To The Word – Day 155

₁Tše ke ditaba tša Nehemia, morwa wa Hakalia.

Ka kgwedi ya Kislebe, ngwageng wa masome a mabedi wa ge Artazerksese e le kgoši ya Persia, nna, Nehemia, ke be ke le Susa, motsengmošate. ₂Hanani, yo mongwe wa bomorwarre, a tla le banna ba bangwe ba etšwa Juda, gomme ka ba botšiša ka Jerusalema le ka Bajuda ba gaborena ba ba bego ba boile bothopša Babilonia. ₃Ba mpotša gore mašaledi ao a boetšego nageng ya bona a phela ka bothata kudu, le gore batho ba šele ba ba agišanego le bona ba a ba nyatša. Ba ile ba mpotša le gore merako ya Jerusalema a kgeregile, le gore masoro a tšhumilwe. ₄Ge ke ekwa tšeo ka dula fase ka lla.

Ka tšea matšatši ke nyamile, ke sa je selo. Ka rapela Modimo ka re: ₅“Joo, Morena Modimo wa legodimo, o yo mogolo, o a boifega! O botegela kgwerano ya gago le bao ba go ratago gape ba phethago ditaelo tša gago. ₆Ntebelele, Morena, gomme o theeletše thapelo ya ka ge ke rapelela bahlanka ba gago, Baisraele, bošego le mosegare. Ke ipolela gore rena setšhaba sa Israele re dirile dibe. Le nna le bešo re dirile dibe. ₇Re go phošeditše kudu, gomme ga se ra phetha melao le ditaelo tše o re filego tšona ka Moshe, mohlanka wa gago. ₈Bjale gopola se o kilego wa se botša Moshe wa re: ‘Ge lena setšhaba sa Israele le sa mpotegele ke tla le gašanya le ditšhaba. ₉Eupša ge le ka sokologela go nna gomme la dira tše ke le laetšego tšona, ke tla le kgoboketša ka le bušetša moo ke go kgethilego gore ke khunamelwe gona, le ge le gašane go fihla mafelelong a lefase.’

₁₀“Morena, ba ke bahlanka ba gago, ke setšhaba sa gago se o se hlakodišitšego ka maatla a gago a magolo le bonatla. ₁₁Hle, nke o theeletše thapelo ya ka le dithapelo tša bahlanka ba gago bohle bao ba ratago go go boifa. Nke o nkatle lehono gomme o dire gore kgoši e be yo botho go nna.”

Mehleng yeo ke be ke le wa go fa kgoši beine.

₁Ka le lengwe la matšatši ge go šetše go fetile dikgwedi tše nne, ka kgwedi ya Nisane, ya re ge Kgoši Artazerksese a le dijong, ka mo išetša beine. O be a se a ka a mpona ke nyamile, ₂ka gona a mpotšiša a re: “Ke ka lebaka lang o nyamile? Ga o lwale; ka gona o swanetše go ba o tshwentšwe ke se sengwe.”

Ke ile ka tšhoga, ₃ka mo fetola ka re: “Kgoši o re phelele go ya go ile! Nka se nyame bjang ge motse wo go wona go bolokilwego borakgolokhukhu ba ka e le marope, le masoro a wona a swele thokgethokge?”

₄Kgoši a mpotšiša a re: “Bjale o kgopelang?”

Ka rapela Modimo wa legodimo, ₅gomme ka napa ka re go kgoši: “Ge ke go kgahla, kgoši, gomme o dumela se ke se kgopelago, ntumelele ke ye nageng ya Juda, motseng woo go wona go bolokilwego borakgolokhukhu ba ka, gore ke yo o tsošološa.”

₆Kgoši a mpotšiša mohumagadi a dutše le yena a re: “O tla tšea nako ye kaakang o ile, gomme wa boa neng?” Ge ke seno mmotša a dumela.

₇Ke moka ka mo kgopela gore ge a dumela a mphe mangwalo a ke tlago a iša go babušiši ba selete sa Yufratese-Bodikela, ao a ba laelago gore ba ntumelele go ya nageng ya Juda. ₈Ka ba ka kgopela le lengwalo la go ya go Asafo, mohlokomedi wa sethokgwa sa mošate, la go mo laela gore a mphe dikota tša masoro a sebo sa Tempele, le tša merako ya motse, le tša ntlo yeo ke bego ke tla dula ka go yona. Kgoši a mpha tšohle tše ke ilego ka di kgopela, ka gore Modimo o be a na le nna.

₉Kgoši a roma balaodi ba madira le banamedi ba dipere gore ba ye le nna, mme ka napa ka wela tsela ya go ya Yufratese-Bodikela. Ge ke fihla moo ka nea babušiši mangwalo a go tšwa go kgoši. ₁₀Eupša Sanbalate, wa motse wa Bethe-Horone, le Tobia, mohlankedi wa selete sa Amone, ba kwa gore go tlile motho yo mongwe go tlo hola setšhaba sa Israele, gomme ba befelwa kudu.

₁₁Ge ke fihla Jerusalema ka tšea matšatši a mararo ₁₂ke sa botše motho se Modimo a ntutueditšego gore ke se direle motse woo. Bošego ka tsoga ka tloga le banna ba se bakae. Seruiwa se re ilego ra tloga naso e be e le fela pokolo ye ke bego ke e nametše. ₁₃E be e sa le bošego ge ke etšwa motseng ka Lesoro la Moeding ke feta Mothopong wa Mamokebe ke leba Lesorong la Sethobolong, ka tšama ke lebeledišiša merako ye e kgerešitšwego ya motse le masoro a a swelego. ₁₄Ka fetela Lesorong la Mothopong le Mogobeng wa Kgoši. Pokolo yeo ke bego ke e nametše ya thibelwa ke thogorogo, ₁₅ka fao ka rotoga ka moedi wa Kidrone, ke tšama ke lekola morako. Ke moka ka boela motseng, gomme ka tsena ka Lesoro la Moeding.

₁₆Bahlankedi ba moo ba be ba sa tsebe gore ke be ke ile kae, le gore ke be ke ile go dira eng. Ke be ke sešo ka botša Bajuda ba gešo selo – baprista, bakgomana, bahlankedi, goba mang le mang yo a bego a tlilo thuša modirong. ₁₇Bjale ya ba gona ke ba botšago ke re: “Bonang mathata a re lego mo go ona ka ge motse wa Jerusalema e le marope, le masoro a wona a swele! A re tsošološeng merako ya motse gomme re ikhutšeng go goboga.” ₁₈Ke ile ka ba botša le ka moo Modimo a bilego le nna ka gona, le seo kgoši a mpoditšego sona.

Bona ba mphetola ba re: “A re thomeng go aga!” Ba napa ba ipeakanyetša modiro woo wo mobotse.

₁₉Ge Sanbalate le Tobia gotee le Moarabia yo a bego a bitšwa Gesheme ba ekwa seo re ikemišeditšego go se dira, ba re nyefola ba re kwera ba re: “Ke eng se le se dirago? Kgane le rata go tsogela kgoši maatla?”

₂₀Ka ba fetola ka re: “Modimo wa legodimo o tla re atla. Rena, bahlanka ba gagwe, re yo thoma go aga. Ga go se e lego sa lena fa Jerusalema, ga go buše lena felo fa, ebile ga se marope a lena.”

₁Eliashibe, Moprista yo Mogolo, gotee le baprista ba gabo ba ile ba tsošološa Lesoro la Dihuswane, ba le kgakola ka go le šegofatša, gomme ba le tsenya ditswalelo. Ba kgakola morako go fihla Toreng ya Lekgolo le Toreng ya Hananele ka tirelo.

₂Banna ba Jeriko ba aga karolo ye e latelago yeo.

Sakure, morwa wa Imri, a aga karolo ye e latelago ya banna ba Jeriko.

₃Ba kgorwana ya Senaa ba aga Lesoro la Dihlapi. Ba hloma dikota tša lona gomme ba le tsenya ditswalelo, ba le direla mapheko le mašoba a ona.

₄Meremote, morwa wa Uria, setlogolo sa Kotse, a aga karolo ye e latelago.

Meshulamo, morwa wa Berekia, setlogolo sa Meshesabele, a aga karolo ye e latelago ya Meremote.

Tsadoko, morwa wa Baana, a aga karolo ye e latelago ya Meshulamo.

₅Banna ba Tekoa ba aga karolo ye e latelago ya Tsadoko, fela baetapele ba motse ba gana go dira mošomo woo wo boima ba bego ba o filwe ke bahlokomedi.

₆Joyada, morwa wa Paseage, le Meshulamo, morwa wa Besodia, ba tsošološa Lesoro le Letala. Ba hloma dikota tša lona gomme ba le tsenya ditswalelo, ba di direla mapheko le mašoba a ona.

₇Melatia wa Gibeone le Jadone wa Meronote le banna ba bangwe ba Gibeone le ba Mitsepa ba tsošološa karolo ye e latelago ya bona, go yo fihla ntlong ya mmušiši wa Yufratese-Bodikela.

₈Usiele, morwa wa Harahaya, yo e bego e le morudi wa gauta, a aga karolo ye e latelago ya bona.

Hanania, yo e bego e le modiri wa ditlolo tša go nkga bose, a aga karolo ye e latelago ya Usiele, a e tsošološa go yo fihla Morakong wa Phaphathi.

₉Refaya, morwa wa Hure, yo e bego e le mmušiši wa seripagare sa selete sa Jerusalema, a aga karolo ye e latelago ya Hanania.

₁₀Jedaya, morwa wa Harumafo, a aga karolo ye e lego kgauswi le ntlo ya gagwe.

Hatushe, morwa wa Hashabnea, a aga karolo ye e latelago ya Jedaya.

₁₁Malkia, morwa wa Harime, le Hashube, morwa wa Pahate-Moaba, ba aga karolo ye e latelago ya Hatushe gotee le Tora ya Dionto.

₁₂Shalume, morwa wa Loheshe, mmušiši wa karolo ye nngwe ya selete sa Jerusalema, a aga karolo ye e latelago ya bona. Barwedi ba gagwe ba ile ba mo thuša mošomong woo.

₁₃Hanune le batho ba motse wa Sanoage ba tsošološa Lesoro la Moeding. Ba le tsenya ditswalelo, ba di direla mapheko le mašoba a ona, gomme ba tsoša morako botelele bja dimetara tše makgolo a mane le masome a a selelago go yo fihla Lesorong la Sethobolong.

₁₄Malkia, morwa wa Rekabe, mmušiši wa Bethe-Kereme, a tsošološa Lesoro la Sethobolong. A le tsenya ditswalelo, gomme ba di direla mapheko le mašoba a ona.

₁₅Shalume, morwa wa Kolohose, mmušiši wa selete sa Mitsepa, a tsošološa Lesoro la Mothopong. A le direla tlhaka, a le tsenya ditswalelo, gomme a di direla mapheko le mašoba a ona. Mogobeng wa Mokero a aga morako kgauswi le serapa sa mošate, go yo fihla magatong a a theogago a tloga motseng wa Dafida.

₁₆Nehemia, morwa wa Asbuke, mmušiši wa seripagare sa selete sa Bethe-Tsure, a aga karolo ye e latelago ya Shalume go yo fihla go lebana le mabitla a ba lapa la Dafida, le go yo fihla mogobeng le ntlong ya bahlabani.

₁₇Balefi ba ba ilego ba tsošološa dikarolo tša morako šeba:

Rehume, morwa wa Bani, o ile a aga karolo ye e latelago ya Nehemia;

Hashabia, mmušiši wa seripagare sa selete sa Keila, a agela batho ba gagwe karolo ye e latelago ya Rehume;

₁₈Binui, morwa wa Henadade, mmušiši wa seripagare sa bobedi sa selete sa Keila, a aga karolo ye e latelago ya Hashabia;

₁₉Esere, morwa wa Jeshua, mmušiši wa Mitsepa, a aga karolo ye e latelago ya Binui go lebana le morotoga wa go ya bobolokelong bja dibetša, go yo fihla sekhutlong sa morako;

₂₀Baruke, morwa wa Sabai, a aga karolo ye e latelago ya Esere, go yo fihla seferong sa lapa la Eliashibe, Moprista yo Mogolo;

₂₁Meremote, morwa wa Uria, setlogolo sa Kotse, a aga karolo ye e latelago ya Baruke, go yo fihla ka mafelelong a ntlo ya Eliashibe.

₂₂Baprista ba ba ilego ba tsošološa dikarolo tše di latelago tša morako šeba:

Baprista ba tikologong ya Jerusalema ba ile ba aga karolo ye e latelago ya Meremote;

₂₃Benjamene le Hashube ba aga karolo ye e latelago ya baprista, ye e bego e le go lebana le ntlo ya bona;

Asaria, morwa wa Maasea, setlogolo sa Anania, a aga karolo ye e latelago ya Benjamene le Hashube, ye e bego e le go lebana le ntlo ya gagwe;

₂₄Binui, morwa wa Henadade, a aga karolo ye e latelago ya Asaria, go tloga ntlong ya Asaria go yo fihla sekhutlong sa morako;

_25-26Palale, morwa wa Usai, a aga karolo ye e latelago ya Binui, go thoma sekhutlong sa morako le toreng ya ntlo ya ka godimo ya kgoši kgauswi le kgoro ya baleti;

Pedaya, morwa wa Paroshe, a aga karolo ye e latelago ya Palale, go yo fihla ka bohlabela, go lebana le Lesoro la Meetse le tora ye telele go feta meago ye mengwe. Karolo ye e be e le kgauswi le karolo yela ya motse e bego e bitšwa Ofele, mola go bego go dula bašomi ba ka Tempeleng.

₂₇Banna ba Tekoa ba aga karolo ye e latelago ya Pedaya, ya ba ya bobedi ya bona, go tloga go lebana le tora yela ya go feta meago ye mengwe go yo fihla morakong wa Ofele.

₂₈Baprista ba bangwe ba aga karolo ye e latelago ya banna ba Tekoa, go tloga Lesorong la Dipere go ya leboa, yo mongwe le yo mongwe a aga go lebana le ntlo ya gagwe.

₂₉Tsadoko, morwa wa Imere, a aga karolo ye e latelago ya bona, ye e bego e lebane le ntlo ya gagwe.

Shemaya, morwa wa Shekania, yena moleti wa Lesoro la ka Bohlabela, a aga karolo ye e latelago ya Tsadoko.

₃₀Hanania, morwa wa Shelemia, le Hanune, morwa wa boselela wa Tsalafo, ba aga karolo ye e latelago ya Shemaya, ya ba ya bobedi ya bona.

Meshulamo, morwa wa Berekia, a aga karolo ye e latelago ya bona go lebana le phapoši ya gagwe.

₃₁Malkia, morudi wa gauta, a aga karolo ye e latelago ya Meshulamo go yo fihla ntlong yela ya bašomi ba Tempeleng le babapatši; yona e be e lebane le Lesoro la Kgobokanyo ya Bahlabani, le go yo fihla phapošing ye e bego e le godimo ga sekhutlo sa morako.

₃₂Barudi ba gauta le babapatši bona ba aga karolo ya mafelelo, go tloga phapošing yela ya sekhutlong go yo fihla Lesorong la Dihuswane.

₁Ge Sanbalate a ekwa gore rena Bajuda re thomile go tsošološa morako, a tlala pelo a galefa, gomme a re kwera. ₂A bolela pele ga bagwera ba gagwe le madira a Basamaria a re: “Etse Majudanyana a a re a dirang? Na a ikemišeditše go tsošološa motse wo? Kgane a gopola gore ka go dira dihlabelo a ka fetša mošomo wo ka letšatši le tee? Kgane ba ka tšošološa maswika a go aga thogorogong ye e tšhumilwego?”

₃Tobia o be a eme gona moo kgauswi le yena, gomme a mo tlatša a re: “Se ba ka se agago le phukubje e ka se kgereša.”

₄Ka rapela ka re: “Jonna, Modimo wa rena, ekwa ka moo ba re kwerago ka gona. A dikwero tšeo di boele go bona. A ba hlakolwe tšohle tše ba nago le tšona, ba be ba išwe bothopša nageng e šele. ₅O se ke wa phumola molato wa bona, o se ke wa ba lebalela sebe sa bona, ka gobane ba rogile rena bao re agago.”

₆Fela rena ra no tšwela pele le go tsošološa morako, gomme go se gwa ya kae ra be re agile go fihla bogareng bja bogodimo bja wona, ka gore batho ba be ba šoma ka dipelo tša bona ka moka.

₇Eupša Sanbalate le Tobia le batho ba Arabia le ba Amone le ba Ashdode ba kwa gore re šetše re tšwele tema ge re tsošološa morako wa Jerusalema, le gore mo go kgeregilego go a thibja, gomme ba tlala pelo kudu. ₈Ka gona ka moka ga bona ba lakana go tlo hlasela Jerusalema le go ferekanya batho, ₉eupša rena ra rapela Modimo wa rena, gomme ra bea banna gore ba lete motse bošego le mosegare.

₁₀Bajuda ba be ba hlamile kopelo ba e opela ba re:

₁₁Manaba a rena a be a gopola gore re ka se a bone goba ra tseba se a se dirago go fihlela ge a re hlasela, a re bolaya mme a emiša mošomo wa rena. ₁₂Bajuda ba ba bego ba agile le manaba a rena ba be ba fela ba etšwa mafelong a a fapafapanego ba tlilo re botša gore re boele go bona. ₁₃Eupša nna ka neela setšhaba sa gešo ditšhoša le marumo le mesebe, gomme ka ba bea ka dikgorwana ka morago ga morako, ba iphihlile moo morako o bego o sešo wa fela.

₁₄Ke ile ka bona gore setšhaba se tshwenyegile, ka gona ka se botša le bakgomana le bahlankedi ba sona ka re: “Le se ke la boifa manaba a rena. Gopolang gore Morena ke yo mogolo, gomme le hlabanele batho ba gabolena le bana ba lena le basadi ba lena le magae a lena.” ₁₅Manaba a rena a ile a kwa gore re lemogile maano ao ba bego ba a loga, gomme ba tseba gore Modimo o sentše morero woo wa bona. Ka moka ga rena ra napa ra boela morakong, yo mongwe le yo mongwe a ya modirong wa gagwe.

₁₆Go tloga mohlang woo sekgao se sengwe sa banna ba ka sa šoma, mola se sengwe se itlhamile ka marumo le dikotse le mesebe se apere diaparo tša ntwa. Baetapele ba rena ba be ba kwana le batho ₁₇ba ba agago morako. Ba ba bego ba rwala dikago ba be ba šoma ka letsogo le lengwe, ka le lengwe ba swara letsolo, ₁₈gomme bohle ba ba bego ba aga ba be ba tlemeletše ditšhoša mathekeng. Monna yo a bego a swanetše go hlabela batho mokgoši ka phalafala o be a ema kgauswi le nna. ₁₉Ke ile ka botša setšhaba le bakgomana le baetapele ka re: “Mošomo ke o mogolo mme o nabile mo e lego gore re arogane kudu mo morakong. ₂₀Mo le kwago phalafala e lla le re phalalele. Modimo wa rena o tla re lwela.” ₂₁Ka lebaka leo tšatši le lengwe le le lengwe, go tloga ka masa go fihlela bošego ge dinaledi di bonala, sekgao se sengwe sa rena se be se šoma morakong, mola se sengwe se letile ka marumo.

₂₂Ka nako yeo ka botša setšhaba gore mookamedi yo mongwe le yo mongwe wa bona gotee le mothuši wa gagwe ba robale Jerusalema, gore ba lale ba re letile bošego gomme mosegare ba hlwe ba šoma. ₂₃Le bošego nna le meloko yešo le bahlanka ba ka le bao ba bego ba dula ba ntetile re be re sa apole diaparo. Bohle re be re dula re swere dibetša tša rena.

₁Ka nako ye nngwe banna le basadi ba bantši ba setšhaba ba kile ba ngongoregela Bajuda ba gabobona. ₂Ba bangwe ba re: “Re atetšwe ke thari, re nyaka mabele gore re je, re phele.”

₃Ba bangwe ba re: “Re ile ra tlemega go beeletša mabele ka mašemo a rena le dirapa tša rena tša merara le dintlo tša rena gore re se bolawe ke tlala.”

₄Ba bangwe le bona ba re: “Re ile ra gapeletšega go adima tšhelete gore re tle re ntšhetše mašemo a rena le dirapa tša rena tša merara motšhelo wa mošate. ₅Re batho ba tee le Bajuda ba gaborena. Kgane bana ba rena ga ba swane le ba bona? Eupša rena ba rena re tlemegile go ba dira makgoba. Barwedi ba rena ba bangwe ba šetše ba rekišitšwe ya ba makgoba. Gomme re a hlaka ka gore mašemo a rena le dirapa tša rena tša merara e šetše e le tša ba bangwe.”

₆Ge ke ekwa dillo tšeo tša bona ka befelwa kudu, ₇gomme ka lebeledišiša taba yeo gabotse, ka omanya bakgomana le bahlankedi ba setšhaba ka re go bona: “Le jeletša batho ba gabolena!”

Ka ba rapela pitšo ye kgolo ₈ka re: “Re lekile ka mo re ka kgonago ka gona go rekolla batho ba gabolena ba Bajuda bao ba bego ba ithekišitše ditšhabeng di šele. Bjale le gapeletša batho ba gabolena gore ba ithekiše, gore le bona re tle re ba rekolle!” Bakgomana ba homola ba hloka se ba ka se bolelago.

₉Ke moka ka re: “Se le se dirago ga se botse! Le swanetše go boifa Modimo le dire tše di lokilego. Ke mo le ka se kego la re segiša baditšhaba, manaba a rena. ₁₀Nna ka noši le meloko yešo le bahlanka ba ka re adimile batho tšhelete le mabele. Bjale a re se ke ra nyaka gore ba buše tše ba di adimilego go rena. ₁₁Phumolang melato ya bona – tšhelete goba mabele goba beine goba makhura a mohlware – le be le ba bušetše ka bjako mašemo a bona le dirapa tša bona tša merara le tša mehlware le dintlo tša bona!”

₁₂Bakgomana ba mphetola ba re: “Re tla dira ka moo o bolelago ka gona. Re tla bušetša dilo tšeo, le gona re ka se ba seke tše ba di adimilego.”

Ka napa ka bitša baprista, gomme ka eniša bakgomana mo pele ga bona gore ba tla phetha taba yeo. ₁₃Ke moo ke hlohlorilego lepanta la ka la lešela, ka re: “Ke ka mokgwa wo Modimo a tlago hlohlora yo mongwe le yo mongwe wa lena yo a ka se phethego se a ennego gore o tla se dira. Modimo o tla mo amoga ntlo ya gagwe le tšohle tše a nago le tšona, a mo tlogela a se ne selo.”

Bohle ba ba bego ba le fao ba mphetola ba re: “Amene!” gomme ba tumiša Morena. Bakgomana ba phetha se ba se holofeditšego.

₁₄Mengwageng yohle ye lesome le ye mebedi ya ge ke be ke le mmušiši wa naga ya Juda, go tloga ka ngwaga wa masome a mabedi wa ge Artazerksese e le kgoši go fihlela ka ngwaga wa gagwe wa masome a mararo le metšo ye meraro, nna le meloko yešo ga se ra ka ra ja dijo tše di fiwago babušiši. ₁₅Babušiši ba ba bilego gona pele ga ka ba be ba imetša batho gomme ba ba ntšhiša dipapetlana tša silibera tše masome a mane ka letšatši, e le tša dijo le beine. Ešita le bahlankedi ba bona ba be ba gatelela batho. Eupša nna ga se ka ba gatelela, ka gobane ke be ke boifa Modimo. ₁₆Ke be ke tloga ke ikgafetše go tsošološa morako, gomme ka se ithekele le seripa se sengwenyana sa naga. Bahlanka ba ka ka moka ba be ba nthuša moo mošomong woo. ₁₇Bajuda ba lekgolo le ba masome a mahlano le bahlankedi ba bona ba be ba fela ba eja le nna, ke sa bale ba ba bego ba nketela ba etšwa ditšhabeng tše di bego di bapile le rena. ₁₈Tšatši le lengwe le le lengwe ke be ke hlaba kgomo le dinku tše di nonnego tše di selelago le dikgogo tše dintši, gomme ka tšatši le lengwe le le lengwe la lesome ke be ke efa batho dibeine tše ntši tša mehutahuta. Eupša ke be ke tseba ka moo setšhaba se bego se imelwa ka gona, ka gona ka se ke ka ntšhiša batho motšhelo wo o ntšhetšwago babušiši.

₁₉Ke a go rapela hle, Modimo, o ntebelele ka botho ka lebaka la tšohle tše ke di diretšego setšhaba se.

₁Sanbalate le Tobia le Gesheme, Moarabia, le manaba a rena a mangwe ba kwa gore re feditše morako, le gore ga o sa ne dikgala, le ge mamati a masoro ona re be re sešo ra a tsenya. ₂Ka gona Sanbalate le Gesheme ba nthomela motseta ba re ke tle ke gahlane nabo motseng wo mongwe kwa molaleng wa Ono. Ke ka moo ba bego ba nyaka go ntira bobe ka gona. ₃Nna ka roma batseta gore ba ba botše ba re: “Ke dira mošomo wo mogolo gomme nka se kgone go theogela moo. Nka se emiše mošomo gore ke tlo gahlana le lena.”

₄Ba ile ba nthomela motseta ka mokgwa wo makga a mane, gomme nna nako le nako ke ba fetola ka mokgwa wo o swanago.

₅Ke moo Sanbalate a romilego mohlanka wa gagwe lekga la bohlano ka yona taba yela. Ka lekga le o be a swere le lengwalo le le sego la tswalelwa. ₆Lona le be le re:

₈Ke ile ka mo fetola ka re: “Ditaba tše o di bolelago le gatee ga se nnete. Tšohle ke tše o ithometšego tšona.”

₉Gape ba be ba leka go re tšhošetša gore re lese mošomo. Nna ka rapela ka re: “Bjale hle, Modimo, ntiiše!”

₁₀Ke ile ka yo etela Shemaya, morwa wa Delaya, setlogolo sa Mehetabele, yo a bego a ganetšwa go tloga lapeng la gagwe. Yena a re go nna:

₁₁Nna ka mo fetola ka re: “Na motho yo a swanago le nna a ka tšhaba? A ka khuta ka Tempeleng gore a phologe? Yeo taba nka se e dire.”

₁₂Ke ile ka lemoga gore Shemaya o be a se a laelwa ke Modimo, eupša a rekilwe ke Tobia le Sanbalate gore a tle a ntshebele taba ye ka mokgwa woo. ₁₃Ba be ba mo rekile gore a tle a ntšhošetše ke dire sebe, gore ba tle ba kgone go ntshenya leina gomme ba nkgoboše.

₁₄Ka rapela ka re: “Hle, Modimo, o se ke wa lebala tše Tobia le Sanbalate ba di dirilego, gomme o ba otle. Gopola le moprofeta yola wa mosadi, Noadia, le baprofeta bale ba bangwe ba go leka go ntšhošetša.”

₁₅Morako ka moka o ile wa phethwa ka morago ga matšatši a masome a mahlano le a mabedi, ka letšatši la masome a mabedi le metšo ye mehlano la kgwedi ya Elulo. ₁₆Ya re ge manaba a rena ohle a ekwa taba yeo, le ditšhaba ka moka tše di bapilego le rena di bona gore modiro o phethilwe, tša lewa ke dihlong kudu, ka gobane di ile tša lemoga gore mošomo woo o dirilwe ka thušo ya Modimo.

₁₇Nakong yeo ka moka bakgomana ba Bajuda ba be ba fela ba ngwalelana le Tobia. ₁₈Batho ba bantši nageng ya Juda ba be ba kwana naye kudu ka lebaka la gore ratswalagwe, Shekania, morwa wa Ara, e be e le Mojuda. Godimo ga moo, morwa wa gagwe, Johanane, o be a nyetše morwedi wa Meshulamo. Meshulamo e be e le morwa wa Berekia. ₁₉Batho ba be ba fela ba bolela pele ga ka ka dilo tše dibotse tše Tobia a bego a di dirile, le gona ba mmotša tšohle tše ke di boletšego. Gomme Tobia a fela a nngwalela a leka go ntšhošetša.

₁E rile ge morako o šetše o tsošološitšwe ka tsenya ditswalelo masorong, gomme baleti ba masoro a dikgoro tša Tempele le baopedi ba ka Tempeleng le Balefi ba bangwe ba bewa medirong ya bona. ₂Ke ile ka bea morwarre, Hanani, le Hanania, molaodi yo mogolo wa sebo, gore ba laole motse wa Jerusalema. Hanania e be e le monna wa go tshephega, wa go boifa Modimo go feta ba bantši. ₃Ka ba laya gore mesong masoro a Jerusalema a se ke a bulwa go fihlela ge go šetše go ruthetše, le gore a tswalelwe a kgonywe pele ga ge baleti ba tšhaiša modirong. Ka ba laya le gore ba kgethe baleti gare ga batho ba Jerusalema, baleti bao ba lete mafelong ao go letwago motse go ona, le gore ba bangwe ba lete pele ga dintlo tša bona.

₄Jerusalema e be e le motse wo mogolo wo o ikadilego, eupša go se batho ba bantši ba ba dulago go wona, le gona go sešo gwa tsošološwa dintlo tše dintši. ₅Modimo a ntutuetša gore ke kgobokanye setšhaba le bakgomana ba sona le bahlankedi, gomme ke lebeledišiše ka dipukung tše go tšona go ngwadilwego malapa. Ke ile ka hwetša lengwalo leo go lona go bego go ngwadilwe bale ba go boa bothopša pele. Tše di bego di ngwadilwe ka lengwalong leo ke tša go re:

₆Mathopša a mantši a ile a tloga seleteng sa Babilone a boela Jerusalema le nageng ya Juda, yo mongwe le yo mongwe a ya motseng wa gabo. Ba malapa a bona ba be ba dutše Babilonia go tloga mola Kgoši Nebukadnesare a ba thopago. _7-25Baetapele ba bona e be e le Serubabele, Jeshua, Nehemia, Asaria, Raamia, Nahamani, Mordekai, Bilshane, Misperete, Bigbai, Nehume le Baana.

Šedi dikgorwana tša Israele le palo ya bao ba ilego ba boa bothopša kgorwaneng ye nngwe le ye nngwe:

₆₀Ditlogolo ka moka tša bašomi ba ka Tempeleng le tša bahlanka ba Solomone tše di ilego tša boa bothopša e be e le tše makgolo a mararo le masome a senyane le metšo ye mebedi.

_61-62Ba makgolo a a selelago le masome a mane le metšo ye mebedi e be e le ba dikgorwana tša Delaya, Tobia le Nekoda, gomme ba be ba tlogile motseng wa Tele-Melage le wa Tele-Harsha le wa Kerube le wa Adone le wa Imere; eupša ba be ba se ne bohlatse bja gore ke ditlogolo tša Baisraele.

_63-64Ba dikgorwana tše di latelago tša baprista ba ile ba hloka maina a borakgolokhukhu ba bona lenaneong le le ngwadilwego la malapa: Habaya, Kotse le Barsilai. Rakgolokhukhu wa kgorwana ya baprista ya Barsilai o be a nyetše mosadi wa kgorwana ya Barsilai wa Gileade, gomme a bitšwa ka leina la kgorwana ya boratswalagwe. Ka ge ba be sa kgone go laetša gore borakgolokhukhu ba bona ke bomang, ba ile ba se ke ba amogelwa bopristeng. ₆₅Mmušiši wa Bajuda o ile a ba botša gore ba se ke ba ja dijo tše di abetšwego Modimo go fihlela go eba le moprista yo a ka šomišago Urime le Tumime.

_66-69Mathopša ka moka ao a ilego a boa e be e le a dikete tše masome a mane le tše pedi le makgolo a mararo le masome a a selelago.

_70-72Batho ba ba ilego ba thuša go tsošološa Tempele ka dimpho šeba:

₇₃Baprista le Balefi le baleti ba masoro a Tempele le baopedi le batho ba bangwe ba setšhaba le bašomi ba ka Tempeleng – batho ka moka ba Israele – ba ile ba dula metseng le metsaneng ya Juda.