To The Word – Day 222

₁Retang Morena!

Go lehlogonolo motho yo a boifago Morena,

yo a kgahlwago kudu ke go phetha melao ya gagwe.

₂Ditlogolo tša gagwe e tla ba tše maatla mo lefaseng;

e tla ba moloko wo lehlogonolo wa baloki.

₃Ka ga gagwe go tla ba le mahumo le maruo,

le go loka ga gagwe go tla dulela sa ruri.

₄Mo go baloki o taga boka seedi leswiswing;

ke yo botho, ke wa lešoko le wa go loka.

₅Yo a adimago bangwe a sa dikadike;

yo a phethago taba tša gagwe ka mo go mo lebanego,

tša gagwe di a mo lokela.

₆A ka se tsoge a paletšwe go tše a di dirago;

moloki o gopolwa go ya go ile.

₇Ga a tšhošwe ke taba tše bohloko;

o na le sebete, o botile Morena.

₈O beta pelo, ga a boife selo,

a be a fetše ka go bogela manaba a gagwe a fentšwe.

₉Ke mafakudu wa bahloki;

go loka ga gagwe ke ga go ya go ile.

E tla ba yo maatla,

wa go hlomphega.

₁₀Yo kgopo a di bona,

a lomantšha meno,

a tšewa ke pelo, a nyamelela;

gape bakgopo ga ba ke ba tšwelela ditumong tša bona.

₁Retang Morena!

Lena bahlanka ba Morena, mo reteng!

₂A go tumišwe Morena go tloga bjale go ya go ile.

₃Go tloga bohlabatšatši go ya bodikelatšatši a go tumišwe yena Morena.

₄Morena o okametše ditšhaba tšohle,

letago la gagwe le okametše magodimo.

₅Ke mang wa go lekana le Morena,

Modimo wa rena,

e lego yena Ramadulagodimo,

₆yena wa go okamela legodimo le lefase,

mme a di bonela fasefase?

₇O tsoša mohlaki leroleng,

le mohloki o mo ntšha mathateng a gagwe,

₈a mo dudiša le bakgomana,

bakgomana ba tšhaba sa gagwe.

₉O fa mosadi wa moopa maduledi ka gae,

a mo dira mmagobana yo a thabilego.

Retang Morena!

₁Ge Baisraele ba tloga Egepeta,

ge ditlogolo tša Jakobo di tloga morafeng wola wa go bolela leleme le šele,

₂Juda e ile ya ba tšhaba se sekgethwa sa Modimo,

Israele ya ba mmušo wa gagwe.

₃Lewatle le rile go di bona la tšhaba,

Jordane ya katakata ka sa morago.

₄Dithaba tša tsheletshela boka dikgapa,

meboto ya kganakgana boka dikwanyana.

₅Wena lewatle, o tšhabelang?

Wena Jordane, o reng o katakata?

₆Lena dithaba,

le reng le tsheletshela boka dikgapa?

Lena meboto,

ke eng le kganakgana boka dikwanyana?

₇Wena lefase,

thothomela ge go etla Mong wa gago,

ee, ge go etla Modimo wa Jakobo,

₈yena a fetolago leswika mogobe wa meetse,

legakabje a le fetola sediba.

₁O se tumiše rena, Morena,

o se tumiše rena,

o itumiše, wena mong,

o itumišetše lerato la gago,

kilaphetogo, le potego ya gago.

₂Baditšhaba ba reng ba botšiša ba re:

“Etse Modimo wa bona o kae?”

₃Gape rena Modimo wa rena o legodimong;

o dira tšohle tše a di ratago.

₄Ya bona medimo ke ya silibera le gauta;

ke ya go bopša ke batho ka diatla.

₅E na le melomo, fela ga e bolele;

e na le mahlo, fela ga e bone.

₆E na le ditsebe, eupša ga e kwe;

e na le dinko, eupša ga e dupe.

₇E na le diatla, fela ga e sware;

e na le maoto, fela ga e sepele;

ga e kgone le ka go ntšha modungwana ka megolo ya yona.

₈Babopi ba yona ba tla swana nayo,

le bohle ba ba e botilego.

₉Lena, Baisraele, botang Morena;

ke yena Mothuši le Mofahledi wa lena.

₁₀Lena lešika la Arone, botang Morena;

ke yena Mothuši le Mofahledi wa lena.

₁₁Lena ba go boifa Morena, mmoteng;

ke yena Mothuši le Mofahledi wa lena.

₁₂Morena ga a re lebale,

gomme o tla re šegofatša;

o tla šegofatša Baisraele;

a šegofatša le lešika la Arone.

₁₃O tla šegofatša ba ba mmoifago,

ba bagolo le ba banyenyane.

₁₄A Morena a le atiše,

lena le bana ba lena.

₁₅A Morena a le šegofatše,

yena a hlodilego legodimo le lefase.

₁₆Legodimo ke la Morena a nnoši,

lefase lona o le file batho.

₁₇Ga se bahu ba ba tumišago Morena,

ga se ba ba iketšego nageng ya setu;

₁₈ke rena ba re phelago

ba re tlago tumiša Morena,

go tloga bjale go ya go ile.

Retang Morena!

₁Nna Morena ke a mo rata, gobane ge ke mo llela o a nkwa.

₂Ke tla no dula ke mo rapela ge ke sa phela,

ka gobane o ntlhwaela tsebe.

₃Ke be ke rarilwe ke ditlemo tša lehu,

ke dikaneditšwe ke poifo ya bodulabahu,

ke tlaletšwe ke bile ke gakanegile.

₄Ke mo ke lletšego Morena ka re:

“Ke a go rapela, Morena, ntlhakodiše!”

₅Morena ke Mogaugedi ebile ke Moloki,

Modimo wa rena ke wa lešoko.

₆Morena o babalela ba ba sa kgonego go ithuša;

nna o mphološitše ke šetše ke itlhobogile.

₇A ke boele ke fole maswafo,

gobane Morena o ntoketše.

₈O ntlhakodišitše lehung,

a mphumola le meokgo,

a ba a mphefiša go kgopša.

₉Ke tla dula ke hlokometšwe ke Morena

ge ke sa le nageng ya ba ba phelago.

₁₀Tumelo yona ga se ya ka ya mphelela,

le mola ke ekwa gore bjale gona go padile.

₁₁Ge ke boifa bjalo, ka re:

“Motho wa nama yena ga a tshephagale!”

₁₂Morena ke tla mo leboga bjang ka lebaka la tšohle tše a ntiretšego tšona?

₁₃Ke tla mo neela seloba sa seno sa go mo leboga ka ge a mphološitše.

₁₄Ke tla phetha dikeno tša ka ke bonwa ke tšhaba sohle sa gagwe.

₁₅Lehu la ba ba botegelago Morena ga se taba ye nnyane go yena.

₁₆Mmalo, Morena,

ke nna mohlanka wa gago,

ke go hlankela boka mma yo a bego a go hlankela.

O ntlemolotše ditlemong tša lehu.

₁₇Ke tla go neela sehlabelo sa tebogo,

ka go rapela.

₁₈Ke tla phetha dikeno tša ka ke bonwa ke tšhaba sohle sa Morena

₁₉ka kgorong tša Tempele ya gagwe,

ke le ka gare ga gago,

wena Jerusalema.

Retang Morena!

₁Retang Morena,

lena ditšhaba tšohle!

Mo reteng,

lena merafe ka moka!

₂Gobane o re rata kudu ka lerato la gagwe, kilaphetogo;

o re botegela go ya go ile.

Retang Morena!