JOBO 15

₂“Na mohlalefi wa go swana nago a ka bolela ditšiebadimo tša mohuta wo, dilo tša go hloka mahlakantšho,

₃a ikemelela ka mantšu a a se nago mohola,

le ka dipolelo tša lefeela ka mokgwa wo?

₄Le go boifa Modimo ga o sa mmoifa;

o mo nagana gannyane.

₅O boledišwa ke bokgopo bja gago;

ke ka lebaka le o bolelago ka leleme le boreledi ka mokgwa wo.

₆O ahlolwa ka mantšu a gago,

ga o ahlolwe ke nna;

gabotsebotse o a itšwa.

₇“Kgane ke wena wa mathomo wa go tswalwa?

Na o be o le gona pele ga ge Modimo a dira meboto?

₈Na Modimo o kile wa mo tšea ka tsebe a bolela lekgotleng la gagwe?

Kgane bohlale ke bja gago o nnoši?

₉Ke eng se o se tsebago rena re sa se tsebe?

O kwešiša eng se rena re sa se kwešišego?

₁₀Rena se re se tsebago ke bohlale bjo re bo rutilwego ke diputswa tša gaborena,

banna ba ba tswetšwego pele ga tatago.

₁₁“O reng o gana re go homotša ka boleta legatong la Modimo?

₁₂O reng o tshelwa ke pelo;

mahlo ona o a tomoletšeng?

₁₃O reng o galefetše Modimo,

o mmolela ka mokgwa wo?

₁₄“Na ruri o gona motho yo a se nago bosodi?

Kgane motho, motswalwakemosadi,

e ka ba moloki?

₁₅Gape le barongwa Modimo ga a ba tshepe;

mo go yena le magodimo ga se a hlweka.

₁₆Bjale motho wa go šišimiša le go senyega,

motho wa go nwa bokgopo boka meetse,

yena a ka mo semang?

₁₇“Theeletša, ke go botše ke go anegele tše ke di bonego,

₁₈ke tše di tšwago go banna ba bohlale,

tše ba sa kago ba di fihlelwa ke botatagobona.

₁₉Ke botatagobona fela ba ba ilego ba fiwa naga – gwa hlokega mofaladi.

₂₀“Motho yo mokgopo,

wa go gatelela bangwe,

o dula a le mahlokong bophelong bjohle bja gagwe,

mengwageng yohle ye a e beetšwego.

₂₁O kwa mašata a go tšhoša;

le ge a sa iketlile o khukhunetšwa ke mmolai.

₂₂O lebanwe ke go bolawa ka tšhoša;

ga a sa tshepa gore a ka tšwa swiswing leo.

₂₃O a tseba gore o tla bolawa kgauswinyana;

o lebanwe ke go lewa ke manong.

₂₄O tšhošwa ke leswiswi le le mo tlelago.

Masetlapelo le mahlomola a mmoifiša bjalo ka kgoši ye e nyakago go hlasela.

₂₅“Ke ka gobane o šupile Modimo ka monwana,

o nyaditše Ramaatlaohle.

₂₆O mo hlasetše a sa tšhabe selo,

a swere kotse ya gagwe ye koto.

₂₇O šušumogile sefahlego ka go nona,

le letheka la gagwe le wele maphethe.

₂₈“Yoo ke yena yo a tlago dula maropeng,

dintlong tše di sa dulwego ke motho,

tše di tlilego go ba marope.

₂₉A ka se dule e le mohumi;

lehumo la gagwe le ka se swarelele;

le moriti wa gagwe o ka se sa bonala mo lefaseng.

₃₀A ka se kgone go phonyokga leswiswi.

O tla ba bjalo ka sehlare seo matlakala a sona a fišitšwego ke mollo,

seo maloba a sona a tšerwego ke phefo.

₃₁A se ke a iphora a bota lefeela,

ka gobane lefeela e tla ba wona moputso wa gagwe.

₃₂O tla pona nako ya gagwe e sešo ya tla,

a šwaba bjalo ka lekala, a se sa talafala.

₃₃O tla ba bjalo ka morara woo dikenywa tša wona di hlohloregago e sa le matata;

o tla etša mohlware wo o thinthegago maloba.

₃₄“Bahlokamodimo ga ba be le ditlogolo;

le dintlo tše ba di agilego ka tsogolekobong di tla tšhungwa ka mollo.

₃₅Ba lakana go hlola mathata,

ba dire tše mpe;

ba tletše bomenetša ka dipelong.”