To The Word – Day 153

₁Ka morago ga mengwaga ye mentši Artazerksese e ile ya ba kgoši ya Persia. Mehleng ya gagwe gwa ba le monna yo mongwe yo a bitšwago Esra. Yena o be a latišiša borakgolokhukhu ba gagwe go yo fihla ka Arone, Moprista yo Mogolo, ka mokgwa wo o latelago: Esra e be e le morwa wa Seraya, Seraya morwa wa Asaria, Asaria morwa wa Hilkia, ₂Hilkia morwa wa Shalume, Shalume morwa wa Tsadoko, Tsadoko morwa wa Ahitube, ₃Ahitube morwa wa Amaria, Amaria morwa wa Asaria, Asaria morwa wa Merayote, ₄Merayote morwa wa Seragia, Seragia morwa wa Usi, Usi morwa wa Buki, ₅Buki morwa wa Abishua, Abishua morwa wa Finease, Finease morwa wa Eleasara, Eleasara morwa wa Arone.

_6-7Esra e be e le serutegi se segolo sa melao ye Morena Modimo wa Israele a bego a e file Moshe. Ka ge Esra a be a šegofaditšwe ke Morena Modimo wa gagwe, kgoši o be a mo fa tšohle tše a bego a mo kgopela tšona. Ya re ka ngwaga wa bošupa wa pušo ya Artazerksese, Esra a tloga Babilonia a leba Jerusalema a na le sehlopha sa Baisraele. Sehlopha seo se be se na le baprista le Balefi le baopedi ba ka Tempeleng le baleti ba masoro a Tempele le bašomi ba ka Tempeleng. _8-9Ba tloga Babilonia ka letšatši la pele la kgwedi ya mathomo, gomme ba fihla Jerusalema ka letšatši la pele la kgwedi ya bohlano, ka gobane Modimo o be a na le yena. ₁₀Esra o be a ikgafetše go ithuta melao ya Morena le go ruta setšhaba sa Israele ditaelo le melawana ya yona.

₁₁Artazerksese o ile a fa Esra, moprista, serutegi se segolo sa melao le ditaelo tše Morena a bego a di file Israele, lengwalo. Lona le be le re:

₂₇Esra a re: “A go retwe Morena, Modimo wa borakgolokhukhu ba rena! O dirile gore kgoši a ikemišetše go hlompha Tempele ya Morena kua Jerusalema ka mokgwa wo mobjalo. ₂₈Modimo o dirile gore kgoši le baeletši ba gagwe le bahlankedi bohle ba maatla ba ntebelele ka botho; Morena Modimo wa ka o ntšhegofaditše gomme a mpha maatla a go kgobokanya mantona a dikgorwana a Israele gore a boele le nna morago.”

₁Šea mantona a dikgorwana le ba mašika a bona ba ba bego ba le bothopša kua Babilonia ba ba ilego ba boela Jerusalema gammogo le Esra mehleng ya ge Artazerksese e le kgoši:

₁₅Ke ile ka bokanya sehlopha seo kgauswi le mokero wo o elelago motseng wa Ahaba, gomme ra hloma mešaša, ra dula moo matšatši a mararo. Ka bona gore sehlopheng seo go na le baprista, eupša ga go na Balefi. ₁₆Ka bitša baetapele ba: Eliesere, Ariele, Shemaya, Elnathane, Jaribe, Elnathane, Nathane, Sakaria le Meshulamo, gammogo le morutiši Joyaribe le morutiši Elnathane. ₁₇Ka ba roma go Ido, moetapele wa Bajuda ba ba dulago Kasifia, gore ba yo kgopela yena le badirišani ba gagwe, e lego bašomi ba ka Tempeleng, gore ba re romele batho ba ba ka šomago ka Tempeleng ya Modimo wa rena. ₁₈Ka ge Modimo a be a re šegofaditše ba ile ba re romela Sherebia, monna wa temogo, Molefi wa kgorwana ya Magli, gomme yena a tla le barwa ba gagwe le banababo ba lesome le metšo ye e šupago. ₁₉Ba ile ba romela le Hashabia le Jeshaya, ba kgorwana ya Merari, gotee le ba masome a mabedi ba meloko ya bobona. ₂₀Le gona go be go na le bašomi ba ka Tempeleng ba makgolo a mabedi le masome a mabedi bao borakgolokhukhu ba bona ba bego ba sa le ba kgethwa ke Kgoši Dafida le bahlankedi ba gagwe gore ba thuše Balefi. Ka moka ga bona ba be ba ngwadišitšwe ka maina.

₂₁Gona moo mokerong wa Ahaba ke ile ka laela gore bohle re ikone dijo, gore re ikokobetše pele ga Modimo wa rena re mo kgopele gore a re šireletše leetong, rena le bana le batšofadi gotee le dithoto tšohle tša rena. ₂₂Ke ile ka lewa ke dihlong go kgopela kgoši gore a re fe madira le banamedi ba dipere bao ba tlago tšama ba re šireletša manabeng leetong la rena, ka gobane ke be ke mmoditše gore Modimo wa rena o loketše yo mongwe le yo mongwe yo a mmotago, eupša o galefela mang le mang yo a mo furalelago, gomme o a mo otla. ₂₃Ka gona ra ikona dijo, ra rapela gore Modimo a re šireletše, mme yena a kwa dithapelo tša rena.

₂₄Gare ga baetapele ba baprista ke ile ka kgetha Sherebia le Hashabia le ba bangwe ba lesome. ₂₅Ka napa ka ela silibera le gauta le dibjana tše kgoši le baeletši ba gagwe le bahlankedi le Baisraele ba ba bego ba le bothopša ba bego ba di abile gore di tle di šomišwe ka Tempeleng, ka di neela baprista. _26-27Tše ke ilego ka ba fa tšona šedi:

₂₈Ka re go bona: “Lena le ba bakgethwa go Morena, Modimo wa borakgolokhukhu ba lena, gomme le tšona dibjana ka moka tša silibera le tša gauta tše di abetšwego yena e le dimpho tša boithaopo ke tše dikgethwa. ₂₉Le di lote gabotse go fihlela ge le goroga Tempeleng. Fao le di ele ka diphapošing tša Tempele gomme le di neele baetapele ba baprista le ba Balefi le mantona a dikgorwana a setšhaba sa Israele kua Jerusalema.” ₃₀Ka gona baprista le Balefi ba amogela silibera le gauta le dibjana gore ba di iše Tempeleng Jerusalema.

₃₁E be e le ka letšatši la lesome le metšo ye mebedi la kgwedi ya mathomo ge re tloga mokerong wa Ahaba re leba Jerusalema. Modimo wa rena a re šireletša, a re boloka gore re se hlaselwe ke manaba, le gore re se lalelwe tseleng. ₃₂Ge re fihla Jerusalema ra khutša matšatši a mararo. ₃₃Ka letšatši la bone ra ya Tempeleng, ra ela silibera le gauta le dibjana, gomme ra di neela moprista Meremote, morwa wa Uria. Yena o be a na le Eleasara, morwa wa Finease, gotee le Balefi ba: Josabade, morwa wa Jeshua, le Noadia, morwa wa Binui. ₃₄Tšohle di ile tša balwa, tša elwa, gomme boima bja tšona bja ngwalwa le semeetseng.

₃₅Ke moka bohle bao ba bego ba boile bothopša ba direla Morena Modimo wa Israele dihlabelo. Ba direla Baisraele bohle dihlabelo tša go tšhungwa ka moka ka dipoo tše lesome le tše pedi. Ba hlaba le dikgapa tše masome a senyane le metšo ye e selelago, le dikwanyana tše masome a a šupago a metšo ye e šupago, le tšona ya ba dihlabelo tša go tšhungwa ka moka. Ba dira le sehlabelo sa tshwarelo ya dibe ka diphooko tše lesome le tše pedi. Diruiwa tšeo ka moka ya ba tša go direla Morena sehlabelo sa go tšhungwa ka moka. ₃₆Ba ile ba tšea le lengwalo lela ba go le fiwa ke kgoši, ba le neela babušiši le bahlankedi ba selete sa Yufratese-Bodikela, gomme bona ba napa ba thuša setšhaba le ka tša tirelo ya sona ya Tempeleng.

₁Ka morago ga tšeo ka moka baetapele ba setšhaba sa Israele ba ile ba tla ba mpotša gore setšhaba le baprista le Balefi ga se ba ikgetholla go ditšhaba tša dinaga tša kgauswi, e lego Amone le Moaba le Egepeta, goba go Bakanana le Bahete le Baperise le Bajebuse le Baamore. Ba be ba dira tšona dilo tšela tša makgapha tše di bego di dirwa ke ditšhaba tšeo. ₂Bajuda ba be ba nyala basadi ba merafe yeo, ka gona setšhaba se sekgethwa sa Modimo sa tswakana nayo. Baetapele le bahlankedi e be e le bona dithwadi moo tabeng yeo ya go se botegele Modimo. ₃Ge ke ekwa seo ka ikgagolela diaparo tša ka gare le seaparo sa ka ntle, ka itumola moriri le maledu, ka dula fase ke gakanegile kudu. ₄Batho ka moka bao ba bego ba tšhošitšwe ke seo Modimo wa Israele a bego a se boletše mabapi le go se botege ga bao ba bego ba boile bothopša, ba ile ba thoma go nkgobokanela. Ka dula moo ke gakanegile kudu go fihlela ka nako ye go dirwago sehlabelo sa mantšiboa.

₅Ya re ge nako yeo e fihla, ka emelela moo ke bego ke itshola gona, ke sa apere diaparo tšela di gagogilego, ka khunama ka rapela ke emišeditše matsogo go Morena Modimo wa ka. ₆Ka re: “Joo, Modimo, ke lewa ke dihlong, ke tšhaba le go emiša sefahlego pele ga gago. Dibe tša rena di hlatlagane, di re pipile dihlogo; molato wa rena o phagame o fihla magodimong. ₇Ge e sa le go tloga mehleng ya borakgolokhukhu ba rena go fihlela gonabjale, rena setšhaba sa gago re dira dibe kudu. Ka lebaka la dibe tša rena, rena le magoši a rena le baprista re gafetšwe diatleng tša magoši a dinaga di šele, ra bolawa, ra hlakolwa, ra ba ra ba mathopša. Re gobošitšwe la go lahlwa, gomme le bjale re sa gobošwa. ₈Bjale wena, Morena Modimo wa rena, o re šoketše lebakanyana fela, gomme wa dira gore ba bangwe ba rena ba phologe bokgobeng, mme ba tle ba dulele sa ruri mo felong mo gokgethwa. O tsošološitše bophelo bja rena wa bo mpshafatša le ge re be re le bokgobeng. ₉Re be re le makgoba, eupša wa se re tlogele bokgobeng. O dirile gore magoši a Persia a re šokele gomme a re dumelele gore re phele lefsa, le gore re tsoše Tempele ya gago ye e bego e le marope, le gore re tle re bolokege mo Juda le Jerusalema.

₁₀“Eupša bjale, Modimo wa rena, re ka hlwa re sa reng ka morago ga tše di šetšego di diregile? Re boeleditše re tshetše ditaelo tša gago ₁₁tše o re filego tšona ka baprofeta, bahlanka ba gago. Ba re boditše gore naga ye re yago go yona ke naga ye e sego ya hlweka, ka gore batho ba ba dulago go yona ba e tladitše ditiro tša makgapha le tša bohlola ka moka. ₁₂Ba re boditše gore ge re nyaka go tia le go ipshina ka monono wa naga yeo le go e tlogelela ditlogolo tša rena go ya go ile, re se ke ra tsoga re nyalelane le batho ba gona, goba re ba thušitše go atlega le go phela gabotse. ₁₃Ešita le ka morago ga tšohle tše di re hlagetšego ka lebaka la dibe tša rena le melato ya rena, re tseba gore wena, Modimo wa rena, o re otlile gannyane go fetwa ke ka moo re bego re swanela, gomme o re lesitše ra ba le mašaledi a. ₁₄Bjale re ka thoma bjang go tshela melao ya gago mme ra nyalelana le batho ba ba dirago bohlola bjoo? Ge re ka dira bjalo o tla re galefela mo e lego gore o tla re fediša taa, gomme wa se lese motho e eba lešaledi goba a phologa. ₁₅Wena, Morena Modimo wa Israele, o dira ka toka, gomme o re phološitše, ra ba mašaledi le lehono. Re ipolela molato wa rena go wena, ka gobane ka lebaka la molato wo wa rena ga go yo a ka emago pele ga gago.”

₁Eitše ge Esra a sa itahletše fase a rapela pele ga Tempele a lla a bolela dibe tše, Baisraele ba bantšintši, banna le basadi le bana, ba mo kgobokanela, ba lla gabohloko. ₂Shekania, morwa wa Jehiele, wa kgorwana ya Elamo, a re go Esra: “Re hlanogetše Modimo wa rena ra nyala basadi ba šele, fela kholofelo e sa le gona ya gore Baisraele ba tšwe molatong wo. ₃Bjale a re eneng pele ga Modimo wa rena gore re tla bušetša basadi ba le bana ba bona morago. Re tla dira se wena, mong wa ka, le ba bangwe ba ba phethago ditaelo tša Modimo ba re eletšago gore re se dire. Re tla dira seo melao ya Modimo e se nyakago. ₄Taba yeo e magetleng a gago. Re ema le wena, ka gona tia maatla o e phethe!”

₅Ka gona Esra a thoma go eniša baetapele ba baprista le ba Balefi le ba setšhaba ka moka gore ba tla dira seo Shekania a se boletšego. ₆A napa a tloga pele ga Tempele a tsena ka phapošing ya Johanane, morwa wa Eliashibe, gomme a lala a lla ka lebaka la go se botege ga mathopša. A se ke a ja goba a nwa selo.

_7-8Baetapele ba setšhaba ba laela gore go rongwe batseta Jerusalema le nageng ya Juda ka moka gore ba botše batho ka moka bao ba boilego bothopša ba tle ba kopane Jerusalema. Batseta bao ba laelwa gore ba ba tsebiše le gore ge motho a ka se tle moo gwa ba gwa feta matšatši a mararo, se sengwe le se sengwe se e lego sa gagwe se tla thopša, gomme yena o tla kgaolwa setšhabeng. ₉Moo matšatšing ao a mararo, ka letšatši la masome a mabedi la kgwedi ya senyane, banna bohle ba ba dulago nageng ya Juda le ya Benjamene ba tla Jerusalema gomme ba kgobokana ka kgorong ya Tempele. Pula e be e ena kudu, gomme batho ba thothomela ka lebaka la yona le ka lebaka la bogolo bja molato.

₁₀Moprista Esra a ema a re go bona: “Ga se la botega gomme le godišeditše Baisraele molato ka go nyala basadi ba ditšhaba di šele. ₁₁Bjale ge, ipoleleng dibe tša lena go Morena, Modimo wa borakgolokhukhu ba lena, gomme le direng se se mo kgahlago. Ikaroganyeng le batho ba naga ye le basadi ba lena ba ditšhaba di šele.”

₁₂Batho ba mo fetola ba goa ba re: “Go lokile! Re swanetše go dira se o se bolelago. ₁₃Fela re ba bantši le gona pula e na kudu. Re ka se eme mo ntle. Taba ye e ka se phethwe ka tšatši le tee goba a mabedi, ka gobane re ba bantši kudu bao re dirilego sebe se. ₁₄Baetapele ba rena a ba šale Jerusalema ba hlokomele taba ye. Gomme yo mongwe le yo mongwe yo a nago le mosadi wa setšhaba se šele a tle ka nako ye e beilwego, gotee le baetapele le baahlodi ba motse wa gabo. Ka tsela ye kgalefo ya Modimo tabeng ye e tla široga.” ₁₅Go ile gwa se be le yo a ganago leano leo, ge e se Jonathane, morwa wa Asahele, le Jagsera, morwa wa Tikba, mme bona ba be ba tlatšwa ke Meshulamo le Shabetai wa Molefi.

₁₆Mathopša ao a bego a boile a ile a kwana le leano leo, ka gona moprista Esra a ikgethela banna gare ga mantona a dikgorwana, gomme a ba ngwala ka maina. Ya re ka letšatši la pele la kgwedi ya lesome ba thoma go nyakišiša, ₁₇gomme kgweding tše tharo tše di latelago ke ge ba nyakišišitše banna ka moka ba ba bego ba nyetše basadi ba šele.

₁₈Le ke lenaneo la banna ba ba bego ba na le basadi ba šele:

Kgorwana ya Jeshua le banababo, barwa ba Jotsadaka: Maasea, Eliesere, Jaribe le Gedalia. ₁₉Ba ile ba tshepiša gore ba tla bušetša basadi ba bona morago, gomme ba dira sehlabelo sa dibe tša bona ka kgapa.

₂₀Kgorwana ya Imere: Hanani le Sebadia

₂₁Kgorwana ya Harime: Maasea, Eliya, Shemaya, Jehiele le Usia

₂₂Kgorwana ya Pashure: Elioenai, Maasea, Ishmaele, Nathaniele, Josabade le Elasa

Josabade le Shimi le Kelaya, yo a bego a bitšwa le ka la Kelita, le Petagia le Juda le Eliesere

Eliashibe

Shalume le Teleme le Uri

Kgorwana ya Paroshe: Ramia, Jisia, Malkia, Miyamine, Eleasara, Malkia le Benaya

₂₆Kgorwana ya Elamo: Matania, Sakaria, Jehiele, Abdi, Jeremote le Eliya

₂₇Kgorwana ya Satu: Elioenai, Eliashibe, Matania, Jeremote, Sabade le Asisa

₂₈Kgorwana ya Bebai: Johanane, Hanania, Sabai le Atelai

₂₉Kgorwana ya Bani: Meshulamo, Maluke, Adaya, Jashube, Sheale le Jeremote

₃₀Kgorwana ya Pahate-Moaba: Adna, Kelale, Benaya, Maasea, Matania, Betsaliele, Binui le Manase

_31-32Kgorwana ya Harime: Eliesere, Jisia, Malkia, Shemaya, Simeone, Benjamene, Maluke le Shemaria

₃₃Kgorwana ya Hashumo: Matenai, Matata, Sabade, Elifelete, Jeremai, Manase le Shimi

_34-37Kgorwana ya Bani: Maadai, Amramo, Uele, Benaya, Bedia, Keluhi, Bania, Meremote, Eliashibe, Matania, Matenai le Jaasai

_38-42Kgorwana ya Binui: Shimi, Shelemia, Nathane, Adaya, Makanadibai, Shashai, Sharai, Asarele, Shelemia, Shemaria, Shalume, Amaria le Josefa

₄₃Kgorwana ya Nebo: Jeiele, Matitia, Sabade, Sebina, Jadai, Joele le Benaya

₄₄Banna bao ka moka ba be ba nyetše basadi ba šele. Ba ile ba ba hlala, gomme ba ba bušetša morago le bana ba bona.