To The Word – Day 198

₁Ka morago monna yoo a nkiša ka Tempeleng. A ela dikokwane, mme bokoto bja tšona ya ba dimetara tše tharo ka mo le ka mo. ₂Bophara bja lesoro ya ba dimetara tše tlhano, gomme bokoto bja dikokwane tša lona ya ba dimetara tše pedi le seripa ka mo le ka mo. A ela phapoši ya gare, gomme ya ba dimetara tše masome a mabedi ka botelele, le tše lesome ka bophara.

₃Ke moka a ya phapošing ya moseo. A ela dikokwane tša mojako, ye nngwe le ye nngwe ya ba ya metara o tee ka bokoto. Bophara bja mojako ya ba dimetara tše tharo, gomme bokoto bja dikokwane tša wona ya ba dimetara tše tharo le seripa. ₄A ela botelele bja phapoši yeo, mme ya ba dimetara tše lesome, le bophara ya ba dimetara tše lesome. A re go nna: “Mo ke gona Felo mo Gokgethwakgethwa.”

₅Monna yoo a ela bokoto bja leboto la Tempele, gomme ya ba dimetara tše tharo. Go bapela le leboto le, go dikologa le Tempele, go be go na le molokoloko wa diphapoši tše dinnyane tša dimetara tše pedi ka bophara. ₆Diphapoši tšeo e be e le tša mabato a mararo a go hlatlagana, gomme lebatong le lengwe le le lengwe go na le diphapoši tše masome a mararo. Leboto la ka ntle la Tempele lebatong le lengwe le le lengwe le be le fetwa ke la ka fase ga lona ka bokoto mo e lego gore diphapoši di be di dulane godimo ka maboto. ₇Bophara bja diphapoši bo be bo oketšega lebatong le lengwe le le lengwe ka go sesefala ga leboto ge le eya godimo. Diphapošing tša ka godimo go be go iwa ka manamelo a a tlogago lebatong la ka fase, go ya go la gare, le go la ka godimo. ₈Ka bona Tempele e na le sethala se se e dikologilego, sona e le motheo wa diphapoši. Bogodimo bja sona bo be bo lekana le botelele bja lehlaka la go ela, e lego dimetara tše tharo. ₉Bokoto bja leboto la ka ntle la diphapoši e be e le dimetara tše pedi le seripa. Go be go na le sekgoba mokgahlo ga diphapoši tša Tempele ₁₀le diphapoši tša baprista go dikologa Tempele, mme sona e le sa dimetara tše lesome ka bophara. ₁₁Diphapošing tšeo tša Tempele go be go na le mejako ye mebedi ye e bulelwago sekgobeng seo: wo mongwe o lebeletše leboa, wo mongwe o lebeletše borwa. Bophara bja sekgoba seo e be e le dimetara tše pedi le seripa go dikologa Tempele.

₁₂Ka mafelelong a kgoro ya ka thoko ya bodikela bja Tempele go be go na le moago wa dimetara tše masome a mane le tše tlhano ka botelele, le tše masome a mararo le tše tlhano ka bophara; leboto la wona e be e le la dimetara tše pedi le seripa ka bokoto mo gohle.

₁₃Monna yoo a ela Tempele, gomme ya ba ya dimetara tše masome a mahlano ka botelele. Gomme go tloga lehlakoreng la ka morago la Tempele go putla kgoro go yo fihla lehlakoreng la ka mafelelong la moago wa ka bodikela sebaka sa gona le sona ya ba dimetara tše masome a mahlano. ₁₄Bophara bja kgoro ya ka bohlabatšatši go balwa le bokapele bja Tempele e be e le dimetara tše masome a mahlano. ₁₅A ela le botelele bja moago wo o lebeletšego kgorong ya ka morago ga Tempele, gotee le mathudi a a lego ka mahlakoreng ka mabedi, le bjona ya ba dimetara tše masome a mahlano.

Phapoši ya gare ga Tempele, le phapoši ya moseo, le mathudi a go tsenela ka Tempeleng, ₁₆le direpodi, le mafasetere a mapheko, le mathudi a ka mathokong a mararo a a lebeletšego mojako wa Tempele di be di manegilwe ka dipapetlana tša dikota mo gohle, go tloga fase go fihla mafesetereng. Mafasetere ao a be a tswalelega. _17-18Mo gohle mabotong ka moka a phapoši ya moseo le ya gare go be go tlokilwe diswantšho tša bakerubi le tša mehlare ya mepalema ka go latelana ga tšona go fihla serepoding, mokerubi a latela mopalema, bjalo bjalo. Mokerubi yo mongwe le yo mongwe o be a na le difahlego tše pedi: ₁₉sefahlego sa motho sa go lebelela mopalemeng ka thoko ye nngwe, le sa tau sa go lebelela mopalemeng ka thoko ye nngwe. Di be di tlokilwe bjalo mo gohle Tempeleng. ₂₀Go tloga fase go fihla serepoding sa mojako wa Tempele mo lebotong go be go tlokilwe diswantšho tša bakerubi le tša mepalema. ₂₁Bophara le bogodimo bja mojako wa phapoši ya gare bo be bo lekana.

Pele ga mojako wa Felo mo Gokgethwakgethwa go be go na le selo se se swanago le ₂₂aletare ya dikota. E be e le ya metara o tee le seripa go ya godimo, le metara o tee botelele, le metara o tee bophara. Dikota tša yona tša dikhutlo le bogato bja yona le mahlakore a yona ka moka e be e le tša dikota. Monna yoo a re go nna: “Ye ke yona tafola ye e emego pele ga Morena.”

₂₃Phapoši ya gare le Felo mo Gokgethwakgethwa di be di na le mejako ya mabati a mabedi ye nngwe le ye nngwe. ₂₄Mabati ao a be a bulwa ka bogare. ₂₅Mo mabating a phapoši ya gare go be go tlokilwe diswantšho tša mehlare ya mepalema le bakerubi, go no swana le mabotong. Mathudi a Tempele a be a na le tlhaka ya dikota ka pele. ₂₆Ka mahlakoreng a mathudi mabotong go be go na le mafasetere a mapheko, gomme gona moo mabotong go tlokilwe diswantšho tša mehlare ya mepalema ka mo le ka mo.

₁Ke moka monna yoo a nkiša ka leboa ka kgorong ya ka ntle, a nkiša diphapošing tše di lebanego le kgoro ya Tempele, le moago wo o lego ka leboa. ₂Moago woo e be e le wa dimetara tše masome a mahlano ka botelele, le tše masome a mabedi le tše tlhano ka bophara. Mojako wa wona o be o le ka leboa. ₃Go lebana le lebala la dimetara tše lesome le le bego le kgomagane le kgoro ya ka gare, le go lebana le lebato la kgoro ya ka ntle go be go na le diphapoši tše di lebelelanego mabatong a mararo a a hlatlaganego. ₄Mo pele ga diphapoši go be go na le megorogohlo ye e išago ka diphapošing tšeo, bophara bja yona e le dimetara tše tlhano, mme botelele e le dimetara tše masome a mahlano. Mejako ya yona e be e lebeletše leboa. ₅Diphapoši tša lebatong la ka godimo di be di pitlagane go feta tša lebatong la ka fase le la gare, ka gore di be di agetšwe moragonyana. ₆Diphapoši tša mabatong ao ka mararo di be di se na dikokwane, di sa swane le meago ya dikgoro; ke ka lebaka leo diphapoši tša ka godimo di bego di agetšwe moragonyana go tša ka fase ga tšona, le go tša gare. ₇Go bapa le diphapoši ka ntle go be go na le leboto la dimetara tše masome a mahlano ka botelele le eya ka kgorong ya ka ntle. ₈Botelele bja moago wa diphapoši tšeo di lebeletšego kgorong ya ka ntle e be e le dimetara tše masome a mabedi le tše tlhano, kganthe bja diphapoši tšeo di lebeletšego Tempeleng e be e le dimetara tše masome a mahlano. ₉Ka bohlabela diphapoši tša ka fase di be di na le mojako wa go tsena ge motho a etšwa ka kgorong ya ka ntle.

₁₀Go bapa le leboto la kgoro ya ka ntle ka lehlakoreng la lona la ka borwa go be go na le diphapoši tše di lebeletšego ka kgorong ya Tempele le go wona moago wa diphapoši. ₁₁Mo pele ga diphapoši go be go na le mogorogohlo. Diphapoši tše di be di swana le tšela tša ka leboa. Di be di lekana natšo ka botelele le ka bophara, di swana natšo le ka sebopego, le mejako ya tšona e swana. ₁₂Go be go na le mogorogohlo ka fase ga diphapoši tša ka lehlakoreng la ka borwa la moago. Mathomong a mogorogohlo wo wa go bapa le leboto go leba ka bohlabatšatši go be go na le mojako wo go tsenwago ka wona ka diphapošing.

₁₃Monna yoo a re go nna: “Diphapoši tše di lego ka leboa le ka borwa tše di lebeletšego ka kgorong ya Tempele ke tše dikgethwa, tše baprista ba ba tsenago ka mo go lego Morena ba jelago dikabelo tše dikgethwakgethwa ka go tšona. Ka ge diphapoši tša gona e le tše dikgethwa, baprista ba tla bea dikabelo tše dikgethwakgethwa ka gare ga tšona: dikabelo tša bupi le dihlabelo tša tshwarelo ya dibe le tša dihlabelo tša tefelo ya tšona. ₁₄Ge baprista ba ile ba tsena ka Felo mo Gokgethwa, ba se ke ba tšwela ka kgorong ya ka ntle ba se ba apola diaparo tše ba bego ba di apere ge ba hlankela Morena, ba di tlogele moo, gobane diaparo tšeo ke tše dikgethwa. Ba apare tša bona pele ba tšwela ka ntle mo go kgobokanego setšhaba.”

₁₅Ge monna yoo a seno fetša go ela bokagare bja lebala la Tempele, o ile a nntšhetša ka ntle ka kgoro ya ka bohlabatšatši, gomme a ela setsha sa Tempele. ₁₆A ela lehlakore la ka bohlabatšatši ka lehlaka la go ela, gomme lona ya ba la dimetara tše makgolo a mabedi le tše masome a mahlano. ₁₇Ke moka a ela lehlakore la ka leboa, le lona ya ba la dimetara tše makgolo a mabedi le tše masome a mahlano. ₁₈A ela lehlakore la ka borwa, le lona ya ba la dimetara tše makgolo a mabedi le tše masome a mahlano. ₁₉A ya ka lehlakoreng la ka bodikela, a le ela, gomme le lona ya ba la dimetara tše makgolo a mabedi le tše masome a mahlano. ₂₀Ya ba ge a etše mathoko ka mane a leboto la thetemotse; botelele bja lona ya ba dimetara tše makgolo a mabedi le tše masome a mahlano, bophara le bjona ya ba dimetara tše makgolo a mabedi le tše masome a mahlano. Leboto leo ya ba la go aroganya sekgoba se sekgethwa le se e sego se sekgethwa.

₁Monna yoo a nkiša lesorong le le lebeletšego bohlabatšatši, ₂gomme moo ka bona letago la Modimo wa Israele le etšwa bohlabatšatši. Modumo wa lentšu la gagwe wa kwagala bjalo ka wa maphoto a lewatle, gomme lefase la bonegelwa ke letago la gagwe. ₃Pono yeo e be e swana le yela ke bego nkile ka e bona mola Modimo a etla go fediša Jerusalema, le yela ke bego nkile ka e bona kua nokeng ya Kebara. Ke moka ka itahlela fase ka sefahlego. ₄Letago leo la Morena la tsena ka lesoro le le lebeletšego bohlabatšatši la ya ka Tempeleng.

₅Moya wa Morena wa nkuka wa ntsentšha ka kgorong ya ka gare, moo ke ilego ka bona Tempele e tletše letago la Morena. ₆Ya re monna yoo a sa eme ka thoko ga ka ka kwa motho a bolela le nna a le ka Tempeleng ₇a re: “Wena motho wa nama, felo fa ke mo go lego setulo sa ka sa bogoši, le mo ke khutšišago maoto. Ke mo ke tlago dula gare ga Baisraele go ya go ile. Setšhaba sa Israele le magoši a sona ba ka se sa tsoga ba gobošitše leina la ka ka go khunamela medimo ye mengwe, goba ka go boloka dikgoši tša bona mo lefelong le. ₈Dikgoši di phutše mojako wa mošate go bapela le wa Tempele ya ka, mo e lego gore nna le bona re arogantšwe fela ke leboto. Ba gobošitše leina la ka le lekgethwa ka tše di šišimišago tše ba di dirilego, ka gona ka ba fediša ke galefile. ₉Bjale ba swanetše go lesa go khunamela medimo ye mengwe, gomme ba tloše ditopo tša dikgoši tša bona. Ge ba ka dira bjalo ke tla dula gare ga bona go ya go ile.

₁₀“Wena motho wa nama, o hlalošetše setšhaba sa Israele ka Tempele yeo, gomme ba lebeledišiše seswantšho sa yona. O ba lemoše gore ba inyaletše makgopo a bona. ₁₁Ge ba ka inyaletša tšohle tše ba di dirilego, o ba hlalošetše seswantšho sa Tempele: seemo sa yona, mejako le masoro, sebopego sa yona, peakanyo ya dilo ka moka, le melao le melawana yohle ya yona. O di ngwale ba go lebeletše, gore ba tle ba lemoge seemo sa yona mme ba phethe melao ya yona ka moka. ₁₂Molao wa Tempele šo: Sekgoba sohle se se potapotilego Tempele godimo ga thaba le se tšee e le se sekgethwakgethwa.”

₁₃Šedi dikelo tša aletare, tša ge go šomišwa kelo ya go swana le ye e šomišitšwego ge go elwa Tempele. Aletare e be e na le mosele wa disentimetara tše masome a mahlano go iša fase, le masome a mahlano bophara, le morumo wa disentimetara tše masome a mabedi le tše tlhano bophara. Bophagamo bja aletare ka boyona bo be bo le ka mokgwa wo: ₁₄Go tloga fase moseleng go fihla serepoding sa ka fase e be e le metara o tee go ya godimo, le disentimetara tše masome a mahlano bophara. Go tloga serepoding se senyenyane go fihla go se segolo e be e le dimetara tše pedi go ya godimo, le disentimetara tše masome a mahlano bophara. ₁₅Bophagamo bja karolo ya aletare yeo dihlabelo di bego di tšhumelwa go yona e be e le dimetara tše pedi, gomme go tloga karolong yeo go ya godimo go be go tlomogile manakana a mane. ₁₆Karolo ye e be e lekalekana ka mathoko ohle, e le dimetara tše di selelago ka botelele, le tše di selelago ka bophara. ₁₇Serepodi sa ka godimo se be se lekalekana ka mahlakoreng ohle, e le dimetara tše di šupago ka botelele, le tše di šupago ka bophara, se na le morumo wa disentimetara tše masome a mabedi le tše tlhano ka bophara. Mosela wa go dikologa aletare e be e le wa disentimetara tše masome a mahlano. Manamelo a go namelela aletareng a be a le ka lehlakoreng la ka bohlabatšatši.

₁₈Monna yoo a re go nna: “Wena motho wa nama, Morena, Mong wa bohle o re: Ditaelo tša go dira dihlabelo tša go tšhungwa ka moka le tša go foka aletare ka madi ge e agilwe šedi: ₁₉Baprista bale ba kgoro ya Lefi ba e lego ditlogolo tša Tsadoko ke bona fela ba ba swanetšego go tla pele ga Morena go mo hlankela. Morena, Mong wa bohle, o go laela gore o ba fe powana e be sehlabelo sa tshwarelo ya dibe. ₂₀O tšee madi a mangwe a yona o tlotše manakana a aletare ka ona, le dikhutlo tša serepodi sa ka godimo ka dine, le morumo ka moka. Ka mokgwa woo o tla be o hlwekiša aletare ebile o e kgethwafatša. ₂₁O tšee powana yeo ya go dira sehlabelo sa tshwarelo ya dibe o e tšhumele lefelong leo le se kgethetšwego ka ntle ga setsha sa Tempele. ₂₂Ka tšatši le le latelago o tšee phooko ye e se nago bosodi o dire sehlabelo sa tshwarelo ya dibe ka yona. O boeletše o hlwekiše aletare ka wona mokgwa wola o dirilego ka madi a powana. ₂₃Ge o feditše go e hlwekiša, o tšee powana le kgapa ya mohlape wa gago, bobedi e be tše di se nago bosodi, ₂₄o di iše go Morena. Baprista ba di gaše ka letswai gomme ba mo tšhumele tšona e le sehlabelo sa go tšhungwa ka moka. ₂₅Matšatšing a a šupago o dire sehlabelo sa tshwarelo ya dibe ka diruiwa tša mohlape wa gago, ka phooko le ka powana le ka kgapa tšatši le lengwe le le lengwe. Ka moka ga tšona e be tše di se nago bosodi. ₂₆Matšatšing a a šupago baprista ba šegofatše aletare ba e hlwekiše, e be gona go e kgethwafatša. ₂₇Ge matšatši ao a fetile, go tloga ka tšatši la seswai baprista ba thome go le direla dihlabelo tša go tšhungwa ka moka le dihlabelo tša kagišano aletareng. Ke mo le tlago nkgahla. O realo, Morena, Mong wa bohle.”

₁Monna yoo a mpušetša lesorong la ka ntle la Tempele le le lebeletšego bohlabatšatši. Lesoro leo le be le tswaletšwe, ₂gomme Morena a re go nna: “Lesoro le le dule le tswaletšwe, le se ke la bulwa. Go se be le motho yo a tsenago ka lona. Le dule le tswaletšwe, ka gobane nna, Morena Modimo wa Israele, ke tsene ka lona. ₃Ke kgoši fela yo a dumeletšwego go yo jela dijo tše dikgethwa go lona pele ga ka. A ye gona ka tsela ya lona ya mathudi, a be a tšwe ka yona.”

₄Monna yoo a nntšha ka lesoro la ka leboa a nkiša pele ga Tempele. Ya re ge ke lebelela, ka bona Tempele ya Morena e tletše letago la gagwe. Ka itahlela fase ka sefahlego, ₅gomme Morena a re go nna: “Wena motho wa nama, o ele hloko tšohle tše o di bonago ka mahlo, gape o di kwago ka ditsebe mabapi le tšohle tše ke go botšago tšona ka melao le melawana ya Tempele ya ka. O šetše gabotse gore ke batho bafe ba ba dumeletšwego go tsena le go tšwa ka Tempeleng, le ba ba sego ba dumelelwa.

₆“O botše setšhaba seo sa dingangele sa Israele gore nna, Morena, Mong wa bohle, ke re: Lena setšhaba sa Israele, tlogelang tšohle tše di šišimišago tše le di dirago! ₇Le tšhilafaditše Tempele ya ka ka go dumelela bafaladi ba mašoboro, batho ba ba sa ntlhomphego, gore ba tsene ka Tempeleng ya ka ge le ntlišetša makhura le madi e le kabelo ya dijo. Ka gona le lahlile kgwerano ya ka ka tšohle tše di šišimišago tše le di dirilego. ₈Ga se la phetha ditirelo tše dikgethwa ka Tempeleng ya ka, eupša le dirile gore di phethwe ke bafaladi.

₉“Nna, Morena, Mong wa bohle, ke re: Mofaladi wa lešoboro, yo a sa ntlhomphego, a se tsene ka Tempeleng ya ka, ešita le bafaladi ba ba tswakanego le Baisraele.”

₁₀“Balefi bale ba go kgeloga ba na le Baisraele ka moka ba khunamela medingwana ba tla otlelwa sebe sa bona. ₁₁Ba ka no ntlhankela ka Tempeleng ka go hlokomela masoro le go dira modiro wa ka Tempeleng. Ba ka no hlaba diruiwa tšeo batho ba di tlišago gore ka tšona go dirwe dihlabelo tša go tšhungwa ka moka, le dihlabelo tše dingwe, gomme ba ba modirong wa go direla setšhaba dihlabelo. ₁₂Fela ka ge ba ile ba khunamela medingwana, seo ba se direla setšhaba sa Israele, gomme ka go dira bjalo ba diriša setšhaba sebe, nna, Morena, Mong wa bohle, ke ikanne gore ke tla ba otlela sebe seo sa bona. ₁₃Ba se ke ba mpatamela ba tlo ntlhankela e le baprista, goba ba batamela se sengwe sa tše dikgethwa tša ka, goba ba batamela dikabelo tše dikgethwakgethwa. Ke ka mo ba tlago goboga ka lebaka la tše di šišimišago tše ba ilego ba di dira. ₁₄Ke ba fa mešongwana yohle ya ka Tempeleng, tšohle tše di swanetšego go dirwa go yona.”

₁₅“Baprista ba Balefi ba e lego ditlogolo tša Tsadoko bona ba ile ba no fela ba botegela mediro ya ka Tempeleng ya ka mola Baisraele ba kgeloga. Ke ka lebaka leo bjale e lego bona bao ba swanetšego go mpatamela gore ba ntlhankele, ba nkabele makhura le madi a dihlabelo. ₁₆Ke bona fela ba ba swanetšego go tsena ka Tempeleng ya ka, le go batamela tafoleng ya ka ba ntlhankela, gomme ba swara tirelo ya ka Tempeleng. ₁₇Ge ba tsena ka masoro a go ya ka kgorong ya ka gare ya Tempele ba apare diaparo tša mašela. Ba se ke ba apara seaparo sa boya ge ba le modirong wa bona ka kgorong ya ka gare goba ka Tempeleng. ₁₈Ba rwale dikuane tša mašela hlogong, ba apare marokgo a mašela; ba se ke ba apara selo se se kago ba ntšha sethitho. ₁₉Pele ba eya ka kgorong ya ka ntle moo go lego setšhaba, ba apole diaparo tše ba bego ba di apere mola ba le modirong wa bona ka Tempeleng, gomme ba di tlogele ka phapošing tše dikgethwa. Ba apare tša bona gore ba tle ba se tšhele setšhaba madimabe a diaparo tša bona tše dikgethwa.

₂₀“Baprista ba se ke ba phalola dihlogo goba ba rua setšhitšhi. Meriri ya bona e dule e fokoditšwe. ₂₁Baprista ba se ke ba nwa beine pele ba tsena ka kgorong ya ka gare. ₂₂Moprista a se ke a nyala mosadi yo a hladilwego; a nyale fela kgarebe ya Moisraele, goba mohlologadi wa moprista yo a hlokafetšego.

₂₃“Baprista ba rute setšhaba sa ka go kgetholla se sekgethwa go se e sego se sekgethwa, le se se hlwekilego go se se sego sa hlweka. ₂₄Ge batho ba sekišana kgorong baprista ba ahlole molato woo go ya ka melao ya ka. Ba phethe melao le melawana ya ka menyanyeng ya ka yohle, le Disabatha tša ka ba di kgethwafatše.

₂₅“Moprista a se ke a itšhilafatša ka go kgoma setopo, ge e se ge e le sa tatagwe, goba sa mmagwe, goba sa morwediagwe, goba sa morwarragwe, goba sa kgaetšediagwe ye e sego ya nyalwa. ₂₆Ge a seno hlwekišwa gape a letele matšatši a a šupago. ₂₇Ka tšatši le a tsenago gape ka lona ka kgorong ya ka gare ya Tempele go dira modiro wa gagwe wa ka Tempeleng a dire sehlabelo sa tshwarelo ya dibe. Ke realo, nna, Morena, Mong wa bohle.

₂₈“Baprista ba se ke ba fiwa lefa felo, gobane lefa la bona ke nna. Le se ke la ba fa thoto mo nageng ya Israele, gobane thoto ya bona ke nna. ₂₉Ba phele ka dikabelo tša bupi, le dihlabelo tša tshwarelo ya dibe, le dihlabelo tša tefelo ya tšona; le tšohle tše di abetšwego nna mo nageng ya Israele e be tša bona. ₃₀Dithakangwaga tšohle tše kaonekaone le dikabelo tšohle tše le ntlišetšago tšona e be tša bona. Hlama ya lena ya mathomo le e fe baprista, ke mo ke tlago atla malapa a lena. ₃₁Baprista ba se ke ba ja nonyana goba phoofolo ye e ikhwetšego ka boyona, goba e bolailwego ke phoofolo ye nngwe.”

₁“Mohla le arola naga le efa kgoro ye nngwe le ye nngwe karolo, seripa se sengwe se arolelwe Morena e le selete se sekgethwa. E be sa dikilometara tše lesome le tše pedi le seripa ka botelele, le tše lesome ka bophara. Sebaka seo ka moka e tla ba se sekgethwa. ₂Gona mo sebakeng seo go be le setsha sa Tempele sa go lekana ka mathoko ohle a dimetara tše makgolo a mabedi le masome a mahlano ka botelele, le tše makgolo a mabedi le masome a mahlano ka bophara, gomme sona se dikologwe ke sekgoba sa dimetara tše masome a mabedi le tše tlhano ka bophara. ₃Ka gare ga selete seo se sekgethwa le ele karolo ya dikilometara tše lesome le tše pedi le seripa ka botelele, le tše tlhano ka bophara. Ka go yona go agwe Tempele, e lego gona Felo mo Gokgethwakgethwa. ₄Karolo ye e be yona ye kgethwa nageng, e be ya baprista ba go hlankela Morena ka Tempeleng. E be ya magae a bona, e be lefelo le lekgethwa la Tempele.

₅“Karolo ye nngwe ya botelele bja dikilometara tše lesome le tše pedi le seripa, le bophara bja dikilometara tše tlhano e be ya Balefi bao ba dirago mediro ya ka Tempeleng. Gona moo go be le metse ye ba dulago go yona.

₆“Kgauswi le selete seo se sekgethwa le arole seripa se sengwe sa dikilometara tše lesome le tše pedi le seripa ka botelele, le tše pedi le seripa ka bophara, e be ya motse moo mang le mang wa setšhaba sa Israele a kago dula gona.”

₇“Kgoši le yona e arolelwe naga ye e lego ka mahlakoreng a mabedi a selete sekgethwa, le a karolo yeo go yona go tlago agwa motse. Ka bodikela e nabele bodikela; ka bohlabatšatši e nabele bohlabatšatši. Botelele bja yona bo lekane le bja karolo ye nngwe ya tše di aroletšwego dikgoro tša Israele. E tloge mollwaneng wa ka bodikela wa naga e yo fihla go wa ka bohlabatšatši. ₈Karolo ye ya naga ya Israele e tla ba yona ya kgoši, gomme dikgoši tša ka di ka se sa gatelela setšhaba sa ka, eupša di tla tlogelela setšhaba sa Israele naga go ya ka dikgoro tša sona.”

₉Morena, Mong wa bohle, a re: “Go lekane, lena babuši ba Israele! Tlogelang šiši le kgatelelo. Dirang tše di lokilego le tše di swanelago. Lesang go raka setšhaba sa ka nageng ya sona. Le botšwa ke nna, Morena, Mong wa bohle.

₁₀“Le šomiše dikeloboima le diroto tše di nepagetšego le meruswi ye e nepagetšego.

₁₁“Seroto le moruswi di lekane ka bogolo, moruswi le seroto bobedi e be tša go tsena galesome ka pitšeng ye go elwago ka yona.

₁₂“Dikeloboima tša lena e be tše di latelago: digera tše masome a mabedi di lekana le šekele e tee, dišekele tše masome a a selelago di lekana le mina o tee.

₁₃“Dikabelo tša lena e swanetše go ba tše: mabele e be seroto se tee go tše masome a a selelago, garase e be seroto se tee go tše masome a a selelago, ₁₄makhura a mohlware e be moruswi o tee go ye lekgolo. ₁₅Go tšwa mohlapeng wo mongwe le wo mongwe wa dihuswane tše makgolo a mabedi tša mafulo a Israele go neelwe sehuswane se tee.

“Ka dikabelo tšeo ka moka go dirwe dikabelo tša bupi, le dihlabelo tša go tšhungwa ka moka, le dihlabelo tša kagišano, gore setšhaba se swarelwe dibe tša sona.

₁₆“Batho bohle ba naga ye ba išetše kgoši ya Israele dikabelo tšeo. ₁₇Yena sa gagwe e tla ba go tliša diruiwa tša go tšhungwa ka moka, le dikabelo tša bupi, le dikabelo tša dino ge setšhaba sa Israele se keteka Monyanya wa Lebalana, le Disabatha, le menyanya ye mengwe. O swanetše go ntšha dihlabelo tša tshwarelo ya dibe, le dikabelo tša bupi, le dihlabelo tša go tšhungwa ka moka, le dihlabelo tša kagišano, gore setšhaba sa Israele se swarelwe dibe tša sona.”

₁₈Morena, Mong wa bohle, a re: “Ka letšatši la pele la kgwedi ya mathomo le dire sehlabelo ka poo ye e se nago bosodi, gomme le hlwekiše Tempele. ₁₉Moprista a tšee madi a mangwe a sehlabelo se sa tshwarelo ya dibe, a a tlotše dikoteng tša mejako ya Tempele le dikhutlong tša serepodi sa ka godimo sa aletare ka bone ga tšona, le dikoteng tša masoro a go ya ka kgorong ya ka gare. ₂₀Ka letšatši la bošupa la kgwedi le dire ka wona mokgwa woo, le direle mang le mang yo a ka nogo ba a dirile sebe a se a ikemišetša, goba a sa tsebe. Ke ka mokgwa wo le swanetšego go hlwekiša Tempele ka wona.

₂₁“Ka letšatši la lesome le metšo ye mene la kgwedi ya mathomo le thome go keteka Monyanya wa Paseka. Matšatšing a a šupago go lewe senkgwa se se se nago komelo. ₂₂Ka letšatši la mathomo la monyanya kgoši a dire sehlabelo sa tshwarelo ya dibe tša gagwe ka poo le tša setšhaba ka moka sa naga ye. ₂₃Tšatšing le lengwe le le lengwe la matšatši ao a go šupa a monyanya a direle Morena sehlabelo sa go tšhungwa ka moka ka dipoo tše di šupago le dikgapa tše di šupago tše di se nago bosodi. A dire le sehlabelo sa tshwarelo ya dibe ka phooko tšatši le lengwe le le lengwe. ₂₄Poo ye nngwe le ye nngwe le kgapa ye nngwe le ye nngwe ye a dirago sehlabelo ka yona e emelwe ke kabelo ya bupi ya seroto sa bupi, le moruswi wa makhura a mohlware.

₂₅“Tšatši le lengwe le le lengwe la matšatši a a šupago a Monyanya wa Mešaša kgoši a dire ka mokgwa woo ka sehlabelo sa tshwarelo ya dibe, le ka sa go tšhungwa ka moka, a tšhume le kabelo ya bupi le ya makhura a mohlware ka mokgwa woo.”