To The Word – Day 220

₁Morena ke kgoši,

ditšhaba di a thothomela;

o dutše ka godimo ga bakerubi;

lefase le a tekema.

₂Morena ke yo mogolo kua Sione,

o okametše ditšhaba tšohle.

₃A di go rete, wena senatla, Motšhabegi.

Ke wena Mokgethwa!

₄Maatla ke a gago, wena Kgoši, Moratatoka;

o dirile gore baahlodi ba ahlole ba sa kgetholle,

wa swara Baisraele ka toka le ka tshwanelo.

₅Godišang Morena Modimo wa rena,

le mo khunameleng ka go itahlela maotong a gagwe.

Ke yena Mokgethwa!

₆Moshe le Arone e be e le bangwe ba baprista ba gagwe,

Samuele e le yo mongwe wa barapedi ba gagwe.

Ge ba mo llela o be a ba theeletša.

₇O be a bolela nabo a le thololong ya leru;

ba phetha melao le ditaelo tše a ba filego tšona.

₈Morena, Modimo wa rena, o be o ba kwa;

go bona o be o le Modimo wa tshwarelo,

le ge o be o ba otlela dibe tša bona.

₉Godišang Morena Modimo wa rena;

le mo khunameleng thabeng ya gagwe ye kgethwa,

gobane Morena Modimo wa rena ke yo mokgethwa.

₁Hlabelang Morena mekgolokwane,

lena bohle ba lefase!

₂Direlang Morena ka lethabo;

tlaang pele ga gagwe le duduetša!

₃Tsebang gore Morena ke yena Modimo.

O re bopile gomme ke rena ba gagwe;

ke rena setšhaba sa gagwe,

re mohlape wa gagwe.

₄Tsenang ka masoro a Tempele ka ditebogo,

tsenang ka dikgorong tša yona ka dikopelo tša tumišo.

Mo lebogeng le mo reteng.

₅Gobane Morena ke yo botho;

lerato la gagwe ke la neng le neng,

potego ya gagwe ke ya go ya go ile.

₁Ke tla opela leratorato la gago le toka ya gago.

Ke tla go opelela ditumišo, Morena.

₂Ke tla phela ka hloko ke se na bosodi.

O tla tla neng go nna?

Ke tla phela ka pelo ye e hlwekilego ka ga ka.

₃Nka se gabe selo se sebe;

ke hloile ditiro tša bakgelogi,

di ka se nkgomarele.

₄Nka se be le pelompe;

bokgopo ga ke tsenelane nabjo.

₅Mosebabangwe ke tla mo thiba molomo;

moikgantšhi le ramakokwana ba a ntsheleka.

₆Ge e le bašomedi, nna ke ikgethela ba ba botegago mo lefaseng;

ba ba hlokago bosodi ke bona ba ba tlago ntšhomela.

₇Moradia yena ka ga ka a ka se dule;

mpheane a ka se itebanye le nna.

₈Mosong wo mongwe le wo mongwe ke tla bolaya bakgopo mo nageng,

gore ke fediše badiratšempe bohle mo motseng wa Morena.

₁Morena, nke o kwe thapelo ya ka,

mme sello sa ka se go fihlele.

₂O se iphihlele nna ge ke le tlalelong;

o ntlhwaele tsebe;

o se ntiegele ge ke go llela.

₃Bophelo bja ka bo fela bjalo ka muši;

mmele wa ka o fiša bjalo ka mollo.

₄Ke itlhobogile, ke ikwa ke omeletše bjalo ka hlaga;

ke feletšwe le ke tumo ya dijo.

₅Ke tsetlela godimo;

ke šetše ke le marapo fela.

₆Ke swana le leribiši la leganata;

ke etša makgohlo ka mašopeng.

₇Ga ke sa swarwa ke boroko;

ke bodutung go swana le nonyana tlhakeng ya ntlo.

₈Manaba a ka a hlwela go nthumola;

ba go nkgegea ba rogana ka nna.

_9-10Ka ge o mpefeletšwe o bile o nkgalefetše,

molora ke sona sejo sa ka,

seno sa ka se tswakane le meokgo,

gobane o ile wa ntopa wa ntahlela fase.

₁₁Matšatši a ka a go phela a etša meriti ye e theago;

ke pona bjalo ka bjang.

₁₂Eupša wena, Morena,

o buša go ya go ile;

setumo sa gago ke sa go sa felego.

₁₃O tla nanoga wa šokela Sione,

gobane ke nako ya go e gaugela,

ke nako.

₁₄Bahlanka ba gago ba kgahlwa ke maswika a yona;

ba a šokwa ge e phušogile.

₁₅Baditšhaba ba tla boifa Morena,

le magoši ohle a lefase a tla gakgamatšwa ke letago la gagwe.

₁₆Mohla Morena a tsoša Sione,

o tla tšwelela ka letago la gagwe.

₁₇O tla theeletša dithapelo tša bahloki,

a ka se di tšeiše phefo.

₁₈Tše di latelago a di ngwalelwe moloko wa ka moso,

gore tšhaba se se sa tlilogo hlolwa se tle se tumiše Morena:

₁₉Morena o lebelela fase a le bodulong bja gagwe bjo bokgethwa kua godimo;

o okamela lefaseng a le legodimong,

₂₀gore a kwe metsetlo ya dibofša,

le gore a lokolle baahlolelwalehu.

₂₁Ke ka lebaka leo a tlago begwa Sione,

a tlago retwa Jerusalema,

₂₂mohla ditšhaba le mebušo di phuthega gore di khunamele Morena.

₂₃Nna o nkamogile maatla ke sa le yo mofsa;

o mphokoleditše nako ya go phela.

₂₄Ke moka ka re:

“Hle, Modimo wa ka, o se ntšee ke sa le yo mofsa,

wena yo mengwaga ya gago e golago le meloko.”

₂₅Lefase e sa le o le thea kgalekgale,

le magodimo o a bopile ka tša gago diatla.

₂₆Ona a tla feta, fela wena o tla šala;

ohle a tla hlagala bjalo ka seaparo;

o a lahla boka seaparo sa leratha,

gomme a feta.

₂₇Fela wena o dula o sa fetoge,

le mengwaga ya gago ga e fele.

₂₈Bana ba bahlanka ba gago ba tla lotega,

le ditlogolo tša bona di tla no phela di na le wena.

₁A ke rete Morena!

A ke tumiše leina la gagwe le lekgethwa ka pelo ya ka ka moka.

₂A ke rete Morena,

ke se lebale tše a ntirelago tšona:

₃O ntebalela makgopo a ka ka moka;

o mphodiša malwetši a ka ohle.

₄O ntlhakodiša lehung;

o a ntlhompha, a nthata, a ntšhokela.

₅Bophelong bja ka ka moka

o mpha tše botse ka bontši,

gore ke no fela ke tiile,

ke le yo mofsa bjalo ka ntšhu.

₆Morena o fa bagatelelwa ditshwanelo tša bona,

o ba ahlola ka toka.

₇O tsebišitše Moshe maikemišetšo a gagwe,

o laeditše Baisraele ditiro tša gagwe.

₈Morena o na le kgaugelo le lešoko;

ga a befelwe ka pela,

mme o tletše leratorato.

₉Ga a dule a kgalemela motho;

ga a befelwe go ya go ile.

₁₀Ga a re otle go ya ka moo re sentšego ka gona,

goba a itefeletša ka lebaka la dibe tša rena le makgopo a rena.

₁₁Bjalo ka ge legodimo le katologile lefase kudu,

ba ba mmoifago le bona o ba rata kudu.

₁₂Bjalo ka ge bohlabela bo tlogelane le bodikela,

le rena o re tlogelanya le dibe tša rena.

₁₃Morena o hlokomela bao ba mmoifago,

go swana le tatagobana ge a hlokomela bana ba gagwe.

₁₄O tseba se re bopilwego ka sona –

ga a lebale gore re lerole.

₁₅Motho o phela nako ye kopana go swana le bjang,

o bjalo ka letšoba la naga le le khukhušago.

₁₆Ge phefo ye e tšhumago e foka, le a hwa, la timelela.

_17-18Eupša bao ba boifago Morena

bona o ba rata go ya go ile,

mme o botegela meloko ya bao ba botegelago kgwerano ya gagwe,

gape ba phethago ditaelo tša gagwe ka potego ka go latelana ga meloko.

₁₉Morena o beile setulo sa gagwe sa bogoši legodimong;

ke kgoši ya tšohle.

₂₀Retang Morena,

lena barongwa ba gagwe,

lena bagale ba maatla,

ba le phethago ditaelo tša gagwe,

le theetšago se a se bolelago.

₂₁Retang Morena,

lena dibopiwa tšohle tša legodimo;

lena bahlanka ba gagwe ba le dirago thato ya gagwe!

₂₂Retang Morena,

lena dibopiwa tša gagwe ka moka gohle mo a bušago gona.

A ke rete Morena!

₁A ke rete Morena!

Wena Morena, Modimo wa ka,

o yo mogolo kudu!

O apere bogoši le letago;

₂o apara seetša bjalo ka kobo.

O phurolotše leratadima bjalo ka tente,

₃wa aga legae godimo ga meetse a ka godimo.

Maru o a dira koloi ya gago ya ntwa,

mme o namela diphego tša phefo.

₄Diphefo o di dira batseta ba gago,

mola magadima e le bahlanka ba gago.

₅O tsemile lefase metheong ya lona,

mme le ka se tsoge le šuthile.

₆O le apešitše lewatle bjalo ka seaparo,

mme meetse a khupetša dithaba.

₇A a tšhaba ge o a kgalemela;

a ela ka lephakuphaku

ge a ekwa modumo wa lentšu la gago.

₈A ela a tloga le dithabeng a theogela ka meeding,

lefelo leo o a kgethetšego lona.

₉O a beetše mollwane wo a ka se kego a o tshela;

a ka se tsoge a khupeditše lefase gape.

₁₀O ediša meetse a methopo ka meeding,

le dinoka tša ela mokgahlo ga dithaba.

₁₁Meetse a tšona a nwewa ke diphoofolo tšohle tša naga;

ke moo dipitsi di itimolago lenyora gona.

₁₂Mehlareng ya kgauswi le dinoka

dinonyana di ikagela dihlaga,

tša letša melodi makaleng.

₁₃O nešetša dithaba pula e etšwa legodimong,

mme lefase la nwa meetse a yona go kgolwa.

₁₄O hlogišetša dikgomo bjang,

motho wa mo medišetša dibjalo,

gore a tle a hwetše dijo mobung,

₁₅a itirele beine ya go mo thabiša,

le makhura a mohlware a go mo ediša sefahlego,

le dijo tša go mo tiiša maatla.

₁₆Mesedere ya Lebanone e nelwa ke pula ya matlorotloro –

ke mehlare ya gago, Morena, ye o e bjetšego.

₁₇Ke fao dinonyana di ikagelago dihlaga;

megolodi e aga dihlaga mehlareng ya mephaene.

₁₈Maolo a magolo ke gagabodikome,

mme marako ke botšhabelo bja dipela.

₁₉O bopile ngwedi ya ba taetšamabaka;

letšatsi le tseba nako ya lona ya go dikela.

₂₀O hlola leswiswi ya ba bošego,

gwa tšwa phoofolo tšohle tša naga.

₂₁Ditawana di a rora ge di tsoma,

di nyaka dijo tše di di fiwago ke Modimo.

₂₂Ge letšatši le hlaba di boela morago,

tša yo patlama ka digoleng tša tšona.

₂₃Ya ba gona batho ba yago medirong ya bona,

ba hlwa ba šoma go fihlela mantšiboa.

₂₄Morena, tše o di dirilego ga se ka bontši!

Tšohle o di dirile ka bohlale;

lefase le tletše dibopiwa tša gago.

₂₅Go na le lewatle, ke le legolo le ikadile,

ka go lona go na le diphedi tše ntšintši,

tše kgolo le tše nnyane.

₂₆Maselawatle a sepela godimo ga lona,

le Lebiathane, mamokebe wola o o bopilego,

o bapala ka go lona.

₂₇Tšohle di lebeletše wena

gore o di fe dijo ka nako ye e swanetšego.

₂₈Wa di fa tšona, di a ja;

wa di fepa, di ja go khora.

₂₉Wa di furalela, di a boifa;

wa di amoga moya, di a hwa,

tša boela leroleng mo di tšwago gona.

₃₀Eupša wa di budulela, di phela gape;

mobung le gona o tsoša bophelo ka bofsa.

₃₁A letago la Morena e be la go ya go ile!

A Morena a kgahlwe ke tše a di hlodilego!

₃₂Yo e rego ge a lebelela lefase,

la šikinyega;

e rego ge a kgwatha dithaba,

tša tupa muši.

₃₃Ke tla opelela Morena bophelong bja ka ka moka;

ge ke sa phela ke tla opelela Modimo wa ka ditumišo.

₃₄A a kgahlwe ke kopelo ya ka;

nna ke thabela tše Morena a di dirilego.

₃₅A badiradibe ba fedišwe lefaseng;

bakgopo a ba se hlwe ba le gona.

A ke rete Morena!

Retang Morena!