To The Word – Day 199

₁Morena, Mong wa bohle, o re: “Lesoro la kgoro ya ka gare le le lebeletšego bohlabatšatši le dule le tswaletšwe matšatšing a a selelago a go šoma, eupša ka Sabatha le ka Monyanya wa Lebalana le bulwe. ₂Kgoši a tsene ka lesoro la mathudi a etšwa ka kgorong ya ka ntle, a yo ema go bapela le kota ya lesoro ge baprista ba le gare ba mo direla sehlabelo sa go tšhungwa ka moka le dihlabelo tša kagišano. Gona moo lesorong a khunamele Morena, a kgone a etšwa gape. Lesoro le dule le butšwe go fihlela mantšiboa. ₃Ka letšatši la Sabatha le ka Monyanya wa Lebalana setšhaba sohle sa naga ye le sona se khunamele Morena moo pele ga lesoro.

₄“Ka letšatši la Sabatha kgoši e tlišetše Morena dikwanyana tše di selelago le kgapa e tee tša go dira sehlabelo sa go tšhungwa ka moka, tšohle e be tše di se nago bosodi. ₅Kgapa a e tliše le kabelo ya bupi bja seroto se tee, gomme dikwanyana a di tliše le kabelo ya bupi bja diroto tša palo ye a e ratago. Seroto se sengwe le se sengwe sa bupi a se tliše le moruswi o tee wa makhura a mohlware. ₆Ka Monyanya wa Lebalana a tliše powana, dikwanyana tše di selelago, le kgapa, tšohle e be tše di se nago bosodi. ₇Poo ye nngwe le ye nngwe le kgapa ye nngwe le ye nngwe ye a e tlišago a e tliše le kabelo ya seroto sa bupi, gomme kwanyana ye nngwe le ye nngwe ye a e tlišago, yona a e tliše le kabelo ya bupi bja diroto tša palo ye a e ratago. Seroto se sengwe le se sengwe sa bupi a se tliše le moruswi o tee wa makhura a mohlware. ₈Kgoši a tloge mathuding a lesoro mme a tšwe ka yona tsela yela a tsenego ka yona.

₉“Ge setšhaba sa naga ye se etla go khunamela Morena menyanyeng, ba ba tsenago ka lesoro la ka leboa ba tšwe ka la ka borwa ge ba feditše go mo khunamela, gomme ba ba tsenago ka lesoro la ka borwa ba tšwe ka la ka leboa. Go se be le yo a tšwago ka tsela ye a tsenego ka yona, eupša motho a tšwe ka lesoro le a lebanego nalo. ₁₀Ge setšhaba se tsena, kgoši le yena a tsene; ge se etšwa, le yena a tšwe. ₁₁Ka matšatši a mekete le mabakeng a menyanya kabelo ya bupi e be seroto sa bupi, mme e tlišwe le poo goba kgapa; morapedi a tliše kwanyana le kabelo ya bupi bja diroto tša palo ye a e ratago. Seroto se sengwe le se sengwe sa bupi a se tliše le moruswi o tee wa makhura a mohlware.

₁₂“Ge kgoši a nyaka go tlišetša Morena sehlabelo sa boithaopo, e ka ba sa go tšhungwa ka moka goba dihlabelo tša kagišano, a bulelwe lesoro le le lebeletšego ka bohlabatšatši la go tsenela ka kgorong ya ka gare. A dire sehlabelo seo sa gagwe sa go tšhungwa ka moka le dihlabelo tša gagwe tša kagišano go no swana le ka letšatši la Sabatha, gomme lesoro le tswalelwe ge a seno tšwa gape.”

₁₃“Mosong wa tšatši le lengwe le le lengwe a direle Morena sehlabelo sa go tšhungwa ka moka ka kwanyana ye e se nago bosodi ya ngwaga o tee. ₁₄A tliše le kabelo ya bupi mosong wo mongwe le wo mongwe, e be bja dikilokramo tše pedi, le litara e tee ya makhura a mohlware a go duba bupi bjoo. Kabelo ye ya bupi ye e neelwago Morena ke taelo ya go ya go ile. ₁₅Kwanyana yeo le bupi le makhura a mohlware di abelwe Morena mosong wo mongwe le wo mongwe go ya go ile.”

₁₆Morena, Mong wa bohle, o re: “Ge kgoši e ka arolela yo mongwe wa barwa ba gagwe naga ye a e filwego e le bohwa, karolo yeo e tla be e filwe le ditlogolo tša gagwe. E tla ba bohwa bja bona. ₁₇Eupša ge kgoši e ka arolela mohlanka wa yona naga, e tla ba ya mohlanka yoo go fihlela fela Ngwageng wa Poetšo, ya kgona e boela go kgoši. Ke barwa ba gagwe fela ba ba lebanwego ke karolo ye ya bohwa bja tatagobona. ₁₈Kgoši e se ke ya amoga batho naga ye e lego bohwa bja bona, ya ba raka karolong ya bona ya naga. Naga ye a e fago barwa ba gagwe e le bohwa e be ke karolo ya naga ye a e aroletšwego, gore go se be le yo mongwe wa setšhaba sa ka yo a amogwago se e lego sa gagwe.”

₁₉Ke moka monna yoo a ntsentšha ka kgorong ya ka gare ka mojako wo o lego ka thoko ga lesoro, a nkiša diphapošing tše dikgethwa tša baprista tše di lebeletšego leboa, a mpontšha felotsoko ka thoko ya bodikela bja diphapoši tšeo. ₂₀A re: “Fa ke mo baprista ba swanetšego go apea dinama tša dihlabelo tša tshwarelo ya dibe, le tša dihlabelo tša tefelo ya tšona, le go apea dikabelo tša bupi, gore go se be le selo se sekgethwa se se ntšhetšwago ka kgorong ya ka ntle, mme setšhaba sa tšhelwa madimabe.”

_21-22Ke moka a ntsentšha ka kgorong ya ka ntle, mme a ntshepetša le dikhutlo tša yona ka bone bja tšona; a mpontšha gore khutlong ye nngwe le ye nngwe go na le kgorwana ya dimetara tše masome a mabedi ka botelele, le tše lesome le tše tlhano ka bophara. Dikgorwana tše di be di lekana ka bogolo. ₂₃Ye nngwe le ye nngwe e be e na le leboto la maswika ka gare go e dikologa, le dibešo tše di ageletšwego lebotong. ₂₄Monna yoo a re go nna: “Ye ke merale yeo bahlanka ba ka Tempeleng ba swanetšego go apeela ka go yona dihlabelo tšeo setšhaba se di dirago.”

₁Monna yoo a nkiša mojakong wa Tempele. Ka bona meetse a etšwa ka fase ga serepodi sa Tempele a elela bohlabela, thoko yeo Tempele e bego e lebeletše ka gona. A be a elela ka fase ga lehlakore la ka borwa la Tempele a tšwelela ka borwa bja aletare. ₂Ke moka monna yoo a nntšha ka sekgobeng sa Tempele ka lesoro la ka leboa, gomme a ntikološa a nkiša lesorong le le lebeletšego bohlabela. Ka lehlakoreng la ka borwa go be go ela moelanyana wa meetse. ₃Monna yoo a ela dimetara tše makgolo a mane le masome a a selelago go ya bohlabela ka lehlaka la gagwe, gomme a mpotša gore ke tshele moela. Meetse ao a be a nkgoma ka dikgokgoilane fela. ₄A nama a ela dimetara tše dingwe tše makgolo a mane le masome a a selelago, a mpotša gore ke tshele, gomme meetse a nkgoma ka dikhuru. A ela gape dimetara tše dingwe tše makgolo a mane le masome a a selelago go theoga, mme ge ke tshela gape meetse a nkgoma ka letheka. ₅A buša a ela tše dingwe tše makgolo a mane le masome a a selelago, gomme moo moela o be o iša kudu mo e lego gore ke be ke sa kgone go o tshela. O be o tshelega fela ka go thala. ₆A re go nna: “Wena motho wa nama, na o bone taba ye gabotse?”

Ke moka a mpušetša leribeng la noka yeo, ₇gomme ge ke boela morago ka bona go na le mehlare ye mentši maribeng ka mabedi. ₈A re go nna: “Moela wo o elela seleteng sa ka bohlabela gomme o theogela ka moeding wa Jordane, wa fetela Lewatleng le le Hwilego. Ge o tsena ka Lewatleng le le Hwilego o ntšha meetse a lewatle leo letswai. ₉Mo gongwe le mo gongwe mo o fetago gona o tla tliša bophelo. Ka fao gohle mo o putlago gona go tla ba le diphoofolo tša mehutahuta le dihlapi tše dintši. ₁₀Go tloga Engedi go yo fihla Ene-Eglaime go tla ba le bathei ba dihlapi lebopong la lewatle leo, gomme ba tla anega malokwa a bona moo gore a ome. Moo go tla ba le mehutahuta ya dihlapi go swana le ka Lewatleng la Mediteraniene. ₁₁Eupša meetse a a lego ka mehlakeng le ka megobeng ya lebopong ona a ka se tšwe letswai. A tla no ba gona gore batho ba moo ba fele ba na le letswai. ₁₂Mo maribeng a moela woo ka mabedi go tla mela mehlare ya mehuta yohle ya dikenywa tša go lewa. E ka se tsoge e ponne matlakala, le gona e ka se tsoge e lesitše go enywa. Kgwedi ye nngwe le ye nngwe mehlare yeo e tla ba le dikenywa tše di budulego, ka ge e nošetšwa ke moela woo o tšwago Tempeleng. Dienywa tša yona di tla lewa, mme matlakala a yona ya ba a go alafa malwetši.”

₁₃Morena, Mong wa bohle, a re: “E re ke le botše ka mo mellwane ya naga ye e swanetšego go arolelwa dikgoro tše lesome le tše pedi tša Israele e swanetšego go ba ka gona, kgoro ya Josefa e fiwe dikarolo tše pedi. ₁₄Ka ge ke ile ka ikana gore naga ye ke tla e fa borakgolokhukhu ba lena, e tla ba bohwa bja lena; le e arolelane ka go lekana.

₁₅“Mellwane ya naga e tla ba ka mokgwa wo: Ka leboa mollwane o tla tloga Lewatleng la Mediteraniene, wa bapela le tsela ye e yago Hetelone go yo fihla sefateng sa Hamate, le go fetela Tsedade, ₁₆go yo fihla Berota le Sibraime, mokgahlo ga selete sa Damaskose le sa Hamate, le go yo fihla Hatsare-Hatikone, mollwaneng wa Haurane. ₁₇Ka gona mollwane o tla tloga Lewatleng la Mediteraniene, wa leba Hatsore-Enane, wa phaela selete sa Damaskose le sa Hamate ka leboa.

₁₈“Ka bohlabatšatši mollwane o tla putla mokgahlo ga Haurane le Damaskose, wa bapela le noka ya Jordane, mokgahlo ga naga ya Gileade le ya Israele, wa fetela Lewatleng le le Hwilego wa ba wa yo fihla Tamare. Wo e tla ba wona mollwane wa ka bohlabatšatši.

₁₉“Ka borwa mollwane o tla tloga Tamare wa ya mohlakeng wa Meriba-Kadeshe, go tloga moo wa ipata le noka go yo fihla Lewatleng la Mediteraniene. Wo e tla ba mollwane wa ka borwa.

₂₀“Ka bodikela mollwane e tla ba Lewatle la Mediteraniene go yo fihla felo mo o lebanago le sefata sa Hamate. Wo e tla ba wona mollwane wa ka bodikela.

₂₁“Le arolele dikgoro tša lena naga ye. ₂₂Le e arolelane e le bohwa bja lena le bja bafaladi ba ba dulago le lena, bao bana ba bona ba tswaletšwego mo nageng ye. Le ba tšee e le badudi ba naga ya Israele. Ba abelwe bohwa gotee le lena ba dikgoro tša Israele. ₂₃Mofaladi a abelwe bohwa kgorong yeo a dulago go yona. Ke realo, nna, Morena, Mong wa bohle.”

₁Dikgoro di arolelwe naga ka mokgwa wo: Karolo ya kgoro ya Dane e thome mollwaneng wa ka leboa wa naga ya Israele. Mollwane wa yona o bapele le tsela ya Hetelone go yo fihla sefateng sa Hamate, wa leba Hatsare-Enane le mollwaneng wa Damaskose wa ka leboa, kgauswi le Hamate. E be mollwane wa yona go tloga ka bohlabatšatši go ya ka bodikela. ₂Karolo ya kgoro ya Asere e beelane mollwane le ya kgoro ya Dane go tloga mollwaneng wa ka bohlabatšatši go yo fihla go wa ka bodikela. ₃Karolo ya kgoro ya Naftali e beelane mollwane le ya kgoro ya Asere go tloga mollwaneng wa ka bohlabatšatši go yo fihla go wa ka bodikela. ₄Karolo ya kgoro ya Manase e beelane mollwane le ya kgoro ya Naftali go tloga mollwaneng wa ka bohlabatšatši go yo fihla go wa ka bodikela. ₅Karolo ya kgoro ya Efraime e beelane mollwane le ya kgoro ya Manase go tloga mollwaneng wa ka bohlabatšatši go yo fihla go wa ka bodikela. ₆Karolo ya kgoro ya Rubene e beelane mollwane le ya kgoro ya Efraime go tloga mollwaneng wa ka bohlabatšatši go yo fihla go wa ka bodikela. ₇Karolo ya kgoro ya Juda e beelane mollwane le ya kgoro ya Rubene go tloga mollwaneng wa ka bohlabatšatši go yo fihla go wa ka bodikela.

₈Karolo ye e beelanego mollwane le ya kgoro ya Juda go tloga mollwaneng wa ka bohlabatšatši go yo fihla go wa ka bodikela e be ye e abelwago Morena. Bophara bja yona e be dikilometara tše lesome le tše pedi le seripa, gomme botelele bja yona go tloga mollwaneng wa ka bohlabatšatši go ya ka bodikela e be bja go lekana le bja dikarolo tše di filwego dikgoro. Bogareng bja karolo yeo ke mo go tlago agwa Tempele.

₉Karolo ye le e abelago Morena e be ya botelele bja dikilometara tše lesome le tše pedi le seripa, le bophara bja dikilometara tše lesome. ₁₀Baprista ba fiwe seripa gona moo karolong ye kgethwa. Ka leboa seripa se e be sa dikilometara tše lesome le tše pedi le seripa ka botelele, ka bodikela e be sa dikilometara tše tlhano ka bophara. Ka bohlabatšatši le gona e be sa dikilometara tše tlhano ka bophara, ka borwa e be sa dikilometara tše lesome le tše pedi le seripa ka botelele. Tempele ya Morena e agwe mo gare ga seripa se. ₁₁Seripa se e be sa baprista, bona batlotšwa, ditlogolo tša Tsadoko, ba ba ntlhanketšego ka potego ba sa kgeloge bjalo ka Balefi ba bangwe mola Baisraele ba kgeloga. ₁₂Ka gona, ba swanetše go ba le karolo ye e lebanego bona karolong ye kgethwa ya naga. Karolo ye e tla ba yona ye kgethwakgethwa ye e beelanego mollwane le ya Balefi. ₁₃Go bapela le karolo ya baprista Balefi ba swanetše go ba le karolo ya dikilometara tše lesome le tše pedi le seripa ka botelele, le tše tlhano ka bophara. ₁₄Ke karolo ye e phalago dikarolo tše dingwe ka moka tša naga, gomme go se ke gwa ba le seripanyana se sengwe sa yona se se rekišwago, goba se bapatšwago, goba se fiwago yo mongwe, gobane e kgethetšwe Morena.

₁₅Karolo ye e šalago ya bophara bja dikilometara tše pedi le seripa, le botelele bja dikilometara tše lesome le tše pedi le seripa yona ga se ye kgethwa, ke ya motse le ya phulo. Bogareng bja yona ke mo go swanetšego go agwa motse, ₁₆gomme gona e be dimetara tše dikete tše pedi le makgolo a mabedi le masome a mahlano ka lehlakoreng le lengwe le le lengwe. ₁₇Go dikologa motse ka lehlakoreng le lengwe le le lengwe go be le karolo ya phulo ya bophara bja dimetara tše lekgolo le masome a mabedi le tše tlhano. ₁₈Karolo ye e šetšego, ye e bapetšego le karolo ye kgethwa mme e lekanago nayo ka botelele, e tla ba ya dikilometara tše tlhano ka bohlabatšatši, le tše tlhano ka bodikela. E swanetše go ba mašemo a go bjala dibjalo tša go fepa ba ba šomago ka motseng. ₁₉Bašomi ba ka motseng ba ba lemago karolong ye e swanetše go ba ba dikgoro tšohle tša Israele. ₂₀Karolo ye ya go kgethelwa Morena e swanetše go ba ya dikilometara tše lesome le tše pedi le seripa ka mathoko ohle, e lego karolo ye kgethwa e kopane le ye e lego ya motse.

₂₁Karolo ye e šalago ka mo le ka mo ga karolo ye kgethwa le ga karolo ya motse e be ya kgoši. E tla gagabela bohlabatšatši dikilometara tše lesome le tše pedi le seripa go yo fihla mollwaneng wa ka bohlabatšatši, le go ya bodikela dikilometara tše lesome le tše pedi le seripa go yo fihla mollwaneng wa ka bodikela. Dikarolo tše pedi tše tša go bapela le dikarolo tša setšhaba e be tša kgoši, gomme karolo ye kgethwa le Tempele di tla ba gare. ₂₂Ka gona karolo ya Balefi le karolo ya motse di tla ba gare ga karolo ya kgoši. Karolo ye ya kgoši e tla ba mokgahlo ga karolo ya Juda le ya Benjamene.

₂₃Dikgoro tše di šetšego di arolelwe naga ka mokgwa wo: Karolo ya kgoro ya Benjamene e tloge mollwaneng wa ka bohlabatšatši e yo fihla go wa ka bodikela. ₂₄Karolo ya kgoro ya Simeone e beelane mollwane le ya kgoro ya Benjamene go tloga mollwaneng wa ka bohlabatšatši go yo fihla go wa ka bodikela. ₂₅Karolo ya kgoro ya Isakara e beelane mollwane le ya kgoro ya Simeone go tloga mollwaneng wa ka bohlabatšatši go yo fihla go wa ka bodikela. ₂₆Karolo ya kgoro ya Sebulone e beelane mollwane le ya kgoro ya Isakara go tloga mollwaneng wa ka bohlabatšatši go yo fihla go wa ka bodikela. ₂₇Karolo ya kgoro ya Gade e beelane mollwane le ya kgoro ya Sebulone go tloga mollwaneng wa ka bohlabatšatši go yo fihla go wa ka bodikela.

₂₈Ka borwa mollwane wa karolo ya kgoro ya Gade o tloge Tamare o lebe borwa, o yo fihla mohlakeng wa Meriba-Kadeshe, go tloga moo o ipate le noka go yo fihla Lewatleng la Mediteraniene.

₂₉Morena, Mong wa bohle, o re: “Ke ka mo le swanetšego go arolela dikgoro tša Israele naga ka gona ya ba bohwa bja tšona.”

_30-34Go tla ba le masoro a lesome le a mabedi ka motseng wa Jerusalema. Morako ka lehlakoreng le lengwe le le lengwe e tla ba wa dimetara tše dikete tše pedi le makgolo a mabedi le masome a mahlano, gomme o tla ba le masoro a mararo, maina a ona a ye ka dikgoro tša Israele. Masoro a morako wa ka leboa a theelelwe Rubene, Juda le Lefi; a morako wa ka bohlabatšatši a theelelwe Josefa, Benjamene le Dane; a morako wa ka borwa a theelelwe Simeone, Isakara le Sebulone; gomme a morako wa ka bodikela a theelelwa Gade, Asere le Naftali. ₃₅Botelele bja morako ka mahlakoreng a motse ka bone ke dimetara tše dikete tše senyane. Go tloga nakong yeo leina la motse wo e tla ba “Morena o mo”.