DITIRO 6

₁Mabakeng ao, ge badumedi ba ntše ba ata, gwa tsoga dingongorego mo go Bajuda ba ba bolelago Segerike, ba lla ka Bajuda ba ba bolelago Seheberu. Sello sa bona e be e le gore bahlologadi ba gabobona ga ba šetšwe ge go abiwa dimpho ka mehla. ₂Ke ge baapostola bale ba lesome le ba babedi ba kgoboketša badumedi ka moka ba re: “Ga se tshwanelo gore rena re hlokomologe go bega lentšu la Modimo, re abele batho dimpho. ₃Ka gona, banabešo, kgethang banna ba ba šupago mo go lena ba go tuma ba ba nago le Moya wo Mokgethwa le bohlale, ba re kago ba fa modiro wo. ₄Ke mo rena beng re tlago ikgafela go rapela le go bega molaetša wa Modimo.”

₅Taba ye e ile ya kgahla badumedi ka moka, gomme ba kgetha Stefane, monna wa tumelo ye kgolo yo a tletšego Moya wo Mokgethwa, le Filipi le Progorose le Nikanoro le Timone le Parmenase, le Nikolase wa go tšwa Antiokia, yo a bego a sokologetše tumelong ya Sejuda. ₆Ba ba tliša go baapostola, gomme ba ba rapelela ba ba bea diatla.

₇Gomme lentšu la Modimo la fela le phatlalala, palo ya badumedi Jerusalema ya fela e gola kudu, baprista le bona ba dumela go Jesu Kriste ka bontši.

₈Stefane, monna yo a bego a šegofaditšwe kudu ke Modimo mme a tletše maatla, o be a dira dimakatšo tše dikgolo le mehlolo ye megolo mo bathong. ₉Fela o be a lwantšhwa ke banna ba bangwe ba sehlopha se go thwego ke sa sinagoge ya Balokollwa, e le Bajuda ba go tšwa Sirene le Aleksandria. Bona bao gotee le Bajuda ba bangwe ba go tšwa seleteng sa Tsilitsia le sa Asia ba tla ba ngangišana le Stefane. ₁₀Fela ba palelwa ke go mo phala ka dipolelo ka lebaka la bohlale bjo a bego a bo filwe ke Moya wo Mokgethwa. ₁₁Ka gona ba hlohleletša banna ba bangwe gore ba re: “Rena re mo kwele ge a bolela ditaba tša go goboša Moshe le Modimo.” ₁₂Ka go realo ya ba ge ba hlohleleditše setšhaba le bagolo ba sona le boramangwalo. Ba mo wela godimo, ba mo swara, ba mo iša Kgorongkgolo. ₁₃Ke moka ba tliša dihlatse tša maaka tša re: “Motho yo ka mehla o bolela gampe ka Tempele ye ye kgethwa le melao ya Moshe. ₁₄Gape re mo kwele ge a re Jesu wa Nasaretha o tla kgereša Tempele, a fetoša le ditlwaedi tše re di filwego ke Moshe.” ₁₅Bohle ba ba bego ba le moo Kgorongkgolo ba rile ba sa mo tomoletše mahlo bjalo ba bona sefahlego sa gagwe se swana le sa morongwa.