HESEKIELE 43

₁Monna yoo a nkiša lesorong le le lebeletšego bohlabatšatši, ₂gomme moo ka bona letago la Modimo wa Israele le etšwa bohlabatšatši. Modumo wa lentšu la gagwe wa kwagala bjalo ka wa maphoto a lewatle, gomme lefase la bonegelwa ke letago la gagwe. ₃Pono yeo e be e swana le yela ke bego nkile ka e bona mola Modimo a etla go fediša Jerusalema, le yela ke bego nkile ka e bona kua nokeng ya Kebara. Ke moka ka itahlela fase ka sefahlego. ₄Letago leo la Morena la tsena ka lesoro le le lebeletšego bohlabatšatši la ya ka Tempeleng.

₅Moya wa Morena wa nkuka wa ntsentšha ka kgorong ya ka gare, moo ke ilego ka bona Tempele e tletše letago la Morena. ₆Ya re monna yoo a sa eme ka thoko ga ka ka kwa motho a bolela le nna a le ka Tempeleng ₇a re: “Wena motho wa nama, felo fa ke mo go lego setulo sa ka sa bogoši, le mo ke khutšišago maoto. Ke mo ke tlago dula gare ga Baisraele go ya go ile. Setšhaba sa Israele le magoši a sona ba ka se sa tsoga ba gobošitše leina la ka ka go khunamela medimo ye mengwe, goba ka go boloka dikgoši tša bona mo lefelong le. ₈Dikgoši di phutše mojako wa mošate go bapela le wa Tempele ya ka, mo e lego gore nna le bona re arogantšwe fela ke leboto. Ba gobošitše leina la ka le lekgethwa ka tše di šišimišago tše ba di dirilego, ka gona ka ba fediša ke galefile. ₉Bjale ba swanetše go lesa go khunamela medimo ye mengwe, gomme ba tloše ditopo tša dikgoši tša bona. Ge ba ka dira bjalo ke tla dula gare ga bona go ya go ile.

₁₀“Wena motho wa nama, o hlalošetše setšhaba sa Israele ka Tempele yeo, gomme ba lebeledišiše seswantšho sa yona. O ba lemoše gore ba inyaletše makgopo a bona. ₁₁Ge ba ka inyaletša tšohle tše ba di dirilego, o ba hlalošetše seswantšho sa Tempele: seemo sa yona, mejako le masoro, sebopego sa yona, peakanyo ya dilo ka moka, le melao le melawana yohle ya yona. O di ngwale ba go lebeletše, gore ba tle ba lemoge seemo sa yona mme ba phethe melao ya yona ka moka. ₁₂Molao wa Tempele šo: Sekgoba sohle se se potapotilego Tempele godimo ga thaba le se tšee e le se sekgethwakgethwa.”

₁₃Šedi dikelo tša aletare, tša ge go šomišwa kelo ya go swana le ye e šomišitšwego ge go elwa Tempele. Aletare e be e na le mosele wa disentimetara tše masome a mahlano go iša fase, le masome a mahlano bophara, le morumo wa disentimetara tše masome a mabedi le tše tlhano bophara. Bophagamo bja aletare ka boyona bo be bo le ka mokgwa wo: ₁₄Go tloga fase moseleng go fihla serepoding sa ka fase e be e le metara o tee go ya godimo, le disentimetara tše masome a mahlano bophara. Go tloga serepoding se senyenyane go fihla go se segolo e be e le dimetara tše pedi go ya godimo, le disentimetara tše masome a mahlano bophara. ₁₅Bophagamo bja karolo ya aletare yeo dihlabelo di bego di tšhumelwa go yona e be e le dimetara tše pedi, gomme go tloga karolong yeo go ya godimo go be go tlomogile manakana a mane. ₁₆Karolo ye e be e lekalekana ka mathoko ohle, e le dimetara tše di selelago ka botelele, le tše di selelago ka bophara. ₁₇Serepodi sa ka godimo se be se lekalekana ka mahlakoreng ohle, e le dimetara tše di šupago ka botelele, le tše di šupago ka bophara, se na le morumo wa disentimetara tše masome a mabedi le tše tlhano ka bophara. Mosela wa go dikologa aletare e be e le wa disentimetara tše masome a mahlano. Manamelo a go namelela aletareng a be a le ka lehlakoreng la ka bohlabatšatši.

₁₈Monna yoo a re go nna: “Wena motho wa nama, Morena, Mong wa bohle o re: Ditaelo tša go dira dihlabelo tša go tšhungwa ka moka le tša go foka aletare ka madi ge e agilwe šedi: ₁₉Baprista bale ba kgoro ya Lefi ba e lego ditlogolo tša Tsadoko ke bona fela ba ba swanetšego go tla pele ga Morena go mo hlankela. Morena, Mong wa bohle, o go laela gore o ba fe powana e be sehlabelo sa tshwarelo ya dibe. ₂₀O tšee madi a mangwe a yona o tlotše manakana a aletare ka ona, le dikhutlo tša serepodi sa ka godimo ka dine, le morumo ka moka. Ka mokgwa woo o tla be o hlwekiša aletare ebile o e kgethwafatša. ₂₁O tšee powana yeo ya go dira sehlabelo sa tshwarelo ya dibe o e tšhumele lefelong leo le se kgethetšwego ka ntle ga setsha sa Tempele. ₂₂Ka tšatši le le latelago o tšee phooko ye e se nago bosodi o dire sehlabelo sa tshwarelo ya dibe ka yona. O boeletše o hlwekiše aletare ka wona mokgwa wola o dirilego ka madi a powana. ₂₃Ge o feditše go e hlwekiša, o tšee powana le kgapa ya mohlape wa gago, bobedi e be tše di se nago bosodi, ₂₄o di iše go Morena. Baprista ba di gaše ka letswai gomme ba mo tšhumele tšona e le sehlabelo sa go tšhungwa ka moka. ₂₅Matšatšing a a šupago o dire sehlabelo sa tshwarelo ya dibe ka diruiwa tša mohlape wa gago, ka phooko le ka powana le ka kgapa tšatši le lengwe le le lengwe. Ka moka ga tšona e be tše di se nago bosodi. ₂₆Matšatšing a a šupago baprista ba šegofatše aletare ba e hlwekiše, e be gona go e kgethwafatša. ₂₇Ge matšatši ao a fetile, go tloga ka tšatši la seswai baprista ba thome go le direla dihlabelo tša go tšhungwa ka moka le dihlabelo tša kagišano aletareng. Ke mo le tlago nkgahla. O realo, Morena, Mong wa bohle.”