To The Word – Day 221

₁Retang Morena!

Mo tumišeng ka gobane ke yo botho;

lerato la gagwe ke la go ya go ile.

₂Ke mang yo a ka anegago ditiro tša gagwe tše maatla?

Ke mang yo a ka begago ditumišo tša gagwe ka botlalo?

₃Go lehlogonolo ba ba phethago taelo tša gagwe,

ba ka mehla ba dirago tše di lokilego.

₄Morena,

o nkgopole ge o dira tšhaba sa gago ka botho;

o mpale le bona ge o ba phološa,

₅gore ke bone katlego ya ba o ba kgethilego,

gore ke thabe le tšhaba sa gago se se thabilego,

gore ke ikgantšhe ka wena le ba e lego ba gago.

₆Re dirile dibe ra etša borakgolokhukhu ba rena;

re ikobetše molato.

₇Borakgolokhukhu ba rena kua Egepeta

ba be ba sa hlathe mehlolo ya gago,

ba be ba sa nagane ka lerato la gago le o ba bontšhitšego lona gantšintši,

ba go tsogela maatla kua lebopong la Lewatle la Mahlaka.

₈Le ge go le bjalo,

Morena a fela a ba phološa ka ge e le Modimo,

gore a ba bontšhe maatla a gagwe.

₉A kgalema Lewatle la Mahlaka, la pšha;

a ba sepetša ka bodibeng boka mo go omilego.

₁₀A ba hlakodiša dinaleng tša bahloi ba bona,

a ba phološa diatleng tša manaba a bona.

₁₁Meetse a khupetša manaba ao,

gwa se šale le o tee.

₁₂Ke mo setšhaba se dumetšego tše a ba holofeditšego tšona,

gomme sa mo opelela ditumišo.

₁₃Fela ba lebala ka pela tše a ba diretšego tšona;

ba se letele maele a go tšwa go yena.

₁₄Ba laolwa ke ditumo tša bona šokeng,

gomme ba leka Modimo leganateng.

₁₅Yena a ba fa se ba se kgopelago,

kganthe o tla ba tlišetša le bolwetši bja go ba otiša.

₁₆Kua mešašeng ba be ba tsebafela Moshe,

le yena Arone, mokgethwa wa Morena.

₁₇Ke mo lefase le pharogilego la metša Datane a wela;

le Abiramo a ribegetšwa le lekokwana la gagwe.

₁₈Gwa tuka mollo ka gare ga lekokwana leo,

bakgopo bao ba tšhungwa ke kgabo ya wona.

₁₉Ba bopa powana kua thabeng ya Horebe,

ba khunamela seswantšhobopša seo.

₂₀Bakeng sa go khunamela Modimo yo a swanelwago ke go tumišwa,

ba khunamela seswantšho sa poo ye e fulago bjang.

₂₁Ba lebala Modimo, Mophološi wa bona,

yena wa go dira tše dikgolo kua Egepeta,

₂₂wa go dira mehlolo nageng yeo ya Hamo,

le tše di gakgamatšago Lewatleng la Mahlaka.

₂₃Yena a re o a ba fediša,

eupša Moshe,

yo Modimo a mo kgethilego,

a ba phophothela,

gore a se sa ba fediša a ba galefetše.

₂₄Ba galala naga ye botse ka ge ba be ba sa kgolwe se a ba holofeditšego sona.

₂₅Ba munamuna ba le mešašeng ya bona,

ba se theeletše tše Modimo a di bolelago.

₂₆Ke ge a ikana go bona a emišitše letsogo a re o tla ba lesa ba hwela lešokeng,

₂₇ditlogolo tša bona a di phatlalatša le dinaga,

a di lesa di hwela baditšhabeng.

₂₈Ba khunamela Baale, modimo wa Bapeore;

ba ja didimo tša medingwana ya go se phele.

₂₉Ba rumola Morena ka ditiro tša bona,

mme ba tsenwa ke bolwetši bja leuba.

₃₀Finease a nanoga a otla basenyi;

ya ba gona leuba le kgaotšago.

₃₁Se Finease a se dirilego sa bonwa se lokile go iša go sa felego.

₃₂Kua meetseng a Meriba ba ile ba galefiša Morena,

Moshe a ba a senyegelwa ke ditaba ka lebaka la bona.

₃₃Ba be ba mo tenne mo a ilego a ba a phonyokgwa ke leleme.

₃₄Le gona ba be ba se ba fediša baditšhaba ka mo Morena a bego a ba laetše;

₃₅ba nyalelana le bona, ba phela bjalo ka bona.

₃₆Ba khunamela medingwana ya bona,

mme yona ya ba mereo go bona.

₃₇Ba direla bademone didimo ka barwa le barwedi ba bona.

₃₈Ba bolaya bana ba ba se nago molato ka go direla medingwana ya Kanana didimo ka barwa le barwedi ba bona.

₃₉Ba itšhilafatša ka ditiro tše dibjalo,

gomme ka mediro ya bona ba bontšha go se botegele Modimo.

₄₀Ka gona Morena a galefela tšhaba sa gagwe;

a šišimišwa ke ba e lego lefa la gagwe.

₄₁A ba gafela ditšhaba,

gomme ba bušwa ke dira tša bona.

₄₂Manaba a bona a ba gatelela,

a ba šitiša go tsoša hlogo.

₄₃Ke gantši a ba hlakodiša,

eupša bona ba mo tsogela maatla ka boomo;

ba bolawa ke bokgopo bja bona.

₄₄Le ge go le bjalo,

ge a ekwa ba lla ba le tlalelong,

o be a ba šokela.

₄₅Ka lebaka la bona a se lebale kgwerano ya gagwe,

a upša a ba hlomogela pelo,

ka ge a ba rata kudu.

₄₆A dira gore bathopi bohle ba bona ba ba kwele bohloko.

₄₇Re phološe, Morena,

Modimo wa rena;

re kgoboketše re boe ditšhabeng,

gore re tle re go tumiše, wena Yomokgethwa,

re ikgantšhe ka ditiro tša gago tše di makatšago.

₄₈A go tumišwe Morena Modimo wa Israele,

go tloga le go tloga,

le go iša go sa felego!

A setšhaba ka moka se re: “Amene!”

Retang Morena!

₁Retang Morena,

gobane ke yo botho;

lerato la gagwe ke la go ya go ile.

₂A ba realo,

baphološwa ba Morena,

bona ba go phološwa maatleng a manaba a bona,

₃bao a ba kgobokeditšego go tšwa mafaseng,

go tšwa bohlabela le bodikela,

leboa le borwa.

₄Bangwe ba be ba ebela le lešoka leganateng,

ba sa bone tsela ya go ya motseng mo ba kago dula gona.

₅Ba be ba swarwa ke tlala le lenyora,

gomme ba felelwa ke maatla.

₆Ke mo ba bego ba llela Morena ba gakanegile,

gomme a ba hlakodiše tlalelong ya bona.

₇A ba tšeiša ka tsela ya nnete,

ya go ba iša motseng mo ba kago dula gona.

₈A ba rete Morena ka lebaka la lerato la gagwe, kilaphetogo,

le mehlolo ye a e direlago batho.

₉O kgodiša yo a swerwego ke lenyora,

mme monatlala o mo khoriša tše dibose.

₁₀Bangwe ba be ba dula swiswing le lesoleso,

ba tlemilwe ka diketane mme ba tlaišwa kudu,

₁₁ka ge ba be ba nyaditše taelo tša Modimo,

ba ganne le leano la yena Ragodimodimo.

₁₂Yena a ba nyamiša dipelo ka go ba šomiša gaboima;

ya re ge ba thetšwa,

ba hloka mothuši.

₁₃Ke mo ba lletšego Morena ba gakanegile,

gomme yena a ba hlakodiša tlalelong ya bona.

₁₄A ba ntšha swiswing le lesoleso,

a kgaola ditlemo tša bona.

₁₅A ba rete Morena ka lebaka la leratorato la gagwe,

le tše dikgolo tše a di direlago batho.

₁₆Gobane o robagantše dikgoro tša metse tša mphiri,

a robaganya le mapheko a tšona a tshipi.

₁₇Bangwe ba be ba šilofatšwa ke go hlokomologa melao ya Modimo,

gomme ba otlwe ka lebaka la bokgopo bja bona.

₁₈Ba be ba šišingwa sejo sefe le sefe,

ba eba kgauswi le go hwa.

₁₉Ke mo ba bego ba llela Morena ba gakanegile,

gomme a ba hlakodiše tlalelong ya bona.

₂₀O be a ba fodiša ka taelo fela,

gomme a ba hlakodiše lehung.

₂₁A ba rete Morena ka lebaka la leratorato la gagwe,

le mehlolo ye a e direlago batho.

₂₂A ba mo direle dihlabelo tša tebogo,

ka megobo ba bege tše a di dirilego.

₂₃Bangwe ba be ba thala mawatleng ka maselawatle,

ba gweba ka go rwala diphahla ka tšona.

₂₄Ba be ba bona tiro tša Morena,

dimakatšo tša gagwe phampheng ya bodiba,

₂₅tša ge a laela, mme go tsoga ledimo,

la galefiša maphoto.

₂₆Boralewatle ba be ba fefeulelwa godimodimo sebakeng,

ba boe ba lahlelwe fase bodibeng,

mme kotsing tše bjalo ba itlhoboge.

₂₇Ba be ba tlaruma,

ba thekesela boka ditagwa,

gomme bokgoni bja bona bo sa ba thuše ka selo.

₂₈Ke mo ba bego ba llela Morena ba gakanegile,

gomme a ba ntšhe tlalelong ya bona.

₂₉A homotša ledimo,

gomme maphoto ale a se sa gakala.

₃₀Ba thaba ge go thotše,

gomme a ba iša boemakepeng bjo ba bo nyakago.

₃₁A ba rete Morena ka lebaka la lerato la gagwe, kilaphetogo,

le mehlolo ye a e direlago batho.

₃₂A ba mo tumiše phuthegong ya setšhaba sa gagwe,

ba mo rete lekgotleng la ba bagolo.

₃₃O pšheša dinoka ya ba lešabašaba fela,

meela ya meetse ya oma.

₃₄Mobu wa go nona o o fetola lehwafa ka lebaka la bokgopo bja badudi ba moo.

₃₅Leganata o le fetola megobe,

lekwala a le fetola methopo ya meetse.

₃₆Ba ba hlokago dijo o ba dudiša moo,

ba ikagela motse ya ba bodulo bja bona.

₃₇Ba lema mašemo ba bjala le merara,

mme ba buna gagolo.

₃₈A ba šegofatša mme ba ata kudu;

a ba okeletša le maruo.

₃₉Fela palo ya bona e ile ya fokotšega,

mme ba nyamišwa ke go imelwa ke dikotsi le mahloko.

₄₀Babuši a ba nyatšiša batho,

a ba raladiša le mašoka a a se nego ditsela.

₄₁Bahloki bona a ba ntšha mahlomoleng a bona,

a ba atišetša meloko ya etša dihuswane.

₄₂Baloki ge ba di bona ba thaba,

bakgopo bona ba hloka molomo.

₄₃Ba ba hlalefilego a ba šetše taba tše,

gomme ba nagane leratorato la Morena.

₁Ke itiišitše pelo, Modimo.

Ke tla opela ke go tumiša;

ruri, seo ke se ke tlago se dira.

₂A ke tsoge ka mahwibi ke letša harepa le sekgapa.

₃Morena, ke tla go tumiša ditšhabeng;

ke tla go reta merafeng,

₄gobane leratorato la gago, kilaphetogo,

ga le kaaka,

le phagame go feta magodimo,

le potego ya gago e fihla marung.

₅Modimo, bontšha bogolo bja gago magodimong a godimodimo;

letago la gago a le aparele lefase lohle.

₆Re hlakodiše ka maatla a gago;

ekwa thapelo ya ka,

gore baratiwa ba gago ba phologe.

₇Modimo o boletše ka sekgethweng sa gagwe a re:

“Ke tla abaganya naga ya Shekeme ke thabile,

ka arolanya moedi wa Sukote.

₈Naga ya Gileade ke ya ka, le ya Manase;

ya Efraime ke kuane ya ka ya tshipi,

gomme ya Juda ke molamo wa ka wa bolaodi.

₉Ya Moaba yona ke sehlapelo sa ka,

gomme ya Edomo ke ya go lahlela dieta tša ka;

ya Filistia ke tla e gobela megobo ya phenyo.”

₁₀Ke mang yo a tlago nkiša motseng wo o ageleditšwego ka morako?

Ke mang yo a tlago nkiša Edomo,

₁₁ge e se wena, Modimo, yo o re lahlilego,

wena yo o se sa tšwago dira le rena?

₁₂Hle, re thuše ge re elwa le manaba a rena,

gobane thušo ya motho yona ke lefeela.

₁₃Ge re na le Modimo re tla lwa senna;

ke yena yo a tlago re gatakelela manaba.

₁Modimo, wena Motumišwa wa ka,

se nkhomolele.

₂Bakgopo le ba maaka ba a mphara,

ba mpega ka taba tša maaka.

₃Ba nkgobotla ka taba tša lehloyo,

ba nthumola ntle le lebaka.

₄Lerato la ka ba le lefa ka go ntlhoya,

le ge nna ke ba rapelela.

₅Ba mpušetša botse ka bobe,

lerato ba mpušetša lona ka lehloyo.

₆Ba re:

“Mmeele yo kgopo gore a mmege a eme kgauswi le yena.

₇Ge a sekišwa a bonwe molato;

le thapelo ya gagwe e tšewe e le bosenyi.

₈Matšatši a gagwe a a fokotšege,

le modiro wa gagwe o tšewe ke mongwe.

₉Bana ba gagwe a e be ditšhiwana,

le mosadi wa gagwe e be mohlologadi.

₁₀Bana ba gagwe a e be bakgopedi ba go ebela,

ba ba rakilwego magaeng a bobona a a fetogilego mašope.

₁₁A a hulwe thoto yohle ke moadimi wa gagwe,

mme tše a di šometšego di thopše ke bašele.

₁₂A a hloke wa go mmotegela,

le ditšhiwana tša gagwe di hloke mošokedi.

₁₃A ditlogolo tša gagwe di fedišwe,

mme leina la bona le phumolwe molokong wo o tlago.

₁₄A Morena a se lebale

dikarogo tša borakgolokhukhu ba gagwe,

le mmagwe a se ke a phumolelwa dibe tša gagwe.

₁₅A Morena a dule a gopola dibe tša bona,

ge e le bona beng a ba lebalele sa ruri.

₁₆“Motho yoo ga se a ka a rata go ba le botho;

sa gagwe e be e le go hlomara le go bolaya mohlaki le mohloki le ba ba hlomogilego dipelo.

₁₇O be a rata go roga batho –

le yena a a rogwe;

o be a sa kwane le go šegofatša bangwe –

le yena tšhegofatšo a a e hloke!

₁₈Go roga batho e be e le sona seaparo sa gagwe;

a maroga a gagwe a mmoele,

a nwelele go yena boka meetse;

a a tsenelele marapong a gagwe go etša makhura.

₁₉A a mo tate boka kobo ye a e aparago,

a etše lepanta le a ipofago ka lona mehleng.”

₂₀Bantlhoi a Morena a ba otle ka mokgwa woo,

bona ba ba mpolelago gampe.

₂₁Fela wena, Morena, Mong wa ka,

o ntire ka mo go lebanego;

ka ge o nthata mme o ntoketše,

o mphološe.

₂₂Gobane nna ke mohlaki,

ke a itlhokela,

mme ke hlomogile pelo.

₂₃Ke feta boka moriti wo o theago,

ke hlohlorilwe bjalo ka tšie.

₂₄Dikhuru tša ka di a ntatola

ka ge ke hloka dijo;

ke gwametše, ke otile.

₂₅Ba ba mponago ba a nkgegea,

ba šikinya dihlogo ba nnyefola.

₂₆Nthuše, hle, Morena, Modimo wa ka;

ntlhakodiše ka ge o nthata ka leratorato.

₂₇A ba lemoge ge tšeo e le mediro ya gago;

ba tsebe ge di dirilwe ke wena, Morena.

₂₈Le ge ba ntswirinya,

wena o tla ntšhegofatša;

ge ba ntlhasela,

ba segwe ke batho,

gomme nna, mohlanka wa gago,

ke tla thaba.

₂₉Bantlhoi a ba apešwe dihlong,

ba phuthelwe ka kgobogo boka ka kobo.

₃₀Nna ke tla tumiša Morena ke ahlame;

ke tla mo reta ke le ka gare ga lešaba,

₃₁gobane o lamolela mohlaki,

o mo lwela go ba ba ka mo tšwago.

₁Morena o rile go kgoši, mong wa ka:

“Dula ka letsogong la ka la mmagoja

ke be ke tle ke go fenyetše manaba a gago.”

₂Morena o tla atiša pušo ya gago

a le Tempeleng ya gagwe a re:

“Buša manaba a gago.”

₃Mohla o rapa dira setšhaba sa gago se tla ithaopa.

Masogana a gago a tla tla go wena a itlhamile ka tša ntwa ye kgethwa,

a tsarogile phoka ya masa.

₄Morena o ikanne gomme a ka se hlaname;

o rile: “O moprista go ya go ile wa boprista bja go swana le bja Melkitsedeke.”

₅Morena o go thuša ntweng;

mohla a galefile o pšhatlaganya magoši.

₆O tla ahlola ditšhaba a ba a di otla,

gwa tlala ditopo;

o tla fediša babuši gohle lefaseng.

₇Kgoši e tla nwa ka nokaneng ya kgauswi ga tsela,

a re go lapologa a lwa mme a fenya.

₁Retang Morena!

A ke tumiše Morena ka pelo ya ka yohle

ke le mo sehlopheng sa ba ba lokilego,

ke le mo phuthegong ya tšhaba sa gagwe.

₂Mediro ya Morena ke ye megolo;

e swanelwa ke go nagantšhišwa ke bohle ba e ba kgahlago.

₃Tše a di dirago ke tša bothakga le bogoši,

le go loka ga gagwe ke ga go ya go ile.

₄Morena o re gopotša mehlolo ya gagwe;

ke yena wa botho le wa kgaugelo.

₅Ba ba mmoifago o ba fa dijo,

ga a lebale kgwerano ya gagwe.

₆O bontšhitše tšhaba sa gagwe maatla ao a šomago ka ona ka go se fa dinaga tša baditšhaba.

₇O a botega, o lokile go tšohle tše a di dirago;

ditaelo tša gagwe tšohle di a tshephega.

₈Di duletše sa ruri,

di swanetše go phethwa ka potego le ka go loka.

₉O phološitše setšhaba sa gagwe;

o se laetše go botegela kgwerano ya gagwe go ya go ile.

Ke yo mokgethwa, o a tšhabega!

₁₀Go boifa Morena ke ona mathomo a bohlale;

ba temogo ke bohle ba ba phelago bjalo.

O tumišwa go ya go ile.