To The Word – Day 163

₂“Na sefafatlane se ga se arabiwe?

Kgane moratharathi ke yena moloki?

₃Na o gopola gore ditšiebadimo tša gago

di ka no homolelwa?

Kgane o bona nke o ka kodutla Modimo,

wa se ganetšwe ke motho?

₄Etse o ipotša gore se o se bolelago ke nnete,

le gore mahlong a Modimo ga o na bosodi.

₅Nke nkabe Modimo a go fetola,

a phegišana le wena!

₆Nke nkabe a go botša diphiri tša bohlale,

gobane bohlale bja Modimo ke bjo bo makatšago.

Ke mo o bego o tla lemoga gore Modimo o go otla gosenene go feta ka mo go go swanelago.

₇“Kgane o ka kwešiša diphiri tša Modimo,

wa kwešiša bohlale bja Ramaatlaohle ka botlalo?

₈Bo phagame go feta magodimo –

kgane wena o ka bo fihlelela?

Bo iša go feta bodulabahu –

na o ka bo fihlelela?

₉Bo nabile go feta lefase,

ebile bo ikadile go feta lewatle.

₁₀Ge Modimo a ka tla a go swara a go iša tshekong,

ke mang yo a ka mo thibelago?

₁₁Baikaketši Modimo o a ba tseba;

o lebelediša mediro ya bona ye mebe.

₁₂Setlaela se ka se kgone go hlalefa,

bjalo ka ge pitsi le yona

e ka se tswalwe e le motho.

₁₃“Ge o ka sokologela go Modimo,

wa otlolla matsogo a gago wa mo rapela;

₁₄ge o ka tlogela go dira dibe,

wa se dumelele bobe ka lapeng la gago,

₁₅ke mo o tlago ba o hloka bosodi,

wa kgona go lebanya mahlo le batho,

wa ba le maatla, wa se boife.

₁₆O tla nama wa lebala mahloko a gago,

wa a gopola e le fela lefula le le fetilego.

₁₇Bophelo bja gago bo tla taga

go feta letšatši la mosegare wa sekgalela;

manyami a gago a tla go tlogela

go etša leswiswi ge le tlogela masa.

₁₈O ka se sa boifa selo,

gobane o tla be o na le tše o di holofetšego;

Modimo o tla go šireletša,

wa robala o iketlile.

₁₉O tla ithobalela go se yo o mmoifago;

ba bantši ba tla nyaka go ithatiša wena.

₂₀Yo kgopo yena o tla timelelwa ke sefahlego,

le botšhabelo o tla bo hloka.

Sa gagwe e tla ba go letela lehu fela.”

₂“Aowii, gape batho ke bolena.

Mohla le ehwa,

le bohlale e tla be e le gona ge bo hwile.

₃Fela le nna ke na le tlhaologanyo bjalo ka lena;

ga le mphete ka selo.

Kgane taba tše ke mang yo a sa di tsebego?

₄Etse bjale ke segwa le ke bagwera ba ka;

ba a nkgegea, etšwe ke lokile,

ke se ne bosodi,

nna yo ke bego ke rapela Modimo,

gomme yena a nkwe.

₅Lena le iketlilego le a nnyatša,

ke nna wa madimabe;

le e nametša thaba e hlotša.

₆Bahlakodi ba dula ba iketlile;

ba go rumola Modimo le bona ba dula ba bolokegile,

bona ba ba bonago nke ba ka mo laola.

₇Ge o ka botšiša dikgomo di tla go botša,

dinonyana le tšona di tla go begela;

₈wa botšiša digagabi di tla go hlalošetša;

dihlapi le tšona di tla go anegela –

₉tšohle di tseba ge di bopilwe ke Morena.

₁₀Bophelo bja diphedi tšohle le bja motho

bo diatleng tša gagwe.

₁₁A ke re motho o senka mantšu ka ditsebe,

mola ka leleme a kwelela dijo?

₁₂“La hlogoputswa le na le bohlale;

gape go phela galelele go tswala kwešišo.

₁₃Modimo yena o na le bohlale le maatla;

o na le keletšo le temogo.

₁₄Ge a hlahlamola,

moagalefsa a ka se be gona;

a tsenya motho kgolegong,

gwa hlokega mohlakodiši.

₁₅Modimo a se neše pula,

gwa wa komelelo;

a thibolla meetse, gwa tla dikgogola.

₁₆“Modimo ke senatla, Mailagofenywa;

moradia le moradiwa ba laolwa ke yena.

₁₇Baeletši o ba amoga bohlale,

gomme balaodi a ba fetole ditlaela.

₁₈O tloša magoši madulong,

a ba dira dibofša.

₁₉O kokobetša baprista,

le dinatla o a di wiša.

₂₀Batho ba ba botilwego o ba thiba molomo,

le bohlogoputswa o ba tlaetša menagano.

₂₁Bakgoma o ba nyatšiša batho,

mme dinatla a di hlokiša maatla.

₂₂O utolla diphiri tša ka maswiswing,

gomme swiswi le lesoleso a le hlabišetša seedi.

₂₃O godiša ditšhaba, a buše a di fediše.

O atiša ditšhaba, a tle a di lahletše.

₂₄Baetapele ba naga o ba tlaetša menagano,

a ba raladiša le mašoka a a se nago ditsela.

₂₅Ba phophola leswiswing mo go sego seetša,

o ba thekesediša bjalo ka ditagwa.”

₁“Tšohle tše ke šetše ke ile ka di bona ka a ka mahlo,

ka di kwa ka tša ka ditsebe, ka di kwešiša.

₂Tše le di tsebago le nna ke a di tseba.

Ga le mphale ka selo.

₃Yo ke ratago go bolela naye ke Ramaatlaohle.

Ke nyaka go ngangišana le yena Modimo ka taba ye ya ka.

₄Lena le bipa go se tsebe selo ga lena ka maaka.

Le etša dingaka tše di sa kgonego go alafa.

₅Etse ge le ka ikhomolela motho a ka no re le hlalefile.

₆“Nke le ntheeletše ge ke ala taba ya ka,

le ele hloko se ke se bolelago.

₇Na le re le bolelela Modimo ka go bolela tše kgopo?

Kgane le re maaka a lena a tla mo hola?

₈Kgane le leka go mo emelela ka go mo rerelela tshekong?

₉Na ge Modimo a ka le sekiša le ka loka?

Kgane le gopola gore le ka fora Modimo,

go etša ge le fora batho?

₁₀O tla le kgalema gabohloko,

ge eba le kgetholla ka sephiring.

₁₁Na bogoši bja gagwe bo ka se le tšhoše?

Go tšhabega ga gagwe gona a go ka se le boifiše?

₁₂Maele a lena ke matlakala fela;

boitšhireletšo bja lena bo nyaoga bjalo ka letsopa.

₁₃Bjale homolang, go bolele nna,

gomme se se ntlhagelago se ntlhagele.

₁₄“Ke ikemišeditše go tshela ka tswati,

ka ipea kotsing ya lehu.

₁₅Le ge Modimo a mpolaya ke tla no mmota;

boitshwaro bja ka ke tla bo emela mo go yena.

₁₆Seo ke se se tlago mphološa,

gobane yo kgopo a ka se lebane le yena.

₁₇Theeletšang gabotse tše ke le botšago tšona,

gomme tlhalošo ya ka le e ele hloko.

₁₈Ke itokišeditše go bega taba ya ka,

gobane ke tseba ge ke tla hwetšwa ke se ne molato.

₁₉“Ke mang yo a nyakago go sekišana le nna?

Ge eba o gona, ke tla homola, ka ikhwela.

₂₀Modimo, ke taba tše pedi tše ke kgopelago gore o se ntire tšona;

ke mo nka se lekego go go khutela.

₂₁Tšona ke gore o lese go nkotla,

le gona o se sa ntšhoša.

₂₂“Mpee molato,

mme ke tla iphetolela;

goba a go bolele nna,

mme wena o mphetole.

₂₃Melato ya ka le dibe tša ka ke tše kae?

Mpotše diphošo le dibe tše ke di dirilego.

₂₄“O reng o nkgerula?

Ke eng o ntshema lenaba?

₂₅Kgane o nyaka go ntšhoša?

Nna ke dio ba letlakala la go tšewa ke phefo.

Na o nyaka go ntlhomara ke le serite sa go omelela?

₂₆“O mphara ka melato ye boima,

o nkotlela dibe tša bofseng bja ka,

₂₇o mpataganya maoto ka dikota,

o diša tšohle tše ke di dirago,

o lekola le mesepelo ya ka.

₂₈Ka gona, ke senyega bjalo ka kota ye e bodilego,

ke etša seaparo se se llwego ke tšhwele.”

₁“Motho, motswalwakemosadi,

matšatši a gagwe ga a nene,

le gona a tletše matshwenyego.

₂O gola bjalo ka leloba, a ba a pona;

o feta ka lebelo bjalo ka moriti,

ya ba o ile.

₃Yo mobjalo o mmea leihlo,

wa mo tliša tshekong pele ga gago.

₄Ke mang yo a ka ntšhago botse bobeng?

Ga a gona.

₅O beetše motho matšatši a go phela;

ke wena o mmaletšego dikgwedi,

wa ba wa mmeela mellwane ye a ka se kgonego go e tshela.

₆Bjale ge, mo hlokomologe,

o se mo emeletše;

mo lese a phele bophelo bja gagwe go fihlela bofelong,

go etša mothwalwa yo a šomelago mogolo wa letšatši.

₇“Mohlare le ge o remilwe,

go ka holofelwa gore o tla phela gape wa hloga.

₈Le ge medu ya wona e ka tšofala,

le thito ya wona ya hwela ka mobung,

₉ge o ekwa monola o a hloga,

wa hloga le makala bjalo ka semela se sefsa.

₁₀Motho yena ge a ehwa,

ga a sa ne maatla.

O re go hwa, a be kae?

₁₁“Bjalo ka ge letsha le epšha,

le noka e a fokotšega, ya ba ya gopa.

₁₂Le motho ge a hwile ga a sa tsoga.

Bahu ba tla no dula ba hwile ge leratadima le sa le gona.

₁₃“Nke nkabe o mphihla kua bodulabahu,

o nkhutiša go fihlela kgalefo ya gago e okobala,

o mpeela nako ya go tlo nkgopola!

₁₄Ge nkabe motho a re go hwa a tle a tsoge gape,

ke mo ke bego ke tla kgotlelela bophelo bjo bja ka bja matshwenyego,

ka ba ka tla ka imollwa go bjona.

₁₅O be o tla tla wa mpitša, nna ka go araba;

o be o tla duma go mpona, nna, sebopiwa sa gago.

₁₆Kganthe gonabjale o beile mesepelo ya ka yohle leihlo;

o be o tla lesa go latišiša dibe tša ka;

₁₇o be o tla ntshwarela dikarogo tša ka,

wa di lebala;

o be o tla khupetša bokgopo bja ka.

₁₈“Bjalo ka ge thaba e re go kgerega e pšhatlagane,

mme matlapa a tloge madulong a ona,

₁₉bjalo ka ge meetse a kgobola maswika,

le pula ya matlorotloro e gogola mobu,

le wena ke ka mo o fedišago lehutšo la motho ka gona.

₂₀O fenya motho ya ba moka,

ya ba ge a ile.

Ge a ehwa o mo senya sefahlego,

wa mo raka.

₂₁Bana ba gagwe ba rwešwa diala yena a sa tsebe;

le go gobošwa ba gobošwa a sa lemoge.

₂₂Bohloko o kwa bja mmele wa gagwe;

o lla ge bohloko bo ama yena fela.”

“Setšhaba se e sego sa ka ke tla se bitša ‘Setšhaba sa ka’.

Morafe wo ke bego ke sa o rate ke tla o bitša ‘Moratiwa wa ka’.

“ ‘Ga le setšhaba sa ka’,

ke gona mo ba tlago bitšwa ‘bana ba Modimo yo a phelago’.”

“Bonang, ke bea leswika la sekgopi Sione,

letlapa le le tlago ba thetša.

Fela yo a dumelago go lona a ka se swabe.”

“Mokgoši wa bona o phatlaletše lefaseng lohle,

molaetša wa bona o fihlile magomong a lefase.”

“Ke tla le hufegiša batho ba e sego setšhaba;

ke tla le galefiša ka morafe wa mašilo.”

“Ke hweditšwe ke bao ba bego ba sa nnyake,

ka iponagatša go bao ba bego ba sa mpotšiše.”

“Ke hlwele ke phurolotše matsogo go amogela morafe wa lenyatšo le manganga.”