To The Word – Day 154

₁Sebe se bolela le yo kgopo ka pelong ya gagwe,

yena ga a boife Modimo.

₂Gobane motho, ka go ikgogomoša kudu,

o hloma nke dibe tša gagwe di ka se tsebje goba tša hloiwa.

₃Polelo tša gagwe ke tše mpe tša boradia;

ga a sa dira tša tlhaologanyo le tše dibotse.

₄O loga maanomabe le ge a robetše;

boitshwaro bja gagwe ke bjo bobe;

ga a gane tše kgopo.

₅Morena, leratorato la gago le fihla magodimong;

potego ya gago e fihla marung.

₆Go loka ga gago go phagame boka thaba tše kgolo;

dikahlolo tša gago di tebile bjalo ka phamphamadiba.

Wena, Morena,

o babalela batho le diphoofolo.

₇Modimo, leratorato la gago ga se ka bohlokwa!

Batho ba nama ba tšhabela ka fase ga diphego tša gago.

₈Ba khora dijo tše ntši tša ka lapeng la gago;

o ba noša moeleng wa gago wa meetse a mabose.

₉O mothopo wa bophelo;

rena re bonegelwa ke seetša sa gago.

₁₀Dula o rata ba ba go khunamelago;

ba ba lokilego o fele o ba dira ka botho.

₁₁Se lese baikgogomoši ba ntlhasela,

goba bakgopo ba ntelekiša.

₁₂Bona moo badiratšempe ba welego!

Šebao ba rapaletše, go tsoga nkhokho!

₁Tša batho ba babe di se go tshwenye;

se tsebafele ba ba dirago tše kgopo,

₂gobane ba tla omelela ka pela bjalo ka bjang;

ba tla pona bjalo ka dimela tše ditala.

₃Wena, bota Morena,

o dire tše di lokilego;

o itulele mo nageng ya geno o iketle.

₄O ithabiše ka Morena,

mme yena o tla go fa tše o di kgopelago.

₅Dula o ipeile ka diatleng tša Morena;

o mmotile mme yena o tla go phethela.

₆O tla dira gore go hloka molato ga gago go tage bjalo ka seetša sa mosegare,

le go loka ga gago go tage bjalo ka letšatši mosegare wa sekgalela.

₇Ge o le pele ga Morena o se mo felele pelo wa mo kgareetša;

tša yo a atlegago di se go tshwenye,

ešita le tša yo a tšwelelago ka maanomabe a gagwe.

₈Tlogela go befelwa, o ile go galefa;

o se tlale pelo,

gobane go ka go šaetšiša.

₉Yo mobe o tla fedišwa;

wa go bota Morena yena e tla ba mong wa naga.

₁₀Kgauswinyana yo kgopo a ka se sa ba gona;

o ka mo nyaka eupša o ka se mo hwetše.

₁₁Moikokobetši yena e tla ba mong wa naga,

a ipshina ka boiketlo bjo bogolo.

₁₂Yo kgopo o logela moloki maanomabe,

mme o mo lomantšhetša meno.

₁₃Mong wa bohle o sega yo kgopo,

gobane o tseba ge yo mobjalo a tla di bona.

₁₄Yo kgopo o hwanyola tšhoša,

a nganga bora go bolaya mohlaki le mohloki,

le go kgebetla wa tsela tša go loka.

₁₅Fela go tla hlabja yena ka tšhoša ya gagwe,

gwa robaganywa le bora bja gagwe.

₁₆Leruonyana la moloki le phala lehumo la yo kgopo,

₁₇gobane yo kgopo o tla fetšwa maatla,

kganthe moloki yena o thekgwa ke Morena.

₁₈Morena o babalela ba ba se nago bosodi,

mme e tla ba bona bengnaga go ya go ile.

₁₉Ba ka se lewe ke dihlong mabakeng a mathata;

ba tla ja ba khora nakong ya tlala.

₂₀Yo kgopo yena o tla bolawa,

le manaba a Morena a tla fela bjalo ka bjang bja phulo,

bjalo ka muši.

₂₁Yo kgopo o adima a sa buše;

moloki yena ke wa go fa kudu.

₂₂Bašegofatšwa ba Morena e tla ba bona bengnaga;

barogakwa bona ba tla fedišwa.

₂₃Morena o etetša motho yo a mo kgahlago ka maitshwaro,

gomme o a mo thekga.

₂₄Le ge a ka wa, a ka se wele ruri,

gobane Morena o mo swere ka seatla.

₂₅Le ge nkile ka ba yo mofsa mme bjale ke tšofetše,

ga se nke ka bona moloki a lahlilwe,

goba ditlogolo tša gagwe di kgopela diyamaleng.

₂₆Ka mehla o adima batho ka pelo ye tšhweu,

le ditlogolo tša gagwe ke mahlogonolo go yena.

₂₇Tlogela tše mpe o dire tša go loka,

mme o tla ba le bodulo go ya go ile,

₂₈gobane Morena o rata toka,

mme ba ba mmotegelago ga a ba lahle;

o ba šireletša ka mehla.

Ditlogolo tša bakgopo tšona di tla fedišwa.

₂₉Baloki e tla ba bona bengnaga,

mme ba dula go yona go ya go ile.

₃₀Dipolelo tša moloki ke tša bohlale,

mme o bolela tše di lokilego.

₃₁O lota melao ya Modimo wa gagwe ka pelong,

ka gona o tseba ka mo a swanetšego go phela.

₃₂Yo kgopo o lalela moloki a leka go mmolaya,

₃₃eupša Morena ga a mo tlogele a wela diatleng tša gagwe,

goba a mo lesa a tšwiwa tshekong.

₃₄Bota Morena, o phethe ditaelo tša gagwe,

mme o tla go godiša ka go go fa naga;

o tla bogela bakgopo ge ba fedišwa.

₃₅Nkile ka bona yo kgopo wa kgowa;

o be a iphagamišitše nke ke mosedere wa Lebanone.

₃₆Ka tla ka re ke feta fao,

ka hwetša a se sa le gona;

ka mo nyaka ka se mmone.

₃₇Šetša mohlokabosodi,

ela morapedi hloko;

motho wa khutšo o ba le ditlogolwana;

₃₈ba go tshela molao wa Modimo bona ba fedišetšwa sa ruri,

le ditlogolwana tša bakgopo di a bolawa.

₃₉Morena ke mohlakodiši wa baloki;

ke yena setšhabelo sa bona ge ba le tlalelong.

₄₀O a ba thuša a ba lamolela;

o ba lamolela go bakgopo;

o ba hlakodiša ka ge ba tšhabela go yena.

₁Morena, hle, o se nkgale o befetšwe;

o se nkotle o nkgalefetše.

₂Mesebe ya gago e nkgontlhetše,

o nkotlile gabohloko.

₃Ka ge o nkgalefetše ke tšwile dišo gohle mmeleng,

ke opša le ke marapo ka lebaka la dibe tša ka.

₄Ke kgangwa ke makgopo a ka;

ke morwalo wo o mpalelago.

₅Dišo tša ka di a nkga,

di dutla boladu ka lebaka la botlaela bja ka.

₆Ke kudupane, ke kokoropane,

ke hlwa ke lla letšatši ka moka.

₇Ke tletše dišo gohle mmeleng;

mmele wa ka o a fiša ka letadi.

₈Ke feletšwe ke maatla,

ke nolegile moko,

ke tsetlišwa ke manyami.

₉Mong wa ka, o tseba tlhologelo tša ka,

o kwa metsetlo ya ka.

₁₀Pelo ya ka e thebatheba kudu,

ke feletšwe ke maatla,

le mahlo a ka a fifetše.

₁₁Bagwera le bakgotse ba ka ba nkatologile ka lebaka la bolwetši bja ka;

le ba gešo ga ba mpatamele.

₁₂Ba ba ratago go mpolaya ba a nthea;

ba ba ratago go ntira gampe ba a ntakana,

ba hlwa ba duletše go nthera.

₁₃Nna ke bjalo ka setholo,

ga ke kwe selo;

ke swana le semumu,

sona se sa kgonego go bolela.

₁₄Ke bjalo ka motho yo a sa iphetolelego,

ka ge a sa kgone go kwa.

₁₅Le ge go le bjalo, ke botile wena, Morena;

mme wena, Mong wa ka,

wena Modimo wa ka,

o tla nkaraba.

₁₆Ke a go kgopela, se ba lese ba ntshega,

bona ba ba ikgantšhetšago nna ge ke thedimoga.

₁₇Ke kgauswi le go wa,

mme bohloko ga bo nkatologe.

₁₈Ke ipolela bokgopo bja ka,

ke tshwenyegile ka lebaka la dibe tša ka.

₁₉Ba e lego manaba a ka ntle le lebaka ba tiile;

ke ba bantši ba ba ntlhoilego ba se na lebaka.

₂₀Bao ba lefeletšago botse ka bobe ba a ntsota ka ge ke dira tše di lokilego.

₂₁Se ntlogele, Morena,

se nkeme kgole, Modimo wa ka!

₂₂Itlhaganele o nthuše, Mong wa ka,

Mophološi wa ka!

₁Ka pelong ke rile:

“Ke tla itlhokomela maitshwarong,

ka se bolele se sebe;

nka se bolele selo ke na le yo kgopo.”

₂Ke ile ka homola ka re tuu,

ka se bolele selo,

eupša ya ba lefeela.

Tlaišego ya ka yona ya nkgolela.

₃Ka tlalelana ge ke ntše ke tsetla ka mefegelo,

ka ba ka šitwa go itshwara,

mme ka botšiša ka re:

₄“Morena, ntsebiše pheletšo ya ka,

le gore nako ye e ntšhaletšego ke ye kaakang.

Ntemoše bokopana bja matšatši a ka.”

₅O mpeetše bophelo bjo bokopana;

bophelo bja ka o bona e se selo.

Motho wa nama ke lefeelafeela. Sela

₆Bophelo bja motho bo bjalo ka moriti wo o fetago;

tše a itapišago ka tšona ke lefeela.

O ikgobelela mahumo, a sa tsebe moji.

₇Bjale nna ke sa lebeletšeng,

Mong wa ka?

Yo ke mo holofetšego ke wena.

₈Mphološe dikarogong tša ka ka moka.

O se lese ditlatla di nkwera.

₉Ke tla homola, nka se bolele selo,

gobane ke wena o ntirilego gore ke tlaišege ka mokgwa wo.

₁₀Se hlwe o ntlaiša.

Ke šetše ke hlagaditšwe ke mekeketo ya gago.

₁₁O kgalema motho ka go mo otlela bokgopo bja gagwe;

o fediša se a se ratago ya ba nke se lewa ke tšhwele.

Motho ke lefeelafeela. Sela

₁₂Ekwa thapelo ya ka, Morena;

ntheeletše ge ke go llela.

O se hlokomologe sello sa ka,

gobane ke mofaladi nageng ya gago,

ke mofeti bjalo ka borakgolokhukhu ka moka.

₁₃Tlogela go mpea leihlo gore ke iketle pele ke itshepelela, ka se sa ba gona.

₁Phetolo ye boleta e okobatša pefelo,

mantšu a a kgopišago wona a a e gakatša.

₂Polelo tša ba bohlale di ratiša batho tsebo,

melomong ya ditlatla gona go tšhologa tša bošilo.

₃Mahlo a Morena a mo gohle,

a lebeletše ba babe le ba ba lokilego.

₄Mantšu a go bea motho pelo a a mo tsošološa,

a bofora ona a mo ferehla moyeng.

₅Setlatla se itebatša tše tatagosona a se rutilego tšona,

yo bohlale yena o dumela go kgalwa.

₆Ka ngwakong wa moloki go tlala thoto,

thoto ya yo mobe yona e tsenya mong mathateng.

₇Tsebo e gašwa ke batho ba bohlale,

ga e kwalakwatšwe ke ditlatla.

₈Dihlabelo tša bakgopo di šišingwa ke Morena,

dithapelo tša baloki tšona di a mo kgahla.

₉Morena o hlaswa tsela ya yo kgopo,

o rata yo a dirago tše di lokilego.

₁₀Moarogi o tla otlwa gabohloko;

mohloyatsholo o tla hwa.

₁₁Ge Morena a tseba tša bodulabahu le tša kua tahlegong,

tša ka pelong ya motho tšona di ka mo palela bjang?

₁₂Mokodutli ga a nyake go kgalwa,

le maele ga a a nyake go ba bohlale.

₁₃Ge motho a thabile o ediša sefahlego,

manyami ona a šegamiša motho.

₁₄Wa tlhaologanyo ke wa go nyaka go tseba,

lešilo lona le kgotsofala ka bošilo.

₁₅Mohlaki o phela ka mohlako,

ralethabo yena o phela a nyakaletše.

₁₆Mohloki yo a boifago Morena

o phala mohumi wa go balabadišwa ke mahumo a gagwe.

₁₇Go šeba ka morogo le ba o ratanago nabo,

go phala go ja dimakhura le ba o hloyanego nabo.

₁₈Mofelapelwana o hlola phapano,

mopelotelele yena o a e lamola.

₁₉Sebodu sa gagwe ke mathata mo gohle,

moloki yena ga a be le ona.

₂₀Ngwana yo bohlale o thabiša tatagwe,

wa setlatla yena o nyatša mmagwe.

₂₁Moitlhokišatlhaologanyo o kgahlwa ke tša botlaela,

wa tlhaologanyo yena o dira tša go loka.

₂₂Wa go se kgopele maele o palelwa mererong,

wa go a kgopela yena o a atlega.

₂₃Go kgahliša bjang

go bolela sa maleba ka nako ya gona!

₂₄Mohlale o tšea ka tsela ya go rotošetša bophelong,

ya ba ge a phema go theogela bodulabahu.

₂₅Morena o pšhatla magae a baikgogomoši,

dithetemotse tša bahlologadi tšona o a di šireletša.

₂₆Morena o šišingwa maanomabe,

dipolelo tša leago tšona di a mo kgahla.

₂₇Moikhumišakaboradia o hlolela lapa la gagwe go šekeletšwa,

moilatsogolekobong yena o tla phela.

₂₈Moloki o nagana pele a fetola,

yo kgopo yena o kgabakgaba tše mpe ka ganong.

₂₉Morena o katologa bakgopo,

baloki bona o kwa thapelo tša bona.

₃₀Motho o thabišwa ke go edišetšwa sefahlego;

taba tše dibotse di mo tiiša moko.

₃₁Moamogelatsholo o dula le ba bohlale.

₃₂Maganagokgalwa ke moipolai,

moamogelatsholo yena o okeletšwa kwešišo.

₃₃Go boifa Morena ke go ithuta bohlale;

pele motho a ka hlompšha o swanetše go ikokobetša.

₁Motho a ka no ba le maikemišetšo,

fela molaodi wa tše di tlago hlaga ke Morena.

₂Motho a ka no gopola gore tšohle tše a di dirago di lokile,

kganthe yo a elago maikemišetšo ke Morena.

₃Gafela Morena tše o di dirago,

gomme o tla atlega mererong ya gago.

₄Dilo tšohle di na le se Morena a di hloletšego sona,

le bakgopo ba hloletšwe tšatši la masetlapelo.

₅Morena o šišingwa moikgogomoši,

ruri, yo mobjalo a ka se phonyokge kotlo.

₆Motho o swarelwa dibe ka go rata Morena le go mmotegela;

ka go mmoifa motho o phema bobe.

₇Ge motho a phela ka go kgahla Morena,

Morena o mo phediša le manaba a gagwe ka khutšo.

₈Bonnyane o bo hwetšago ka toka

bo phala bontši o bo hwetšago ka boradia.

₉Motho a ka itherela boyo,

fela ke Morena yo a mo etetšago.

₁₀Kgoši e bolela ka maatla a go tšwa go Modimo;

tša gagwe dikahlolo di lokile.

₁₁Morena o nyaka ge go šomišwa kelo ya nnete;

ke yena a beago seroto.

₁₂Magoši a šišingwa ditiro tše mpe,

gobane toka ke yona e tiišago mmušo.

₁₃Mokgahlakgoši ke mmolelatherešo;

moratwakekgoši ke wa polelo tše di lokilego.

₁₄Kgalefo ya kgoši e ka hlola lehu;

yo bohlale o a e tima.

₁₅Botho bja kgoši bjona bo a phediša,

bo bjalo ka maru, manešapulayatsheola.

₁₆Go huma ka bohlale go phala go huma ka gauta;

go ba le kwešišo go phala go ba le silibera.

₁₇Baloki ba phela ka go šikologa bobe;

yo a itotago maitshwarong o tla phela.

₁₈Boikgogomošo bo iša motho tahlegong;

boikgodišo bo feleletša ka go wiša motho.

₁₉Go ikokobetša le baikokobetši

go phala go abelana phahlanahlakola le baikgogomoši.

₂₀Mošetšakeletšo o a atlega;

go lehlogonolo yo a tshephago Morena.

₂₁Motho yo bohlale re ra wa kwešišo;

mmoledi wa sethakga ke wa go kgodiša batho.

₂₂Tlhaologanyo e kgontšha mohlaologanyi go ipshina ka bophelo;

mašilo a bolawa ke bošilo bja ona.

₂₃Yo bohlale o nagana pele a bolela;

ka gona polelo ya gagwe e a kgodiša.

₂₄Polelo tše bose di swana le mamapo a dinose –

a a natefago ka ganong,

gape a fepago mmele.

₂₅Go na le tsela ye e bonalago nke e lokile,

fela mafelelong e iša lehung.

₂₆Diyamaleng di hlohleletša mošomi go šoma,

gobane o šomišwa ke tlala.

₂₇Senokwane se loga maanomabe;

ganong se tshwa polelo tše di fišago boka mollo.

₂₈Moradia o hlola phapano;

wa lesebo o lweša bagwera ba go ntšhana sa inong.

₂₉Ntwadumela o goketša batho,

a ba tšeiša ka tsela tša go se loke.

₃₀Motho wa go budulala o nagana bomenemene;

sepetlamelomo o rera bobe.

₃₁Moriri wo mošweu ke seala,

ke moputso wa ba ba phelago ka go loka.

₃₂Motho wa pelotelele o phala mogale;

wa go se tshelwe ke pelo o phala wa go thopa motse.

₃₃Batho ba ka no dira matengwa,

eupša sephetho se tšewa ke Morena.