To The Word – Day 123

₂Theeletšang, lena bagolo ba setšhaba;

hlwayang tsebe, lena badudi bohle ba naga.

Na tiragalo ya mohuta wo e kile ya hlaga mehleng ya lena goba mehleng ya botatagolena?

₃Le e anegele bana ba lena;

le bona ba e anegele bana ba bona,

mme bao le bona ba e anegele ba bona bana.

₄Dimelana tša go šadišwa ke mogokong di lewa ke bojane;

tša go šadišwa ke bojane di lewa ke segongwane;

tša go šadišwa ke segongwane di lewa ke maphatakalala.

₅Tsogang, le lleng, matagwa tenang!

Gololang, lena bomagampelabeine,

ka ge beine ye mpsha le ka se sa e latswa.

₆Naga ya gaborena e hlasetšwe ke tšie,

tšie ye maatla, ye e sa balwego,

ya meno a nkego a tau,

ya mehlagare o ka rego ya taugadi.

₇E hlobotše merara ya rena,

ya rothotha le mego ya rena.

E e humolotše matswamati ya a lahlela fase,

dikala tša šala di šweufetše.

₈Gololang, le etše monyadiwa yo a iletšego monyadi wa gagwe.

₉Ka ge go se sa išwa kabelo ya bupi goba ya dino ka Tempeleng,

baprista, bahlanka ba Morena, ba a lla.

₁₀Mašemo a hloboletše,

naga e kwa bohloko ka ge e lobile mabele;

diterebe di šwabile,

le mehlware e ponne.

₁₁Felang maatla, lena balemi;

gololang, lena bahlokomedi ba merara,

gobane le mabele le garase le dibjalo tše dingwe di lobile.

₁₂Merara e omeletše, le mego e ponne;

megarenate le mepalema le meapola le mehlare yohle ya naga e omeletše.

Lethabo lela la batho le ile.

₁₃Lena baprista, aparang tša go ilela, le lleng!

Gololang, lena le hlankelago Morena aletareng!

Etlang, le lale le apere tša go ilela,

lena bahlankedi ba Modimo wa ka,

gobane ga go sa na kabelo ya bupi goba ya dino

ya go neelwa ka Tempeleng ya Modimo wa lena.

₁₄Beang letšatši la go ikona dijo,

le rapeng pitšo!

Kgoboketšang bagolo ba setšhaba le badudi bohle ba naga

ka Tempeleng ya Morena Modimo wa lena, le mo lleleng.

₁₅Joo, letšatši la go tla ga Morena le batametše,

lona letšatši le Ramaatlaohle a tlago lobiša naga ka lona!

₁₆Re loba dibjalo re lebeletše.

Ka Tempeleng ya Modimo wa rena ga go sa na lethabo le tlhalalo.

₁₇Peu e boletše ka fase ga makwate,

matlolo ga a ne selo,

le dišego di hlagatšwa ke go hloka mabele.

₁₈Diruiwa di bokoledišwa ke tlala le lenyora;

mehlape ya dikgomo e gerema le naga ka go hloka mafulo;

mehlape ya dihuswane le yona e a hlaka.

₁₉Morena, ke llela wena,

ka ge mafulo le dihlare lešokeng di swele mo nkego di tšhumilwe ke mollo.

₂₀Le diphoofolo tša lešoka di llela wena,

gobane dinokana di pšhele.

₁Letšang phalafala Sione,

hlabang mokgoši thabeng yeo ye kgethwa ya Modimo.

Thothomelang,

lena badudi ba naga ya Juda,

gobane Letšatši la Morena le batametše.

₂E tla ba letšatši la leswiswi le phifalo,

letšatši le leso la maru.

Motšhitšhi wo mogologolo wa tšie o tla bjalo ka lešaba la batho,

o aparetše dithaba,

o bjalo ka mahube a masa.

Ye bjalo ga se ya ka ya ba gona,

ebile e ka se sa tsoga e bonwe.

₃Mo e yago gona e ja dibjalo ka moka bjalo ka mollo.

Mo e fetago gona e senya tšohle boka kgabo ye e laumago.

Ka pele ga yona naga e swana le serapa sa Edene,

ka morago ga yona naga ke leganata,

ga e ne selo.

Ga go se e se šadišago.

₄E bopegile bjalo ka pere;

e na le lebelo bjalo ka dipere tša ntwa.

₅Ge e taboga dintlhoreng tša dithaba,

go kwala lešata le nkego ke la dikoloi tša ntwa,

le nkego ke la mollo ge o fiša dikutwana tša mahlaka.

E šalane morago bjalo ka madira a mantši ao a lego ntweng.

₆Ge e batamela, batho ka moka ba a thothomela,

mongwe le mongwe o galoga sefahlego.

₇E hlasela bjalo ka bahlabani;

e namela merako go etša madira.

E sepela e lebile pele e sa phamoge,

₈e sa kgorometšane.

Le ge e wela mo e thibelwago ga e phamoge.

₉E wela motse godimo,

e tshela merako;

e namela dintlo;

e tsena ka mafasetere boka mahodu.

₁₀Ge e batamela, lefase le a šikinyega,

legodimo le a thothomela.

Letšatši le ngwedi di a fifala,

le dinaledi tša se sa taga.

₁₁Morena o laya madira ao a gagwe a a etile pele.

Ona madira ao a mo theeletšago ke a mantši, a na le maatla.

Letšatši la Morena ke le legolo mme le boifiša kudu.

Ke mang yo a kago le phonyokga?

“Le gonabjale sokologelang go nna ka dipelo tša lena ka moka ka go ikona dijo le ka dillo le mahloko.

₁₃Manyami a lena a a bonagale ka dipelo tša lena tše di kwelego bohloko;

go ikgeilela diaparo ga go a lekana.”

Sokologelang go Morena Modimo wa lena.

Ke yo botho le yo lešoko;

ga a fele pelo ebile o botega kudu;

o fela a buša pelo ge a swanetše go le otla.

₁₄Mohlomongwe a ka buša pelo gape,

a le šegofatša ka dibjalo tše dintši.

Ke gona le ka neelago Morena Modimo wa lena kabelo ya bupi le ya seno.

₁₅Letšang phalafala thabeng ya Sione;

beang letšatši la go ikona dijo,

gomme le rape pitšo.

₁₆Kgobokanyang setšhaba,

le se hlwekišetšeng tirelo ya phuthego;

le bokanyeng batšofadi,

le kgoboketšeng bana le masea.

Monyadi le monyadiwa a ba tšwe ka ntlong ya bona ba tle.

₁₇Baprista ba ba hlankelago Morena a ba lle

mokgahlo ga aletare le phapoši ya matsenong a Tempele,

ba rapele ba re:

“Šokela setšhaba sa gago, hle, Morena.

O se ke wa lesa ditšhaba tše dingwe di re nyatša, di re kwera.

Ke ka lebaka lang di re:

‘Na Modimo wa lena o kae?’ ”

₁₈Ke moka Morena a ela naga ya gagwe hloko,

a šokela setšhaba sa gagwe.

₁₉A ba fetola a re:

“Bjale ke tlilo le fa mabele le beine le makhura a mohlware, gomme le tla khora.

Nka se sa le nyatšiša ditšhaba tše dingwe.

₂₀Ke tla tloša motšhitšhi wa tšie yeo ya go tšwa leboa,

gomme ye nngwe ya yona ke tla e šwalalanyetša leganateng.

Ye e lego ka pele ke tla e lahlela ka Lewatleng le le Hwilego,

gwa re ya ka morago ka e wetša ka Lewatleng la Mediteraniene,

gwa kwagala fela monkgo wa yona ge e hwile,

tšie yeo ya nkgela batho.

Ke tla e fediša ka lebaka la tšohle tše e di dirilego.

₂₁“Lena mašemo, le se boife,

eupša hlabang mekgolokwane le thabele tše Morena a le diretšego tšona.

₂₂Lena diphoofolo, le se boife ka gobane phulo lešokeng e ba ye tala;

mehlare e entšwe,

mego le merara le yona e entšwe.

₂₃“Lena batho ba Sione,

hlabang mekgolokwane,

le thabele tše Morena Modimo wa lena a le diretšego tšona;

o le file pula ye e lekanego,

a le nešetša tsheola le kgogolamooko,

bjalo ka mengwageng.

₂₄Diboa di tlilo tlala mabele;

mapitlelo a tla tšhologa beine le makhura a mohlware.

₂₅Ke tla le bušetša dibjalo tšela le di lobilego

mengwageng yela bojane le segongwane le manale

le maphatakalala di di llego.

Ke nna ke bego ke le rometše madira ao a tšie.

₂₆Le tlilo ba le dijo tše dintši la khora.

Le tla reta Morena Modimo wa lena yo a le diretšego dimakatšo.

Setšhaba sa ka se ka se sa tsoga se llwe ke dihlong.

₂₇Ke gona le tlago tseba, lena Baisraele,

gore ke gare ga lena,

le gore ke nna Morena Modimo wa lena,

gomme ga go sa na le Modimo yo mongwe wa lena.

Setšhaba sa ka se ka se ke sa tsoga se llwe ke dihlong.”

₂₈“Ka morago ga tšeo ke tla tšhela batho bohle moya wa ka;

barwa le barwedi ba lena ba tla botša batho lentšu la ka;

batšofadi ba lena ba tla lora ditoro,

masogana a lena a bona dipono.

₂₉Le bahlanka ba lena ba banna le ba basadi

ke tla ba tšhela moya wa ka mehleng yeo.

₃₀“Ke tla dira dišupo tša letšatši leo legodimong le lefaseng;

go tla tšhologa madi,

gwa ba le mollo le dithololo tša meši.

₃₁Letšatši le tla fifala,

ngwedi wa hwibila bjalo ka madi pele go fihla letšatši leo le legolo le šiišago la Morena.

₃₂Eupša yo mongwe le yo mongwe yo a kgopelago Morena thušo o tla phološwa,

ka gobane Morena o rile:

‘Ba ba lego motseng wa Jerusalema,

gagologolo thabeng ya Sione,

ba tla phologa gotee le mašaledi a mangwe a Morena a tlago a kgetha.’ ”

“ ‘Itlhameleng ntwa, le rapeng bagale;

rapang bahlabani bohle le tšweng dira!

₁₀Kgatlang megoma le e direng ditšhoša,

ditsedi le di direng marumo.

Le dikoka di lebanwe ke go lwa.

₁₁Itlhaganeleng le tleng,

lena ditšhaba tše di bapanego,

le kgobokaneng ka moeding.’ ”

Morena,

romela bagale ba gago lefaseng,

ba ba hlasele.

₁₂“Ditšhaba a di itokiše,

di tle Moeding wa Tsheko.

Moo ke mo ke yago go dula gona,

nna, Morena,

ka sekiša ditšhaba tše di bapilego le lena.

₁₃Ke tše kgopokgopo;

di ripeng boka mabele a budule.

Etlang le di pitleng go etša diterebe ge di pitlwa ka maoto bopitlelong bjo bo falalago beine.”

₁₄Mašabašaba a kgobokane ka Moeding wa Tsheko,

ka gobane tšatši la go tla ga Morena le kgauswi,

le tla tla gona ka moo Moeding.

₁₅Letšatši le ngwedi di a fifala,

le dinaledi ga di sa taga.

₁₆Morena o bopa thabeng ya Sione;

lentšu la gagwe le porotla Jerusalema,

gwa šikinyega lefase le leratadima.

Fela go setšhaba sa gagwe yena ke botšhabelo,

ke sebo sa bona Baisraele.

₁₇“Ke mo lena, Baisraele,

le tlago tseba

gore ke nna Morena Modimo wa lena.

Ke dula Sione, thabeng ya ka ye kgethwa;

Jerusalema e tla ba motse wo mokgethwa;

bašele ba ka se sa o hlasela.

₁₈“Mehleng yeo dithaba di tla khupetšwa ke merara ye e entšwego;

diruiwa tša go fula mebotong di tla šiša;

dinokana tšohle tša Juda di tla ela.

Tempeleng ya Morena go tla runya mothopo,

wa elela Moeding wa Megohlo.

₁₉“Egepeta e tla fetoga leganata,

Edomo e tla ba lešoka,

gobane di hlasetše naga ya Juda,

tša bolaya badudi ba yona ba se na molato.

_20-21“Ke tla lefeletša ba ba bolailwego.

Ba ba nago le molato nka se ba babalele.

Eupša nageng ya Juda go tla dulelwa ruri,

Jerusalema le gona go tla dulwa go ya go ile.

Nna, Morena, ke tla dula thabeng ya Sione.”

₁Morena, ke go reta ka pelo yohle;

ke go opelela ditumišo pele ga medimo.

₂Ke khunama ke lebeletše Tempeleng ya gago ye kgethwa,

ke go tumiša ka lebaka la leratorato la gago le go botega ga gago.

Kholofetšo yela ya gago e feta le setumo sa gago.

₃Ge ke be ke go llela o ile wa nkwa,

wa ntiiša, wa mmaatlafatša.

₄Dikgoši tšohle tša lefase di tla go tumiša, Morena,

ge di ekwa dikholofetšo tša gago.

₅Ba tla opelela ditiro tša gago ba re:

“Letago la Morena ke le legolo ruri!”

₆Le ge o phagame gakaaka banyatšegi o a ba šetša;

baikgogomoši bona o ba tseba ba sa le kgole.

₇Ge ke dikaneditšwe ke mathata,

o a ntlhakodiša; ge ke galefetšwe ke manaba,

o a ntšhireletša;

o mphološa ka maatla a gago.

₈Morena o tla mphethela tšohle.

Morena, leratorato la gago ke la go ya go ile.

Tše o di dirilego o se di hlokomologe.

“ ‘Ke tla tšhela batho bohle Moya wa ka,

barwa le barwedi ba lena ba tla botša batho lentšu la ka;

masogana a lena a tla bona dipono,

batšofadi ba lena ba tla lora ditoro.

₁₈Le badiredi ba ka ba banna le ba basadi ke tla ba tšhela Moya wa ka mehleng yeo,

gomme ba tla bega molaetša wa ka.

₁₉Ke tla dira mehlolo godimo leratadimeng le dimaka fase lefaseng.

Go tla tšhologa madi,

gwa ba le mollo le dihlahlamuši.

₂₀Letšatši le tla fifala,

le ngwedi wa re hwibii boka madi,

pele go etla Letšatši le legolo le le makatšago la Morena.

₂₁Ya ba gona go phološwago mang le mang yo a kgopelago Morena thušo.’

“ ‘Ke be ke bona Morena a le pele ga ka ka mehla;

o kgauswi le nna,

gomme nka se thedimoge.

₂₆Ke ka lebaka leo ke thabilego,

mme ke bolelago ke nyakaletše e le ruri.

Le ge ke le mothwana wa nama bjale,

ke dula ke wele pelo ke holofetše,

₂₇gobane o ka se ntlogele ke eya bodulabahu;

o ka se ntese ke eya boyabahu,

nna, mohlanka wa gago yo ke botegago.

₂₈O ntšhupeditše tsela tše di išago bophelong,

gomme ge o na le nna ke tla iketlela sa ruri.’

“ ‘A ka se tlogelwe a le bodulabahu,

setopo sa gagwe se ka se bole.’

“ ‘Morena o rile go Morena wa ka:

Dula ka mo letsogong la ka la go ja,

₃₅ke be ke tle ke go fenyetše manaba a gago.’