Morena o tla tsošološa Jerusalema
1Morena Ramaatlaohle a re go Sakaria: 2“Ke tshwenyegile kudu ka motse wa Jerusalema, mo ke bilego ke galefetše manaba a bona. Ke realo, nna, Morena Ramaatlaohle. 3Ke tla boela thabeng ya Sione, ka dula motseng wa Jerusalema. Wona o tla bitšwa motse wo o botegago, gomme thaba ya Morena Ramaatlaohle e tla bitšwa thaba ye kgethwa. 4Bakgalabje le bakgekolo ba lehlotlo ba tla buša ba itulela mapatlelong a Jerusalema. Ke realo, nna, Morena Ramaatlaohle. 5Mapatlelo a motse le ona a tla tlala bašemane le banenyana ba ba ralokago.
6“Le ge mašaledi a setšhaba se bjale a bona nke tše dibjalo di ka se kgonege, na le nna nka bona di sa kgonege? Go botšiša nna, Morena Ramaatlaohle. 7Nna, Morena Ramaatlaohle, ke re ke tla hlakodiša setšhaba sa ka dinageng tša ka bohlabatšatši le tša ka bodikelatšatši, 8gomme ka se buša sa tlo dula Jerusalema. E tla ba setšhaba sa ka, gomme nna ka ba Modimo wa sona, ka se buša ka potego le ka toka.
9“Nna, Morena Ramaatlaohle, ke re: Tiang maatla, lena bjale le kwago taba ye ka baprofeta ba ba bego ba le gona mola go thewa motheo wa go tsošološa Tempele, e lego ntlo ya ka, nna, Morena Ramaatlaohle. 10Pele ga moo go be go se na yo a nago le tšhelete ya go thwala motho, goba go lefela seruiwa sa go dirišwa. Batho ba be ba sa dire mešomo ya bona ka polokego ka lebaka la manaba a bona, gobane ke be ke lwiša motho le moagelani wa gagwe. 11Eupša go tloga bjale mašaledi a setšhaba se nka se sa a swara bjalo ka pele. Ke realo, nna, Morena Ramaatlaohle. 12Ba tla bjala dipeu tša bona ba iketlile. Merara ya bona e tla enywa, mobu o tla ntšha dibjalo, le legodimo le tla wiša phoka. Tše ka moka ke tla di fa mašaledi a setšhaba se. 13Lena batho ba Juda le lena ba Israele, pele le be le le sešupo sa thogako go baditšhaba, eupša ke tla le phološa, mme la ba sešupo sa tšhegofatšo. Ka gona, betang dipelo le se boife.”
14Morena Ramaatlaohle o re: “Ka ge borakgolokhukhu ba lena ba ile ba nkgalefiša, ke ile ka ikemišetša go le hlokofatša, gomme ka se buše pelo. 15Fela bjale ke hlaname, mme ke ikemišeditše go atla batho ba Jerusalema le ba Juda. Ka gona le se boife. 16Tše le swanetšego go di dira ke go botšana nnete, le ahlole ka toka le ka therešo ka dikgorong tša tsheko, gore go be le khutšo. 17Le se ke la rerelana tše mpe. Le se ikane ka bohlatse bja maaka, gobane tša mohuta woo ke tše ke di hloilego. Ke realo, nna, Morena.”
18Morena Ramaatlaohle a re go nna: 19“Nna, Morena Ramaatlaohle, ke re go ikona dijo ka kgwedi ya bone, ya bohlano, ya bošupa, le ya lesome go tla fetoga mabaka a lethabo le tlhalalo, go tla fetoga menyanya bathong ba Juda. Ka gona, le rate nnete le khutšo.”
20Morena Ramaatlaohle o re: “Ka moso Jerusalema go tlilo tla batho ba go tšwa metseng ye mentši. 21Ba motse wo mongwe ba tla ya go ba wo mongwe ba re: ‘A re yeng re yo khunamela Morena Ramaatlaohle, re mo rapeleng gore a re šegofatše!’ 22Ditšhaba tše dintši le merafe ye maatla ba tla tla Jerusalema go khunamela Morena Ramaatlaohle, le go mo rapela gore a ba šegofatše. 23Mehleng yeo banna ba lesome ba maleme a a fapanego le ditšhaba tše di fapanego ba tla swara monna wa Mojuda ka morumo wa seaparo sa gagwe ba re: ‘E re re sepeleng le lena, ka gobane re kwele gore Modimo o na le lena.’ Ke realo, nna, Morena Ramaatlaohle.”
