HESEKIELE 42

₁Ke moka monna yoo a nkiša ka leboa ka kgorong ya ka ntle, a nkiša diphapošing tše di lebanego le kgoro ya Tempele, le moago wo o lego ka leboa. ₂Moago woo e be e le wa dimetara tše masome a mahlano ka botelele, le tše masome a mabedi le tše tlhano ka bophara. Mojako wa wona o be o le ka leboa. ₃Go lebana le lebala la dimetara tše lesome le le bego le kgomagane le kgoro ya ka gare, le go lebana le lebato la kgoro ya ka ntle go be go na le diphapoši tše di lebelelanego mabatong a mararo a a hlatlaganego. ₄Mo pele ga diphapoši go be go na le megorogohlo ye e išago ka diphapošing tšeo, bophara bja yona e le dimetara tše tlhano, mme botelele e le dimetara tše masome a mahlano. Mejako ya yona e be e lebeletše leboa. ₅Diphapoši tša lebatong la ka godimo di be di pitlagane go feta tša lebatong la ka fase le la gare, ka gore di be di agetšwe moragonyana. ₆Diphapoši tša mabatong ao ka mararo di be di se na dikokwane, di sa swane le meago ya dikgoro; ke ka lebaka leo diphapoši tša ka godimo di bego di agetšwe moragonyana go tša ka fase ga tšona, le go tša gare. ₇Go bapa le diphapoši ka ntle go be go na le leboto la dimetara tše masome a mahlano ka botelele le eya ka kgorong ya ka ntle. ₈Botelele bja moago wa diphapoši tšeo di lebeletšego kgorong ya ka ntle e be e le dimetara tše masome a mabedi le tše tlhano, kganthe bja diphapoši tšeo di lebeletšego Tempeleng e be e le dimetara tše masome a mahlano. ₉Ka bohlabela diphapoši tša ka fase di be di na le mojako wa go tsena ge motho a etšwa ka kgorong ya ka ntle.

₁₀Go bapa le leboto la kgoro ya ka ntle ka lehlakoreng la lona la ka borwa go be go na le diphapoši tše di lebeletšego ka kgorong ya Tempele le go wona moago wa diphapoši. ₁₁Mo pele ga diphapoši go be go na le mogorogohlo. Diphapoši tše di be di swana le tšela tša ka leboa. Di be di lekana natšo ka botelele le ka bophara, di swana natšo le ka sebopego, le mejako ya tšona e swana. ₁₂Go be go na le mogorogohlo ka fase ga diphapoši tša ka lehlakoreng la ka borwa la moago. Mathomong a mogorogohlo wo wa go bapa le leboto go leba ka bohlabatšatši go be go na le mojako wo go tsenwago ka wona ka diphapošing.

₁₃Monna yoo a re go nna: “Diphapoši tše di lego ka leboa le ka borwa tše di lebeletšego ka kgorong ya Tempele ke tše dikgethwa, tše baprista ba ba tsenago ka mo go lego Morena ba jelago dikabelo tše dikgethwakgethwa ka go tšona. Ka ge diphapoši tša gona e le tše dikgethwa, baprista ba tla bea dikabelo tše dikgethwakgethwa ka gare ga tšona: dikabelo tša bupi le dihlabelo tša tshwarelo ya dibe le tša dihlabelo tša tefelo ya tšona. ₁₄Ge baprista ba ile ba tsena ka Felo mo Gokgethwa, ba se ke ba tšwela ka kgorong ya ka ntle ba se ba apola diaparo tše ba bego ba di apere ge ba hlankela Morena, ba di tlogele moo, gobane diaparo tšeo ke tše dikgethwa. Ba apare tša bona pele ba tšwela ka ntle mo go kgobokanego setšhaba.”

₁₅Ge monna yoo a seno fetša go ela bokagare bja lebala la Tempele, o ile a nntšhetša ka ntle ka kgoro ya ka bohlabatšatši, gomme a ela setsha sa Tempele. ₁₆A ela lehlakore la ka bohlabatšatši ka lehlaka la go ela, gomme lona ya ba la dimetara tše makgolo a mabedi le tše masome a mahlano. ₁₇Ke moka a ela lehlakore la ka leboa, le lona ya ba la dimetara tše makgolo a mabedi le tše masome a mahlano. ₁₈A ela lehlakore la ka borwa, le lona ya ba la dimetara tše makgolo a mabedi le tše masome a mahlano. ₁₉A ya ka lehlakoreng la ka bodikela, a le ela, gomme le lona ya ba la dimetara tše makgolo a mabedi le tše masome a mahlano. ₂₀Ya ba ge a etše mathoko ka mane a leboto la thetemotse; botelele bja lona ya ba dimetara tše makgolo a mabedi le tše masome a mahlano, bophara le bjona ya ba dimetara tše makgolo a mabedi le tše masome a mahlano. Leboto leo ya ba la go aroganya sekgoba se sekgethwa le se e sego se sekgethwa.