Pesalome 82

₁Modimo o ya madulong a gagwe kgorong ya medimo,

o ahlola a dikaneditšwe ke medimo.

₂O re:

“Le tla feletša kae le go ahlola sepitša,

le rerelela bakgopo? Sela

₃Lwelang ditokelo tša bafokodi le ditšhiwana,

le ahloleng bahlaki le bahloki ka toka.

₄Hlakodišang bafokodi le badiidi,

le ba phološeng dinaleng tša bakgopo.

₅“Eupša ga le tsebe ebile ga le kwešiše selo,

le ebela swiswing,

etšwe metheo ya lefase e tekema.

₆Le ge ke ile ka le botša ka re:

‘Ke lena medimo,

bohle le barwa ba Ragodimodimo,’

₇le tla hwa bjalo ka batho ba nama,

go no swana le mmuši ofe le ofe.”

₈Tsoga, Modimo, o sekiše lefase,

gobane tšhaba tšohle ke tša gago.