To The Word – Day 197

₁Morena a ntaela a re: “Wena motho wa nama, porofetela dithaba tša Israele o re: Lena dithaba tša Israele, ekwang se Morena a se bolelago. ₂Nna, Morena, Mong wa bohle, ke re: Manaba a be a bolela ka lena a re: ‘Le swinegile! Meboto yela ya kgale bjale ke ya rena!’

₃“Ka gona, porofeta o re Morena, Mong wa bohle, o re go dithaba tša Israele: Le apotšwe la gatakwa ka mathoko ohle la ba lefa la ditšhaba tše dingwe, batho ba le seba, ba le bolela gampe. ₄Ka gona, lena dithaba tša Israele, ekwang se Morena, Mong wa bohle, a se bolelago. Nna, Morena, Mong wa bohle, ke re go dithaba le meboto le magaga le meedi le maganata le metse ye e fetošitšwego marope, e hutšwego mme e kwerwago ke ditšhaba tšohle tše di e potapotilego: ₅Ke boletše ke tuka bogale, ke galefetše ditšhaba tše di le potapotilego, le setšhaba sohle sa Edomo. Ka lethabo le legolo le ka lenyatšonyatšo ba thopile naga ya ka, ba tšea mafulo a yona.

₆“Ka lebaka leo, porofetela naga ya Israele; o botše dithaba le meboto le magaga le meedi se nna, Morena, Mong wa bohle, ke se bolelago ke galefile ke bile ke hufega ge ditšhaba di ba rogile. ₇Nna, Morena, Mong wa bohle, ke ikana gore go tla rogwa tšona ditšhaba tše di le potapotilego. ₈Fela godimo ga lena, dithaba tša Israele, dihlare di tla buša tša hloga mme tša enywetša setšhaba sa ka sa Israele dikenywa. Sona se kgauswi le go tla gae. ₉Nna ke eme le lena; ke tla le lokela, gomme naga ya lena e tla buša ya lengwa, mme dipeu tša bjalwa moo. ₁₀Ke tla atiša setšhaba sa naga ya lena. Metse e tla buša ya dulwa, le marope a tsošološwa. ₁₁Ke tla ntšifatša batho le maruo. Ba tla ata, le maruo a tswala. Ke tla agiša batho nageng ya lena bjalo ka pele, gomme ke tla le atla le go feta pele. Ke mo le tlago lemoga gore ke nna Morena. ₁₂Ke tla buša setšhaba sa ka sa Israele gore se tle se dule gape nageng ye ya lena. E tla ba naga ya bona, gomme e ka se sa ba hlakola bana.

₁₃“Nna, Morena, Mong wa bohle, ke re: Batho ba re naga ya lena ke sejabatho, le gona e hlakola setšhaba sa gabolena bana ba sona. ₁₄Eupša go tloga gonabjale e ka se sa ba sejabatho, goba ya hlakola setšhaba sa gabolena bana ba sona. Ke realo, nna, Morena, Mong wa bohle. ₁₅Nka se sa dumelela ditšhaba gore di le roge; ditšhaba di ka se sa le goboša. Naga ya lena e ka se sa hlakola setšhaba sa gabolena bana ba sona. Ke realo, nna, Morena, Mong wa bohle.”

₁₆Morena a re go nna: ₁₇“Wena motho wa nama, mola Baisraele ba dula nageng ya bona ba ile ba e tšhilafatša ka mokgwa wo ba bego ba phela mme ba dira ka wona. Ke ile ka bona boitshwaro bja bona e le bjo bo tšhilafetšego go swana le mosadi ge a bone kgwedi. ₁₈Ka tšhollela kgalefo ya ka godimo ga bona ka lebaka la ge ba bolaile batho mo nageng, le ka lebaka la medingwana ye ba bego ba tšhilafaditše naga ka yona. ₁₉Ke ile ka ba lahla ka lebaka la mokgwa wo ba bego ba phela mme ba dira ka wona, gomme ka ba šwalalanya le ditšhaba, ba phatlalala le dinaga. ₂₀Ge ba fihla ditšhabeng ba be ba goboša leina la ka le lekgethwa, ka gobane batho ba be ba re: ‘Batho ba ke setšhaba sa Morena, eupša ba ile ba tlemega go tloga nageng ya gagwe.’ ₂₁Ke yona taba ye e ntshwentšego mabapi le leina la ka le lekgethwa leo setšhaba sa Israele se bego se le goboša ditšhabeng tše ba ilego go tšona.

₂₂“Bjale ge, botša setšhaba sa Israele gore nna, Morena, Mong wa bohle, ke re: Se ke tlago se dira ga se ka lebaka la lena, Baisraele, eupša ke ka lebaka la leina la ka le lekgethwa leo lena le le gobošitšego ditšhabeng tše le ilego la ya go tšona. ₂₃Mohla ke bontšha ditšhaba ka mo leina la ka e lego le lekgethwa ka gona, lona leina leo lena le le gobošitšego gare ga bona, ke gona ba tlago lemoga gore Morena ke nna. Ke realo, nna, Morena, Mong wa bohle. Ke tla šomiša lena go bontšha ditšhaba gore ke nna yo mokgethwa. ₂₄Ke tla le tšea ditšhabeng ka le kgoboketša dinageng tšohle, ka le bušetša nageng ya lena. ₂₅Ke tla le fokela ka meetse a a sekilego, ka le hlwekiša go tšhilafatšwa ke medingwana yohle ya lena, le tše dingwe ka moka tše di le tšhilafaditšego. ₂₆Ke tla le fa dipelo tše mpsha le menagano ye mefsa. Ke tla le amoga dipelo tša lena tše thata ka le fa dipelo tše boleta. ₂₇Ke tla le tsenya moya wa ka, mme ka dira gore le phethe melao ya ka le ditaelo tša ka ka potego. ₂₈Ke mo le tlago dula nageng ye ke e filego borakgolokhukhu ba lena. Le tla ba setšhaba sa ka, mme nna ka ba Modimo wa lena. ₂₉Ke tla le hlakodiša dilong tšohle tše di le tšhilafatšago. Ke tla laela mabele gore a ntšifale gore le se sa bolawa ke tlala. ₃₀Ke tla atiša dikenywa tša mehlare ya lena le dipuno tša mašemo a lena gore le se sa nyatšwa ke ditšhaba ge le welwa ke tlala. ₃₁Le tla gopola boitshwaro bjola bja lena bjo bobe le ditiro tšela tša lena tša go se loke, gomme le tla inyatša ka lebaka la tše mpe le tše di šišimišago tše le bego le di dira. ₃₂Lena setšhaba sa Israele, tšeo ka moka ga ke di dire ka lebaka la lena. Inyatšeng, le itsholele tše le bego le di dira. Ke realo, nna, Morena, Mong wa bohle.”

₃₃Morena, Mong wa bohle, o re: “Mohla ke le hlatswa dibe tšohle ke tla le dudiša metseng ya lena gape, la tsošološa marope. ₃₄Bafeti bohle ba be ba bona ka mo mašemo a lena a letšego ka gona; eupša a tla buša a lengwa. ₃₅Batho ba tla re naga ye e bego e letše ye bjale e swana le serapa sa Edene; le metse ya gona ye e bego e phušotšwe, e hutšwe mme e tlogetšwe e le marope, bjale e na le batho mme e ageleditšwe. ₃₆Ke gona mašaledi a ditšhaba tše di le potapotilego a tlago tseba gore nna, Morena, ke tsošološa metse ye e phušotšwego, ka ba ka lema gape mašemo a a bego a letše. Nna, Morena, ke boletše bjalo, gomme ke tla phetha.”

₃₇Morena, Mong wa bohle, o re: “Se sengwe se ke tlago se direla setšhaba sa Israele ge ba nkgopela sona ke gore ke ba atišetše thari, ba be bjalo ka mohlape wa dihuswane. ₃₈Metse yeo bjale e lego marope e tla tlala batho go swana le mola Jerusalema e kile ya tlala dihuswane tša go dira dihlabelo menyanyeng. Ke mo ba tlago lemoga gore Morena ke nna.”

₁Maatla a Morena a ile a nkaparela, gomme moya wa gagwe wa ntšea wa yo mpea molaleng wo o bego o tletše marapo. ₂Morena a ntshepetša le molala, gomme ka bona go na le marapo a mantšintši, le gona a omeletše kudu. ₃A mpotšiša a re: “Wena motho wa nama, na marapo a a ka buša a phela?”

Nna ka mo fetola ka re: “Morena, Mong wa bohle, ke wena fela o tsebago!”

₄Yena a re: “Porofetela marapo a, o a botše o re: ‘Lena marapo a a omeletšego, theeletšang mantšu a Morena.’ ₅O a botše gore nna, Morena, Mong wa bohle, ke re go ona: Ke tla le tsenya moya ka le phediša gape, ₆ka le kgomaretša mešifa le dinama gomme ka le apeša letlalo. Ke tla le tsenya moya ka le phediša gape. Ke mo le tlago lemoga gore ke nna Morena.”

₇Ka gona ka porofeta ka moo ke laetšwego ka gona. Ya re ke sa bolela ka kwa lešata la mogwaša, gomme marapo a thoma go kopana. ₈Ge ke ntše ke lebeletše ka bona marapo a eba le mešifa le dinama, a napa a apešwa ke letlalo. Eupša go be go se ne moya mebeleng yeo.

₉Modimo a re go nna: “Wena motho wa nama, porofetela moya wa bophelo. Botša moya woo gore Morena, Mong wa bohle, o o laela gore o tle o etšwa ka mathoko ka mane mme o budulele mebele ye o e phediše gape.”

₁₀Ke moka ka porofeta ka moo ke bego ke laetšwe ka gona. Moya wa tsena mebeleng yeo, ya phela gomme ya ema ka maoto. Ya ba batho ba bantši go swana le makokokoko a madira.

₁₁Morena a re go nna: “Wena motho wa nama, setšhaba sa Israele ka moka se swana le marapo ao. Bona ba re re omeletše, re feletšwe ke tshepo, re fedile. ₁₂Ka gona porofetela setšhaba sa Israele o se botše gore nna, Morena, Mong wa bohle, ke ya go fatolla mabitla a bona ka ba ntšha, ka ba bušetša nageng ya Israele. ₁₃Mohla ke fatolla mabitla a bona mme ke ba ntšha, ba tla lemoga gore ke nna Morena. ₁₄Ke tla ba tsenya moya wa ka, ka ba phediša gape, gomme ka dira gore ba dule nageng ya bona. Ke mo ba tlago lemoga gore Morena ke nna. Ke tshepišitše, gomme ke tla phetha bjalo. Ke realo, nna, Morena.”

₁₅Morena a ntaela a re: ₁₆“Wena motho wa nama, tšea patla mme o ngwale godimo ga yona o re: ‘Ke ya Juda le Baisraele ba ba šomišanago naye.’ E be o tšea ye nngwe patla mme o ngwala godimo ga yona o re: ‘Ke ya Josefa le Efraime le Baisraele bohle ba ba šomišanago nabo.’ ₁₇O name o kgotlantšhe dipatla tšeo ka dintlha gore di bonale nke ke patla e tee. ₁₈Ge batho ba go botšiša gore taba yeo e šupang, ₁₉o ba botše gore nna, Morena, Mong wa bohle, ke re: Ke tlilo tšea patla ya Josefa le ya dikgoro tša Israele tše e lego tša Josefa, ye e swerwego ke Efraime, ka e kopanya le ya Juda, ka di dira patla e tee, ka e swara ka seatla.

₂₀“Dipatla tšeo tše pedi o di ngwadilego o di sware ka seatla setšhaba se di bona. ₂₁O nape o ba botše gore nna, Morena, Mong wa bohle, ke re ke tla tšea Baisraele ditšhabeng tše ba ilego go tšona, ka ba kgoboketša, gomme ka ba bušetša nageng ye e lego ya bona. ₂₂Ke tla ba kopanya ya ba setšhaba se tee mo nageng ye dithabeng tša Israele. Ka moka ga bona ba tla bušwa ke kgoši e tee, gomme e ka se sa ba ditšhaba tše pedi goba ba tšwa mebušo ye mebedi. ₂₃Ba ka se sa itšhilafatša ka medingwana ya bona ya go šišimiša, goba ka dikarogo tšohle tša bona. Ke tla ba hlakodiša boaroging bjo ba bego ba mphošetša ka bjona. Ke tla ba hlwekiša; ke mo e tlago ba setšhaba sa ka, mme nna ka ba Modimo wa bona. ₂₄Kgoši ya bona e tla ba Dafida, mohlanka wa ka. Ka moka ba tla bušwa ke mmuši o tee, ba phetha melao ya ka le ditaelo tša ka ka potego. ₂₅Ba tla dula nageng ye ke ilego ka e fa mohlanka wa ka, Jakobo, naga yeo borakgolokhukhu ba bona ba bego ba dula go yona. Ba tla dula moo go ya go ile le bana ba bona le ditlogolo tša bona. Mohlanka wa ka, Dafida, o tla ba buša go ya go ile. ₂₆Ke tla dira kgwerano ya go ya go ile le bona ya go ba tlišetša khutšo. Ke tla ba bea moo mme ka ba atiša, ka aga Tempele ya ka nageng ya bona, moo e tlago dulela sa ruri. ₂₇Ke tla dula le bona moo; ke tla ba Modimo wa bona, mme bona ya ba setšhaba sa ka. ₂₈Ge ke agile Tempele ya ka moo nageng ya bona gore e dulele sa ruri, ke gona ditšhaba di tlago lemoga gore nna, Morena, ke kgethile Baisraele gore e be setšhaba sa ka.”

₁Morena a ntaela a re: ₂“Wena motho wa nama, kgala Gogo, mmuši yo mogolo wa setšhaba sa Mesheke le sa Tubale nageng ya Magogo. Mo porofete, ₃gomme o mmotše gore nna, Morena, Mong wa bohle, ke re: Ke lwa le wena. ₄Ke tla go retollela go nna, ka go tsenya dikgwega ka mehlagareng, mme ka go ntšha le madira ohle a gago. Madira a gago, gotee le dipere tša bona le banamedi ba ba itlhamilego go felela, ke mašabašaba, ba swere dikotse tše dikgolo le tše dinyenyane, ba itlhamile le ka ditšhoša. ₅Banna ba go tšwa Persia le Etopia le Libia ba na le bona, gomme bohle ba itlhamile ka dikotse le dikefa tša ntwa. ₆Bahlabani ka moka ba naga ya Gomere le ya Bethe-Togarma ka leboaboa ba na le wena, gotee le ba go tšwa ditšhabeng tše dingwe tše dintši. ₇Itokiše, o be komana, madulaabapile, wena le madira a a go potapotilego, o be molaodi wa bona. ₈Ge go fetile mengwaga ye mentši ke tla go laela gore o šwahlele naga ye nngwenyana ye e sa tšogo emiša ntwa, moo setšhaba se bušitšwego mmogo se etšwa ditšhabeng tše dintši, dithabeng tša Israele tše di ilego tša tlogelwa nako ye telele, eupša moo bjale batho ka moka ba dutšego ba bolokegile. ₉Wena le madira a gago gotee le ditšhabatšhaba tše di nago le wena le tla hlasela bjalo ka ledimo, la aparela naga bjalo ka leru.”

₁₀Se Morena, Mong wa bohle, a se botšago Gogo sese: “Mohlang woo o tla nagana go loga maanomabe. ₁₁O tla ikemišetša go šwahlela naga ye e sego ya šireletšwa, moo batho ba gona ba dulago ka khutšo le polokego metseng ye e se nago merako, goba dikgoro, goba mapheko. ₁₂O tla hula batho ba ba dulago metseng ye e kilego ya ba marope, mme wa ba thopela. Ba kgobokeditšwe ba ntšhwa ditšhabeng, gomme bjale ba na le maruo le dithoto, mme ba dula garegare ga lefase. ₁₃Batho ba Sheba le ba Dedane le babapatši ba go tšwa Tarshishe ba tla go botšiša ba re: ‘Na o tlile go re hula? O rapile madira a gago a mantši go tlo re hlakola, go tlo re thopela silibera ya rena le gauta, le go ikgapela maruo a rena le dithoto, wa gogola dithebola tše dintši?’ ”

₁₄Ka fao Morena, Mong wa bohle, a ntaela gore ke porofete ke re go Gogo: “Ge setšhaba sa ka sa Israele se dutše se bolokegile, wena o tla tloga ₁₅mo o dutšego gona, leboaboa, wa eta madira a maatla pele a go tšwa ditšhabeng tše dintši, ka moka ga bona e le banamedi ba dipere. ₁₆O tla hlasela setšhaba sa ka sa Israele bjalo ka leru le le aparelago naga. Matšatšing a a tlago ke tla go roma gore o yo šwahlela naga ya ka gore ke tle ke bontšhe ditšhaba gore ke nna mang, le go bontšha bokgethwa bja ka ka se ke se dirago ka wena. ₁₇A ke re ke wena mehleng ye e fetilego ke bego ke bolela ka wena ka bahlanka ba ka, baprofeta ba Israele? Mehleng yeo ba porofetile mengwaga ye mentši ba re ke tla dira gore o hlasele Baisraele.” O realo, Morena, Mong wa bohle.

₁₈Morena, Mong wa bohle, o re: “Mohla Gogo a šwahlela naga ya Israele ke tla tuka bogale. ₁₉Ke bega ke galefile kudu gore mohlang woo go tla ba le tšhikinyego ye kgolo ya lefase mo nageng ya Israele. ₂₀Dihlapi le dinonyana le diphoofolo tša naga le digagabi tšohle le batho ka moka ba lefase di tla thothomela ka letšhogo ge di mpona. Dithaba di tla phekgolwa, magaga a tla pšhatlagana, le merako yohle ya kgerega. ₂₁Ke tla dira gore Gogo a hlaselwe ka ditšhoša dithabeng tša ka tšohle. Ke realo, nna, Morena, Mong wa bohle. Bahlabani ba gagwe ba tla hlabana seng ka ditšhoša tša bona. ₂₂Yena ke tla mo otla ka bolwetši le ka polao. Yena le madira a gagwe le ditšhabatšhaba tše di emago naye ke tla ba nešetša pula ya mafula le sefako gotee le mollo le tshebela. ₂₃Ka tsela ye ke tla bontšha ditšhaba tše dintši gore nna ke yo mogolo, ebile ke yo mokgethwa. Ke mo ba tlago lemoga gore Morena ke nna.”

₁Morena, Mong wa bohle, a ntaela a re: “Wena motho wa nama, porofeta Gogo, o mmotše gore nna, Morena, Mong wa bohle, ke re: Ke lwa le wena, Gogo, mmuši yo mogolo wa setšhaba sa Mesheke le sa Tubale. ₂Ke tla go retolla ka go ntšha ka leboaboa ka go iša dithabeng tša Israele. ₃Ka nama ka go lahliša bora bjo o bo swerego ka seatla sa nngele, le mesebe ye o e swerego ka sa la go ja. ₄Wena le madira a gago ka moka le ditšhabatšhaba tše di emego nago le tla bolawa kua dithabeng tša Israele, gomme ditopo tša lena ke tla di fa manong a mehutahuta le dibata gore di di je. ₅Le tla bolaelwa molaleng, ka gobane go boletše nna, Morena, Mong wa bohle. ₆Ke tla lahlela mollo nageng ya Magogo le go ba ba dutšego ba bolokegile mabopong a lewatle, gomme ba tla lemoga gore Morena ke nna. ₇Ke tla hlokomela gore setšhaba sa ka sa Israele se tsebe leina la ka le lekgethwa, le gona nka se sa lesa leina la ka le gobošwa. Ke mo ditšhaba di tlago lemoga gore nna, Morena, ke Mokgethwa wa Israele.”

₈Morena, Mong wa bohle, a re: “Letšatši lela ke le boletšego ruri le etla. ₉Batho ba ba dulago metseng ya Israele ba tla tšwa ba yo topelela dibetša tše di tlogetšwego ya ba dikgong. Ba tla gotša mello ka dikotse tše dikgolo le tše dinyenyane le mara le mesebe le dithoka le marumo, gomme ba tla fetša mengwaga ye e šupago ba gotša mello ka tšona. ₁₀Ba ka se sa ya kgonyeng nageng, goba ba yo rema dihlare ka dithokgweng, ka gobane ba tla be ba na le dibetša tše di tlogetšwego gore ba di beše. Ba tla hula mme ba thopela bale ba go ba hula le go ba thopela.” O realo, Morena, Mong wa bohle.

₁₁Morena a re: “Mohla tše ka moka di direga, ke tla fa Gogo setsha sa poloko mo nageng ya Israele, ka Moeding wa Mosepedi, ka bohlabela bja Lewatle le le Hwilego. Sona se tla thiba tsela ya basepedi, ka gobane ke mo go tlago ba go bolokilwe Gogo le makoko ohle a gagwe, gomme moedi woo o tla bitšwa ‘Moedi wa Makoko a Gogo’. ₁₂Go boloka ditopo tšeo ka moka le go hlwekiša naga ka lefsa go tla tšea setšhaba sa Israele dikgwedi tše di šupago. ₁₃Batho ka moka mo nageng ba tla thuša go ba boloka, gomme mohla ke ikutolla gore ke nna Modimo yo maatla, bona ba tla retelwa ge ba bolokile batho bao. Ke realo, nna, Morena, Mong wa bohle. ₁₄Ge dikgwedi tšeo tša go šupa di seno feta, go tla kgethwa banna ba go sepela le naga gore ba nyake ditopo tše di sa lego kgakala, mme ba di boloke, gore ba hlwekiše naga. ₁₅Ge ba ntše ba sepela le naga, nako le nako ge ba hwetša lerapo la motho, ba tla bea leswao kgauswi le lona, gore baepamabitla ba tle ba le boloke ka Moeding wa Makoko a Gogo. ₁₆Go tla ba le motse moo wo o bitšwago Makoko. Ke ka moo naga e tlago hlwekišwa ka lefsa ka gona.”

₁₇Morena, Mong wa bohle, a ntaela a re: “Wena motho wa nama, bitša manong a mehutahuta le dibata ka moka o re: Kgobokanang le etšwa ka mathoko ohle le ye sehlabelong se ke le direlago sona. E tla ba monyanya wo mogolo wa sehlabelo dithabeng tša Israele, moo le kago ja nama, la nwa le madi. ₁₈Le tla ja nama ya bagale, la nwa le madi a babuši ba lefase bjalo ka ge nke ke dikgapa goba dikwanyana goba dipudi goba dipoo, diruiwa tšeo ka moka ga tšona e lego tše di nontšhitšwego di etšwa Bashane. ₁₉Sehlabelong seo ke le direlago sona le tla ja makhura go fihlela a le tena, la nwa le madi go fihlela le tagwa. ₂₀Bojelong bja ka le tla ja la khora nama ya dipere le ya banamedi ba tšona, le ya bagale, le ya bahlabani ba mehutahuta. Ke realo, nna, Morena, Mong wa bohle.”

₂₁Morena a re: “Ke tla ikutolla ditšhabeng gore ke nna Modimo yo maatla, mme tšohle ditšhaba di tla bona ka mo ke šomišago maatla a ka go di otla. ₂₂Go tloga ka nako yeo setšhaba sa Israele se tla lemoga gore ke nna Morena Modimo wa sona. ₂₃Le tše dingwe ditšhaba di tla tseba gore sa Israele setšhaba se ile sa išwa bothopša ka lebaka la dibe tša sona, ka ge se be se sa mpotegele. Ka gona ka ba furalela, ka ba gafela manabeng a bona, mme bohle ba bolawa ka tšhoša. ₂₄Ke ile ka ba otla go ya ka mo ba bego ba tšhilafetše ka gona, le go ya ka dibe tša bona, ka ba furalela.”

₂₅Ka gona, Morena, Mong wa bohle, o re: “Bjale ke tla buša ditlogolo tša Jakobo bothopša, ka šokela setšhaba sohle sa Israele, ka šetša gore leina la ka le lekgethwa le hlompšhe. ₂₆Mohla ba dula ka polokego gape nageng ye e lego ya bona, ba se na le yo a ba tšhošetšago, ba tla lebala ka mo ba kilego ba gobošwa ka gona ka lebaka la ge ba be ba sa mpotegele. ₂₇Ge ke seno ba buša ditšhabeng, ke ba kgobokeditše dinageng tša manaba a bona, ke tla bontšha ditšhaba tše dintši gore ke yo mokgethwa ka seo ke se dirago ka bona. ₂₈Ke mo setšhaba sa ka se tlago tseba gore ke nna Morena Modimo wa bona. Seo ba tla se tseba ka gobane ke nna ke ba rometšego bothopša ditšhabeng, gomme ka morago ka ba kgoboketša ka ba bušetša nageng ya bona, ka se tlogele le o tee. ₂₉Nka se sa tsoga ke ba furaletše, ka gore ke tla tšhela setšhaba sa Israele moya wa ka. Ke realo, nna, Morena, Mong wa bohle.”

₁E be e le letšatši la lesome la kgwedi, mathomong a ngwaga wa masome a mabedi le metšo ye mehlano wa ge re le mathopša, le wa lesome le metšo ye mene ka morago ga ge Jerusalema e thopilwe. Mohlang woo ke ile ka aparelwa ke maatla a Morena, gomme yena a nkiša Jerusalema. ₂Moo ponong Modimo a nkiša nageng ya Israele gomme a mpea godimo ga thaba ye teleletelele. Ka lehlakoreng la yona la ka borwa go be go bonala nke go agilwe motse. ₃A nkiša gona, gomme ka bona monna yo a phadimago bjalo ka mphiri. O be a swere thapo ya lešela le lehlaka la go ela a eme lesorong.

₄A re go nna: “Wena motho wa nama, o lebeledišiše, o theeletše gabotse, o ele tše ke go bontšhago tšona hloko, ka gobane ke sona se o se tlišeditšwego fa. O botše setšhaba sa Israele tšohle tše o di bonago.”

₅Se ke bego ke se bona e be e le Tempele, gomme e dikaneditšwe ka morako. Lehlaka la go ela le le bego le swerwe ke monna yoo e be e le la dimetara tše tharo ka botelele, le feta lehlaka le le tlwaelegilego la go ela. A ela morako woo; wona e be e le wa dimetara tše tharo go ya godimo, le tše tharo bokoto. ₆Ke moka a ya lesorong la ka bohlabatšatši. A namelela ka manamelo, a fihla a ela serepodi; sona e be e le sa dimetara tše tharo ka bophara. ₇Gona moo go be go na le diphapoši tša baleti. Phapoši ye nngwe le ye nngwe e le ya dimetara tše tharo ka botelele, le tše tharo ka bophara, gomme maboto ao a di kgaotšego e be e le a bokoto bja dimetara tše pedi le seripa. Ge o tsena ka lesoro o be o feta ka tlase ga mathudi a a lebeletšego Tempeleng. Serepodi sa lona e be e le sa dimetara tše tharo ka bophara. _8-9O ile a ela le ona mathudi ao, mme ya ba dimetara tše nne ka bophara. Dikokwane tša ona e be e le tša metara o tee ka bokoto. ₁₀Ge o tsena ka lesoro la ka bohlabatšatši o be o hwetša diphapoši tše tharo tša baleti ka mo le ka mo, tše tharo e le tša go lekana ka bogolo. Dikokwane tša mathudi ka mo le ka mo di be di lekana.

₁₁Ka morago ga moo monna yoo a ela bophara bja lesoro. Lona e be e le la dimetara tše di selelago le seripa, sekgoba sa mokgahlo ga mabati ge a butšwe sona e be e le sa dimetara tše tlhano. ₁₂Ka pele ga phapoši ye nngwe le ye nngwe ya baleti go be go agilwe le mmotwana wa disentimetara tše masome a mahlano go ya godimo. Botelele bja diphapoši tša gona e be e le dimetara tše tharo, bophara le bjona e le dimetara tše tharo. ₁₃Ke moka a ela sekgoba sa mokgahlo ga leboto la ka morago la phapoši ye nngwe, le la ka morago la phapoši ye e lego ka kua ga mathudi, gomme ya ba dimetara tše lesome le tše pedi le seripa. ₁₄A ela bophara bja mathudi, mme ya ba dimetara tše lesome. Lesoro le be le dikaneditšwe ka kgoro. ₁₅Go tloga lesorong go fihla mafelelong a mathudi e be e le dimetara tše masome a mabedi le tše tlhano. ₁₆Diphapoši tša baleti tše di bego di le ka gare ga mathudi gotee le dikokwane tša tšona di be di na le mafasetere a mapheko ka mathoko ohle. Mathudi le ona a be a na le mafasetere ka gare ka mathoko ohle. Mo dikokwaneng go be go tlokilwe diswantšho tša mehlare ya mepalema.

₁₇Monna yoo a nkiša ka kgorong ya ka ntle. Gona go be go na le diphapoši tše masome a mararo; pele ga diphapoši go be go na le lebato le le dikologilego kgoro. ₁₈Lebato le be le fihla ka mathoko a masoro, gomme bophara bja lona bo lekana le botelele bja masoro. Bophagamo bja lebato le bo be bo le ka fase ga bja kgoro ya ka gare.

₁₉Ke moka a ela sekgoba sa go tloga lesorong la ka fase go fihla kgorong ya ka gare, ya ba dimetara tše masome a mahlano.

₂₀Ka morago a ela botelele le bophara bja lesoro la ka leboa le le bego le tsenelela ka kgorong ya ka ntle. ₂₁Diphapoši tšela tše tharo tša baleti ka mo le ka mo ga mathudi, le dikokwane tša lesoro, le mathudi a lona, di be di lekana le tšela tša lesorong la mathomo. Botelele bja lesoro leo e be e le dimetara tše masome a mabedi le tše tlhano, gomme bophara e le dimetara tše lesome le tše pedi le seripa. ₂₂Mathudi le mafasetere le diswantšho tša mehlare ya mepalema di be di swana le tšela tša lesorong la ka bohlabatšatši. Moo go be go na le magato a a šupago a go namelela lesorong. Ge motho a tsena ka lesoro o be a feta ka tlase ga mathudi. ₂₃Ka kgorong ya ka gare go lebana le lesoro la ka leboa go be go na le lesoro la go swana le lela la go lebana le lesoro la ka bohlabatšatši. Monna yoo a ela sekgoba se se lego mokgahlo ga masoro ao a mabedi, gomme ya ba a dimetara tše masome a mahlano.

₂₄Ka morago monna yoo a nkiša ka lehlakoreng la ka borwa, gomme moo ka bona lesoro le le lebeletšego borwa. A ela dikokwane tša lona le mathudi; di be di lekana le tša masoro a mangwe. ₂₅Diphapoši tša baleti le mathudi lesorong leo di be di na le mafasetere ka mathoko ohle go swana le masorong ale a mangwe. Botelele bja lesoro leo e be e le dimetara tše masome a mabedi le tše tlhano, gomme bophara e le dimetara tše lesome le tše pedi le seripa. ₂₆Go be go na le magato a a šupago a go namelela go lona. Ge motho a tsena ka lesoro o be a feta ka tlase ga mathudi. Go be go tlokilwe diswantšho tša mehlare ya mepalema dikokwaneng tša mathudi, sengwe ka mo, sengwe ka mo. ₂₇Kgoro ya ka gare le yona e be e na le lesoro la ka borwa. Monna yoo a ela sekgoba sa go tloga lesorong leo go fihla lesorong la ka ntle la ka borwa, gomme ya ba dimetara tše masome a mahlano.

₂₈Monna yoo a ntsentšha ka kgorong ya ka gare ka lesoro la ka borwa. A ela lesoro leo, gomme la lekana le masoro ale a mangwe ka bogolo. ₂₉Diphapoši tša lona tša baleti le dikokwane tša lona le mathudi di be di lekana le tšela tša masorong a mangwe ka bogolo. Diphapoši tša baleti le mathudi lesorong leo di be di na le mafasetere ka mathoko ohle. Botelele bja lona e be e le dimetara tše masome a mabedi le tše tlhano, gomme bophara e le dimetara tše lesome le tše pedi le seripa. ₃₀Go be go na le mathudi ka mathoko a kgoro ya ka gare, e le a dimetara tše lesome le tše pedi le seripa ka botelele, le tše pedi le seripa ka bophara. ₃₁Mathudi a lona a be a lebeletše kgorong ya ka ntle, diswantšho tša mehlare ya mepalema di tlokilwe dikokwaneng tša ona. Go be go na le magato a seswai a go namelela lesorong leo.

₃₂Monna yoo a nkiša ka lehlakoreng la ka bohlabatšatši la kgoro ya ka gare, a ela lesoro, gomme la lekana le ale a mangwe ka bogolo. ₃₃Diphapoši tša lona tša baleti le mathudi a lona le dikokwane di be di lekana le tšela tša masorong a mangwe ka bogolo. Go be go na le mafasetere ka mathoko ohle gotee le mathuding. Botelele bja lesoro le e be e le dimetara tše masome a mabedi le tše tlhano, gomme bophara e le dimetara tše lesome le tše pedi le seripa. ₃₄Mathudi a lona a be a lebeletše kgorong ya ka ntle. Diswantšho tša mehlare ya mepalema di be di tlokilwe dikokwaneng tša ona ka mo le ka mo. Go be go na le magato a seswai a go namelela lesorong leo.

₃₅Ka morago monna yoo a nkiša lesorong la ka leboa. A le ela, gomme la lekana le ale a mangwe ka bogolo. ₃₆Diphapoši tša lona tša baleti le dikokwane le mathudi di be di lekana le tšela tše dingwe ka bogolo. Go be go na le mafasetere ka mathoko ohle a lona. Botelele bja lona e be e le dimetara tše masome a mabedi le tše tlhano, gomme bophara e le dimetara tše lesome le tše pedi le seripa. ₃₇Mathudi a lona a be a lebeletše kgorong ya ka ntle. Diswantšho tša mehlare ya mepalema di be di le dikokwaneng tša lona ka mo le ka mo. Go be go na le magato a seswai a go namelela lesorong leo.

₃₈Go be go na le phapoši ye e nago le mojako mathuding a lesoro ka mo go bego go hlatswetšwa dihlabelo tša go tšhungwa ka moka. ₃₉Gona ka moo mathuding go be go na le ditafola tše pedi ka mo le ka mo tša go bolaela diphoofolo tša dihlabelo tša go tšhungwa ka moka, le tša dihlabelo tša tshwarelo ya dibe, le tša dihlabelo tša tefelo ya tšona. ₄₀Ka ntle ga mathudi lesorong la ka leboa go be go na le ditafola tše nne: tše pedi ka lehlakoreng le lengwe, le tše pedi ka go le lengwe. ₄₁Ditafola tšeo go tšona go bego go bolaelwa diphoofolo tša dihlabelo e be e le tše seswai: tše nne ka lehlakoreng le lengwe la lesoro, le tše nne ka go le lengwe. ₄₂Go be go na le ditafola tše dingwe tše nne tša go dirwa ka leswika le le betlilwego tša dihlabelo tša go tšhungwa ka moka. Botelele bja ye nngwe le ye nngwe e be e le disentimetara tše masome a a šupago le tše tlhano; bophara le bjona e le disentimetara tše masome a a šupago le tše tlhano, mola bophagamo e le disentimetara tše masome a mahlano. Godimo ga tšona go be go bewa tše di dirišwago ge go bolawa diphoofolo tša dihlabelo tša go tšhungwa ka moka le tša dihlabelo tše dingwe. ₄₃Maribana a dimilimetara tše masome a a šupago le tše tlhano ka bophara a be a dikologile dipapetla tša ditafola tšeo. Nama ya dihlabelo e be e bewa godimo ga ditafola tšeo.

₄₄Ka morago o ile a nkiša ka kgorong ya ka gare. Go be go na le diphapoši tše pedi ka kgorong ya ka gare, ye nngwe e lebeletše borwa kgauswi le lesoro la ka leboa, mola ye nngwe e lebeletše leboa kgauswi le lesoro la ka borwa. ₄₅Monna yoo a re go nna: “Phapoši ya go lebelela borwa ke ya baprista ba go hlankela Morena ka Tempeleng, ₄₆gomme ya go lebelela leboa ke ya baprista ba go mo hlankela aletareng. Baprista ba ke ditlogolo tša Tsadoko; ke bona fela Balefi ba ba dumelelwago go ya pele ga Morena go mo hlankela.”

₄₇Monna yoo a ela kgoro ya ka gare, gomme botelele ya ba dimetara tše masome a mahlano, bophara le bjona ya ba dimetara tše masome a mahlano, mathoko ohle a lekana, aletare e le ka pele ga Tempele. ₄₈Ke moka a nkiša mathuding a Tempele. A ela dikokwane tša mathudi, bokoto bja tšona ya ba dimetara tše pedi le seripa ka mo le ka mo. Bophara bja lesoro e be e le dimetara tše di šupago, gomme bokoto bja dikokwane tša lona e le metara o tee le seripa ka mo le ka mo. ₄₉Go be go na le magato a go namelela mathuding ao bophara bja ona e bego e le dimetara tše lesome, mme botelele e le dimetara tše di selelago. Moo lesorong go be go na le dikokwane tše pedi, ye nngwe ka mo, ye nngwe ka mo.