JOBO 17

₁Ke nolegile moko,

ke kgauswi le go hwa;

se se ntšhaletšego ke lebitla.

₂Ke dula ke kwerwa,

ke lebeletše ge ba mphediša gabohloko.

₃Ke a rereša; nkgolwe, hle, Modimo.

Yo mongwe yo a ka tiišetšago se ke se bolelago ke mang, ntle le wena?

₄O ba šitišitše go nagana gabotse;

ka gona o ka se ba lese ba mphenya.

₅Kgane motho a ka ja thoto ya gagwe le bagwera,

mola bana ba gagwe ba bolawa ke tlala?

₆Modimo o dirile gore batho ba mphare dika;

ke nna setshwelwakamare.

₇Manyami a ka a nyaka le go mphoufatša;

ditho tšohle tša ka di sesefetše wa moriti.

₈Se ke se se tlabilego baloki;

ba ba se nago molato ba a ntlhanogela,

ba re ke nna mohlokamodimo.

₉Baloki ba swere tsela;

bahlokamolato ba tielela ba tšwela pele.

₁₀Ka moka ga lena etlang le leke gape;

mohlale mo gare ga lena nka se mo hwetše.

₁₁“Matšatši a ka a iketše;

merero ya ka le ditumo di phuhlame.

₁₂Bagwera ba ka bona ba re ditlaišego tša ka di tla mphetogela lethabo.

Seetša serakaleswiswi se batametše.

₁₃Ge nkabe nka holofela go yo phela bodulabahu le go yo ikalela moo leswiswing,

₁₄ka bitša lebitla tate,

diboko ka re ke bomma le bokgaetšedi.

₁₅Ke be ke tla be ke sa botile eng?

A ke mang yo a ka tsebago se nka se holofelago?

₁₆Na kholofelo e ka ya le nna bodulabahu?

Kgane nka theogela gona mmogo le yona?”