Boipobolo bja motho yo a tlaišitšwego ke bolwetši
Go tsebišwa moopediši, Jeduthune, gore ke pesalome ya Dafida.
1Ka pelong ke rile:
“Ke tla itlhokomela maitshwarong,
ka se bolele se sebe;
nka se bolele selo ke na le yo kgopo.”
2Ke ile ka homola ka re tuu,
ka se bolele selo,
eupša ya ba lefeela.
Tlaišego ya ka yona ya nkgolela.
3Ka tlalelana ge ke ntše ke tsetla ka mefegelo,
ka ba ka šitwa go itshwara,
mme ka botšiša ka re:
4“Morena, ntsebiše pheletšo ya ka,
le gore nako ye e ntšhaletšego ke ye kaakang.
Ntemoše bokopana bja matšatši a ka.”
5O mpeetše bophelo bjo bokopana;
bophelo bja ka o bona e se selo.
Motho wa nama ke lefeelafeela. Sela
6Bophelo bja motho bo bjalo ka moriti wo o fetago;
tše a itapišago ka tšona ke lefeela.
O ikgobelela mahumo, a sa tsebe moji.
7Bjale nna ke sa lebeletšeng,
Mong wa ka?
Yo ke mo holofetšego ke wena.
8Mphološe dikarogong tša ka ka moka.
O se lese ditlatla di nkwera.
9Ke tla homola, nka se bolele selo,
gobane ke wena o ntirilego gore ke tlaišege ka mokgwa wo.
10Se hlwe o ntlaiša.
Ke šetše ke hlagaditšwe ke mekeketo ya gago.
11O kgalema motho ka go mo otlela bokgopo bja gagwe;
o fediša se a se ratago ya ba nke se lewa ke tšhwele.
Motho ke lefeelafeela. Sela
12Ekwa thapelo ya ka, Morena;
ntheeletše ge ke go llela.
O se hlokomologe sello sa ka,
gobane ke mofaladi nageng ya gago,
ke mofeti bjalo ka borakgolokhukhu ka moka.
13Tlogela go mpea leihlo gore ke iketle pele ke itshepelela, ka se sa ba gona.
