Bapostola bona ge ba tloga moo Kgorongkgolo ba be ba thabile ka gobane Modimo o be a bone go ba loketše gore ba gobošwe ka lebaka la Jesu. ₄₂Gomme ka mehla ba hlwela go ruta batho Tempeleng le ka malapeng, ba bega Taba ye Botse ya go re Jesu ke yena Mesia.