To The Word – Day 164

₁Gwa fetola Elifase wa go tšwa Temane a re:

₁Ke moka Jobo a ba fetola a re:

₁Bjale ke botšiša ke re: Na ke go re Modimo o lahlile setšhaba sa gagwe? Le gatee! Gape le nna ke Moisraele wa lešika la Abrahama, wa kgoro ya Benjamene. ₂Modimo ga se a lahla setšhaba sa gagwe se a se kgethilego kgale. Na ga le tsebe gore Mangwalo a Makgethwa a reng ka temaneng yela Eliya a begago Baisraele go Modimo? A re: ₃“Morena, ba bolaile baprofeta ba gago, ba kgereša le dialetare tša gago; ke nna fela ke šetšego, gomme le nna ba nyaka go mpolaya.” ₄Modimo yena o ile a mo fetola bjang? O mo fetotše ka go re: “Ke itšhadišeditše banna ba dikete tše di šupago ba ba se ba kago ba khunamela Baale.” ₅Le mehleng yeno go sa le bjalo. Go na le mašaledi ao Modimo a a kgethilego ka ge yena a na le kgaugelo. ₆Gape Modimo o kgetha batho go ya ka kgaugelo ya gagwe, e sego ka tše batho ba di dirago. Ge a ka be a kgetha go ya ka mediro ya batho, gona kgaugelo ya gagwe e ka be e se ya nnete.

₇Bjale go ka thweng? Baisraele ga se ba hwetša se ba bego ba se nyaka. Se hweditšwe fela ke bao ba kgethilwego ke Modimo; ba bangwe bona a ba thatafatša gore ba se mo kwe. ₈Ya ba go phethega ga tše di bolelwago ke Mangwalo a Makgethwa ge a re: “Modimo o dirile gore ba palelwe ke go nagana; go fihlela bjale o sa ba timile go kwešiša le go hlaologanya.” ₉Dafida le yena o re:

₁₁Bjale ke re: Na ke go re go kgopša ga Bajuda go ba wišeditše gore ba lahlegele sa ruri? Le gatee! Ka ge ba dirile sebe phologo e tletše baditšhaba gore Bajuda ba tle ba be le lehufa. ₁₂Go dira sebe ga Bajuda go hotše ditšhaba tša lefase kudu, gomme go gana Modimo ga bona go hotše baditšhaba. Bjale ge, ge Bajuda ka moka ba ka be ba ka amogela Modimo, ditšhaba tšohle di ka be di ka holega le go feta.

₁₃Bjale ke botša lena baditšhaba ke re: Ge ke sa ntše ke le moapostola wa baditšhaba ke tla no fela ke itheta ka modiro wa ka. ₁₄Mohlomongwe nka hufegiša morafe wa gešo, gomme ka go dira bjalo ka phološa ba bangwe ba bona. ₁₅Gobane mola Modimo a ba lahla o boelantše merafe ye mengwe ya lefase le yena. Bjale mohla a ba amogela gape a gona go tla ba bjang? E tla ba mo nkego bahu ba tsošwa mabitleng.

₁₆Gape ge lekako la mathomo le abetšwe Modimo, gona mogopo wohle ke wa gagwe; ge medu ya mohlare e abetšwe Modimo, le makala a wona a abetšwe yena. ₁₇Makala a mangwe a mohlware wa gae a kgaotšwe, gwa hlomesetšwa lekala la mohlware wa naga. Le wena o bjalo ka lekala leo la mohlware wa naga, gomme o holega ka mohlodi wa mohlware wa gae, wona o tsenago mohlwareng ka medu. ₁₈Ka gona, o se ikgantšhetše bao ba bego ba kgaotšwe boka makala; gobane le ge o ka re o a ikgantšha, o no tseba gore ga se wena o rwelego medu, medu ke yona e rwelego wena.

₁₉Mohlomongwe o ka re: “Makala a kgaoletšwe gore go tle go hlomesetšwe nna.” ₂₀Moo ke nnete. A kgaotšwe ka lebaka la go se dumele, kganthe wena o šadišitšwe ka lebaka la tumelo. Fela o se ikgogomoše ka seo; sa gago a e be go boifa, ₂₁gobane ge Modimo a se a ka a hlekesetša bao e lego makala a mohlware, le wena a ka se go hlekesetše. ₂₂Ke mo re bonago botho le bogale bja Modimo. O bogale go bao ba kgelogilego, kganthe go wena o botho, ge eba o phela ka mo go swanelago botho bja gagwe. Ge o sa phele bjalo, gona le wena o tla rengwa. ₂₃Bona ge ba se sa gana go dumela, le bona ba tla hlomesetšwa, gobane Modimo o na le maatla a go ba bušetša madulong. ₂₄Wena o bjalo ka lekala le le remilwego mohlwareng wa naga mme la hlomesetšwa go wa gae wo ka tlhago e sego wa gabolona. Bajuda ba swana le mohlware woo wa gae; gomme go tla ba bonolo kudu go Modimo go hlomesetša makala a a kgaotšwego go mmagoona.

₂₅Banabešo, go na le sephiri se sengwe se ke nyakago gore le se tsebe, gore le se ikgopole le le ba bohlale. Sona sese: Bohlogothata bja Baisraele ga se bja dulela ruri, eupša bo tla ba kgomarela go fihlela palo ye e feletšego ya baditšhaba e sokologela go Modimo. ₂₆Ka mokgwa wo Baisraele bohle ba tla phološwa, bjalo ka ge Mangwalo a Makgethwa a bolela a re:

₃₃Na a kaakang mahumo a Modimo! Bohlale le tsebo ya gagwe di tebile bjang! Dikahlolo tša gagwe di kwešišwa ke mang? Ditsela tša gagwe ga di na mohlathi. ₃₄Gobane le Mangwalo a Makgethwa a re:

₁Bjale ge, banabešo, ka ge Modimo a re gaugetše gakaaka, ke a le kgopela ke re: Ineeleng go yena le be sehlabelo se se phelago, se sekgethwa se se mo kgahlago. Ke wona mokgwa wa nnete wo le swanetšego go mo khunamela ka wona. ₂Le se swantšhe mekgwa ya lena le ya batho ba mo lefaseng, le upše le dumelele Modimo gore a le fetoše ka go le mpshafatša dikgopolong. Ke mo le tlago tseba se e lego thato ya gagwe se se lokilego, se se mo kgahlago, se se feletšego.

₃Gomme ge ke bona mpho ye Modimo a mphilego yona ka kgaugelo ya gagwe, ke botša yo mongwe le yo mongwe wa lena gore a se ikgopole go feta tekanyo, eupša a ikgopole ka mo go mo swanetšego, a ipone go ya ka tumelo ye a e filwego ke Modimo. ₄Gobane re swana le mmele wo o nago le ditho tše dintši, mme ditho tšeo di sa dire modiro o tee tšohle. ₅Ka wona mokgwa woo, le rena le ge re le ba bantši, re mmele o tee ka Kriste, gomme mongwe le mongwe ke setho sa mongwekayena. ₆Re na le dimpho tše di fapafapanego tše Modimo a re babaletšego ka tšona go ya ka kgaugelo ya gagwe. Ge motho a filwe mpho ya go bega molaetša wa Modimo, a o bege go ya ka tumelo ye a nago le yona; ₇ge e le bodiredi, a direle ba bangwe; ge e le go ruta, a rute; ₈ge e le go kgothatša, a kgothatše; yo a abelago ba bangwe, a ba abele ka pelo ye tšhweu; yo a etago ba bangwe pele, a ba ete ka mafolofolo; yo a kwelago ba bangwe bohloko, a ba kwele a thabile.

₉Le se be le lerato la bofora. Le hloye bobe le itshwarelele ka boloki. ₁₀Le rataneng kudu ka mo go lebanego badumedi, mme le fišegele go hlomphana. ₁₁Le se itšimeletše go bontšha mafolofolo. Le be le matšato. Le direle Morena. ₁₂Le thakgatšwe ke kholofelo ye le nago le yona; ge le na le matshwenyego le se a felele pelo; le dule le rapela. ₁₃Tše le nago le tšona le di abelane le badumedi ba ba di hlokago; le thakgalele go amogela baeti.

₁₄Ba ba le hlomarago le ba šegofatše; ee, le ba šegofatše, le se ba roge. ₁₅Le thabe le ba ba thabilego, le lle le ba ba llago. ₁₆Le phedišane ka kwano. Le se llele bogolo, le upše le gwerane le babotlana. Le se ipone le le bahlalefi.

₁₇Le se itefeletše go bao ba le dirago bobe. Le leke go dira tše batho bohle ba bonago e le tše di lokilego. ₁₈Le dire ka mo le ka kgonago ka gona go phedišana le batho ka moka. ₁₉Barategi, le se ke la itefeletša, le upše le lefeletšwe ke Modimo a galefile, gobane Mangwalo a Makgethwa a re: “Ke nna ke lefeletšago; ke nna ke tlago bušetša. O realo, Morena”. ₂₀Go ya ka Mangwalo a Makgethwa: “Wena, ge lenaba la gago le swerwe ke tlala, o le fe dijo; ge le kgalegile, o le noše. Ka mokgwa woo o tla be o le leša dihlong e le ruri.” ₂₁O se ke wa fenywa ke bobe, o fenye bobe ka go loka.

₁Motho mang le mang a se gane go bušwa ke ba ba filwego maatla a go buša, ka gobane ga go mmušo wo o sa tšwego go Modimo; mebušo ye e lego gona e hlomilwe ke Modimo. ₂Ka gona, yo a lwago le mmušo o lwa le se se laetšwego ke Modimo; gomme yo a lwago le sona o ikobela kotlo. ₃Gobane go bao ba dirago tša go loka babuši ga ba boifiše, ba boifiša go bao ba dirago tše dimpe. Kgane wena ga o nyake go phela o sa boife babuši? Gona o dire tše di lokilego, gomme bona ba tla go reta, ₄gobane ke bona bahlanka ba Modimo ba ba šomelago go go hola. Eupša ge o dira tše dimpe, gona o ba boife, gobane maatla a bona a go otla ga se a lefeela. Ke bona bahlanka ba Modimo, ke balefeletši ba Modimo ba go otla bakgopo. ₅Ke ka lebaka leo le swanetšego go theeletša ba ba bušago, e sego fela ka gobane le tšhaba kotlo ya Modimo, eupša e be le ka lebaka la letswalo.

₆Ke ka lebaka leo le tšhelago le metšhelo, gobane babuši ge ba dira mediro ya bona ba šomela Modimo. ₇Ka gona le ntšhetše bohle tše di ba lebanego: yo a lebanwego ke seloba le mo lobe; yo a lebanwego ke sebego le mmegele; yo a lebanwego ke tlhompho le mo hlomphe; yo a lebanwego ke kgodišo le mo godiše.

₈Le se ke la kolota motho selo ge e se go ratana naye. Gobane yo a ratago ba bangwe ke yena yo a phethago melao ya Moshe. ₉Gape melao ye e rego: “O se ke wa otswa, o se ke wa bolaya, o se ke wa utswa, o se ke wa duma tša ba bangwe” le wo mongwe molao wo o ka bago gona, yohle e akaretšwa ka wo o rego: “O rate bangwekawena bjalo ka ge o ithata.” ₁₀Moratamongwekayena ga a mo senyetše. Bjale ge, go rata ke go phetha melao yohle ya Moshe.

₁₁Le dire ka mokgwa woo ka ge le tseba gore ke nako – nako ya go tsoga borokong e šetše e fihlile. Gobane nako ya gore re phološwe bjale e kgauswi go feta mola re sa tšo dumela. ₁₂Bjale go swana le ge bošego bo esa, letšatši le le kgauswi le go hlaba. Ka gona, a re tlogeleng mediro ya leswiswi, re itlhameng ka dibetša tša go lwa seetšeng. ₁₃A re itshwareng gabotse bjalo ka batho ba ba phelago seetšeng sa mosegare, e sego ka bohlola le botagwa, e sego ka bofebe le tša go leša dihlong, e sego ka diphapano le mahufa. ₁₄Le upše le phele bjalo ka balatedi ba Morena Jesu Kriste, mme le lese go beakanyetša dilo pele ka mokgwa wa go kgotsofatša ditumo tša lena tša nama.