To The Word – Day 55

₁Ge Moshe, mohlanka wa Morena, a hwile, Morena o ile a bolela le modiredi wa Moshe, Joshua, morwa wa Nunu, ₂a re: “Mohlanka wa ka, Moshe, o hwile. Bjale itokiše, wena le setšhaba ka moka sa Israele, le tsheleng noka ye ya Jordane le tseneng nageng ye ke le fago yona. ₃Bjalo ka ge ke boditše Moshe, ke le file naga ka moka ye le tlago sepela go yona. ₄Mellwane ya lena e tla tloga lešokeng la ka borwa, ya fihla dithabeng tša Lebanone ka leboa; ka bohlabela e tla tloga nokeng ye kgolo ya Yufratese, ya putla naga ya Bahete, ya fihla Lewatleng la Mediteraniene ka bodikela. ₅Joshua, ga go yo a ka tsogago a go fentše ge o sa phela. Ke tla ba nago bjalo ka ge ke bile le Moshe. Ke tla ba le wena ka mehla; nka se tsoge ke go tlogetše. ₆O be le sebete, o tie, ka gobane ke wena o tlago thopela setšhaba se naga ye, ye ke ilego ka enela borakgolokhukhu ba sona gore ke tla se fa yona. ₇Fela o be le sebete, o tie, mme o hlokomele gore o phele ka melao ka moka ye mohlanka wa ka, Moshe, a go filego yona. O se ke wa e tshela le gatee, gore o tle o atlege mo gongwe le mo gongwe mo o yago gona. ₈Puku ye ya melao e balwe ka mehla tirelong ya lena. O ithute yona bošego le mosegare gore o tle o kgone go phela ka se sengwe le se sengwe se se ngwadilwego go yona. Ke moo o tlago atlega wa tšwelela. ₉A ke re ke go laetše gore o be le sebete, o tie! O se ke wa boifa goba wa nolega moko, ka gobane nna, Morena Modimo wa gago, ke na le wena gohle mo o yago gona.”

₁₀Ke moo Joshua a laetšego baetapele ₁₁gore ba sepele le mešaša mme ba botše setšhaba ba re: “Lokišang mefago, ka gobane ka morago ga matšatši a mararo le tlile go tshela noka ya Jordane go yo thopa naga ye Morena Modimo wa lena a le fago yona.”

₁₂Joshua a re go kgoro ya Rubene le ya Gade le go seripa sa kgoro ya Manase: ₁₃“Gopolang ka mo Moshe, mohlanka wa Morena, a le boditšego gore Morena Modimo wa lena o tla le fa naga ye ya ka bohlabela bja Jordane gore e be legae la lena. ₁₄Basadi ba lena le bana le diruiwa ba ka šala mo nageng ye Moshe a le filego yona. Eupša madira a lena a a itlhametšego ntwa ona a tshele pele ga Baisraele ba gabolena go ba thuša, ₁₅go fihlela ba thopa naga ye Morena Modimo wa lena a ba filego yona. Ge Morena a gorošitše dikgoro tše dingwe tša Israele bjalo ka lena, gona le ka boa la tla la itulela mo nageng ya lena ye Moshe, mohlanka wa Morena, a le filego yona, ka mo bohlabela bja Jordane.”

₁₆Ba fetola Joshua ba re: “Re tla dira tšohle tše o re boditšego tšona, ra ya gohle mo o re laelago gona. ₁₇Re tla go theeletša, bjalo ka ge ka mehla re be re theeletša Moshe. A Morena Modimo wa gago a be le wena bjalo ka ge a bile le Moshe! ₁₈Yo a nyatšago se o se bolelago goba a sa phethego ye nngwe ya ditaelo tša gago a bolawe. Tabakgolo ke gore o be le sebete, o tie!”

₁Joshua a roma dihlodi tše pedi ka sephiring go tloga mešašeng kua Megohlong a re di yo hlola naga, gagologolo motse wa Jeriko. Ge ba fihla gona, ba ile ba ya ngwakong wa segwebakathobalo seo leina la sona e bego e le Rahaba gore ba robale moo. ₂Kgoši ya Jeriko ya kwa gore Baisraele ba bangwe ba tlile bošego bjoo go tlo hlola naga. ₃Ka gona a roma batseta go Rahaba gore ba mmotše ba re: “Banna bao ba lego ngwakong wa gago ba tlile go hlola naga ka moka. Ba ntšhe!”

_4-6Mosadi yoo a ba fetola a re: “Ke therešo, banna ba bangwe ba ile ba tla ngwakong wa ka, fela ga se ka ka ka tseba gore ba tšwa kae. Ba sepetše ge letšatši le dikela, ge kgoro ya motse e tswalelwa. Ga se ka ba botšiša gore ba ya kae, fela ge le ka ba šala morago ntle le go diega, le ka ba swara tseleng.” Rahaba o be a nameditše dihlodi tšela ka godimo ga tlhaka ya ntlo, gomme a di utile ka fase ga mahlaka a leokodi ao a bego a a beile fao. ₇Batseta bale ba kgoši ba tšwa motseng, mme kgoro ya tswalelwa. Ba nyaka dihlodi tšela tša Baisraele go ba go yo fihla moo tsela e tshelago Jordane.

₈Pele ga ge dihlodi tšela di robala, Rahaba a namelela tlhakeng ₉gomme a re go tšona: “Ke a tseba gore Morena o le file naga ye. Re a boifa. Yo mongwe le yo mongwe nageng ye o le tšhogile. ₁₀Re kwele ka moo Morena a ilego a omiša Lewatle la Mahlaka ge le fihla gona le etšwa Egepeta. Re kwele ka moo le bolailego Sihone le Ogo, dikgoši tše pedi tša Baamore, ka bohlabela bja Jordane. ₁₁Ge re ekwa taba tšeo re ile ra boifa; yo mongwe le yo mongwe o nolegile moko ka lebaka la lena. Morena Modimo wa lena ke Modimo kua godimo legodimong le mo fase lefaseng. ₁₂Bjale enang ka Morena gore le tla dira lapa la ka ka botho bjalo ka ge ke le dirile ka botho, mme le mphe sešupo se se kgodišago ₁₃gore le tla phološa tate le mme le dikgaetšedi le bomogolwake le banabešo le malapa a bona ka moka. Le se ke la re lesa re bolawa!”

₁₄Banna bao ba re go yena: “A Modimo a re bolaye ge re ka se le phološe! Ge o ka se bolele se re bego re se dira, re go holofetša gore re tla go swara setho ge Morena a re neela naga ye.”

₁₅Rahaba o be a dula ngwakong wo o kgohlaganego le morako wo o dikaneditšego motse, ka gona a fološetša banna bao ka ntle ka lefasetere ka thapo. ₁₆A re: “Le yeng kua nageng ya dithaba gore banna bale ba le hlomerego ba se ke ba le hwetša. Le utameng moo matšatši a mararo go fihlela ba boa. Ka morago ga fao gona le ka ikela mo le yago gona.”

₁₇Banna bao ba re go yena: “Re ka se tshele keno ye o re enišitšego yona. ₁₈Sese se o swanetšego go se dira: Ge re šwahlela naga ye ya geno, o tlemelele thapo ye ye khubedu lefasetereng le o re fološitšego ka lona. O kgobokanye tatago le mmago le dikgaetšedi le bohle ba lapa la tatago ka mo ngwakong wa gago. ₁₉Ge yo mongwe a ka tšwa ka mo ngwakong mme a bolawa, molato e tla ba wa gagwe, gomme re ka se bonwe molato tabeng yeo; eupša ge yo mongwe yo a lego ka mo ngwakong le wena a ka kwešwa bohloko, yeo e tla ba phošo ya rena. ₂₀Fela ge o ka botša yo mongwe se re bego re se dira mo, gona re ka se tlemege go phetha keno ye o re enišitšego yona.” ₂₁Rahaba a dumela gomme a ba lesa ba sepela. Ge ba sepetše a tlemelela thapo yela ye khubedu lefasetereng.

₂₂Dihlodi tšeo tša ya nageng ya dithaba mme tša utama gona. Banna bale ba bego ba ba hlomere ba ile ba ba nyaka nageng ka moka matšatši a mararo, fela ba se ke ba ba hwetša; ka fao ba ipoelela Jeriko. ₂₃Ke moo dihlodi tšela tše pedi di theogilego moo nageng ya dithaba, tša tshela noka, mme tša gomela go Joshua. Tša mmotša tšohle tše di ba hlagetšego ₂₄tša re: “Re na le therešo ya gore Morena o re file naga yela ka moka. Le gona batho ba gona ka moka ba a re tšhoga.”

₁Ka letšatši le le latelago Joshua le setšhaba ka moka sa Israele ba tsoga e sa le bošego, ba tloga mešašeng ya kua Megohlong mme ba ya Jordane, moo ba hlomilego mešaša ba letela go tshela noka. ₂Ka morago ga matšatši a mararo baetapele ba sepela le mešaša ka moka ₃gomme ba re go setšhaba: “Ge le bona baprista ba rwele Polokelo ya Kgwerano ya Morena Modimo wa lena, le rutlolleng mešaša mme le ba latele. ₄Ba tla le laetša tsela ka gobane ga se la ka la putla mo. Eupša le se ke la batamela Polokelo ya Kgwerano; le beng bokgole bjo e ka bago kilometara ka morago ga yona.”

₅Joshua a botša setšhaba a re: “Itlhwekišeng, ka gobane ka moswane Morena o tla dira mehlolo gare ga lena.” ₆Ka morago a botša baprista gore ba tšee Polokelo ya Kgwerano mme ba sepele nayo pele ga setšhaba. Ba dira ka moo a ba botšago ka gona.

₇Morena a re go Joshua: “Se ke se dirago lehono se tla dira gore setšhaba ka moka sa Israele se thome go go hlompha o le motho yo mogolo, gomme ba tla bona gore ke na le wena bjalo ka ge ke be ke na le Moshe. ₈Botša baprista ba ba rwelego Polokelo ya Kgwerano gore ge ba fihla ka nokeng, ba tsene ka meetseng mme ba eme kgauswi le lebopo.”

₉Ke moo Joshua a itšego go setšhaba: “Tlang mo mme le kweng se Morena Modimo wa lena a se bolelago. ₁₀Ge le goroga, ka kgonthe o tla leleka Bakanana, Bahete, Bahibe, Baperise, Bagirgashe, Baamore le Bajebuse. Le tla tseba gore Modimo yo a phelago o gare ga lena ₁₁ge Polokelo ya Kgwerano ya Morena wa lefase ka moka e tshela Jordane pele ga lena. ₁₂Bjale kgethang banna ba lesome le ba babedi, kgorong ye nngwe le ye nngwe ya Israele le kgethe o tee. ₁₃Ge baprista ba ba rwelego Polokelo ya Morena wa lefase ka moka ba tsenya maoto a bona ka meetseng, Jordane e ka se sa ela, gomme meetse a a tšwago tletlolo a tla bokana felo gotee a dira leboto.”

_14-15E be e le nako ya go buna, mme noka e be e tletše.

Ge setšhaba se tloga mešašeng go tshela Jordane, baprista ba ile ba sepela pele ga sona ba rwele Polokelo ya Kgwerano. Ge baprista ba seno tsena ka meetseng, ₁₆meetse a ile a se sa ela gomme a bokana go fihla tletlolotletlolo kua Adamo, motse wo o lego ka thoko ga Tsaretane. Moela wa go theogela Lewatleng le le Hwilego o ile wa kgaotša go ela, gomme setšhaba sa kgona go tshela noka kgauswi le Jeriko. ₁₇Ge ba putla mobung wo o omilego, baprista ba ba bego ba rwele Polokelo ya Kgwerano ya Morena ba be ba eme mobung wo o omilego ba sa šuthe gare ga Jordane, go fihlela setšhaba ka moka se tshetše.

₁Theofilose wa ka.

Ka pukung yela ka go go ngwalela yona pele ke ngwadile tšohle tše Jesu a di dirilego, le tše a di rutilego batho go tloga mola a thoma modiro wa gagwe, ₂go ba go fihla mohla a rotošetšwa legodimong. Pele a rotošwa, o ile a laya baapostola ba gagwe ka Moya wo Mokgethwa, bale a bego a ba kgethile. ₃Ke bona ba e rilego mo matšatšing a masome a mane ka morago ga go hlokofatšwa ga gagwe a itšweletša go bona gantši ka mo go sa belaetšego gore o tsogile. Ba mmona, gomme a bolela le bona ka tša mmušo wa Modimo. ₄Ya re ge ba le mmogo, a ba laya a re: “Le se ke la tloga Jerusalema, le letele se Tate a le holofeditšego sona, sona sela ke le boditšego sona. ₅Johanese o be a kolobetša ka meetse, eupša lena le tla kolobetšwa ka Moya wo Mokgethwa ka morago ga matšatši a se makae.”

₆E rile ge baapostola ba kopane ba mmotšiša ba re: “Morena, na setšhaba sa Israele o tlilo se tsošetša mmušo gona mo nakong tše?”

₇Jesu a ba fetola ka go re: “Ga se taba ya lena go tseba dinako le mabaka ao Tate a a beilego ka maatla a gagwe yena mong. ₈Lena le tla maatlafatšwa ge Moya wo Mokgethwa o theogela go lena, la ba dihlatse tša ka Jerusalema le nageng yohle ya Judea le ya Samaria, le go fihla magomong a lefase.” ₉Ge a seno realo, a rotošetšwa legodimong ba mo lebeletše, gomme a širetšwa ke leru, ba se sa mmona.

₁₀Ba rile ba sa tsepeletše leratadimeng ge a ntše a sobelela bjalo, gateetee banna ba babedi ba ba aperego bošweu ba ema le bona ₁₁ba re: “Lena banna ba Galilea, le emetšeng mo le lebeletše leratadimeng? Yena Jesu yo a tlošitšwego mo go lena a rotošetšwa legodimong, o tla boa ka wona mokgwa wo le mmonego a eya legodimong ka wona.”

₁₂Ke ge baapostola ba tloga thabeng ye e bitšwago ya Mehlware, kgauswi le motse wa Jerusalema, monabjana wo e ka bago kilometara e tee go tloga gona, ba boela gona motseng. ₁₃Ba re go tsena motseng ba namelela ka phapošing ya ka godimo ye ba bego ba dula ka go yona. Bona e be e le Petrose le Johanese, le Jakobose le Andrease, le Filipi le Thomase, le Bartolomeose le Mateu, le Jakobose, morwa wa Alfeose, le Simone, Mollelatokologo, le Judase, morwa wa Jakobose. ₁₄Ba be ba kgothalela go rapela e le ba pelo e tee, ba na le basadi ba bangwe gotee le Maria, mmagoJesu, le banababo.

₁₅Ka tšatši le lengwe ge badumedi ba e ka bago ba lekgolo le ba masome a mabedi ba kgobokane, Petrose a ema a bolela a re: ₁₆“Bagešo, go be go swanetše gore Mangwalo a Makgethwa a phethege, ao Moya wo Mokgethwa o a boletšego ka Dafida a era Judase, yo e bilego mohlahli wa bale ba go swara Jesu. ₁₇E be e le mongwekarena, a kgethetšwe go šoma le rena.

₁₈“Yo Judase, ka tšhelete ye a bego a e hweditše ka modiro wola wa gagwe wo mobe, o rekile serapa se a wetšego ka hlogo ka go sona, a palega ka bogare, gomme mala a gagwe ohle a kgothoga. ₁₉Taba ye ya tsebja motseng wohle wa Jerusalema, gomme ke ka lebaka leo serapa seo ka polelo ya gona ba rego ke Hakeldamage, ke go re ‘Serapa sa madi’.

₂₀“Gobane ka pukung ya Dipesalome go ngwadilwe go re:

_21-22“Ka gona, yo mongwe o swanetše gore e be hlatse le rena ya gore Morena Jesu o tsogile bahung. E swanetše go ba yo mongwe wa ba ba bego ba sepela le rena nakong ka moka ya ge Morena Jesu a be a šika le rena, go tloga ka nako yela Johanese a mo kolobetša, go fihlela mohla wola a tlošwa go rena a rotošetšwa legodimong.”

₂₃Ka gona ba ntšha ba babedi, e lego Josefa yo a bitšwago Barsabase, le lengwe ke Justose, le Mathiase. ₂₄Ke moka ba rapela ba re: “Morena, wena o tsebago dipelo tša bohle, re bontšhe yo o mo kgethilego mo go ba babedi ba, ₂₅gore a dire modiro wa boapostola wo Judase a o tlogetšego ge a eya felo mo go mo lebanego.” ₂₆Ba ba diriša matengwa ao a ilego a ntšha Mathiase, gomme yena a nama a balwa le baapostola bale ba lesome le o tee.

₁Ge letšatši la Pentekoste le fihla, bohle ba be ba kgobokane felo gotee. ₂Gateetee ba kwa modumo o etšwa kua leratadimeng nke ke wa ledimo le le tšubutlago, wa tlala ntlo yohle yeo ba bego ba dutše ka go yona. ₃Ba bona go hlahlamologa dilwana tše nkego ke dikgabo tša mollo di kotama godimo ga yo mongwe le yo mongwe wa bona. ₄Ke moka ba tlala Moya wo Mokgethwa, ba thoma go bolela ka maleme a šele, go ya ka mo Moya o ba kgontšhago go bolela ka mafolofolo ka gona.

₅Gona moo motseng wa Jerusalema go be go na le Bajuda, banna ba borapedi ba ba agilego ditšhabeng tšohle tše di lego lefaseng. ₆E rile ge modumo woo o kwagala, batho ba bantši ba kgobokana. Ba tlabega ba gakanegile, ka gobane mongwe le mongwe o be a ba kwa ba bolela ka polelo ya gabo. ₇Ge ba tlabegile ba maketše bjalo, ba botšišana ba re: “Na ga ke re batho ba ba bolelago ba ka moka ke Bagalilea? ₈Bjale go tla bjang ge rena ka moka re ekwa ba bolela ka mebolelo ya gaborena? ₉Etse mo go rena go na le Baparetia le Bamedia le Baelamo; go na le ba go dula Mesopotamia le Judea le Kapadokia; go na le badudi ba naga ya Pontose le ya Asia, ₁₀le ya Frigia le ya Pamfilia, le ya Egepeta le dileteng tša Libia, kgauswi le Sirene. Ba bangwe ba tšwa Roma, ₁₁ba bangwe ba bona ke Bajuda, ba bangwe ke baditšhaba ba ba sokologetšego tumelong ya Sejuda; ba bangwe ke Bakreta, bangwe ke Baarabia – fela re kwa ba bolela ka mebolelo ya gaborena dimakatšo tše Modimo a di dirilego.” ₁₂Ba ile ba fela ba tlabegile ba gakanegile, ba botšišana ba re: “Taba ye e iša kae?”

₁₃Fela ba bangwe ba ba kwera ba re: “Ke ditagwa batho ba!”

₁₄Petrose a ema a na le baapostola ba bangwe ba lesome le o tee, a hlaboša lentšu a botša lešaba le le bego le le fao a re: “Lena Bajuda le lena bohle le dulago mo Jerusalema, ntheeletšeng ke le botše tše di diregilego: ₁₅Batho ba ga se ba tagwa, bjalo ka ge lena le nagana, gobane e sa le iri ya senyane mosong. ₁₆Gabotse tše ke ditaba tše di boletšwego ke moprofeta Joele mola a re: ₁₇‘Modimo o re: Tše ke tlago di dira ka matšatši a mafelelo šedi:

₂₂“Lena Baisraele, ekwang taba še: Jesu wa Nasaretha ke monna yo Modimo a mo hlatsetšego mo go lena ka ditiro tše maatla le ka dimaka le ka mehlolo ye a e dirilego ka yena mo go lena, ye lena beng le e tsebago. ₂₃Ke yena yo le mo gafetšwego, go ya ka mo Modimo a beakantšego ka gona le ka mo a tsebilego ka gona pele, la ba la dira gore baditšhaba ba mmapole sefapanong ba mmolaye. ₂₄Eupša Modimo o mo tsošitše bahung, ge a seno mo tlemolla mahlokong a lehu, gobane go be go sa kgonege gore lehu le mo tlemele ruri. ₂₅Gape Dafida o boletše ka yena a re:

₂₉“Bagešo, anke ke bolele le lena ke sa boife selo ka Dafida, rakgolokhukhu wa rena. Yena o rile go hwa a bolokwa, gomme le lehono lebitla la gagwe le sa le gona mo go rena. ₃₀E be e le moprofeta, gomme a tseba gore Modimo o mo enetše gore yo mongwe wa ditlogolo tša gagwe e tlilo ba kgoši go no swana le yena. ₃₁Dafida o di bone di sa tla, gomme o be a bolela ka go tsoga ga yena Kriste mola a re:

₃₆“Ka gona, setšhaba sa Israele ka moka se swanetše se tsebe e le ruri gore yena Jesu yo le mmapotšego sefapanong yo, ke yena yo Modimo a mmeilego Morena, a mo dirilego Kriste.”

₃₇Ge ba ekwa tšeo, tša ba hlaba, gomme ba re go Petrose le baapostola bale ba bangwe: “Bagešo, re direng?”

₃₈Petrose a ba fetola a re: “Sokologang mme ka moka le kolobetšwe le be ba Jesu Kriste, gore le swarelwe dibe tša lena; gomme le tla amegedišwa mpho ya Modimo, e lego Moya wo Mokgethwa. ₃₉Gobane Modimo o holofeditše lena le bana ba lena le bohle ba ba lego kgole – bohle bao Morena Modimo wa rena a ba bitšago.”

₄₀Petrose a ba kgothatša kudu a tiišitše a re: “Itoteng, le tšwe bathong ba bakgopo ba!” ₄₁Ba bantši ba ile ba kgolwa molaetša woo wa gagwe, gomme ba kolobetšwa; mohlang woo badumedi ba oketšwa ka batho ba e ka bago ba dikete tše tharo. ₄₂Bona bao ba be ba dula e le ba ba rutwago ke baapostola, ba ba ikwago e le selo se tee, ba ba ngwathišanago bogobe, le ba ba rapelago.

₄₃Mehlolo ye mentši le dimaka di be di dirwa ke baapostola, gomme bohle ba tletše poifo. ₄₄Badumedi bohle ba be ba dula e le ba ba ikwago e le selo se tee, gomme tšohle tše ba nago le tšona ba di hlakanela. ₄₅Ba be ba fela ba rekiša maruo le dithoto tša bona, gomme tšhelete ya gona ba e abelane, go ya ka mo motho a hlokago ka gona. ₄₆Tšatši le lengwe le le lengwe ba be ba kopanela Tempeleng e le seboka, ba ngwathišana bogobe ka magaeng a bona ka go šielana, ba eja ba thabile, ba ikokobetša, ₄₇ba tumiša Modimo, ba kgahla batho ka moka. Letšatši ka letšatši Morena a oketša phuthego ka bao ba phološwago.

₁Ka tšatši le lengwe Petrose le Johanese ba kile ba ya Tempeleng ka iri ya boraro mathapama, nako ya thapelo. ₂Mo lesorong la Tempele le le bego le bitšwa Lesoro le Lebotse go be go na le monna yo a tswetšwego e le segole. Tšatši le lengwe le le lengwe o be a rwalwa a išwa moo gore a yo kgopela tšhelete go batho ba ba tsenago ka kgorong ya Tempele. ₃O rile go bona Petrose le Johanese ba re ba a tsena, a ba kgopela mphonyana. ₄Bona ba mo hlaba ka mahlo, gomme Petrose a re go yena: “Re lebelele!” ₅Monna yoo a ba lebelela, a holofetše gore ba tla mo fa se sengwenyana. ₆Fela Petrose a re go yena: “Tšhelete yona ga ke nayo, eupša se ke nago le sona ke go fa sona: Ka maatla a Jesu Kriste wa Nasaretha, ema o sepele!” ₇Ya ba o mo swara ka seatla sa la go ja o a mo emiša. Gatee monna yoo a tielela maoto le dikgokgoilane; ₈a nanoga a ema, a thoma go sepelasepela, a tsena ka kgorong ya Tempele le bona, a sepela a phepela, a reta Modimo. ₉Batho ka moka ba mmona a sepela a reta Modimo bjalo, ₁₀gomme ge ba lemoga gore ke mokgopedi yola a bego a hlwa a dutše Lesorong le Lebotse, ba kgotsa kudu ba tlabilwe ke tšeo di mo hlagetšego.

₁₁Ka ge monna yoo a napile a kgomarela Petrose le Johanese mo mathuding ao batho ba a bitšago mathudi a Solomone, batho ka moka ba ile ba ba kitimela ba tlabegile. ₁₂Petrose ge a di bona a re go bona: “Lena Baisraele, le reng le tlabja ke taba ye? Gona le reng le lebeletše rena, mo nkego ke rena re kgontšhitšego motho yo ka maatla a rena goba ka borapedi bja rena gore a sepele? ₁₃Modimo wa Abrahama le Isaka le Jakobo, Modimo wa borakgolokhukhu ba rena, o tumišitše Jesu, mohlanka wa gagwe, yena yo lena le mo gafetšego babuši ba Bajuda, la mo lahla mo pele ga Pilato, ešita le mola Pilato a ikemišeditše go mo lokolla. ₁₄E be e le mokgethwa, e le moloki, fela lena la mo lahla, la kgopela gore le lokollelwe mmolai. ₁₅Le bolaile yena Moišabophelong, fela Modimo a mo tsoša bahung – gomme rena re dihlatse tša taba ye. ₁₆Ke ka maatla a gagwe ge segole se le se bonago se gape le se tsebago se tieletše; ke ka tumelo go yena. Bjalo ka ge le lena ka moka le iponela, ke ka tumelo go Jesu ge motho yo o fodišeditšwe sa ruri.

₁₇“Bjale ge, banabešo, ke a tseba gore se le se dirilego le se dirišitšwe ke go se tsebe, le swana le baetapele ba lena. ₁₈Modimo o boletše kgale ka baprofeta bohle gore Kriste wa gagwe o tla hlokofatšwa, gomme taba ye o e phethagaditše ka wona mokgwa wo. ₁₉Ka gona, itsholeng le sokologe gore le phumolwe dibe tša lena, ₂₀gore Morena a le lapološe, a le romele Jesu, yena Kriste yo a šetšego a mo kgethetše lena. ₂₁O swanetše go ba a dutše kua legodimong go fihlela ge dilo tšohle di tlilo bušetšwa sekeng sa tšona, bjalo ka ge Modimo a begile ka baprofeta ba gagwe ba bakgethwa ba ba phetšego kgalekgale. ₂₂Gobane Moshe o rile: ‘Morena Modimo wa lena o tla le romela moprofeta wa go swana le nna a etšwa setšhabeng sa gabolena. Le phethe tšohle tše a le laelago tšona. ₂₃Yo a sa theeletšego moprofeta yoo a kgaolwe setšhabeng.’ ₂₄Le baprofeta ka moka ba ba bego ba bega molaetša wa Modimo, go thoma ka Samuele le ba ba bego ba mo hlatlama, le bona ba bega tše di dutšego di hlaga mo matšatšing a. ₂₅Dilo tše baprofeta ba boletšego ka tšona ke tša lena, gomme le na le setseka mo kgweranong ye Modimo a e dirilego le borakgolokhukhu ba lena mola a re go Abrahama: ‘Ditšhaba tšohle tša lefase di tla šegofatšwa ka ditlogolo tša gago.’ ₂₆Bjale ge, Modimo o romile mohlanka wa gagwe lefaseng, pele a mo roma go lena, gore a tle a le šegofatše ka go sokolla yo mongwe le yo mongwe wa lena makgopong a gagwe.”