SAKARIA 7

₁Ka ngwaga wa bone wa ge Dariose e le kgoši, ka letšatši la bone la kgwedi ya senyane, kgwedi ya Kislebe, Morena a bolela le Sakaria.

₂Batho ba Bethele ba be ba romile Saretsere le Regeme-Meleke le banna ba gabobona Tempeleng ya Morena Ramaatlaohle go yo kgopela tšhegofatšo ya Morena, ₃le go yo botšiša baprista le baprofeta ba re: “Na re no tšwela pele le go ilela le go ikona dijo ka kgwedi ya bohlano go etša mengwageng ye mentši ye e fetilego?”

₄Ke mo Morena a ntaetšego ₅gore ke botšiše batho bohle ba naga ye le baprista ke re: “Kgane mola le ikona dijo ebile le ilela ka kgwedi ya bohlano le ya bošupa mengwageng ye masome a a šupago le be le direla nna? ₆Le mola le eja, le enwa, na e be e se go itšela le go inwela?”

₇Tšeo ke tšona tše Morena a bego a di bolela ka baprofeta bale ba pele mola Jerusalema le metseng ye e bapilego nayo go sa na le badudi ba bantši, go dutšwe ka boiketlo, le mola seleteng sa ka borwa se se omilego le nagengtlase go sa dula batho.

₈Morena a re go Sakaria: ₉“Nna, Morena Ramaatlaohle, ke laile setšhaba sa ka ka re: Le hlokomele gore go dirwe toka, le gona le swarane ka botho le ka lešoko. ₁₀Le se ke la gatelela bahlologadi le ditšhiwana le bafaladi le bahloki. Le gona le se ke la logelana maanomabe.

₁₁“Eupša setšhaba sa ka se ngangabetše sa gana go ntheeletša. Ba ithibile ditsebe gore ba se nkwe. ₁₂Ba ithatafaditše le dipelo tša ba bjalo ka leswika. Ka ge ba be ba gana go phetha melao le ditaelo tše ke bego ke ba romela tšona ka Moya wa ka di išwa ke baprofeta bale ba pele, ke ile ka ba galefela. ₁₃Ka ge ba be ba sa ntheeletše ge ke be ke ba bitša, le nna ke be ke sa ba theeletše ge ba be ba nthapela. Ke realo, nna, Morena Ramaatlaohle. ₁₄Ke ile ka ba hlothola bjalo ka ledimo, ka ba šwalalanyetša ditšhabeng tšohle tše ba bego ba sa di tsebe. Ya ba ge naga ye e šala e se na badudi le ba go e sepela, mme naga yela ye botse ya fetoga lešoka.”