To The Word – Day 124

₁Ka letšatši le lengwe Morena o kile a bolela le Jona, morwa wa Amithai, ₂a re: “Itokiše, o ye Ninibe, motseng wola wo mogolo, mme o kgaleme batho ba wona; ke tseba ka moo e lego ba babe ka gona.” ₃Eupša Jona yena a itokišetša go ya Tarshishe go tšhabela Morena. A ya Jafo, moo a ilego a hwetša leselawatle leo le bego le šetše le itokišeditše go ya Tarshishe. A napa a lefela leeto mme a namela le basepediši ba leselawatle leo go leba Tarshishe, moo a bego a tla ba kgole le Morena. ₄Eupša Morena a tsoša ledimo le maatla lewatleng. E be e le le maatla mo leselawatle le ilego la ba la nyaka go robega. ₅Basepediši ba lona ba tšhoga mme ba goa ba nyaka thušo, yo mongwe le yo mongwe a llela go modimo wa gagwe. Ka morago ga moo ba lahlela merwalo ya leselawatle ka lewatleng gore ba pheme kotsi. Jona yena o be a theogetše ka garegare ga leselawatle a patlame fao a ile ka boroko.

₆Molaolaleselawatle a mo hwetša fao gomme a re go yena: “O reng o robetše? Tsoga o rapele modimo wa gago gore a re thuše. Mohlomongwe a ka re kwela bohloko a re phološa.”

₇Basepediši ba leselawatle ba botšana ba re: “A re temeng re bone gore ke mang yo a re hloletšego kotsi ye.” Ba tema gomme gwa swarwa Jona. ₈Ka fao ba re go yena: “Bjale ge, re botše: A ke wena o re hloletšego kotsi ye? O dira eng fa? O tšwa nageng efe? O mohlobo mang?”

₉Jona a ba fetola a re: “Ke nna Moheberu, ke khunamela Morena, Modimo wa legodimo, yo a hlodilego lefase le lewatle.” ₁₀A iša pele a ba botša gore o tseleng, o tšhaba yena Morena yoo.

Basepediši ba leselawatle ba tšhoga kudu mme ba re go yena: “Joo, o dirile taba ye e šiišago!” ₁₁Ledimo la gakala go iša pele; ka fao basepediši ba leselawatle ba re go yena: “Re go dire eng gore re homotše ledimo le?”

₁₂Jona a ba fetola a re: “Ntahleleng ka mo lewatleng, gomme ledimo le tla okobala. Ke a tseba gore phošo ke ya ka ge le wetše ledimong le lešoro le.”

₁₃Le ge go le bjalo, basepediši ba leselawatle ba leka go bušetša leselawatle lebopong ka maatla a bona ka moka. Fela ledimo la gakalela pele mme ba šitwa ke go fihla fao. ₁₄Ka gona ba llela go Morena ba re: “Hle, Morena, re a go rapela, o se ke wa re lesa re ehwa, ka ge re bolaya motho yo! Wena, Morena, ke wena o dirago tše ka moka; ke mediro ya gago.” ₁₅Ke moka ba kuka Jona ba mo lahlela ka lewatleng, gomme ka bjako lewatle la okobala. ₁₆Taba ye ya dira gore basepediši ba leselawatle ba boife Morena ka moo ba ilego ba ba ba mo direla sehlabelo, ba tshephiša le go mo direla tše dingwe.

₁₇Morena a dira gore Jona a metšwe ke hlapi ye kgolo, mme a ba ka gare ga yona matšatši a mararo le mašego a ona.

₁Ke moo Jona a rapetšego Morena Modimo wa gagwe a le ka teng ga hlapi a re:

₁₀Ya ba gona Morena a laelago hlapi yela gore e hlatše Jona lebopong, mme ya mo hlatša.

₁Morena a bolela le Jona gape ₂a re: “Itokiše o ye Ninibe, motseng wola wo mogolo, mme o tsebiše batho ba gona molaetša woo ke go filego wona.”

₃Ka gona Jona a phetha taelo ya Morena a ya Ninibe, motseng wola wo mogolo, wo o bego o tšea motho matšatši a mararo go o putla. ₄Jona a tsena motseng, mme ka morago ga ge a thethile le wona letšatši ka moka a thoma go goelela a re: “Ka morago ga matšatši a masome a mane Ninibe e tla thubja!”

₅Batho ba Ninibe ba kgolwa molaetša wa Modimo. Ka fao ba bega gore yo mongwe le yo mongwe a ikone dijo, mme batho ka moka, banyatšegi le bahlomphegi, ba apare diaparo tša go ilela go laetša gore ba sokologile.

₆Ge kgoši ya Ninibe e di kwa, ya emelela setulong sa yona sa bogoši, ya apola seaparo sa yona, ya apara diaparo tša go ilela, mme ya yo dula moloreng. ₇Ya re gohle motseng wa Ninibe go begwe go thwe: “Ye ke taelo ye e tšwago go kgoši le bakgomana ba gagwe. Go se ke gwa ba le motho goba seruiwa se se jago selo – batho le dikgomo le dihuswane di se ke tša ja selo, goba tša nwa meetse. ₈Batho bohle le diruiwa ba apare diaparo tša go ilela. Yo mongwe le yo mongwe a rapele Modimo a tiišitše mme a lese dilo tše mpe le diphošo tšeo a di dirago. ₉Mohlomongwe Modimo a ka buša pelo a se sa re galefela mme ra se ke ra hwa.”

₁₀Modimo a bona seo ba se dirilego, gore ba tlogetše tše mpe tše ba bego ba di dira. Ka fao a buša pelo a se ke a ba otla, le ge a be a itše o tla ba otla.

₁Taba ye ya tlatša Jona pelo mme a galefa. ₂Ka gona a rapela a re: “Ga ke re pele ga ge ke tloga nageng ya gešo se ke sona se ke ilego ka gopola gore o tlilo se dira? Ke ka lebaka le ke ilego ka thoma ka go leka go tšhabela Tarshishe. Ke be ke tseba gore o Modimo wa lerato le kwelobohloko, gore o na le pelo ye telele, o yo botho, le gona o dula o itokišeditše go buša pelo, mme wa se otle. ₃Bjale ge, Morena, hle, ntese ke ikhwele. Go kaone ge ke hwile, ke sa phele.”

₄Morena a mo fetola a re: “A o bona go lebane gore o befelwe?”

₅Jona a tšwa motseng a dula fase ka thoko ya bohlabela, a itirela mošašana mme a dula moriting wa wona, a letetše go bona seo se tlago hlagela Ninibe. ₆Ke moka Morena Modimo a mediša mokhure gore o direle Jona moriti a tle a tloge a iketla. Jona a thabela mokhure woo ka kudu. ₇Fela ka mahube a letšatši le le latelago Morena a laela seboko sa fehla mokhure wola, mme wa hwa. ₈Ya re ge letšatši le hlaba, Modimo a tsoša phefo ye e fišago ya bohlabela, mme letšatši la fiša Jona hlogo a ba a nyaka le go idibala. Ka fao a duma ge nkabe a hwile. A bolela a re: “Go kaone ge ke hwile go na le gore ke fele ke phela.”

₉Eupša Modimo a mmotšiša a re: “A o bona go lebane gore o galefe ka lebaka la mokhure wo?”

Jona a mo fetola a re: “Ee, ke bona e le tshwanelo gore ke galefe – ke galefe la go hwa.”

₁₀Morena a re go yena: “Mokhure wo wa go gola bošego bo tee mme wa timelela bošego bjo bo latelago wena o o kwela bohloko, etšwe o se wa o šomela goba wa o mediša. ₁₁A bjale na motse wo wo mogolo wa Ninibe, nka napa ka se o kwele bohloko le go feta? Etse e bile motse wo o nago le bana ba ba se nago molato ba go feta ba dikete tše lekgolo le tše masome a mabedi, le diruiwa tše ntši.”

₁Ngwageng wa bobedi wa ge Dariose e le kgoši, ka letšatši la pele la kgwedi ya boselela, Morena o ile a romela molaetša wo o latelago ka moprofeta Hagai go mmušiši wa Juda, Serubabele, morwa wa Sealtiele, le go Moprista yo Mogolo, Joshua, morwa wa Jotsadaka.

₂Morena Ramaatlaohle o re: “Setšhaba se se re nako ya go tsošološa Tempele ya Morena ga sešo ya fihla.” ₃Ke mo Morena a botšišitšego setšhaba ka moprofeta Hagai a re: ₄“Le reng le dula ka dintlong tše dibotse mola ntlo ya ka yona e sa le marope?” ₅Morena Ramaatlaohle o re: “Nagantšhišang tše di le hlagelago: ₆Le bjetše kudu, fela la buna gosenene; le a ja, fela ga le khore; le a nwa, fela ga le kgolwe; le a apara, fela ga le ruthele; mošomi o gola mogolo wo o sa lekanego go mo phediša. ₇Nagantšhišang tše di le hlagelago. Ke realo, nna, Morena Ramaatlaohle.”

Morena Ramaatlaohle o rile go Hagai: ₈“Bjale ge, rotogelang dithabeng le yo rema dikota le tle le tsošološe Tempele; ke gona ke tlago kgahlega gomme ka direlwa ka moo ke nyakago ka gona.

₉“Le be le holofetše gore le tla bolaya mabele, eupša šefa ga a nene. E rile ge le a goroša nna ka a budula. Etse ke be ke direlang? Ke be ke dirišwa ke gore Tempele ya ka e sa le marope, mola mongwe le mongwe wa lena a mpshafatša ntlo ya gagwe. ₁₀Lebaka ke lona leo ge legodimo le sa neše pula, le lefase le gana ka dibjalo. ₁₁Ke tlišitše komelelo nageng – dithabeng le mašemong le dirapeng tša merara le tša mehlware le dimeleng tšohle tša mobung, bathong le diphoofolong, le go se sengwe le se sengwe se le se bjalago.”

₁₂Ke moka Serubabele, morwa wa Sealtiele, le Moprista yo Mogolo, Joshua, morwa wa Jotsadaka, le mašaledi ohle a setšhaba ba phetha tše Morena Modimo wa bona a bego a ba laetše tšona, ba theeletša moprofeta Hagai, motseta wa Morena. ₁₃Ke mo Hagai, motseta wa Morena, a boditšego setšhaba molaetša wa Morena, a re Morena o re: “Ke na le lena.” ₁₄Morena a tutuetša mmušiši wa Juda, Serubabele, morwa wa Sealtiele, le Moprista yo Mogolo, Joshua, morwa wa Jotsadaka, le mašaledi ohle a setšhaba gore ba šome Tempeleng. Ba tla, ba thoma go šoma Tempeleng ya Morena Ramaatlaohle, Modimo wa bona, ₁₅ka letšatši la masome a mabedi a metšo ye mene la kgwedi ya boselela ya ngwaga wa bobedi wa ge Dariose e le kgoši.

₁Ka letšatši la masome a mabedi le motšo o tee la kgwedi ya bošupa ya wona ngwaga woo, Morena a buša a bolela ka moprofeta Hagai. ₂A mo laela a re: “Botšiša mmušiši wa Juda, Serubabele, morwa wa Sealtiele, le Moprista yo Mogolo, Joshua, morwa wa Jotsadaka, le mašaledi a setšhaba o re: ₃Ke mang mo gare ga lena yo a ilego a bona ka mo Tempele e bego e le botse ka gona? Gonabjale le e bona e le bjang? Ga ke re le e bona e se selo? ₄Morena o re: Tia maatla, wena Serubabele; le wena Moprista yo Mogolo, Joshua, morwa wa Jotsadaka, tia maatla; le lena setšhaba ka moka sa naga ye, tiang maatla le šome, gobane nna, Morena Ramaatlaohle, ke na le lena. ₅Mola le etšwa Egepeta ke ile ka le tshepiša gore ke tla ba le lena. Ke sa ntše ke na le lena, ka gona le se ke la boifa selo.

₆“Nna, Morena Ramaatlaohle, ke re: Kgauswanyana ke tla reketliša legodimo le lefase, lewatle le naga. ₇Ke tla tsoša meferefere ditšhabeng tšohle, gomme mahumo a tšona a tla tlišwa mo, ka thakga Tempele ka ona. Ke realo, nna, Morena Ramaatlaohle. ₈Silibera ke ya ka, gauta le yona ke ya ka. Ke realo, nna, Morena Ramaatlaohle. ₉Tempele ye mpsha e tlilo phala yela ye tala ka botse, gomme ke tla tliša khutšo ka go yona.” O realo, Morena Ramaatlaohle.

₁₀Ka letšatši la masome a mabedi le metšo ye mene la kgwedi ya senyane ya ngwaga wa bobedi wa ge Dariose e le kgoši, Morena Ramaatlaohle a bolela gape ka moprofeta Hagai. ₁₁A re: “Botšiša baprista gore molao o reng mabapi le taba ye: Ge motho a ka phuthela nama ye kgethwa morumong wa kobo ya gagwe, gomme ka morumo woo a kgoma senkgwa, goba dijo tše di apeilwego, goba beine, goba makhura a mohlware, goba sejo se sengwenyana, na sejo seo e ba se sekgethwa?”

Baprista ba mo fetola ba re: “Aowa.”

₁₂Ke moka Hagai a ba botšiša a re: “Na ge motho yo a tšhilafaditšwego ke go kgoma setopo a ka kgoma se sengwe sa dijo tšeo le sona se tla tšhilafala?”

Baprista ba mo fetola ba re: “Se tla tšhilafala.”

₁₃Ke moka Hagai a re: “Morena o re go bjalo le go batho ba setšhaba se le go tšohle tše ba di šomago ka diatla; ka gona tše ba di tlišago aletareng di tšhilafetše.”

Ge setšhaba se seno thoma go tsošološa Tempele ₁₄Morena a re: “Bjale ge, lebeledišišang tše di le hlagetšego pele le thoma go tsošološa Tempele go fihlela lehono. ₁₅Motho o be a re ge a eya mokgobong wa mabele a gopole gore o tla tšwa ka mekotla ye masome a mabedi, eupša a tšwe fela ka ye lesome. A ye bopitlelong bja diterebe go yo ga dikgapa tše masome a mahlano tša beine, a hwetše fela tše masome a mabedi. ₁₆Ke be ke le romela phefo ya naka le phori le sefako gore di senye sengwe le sengwe se le se bjetšego, eupša gwa se be le yo a sokologelago go nna. ₁₇Go tloga lehono le, letšatši la masome a mabedi a metšo ye mene la kgwedi ya senyane, leo motheo wa Tempele o phethilwego ka lona, le lebeledišišeng tšeo di tlago hlaga. ₁₈Le ge go se na le mabele ka dišegong, le merara le mego le megarenate le mehlware e se sa enywa, go tloga lehono ke tla le šegofatša la buna.”

₁₉Ka lona tšatši leo la masome a mabedi a metšo ye mene la kgwedi yeo, Morena a bolela le Hagai la bobedi, a mmotša ₂₀gore a re go Serubabele, mmušiši wa Juda: “Nna, Morena, ke kgauswi le go reketliša legodimo le lefase, ₂₁ka menola mebušo ya ditšhaba ka e fetša maatla. Ke tla phethola dikoloi tša ntwa le basepetši ba tšona; dipere di tla hwa, le banamedi ba tšona ba bolayana. ₂₂Mohlang woo ke tla go tšea, wena mohlanka wa ka, Serubabele, morwa wa Sealtiele, ka dira gore o buše ka maatla a ka, gobane ke kgethile wena.” O realo, Morena Ramaatlaohle.