JONA 3

₁Morena a bolela le Jona gape ₂a re: “Itokiše o ye Ninibe, motseng wola wo mogolo, mme o tsebiše batho ba gona molaetša woo ke go filego wona.”

₃Ka gona Jona a phetha taelo ya Morena a ya Ninibe, motseng wola wo mogolo, wo o bego o tšea motho matšatši a mararo go o putla. ₄Jona a tsena motseng, mme ka morago ga ge a thethile le wona letšatši ka moka a thoma go goelela a re: “Ka morago ga matšatši a masome a mane Ninibe e tla thubja!”

₅Batho ba Ninibe ba kgolwa molaetša wa Modimo. Ka fao ba bega gore yo mongwe le yo mongwe a ikone dijo, mme batho ka moka, banyatšegi le bahlomphegi, ba apare diaparo tša go ilela go laetša gore ba sokologile.

₆Ge kgoši ya Ninibe e di kwa, ya emelela setulong sa yona sa bogoši, ya apola seaparo sa yona, ya apara diaparo tša go ilela, mme ya yo dula moloreng. ₇Ya re gohle motseng wa Ninibe go begwe go thwe: “Ye ke taelo ye e tšwago go kgoši le bakgomana ba gagwe. Go se ke gwa ba le motho goba seruiwa se se jago selo – batho le dikgomo le dihuswane di se ke tša ja selo, goba tša nwa meetse. ₈Batho bohle le diruiwa ba apare diaparo tša go ilela. Yo mongwe le yo mongwe a rapele Modimo a tiišitše mme a lese dilo tše mpe le diphošo tšeo a di dirago. ₉Mohlomongwe Modimo a ka buša pelo a se sa re galefela mme ra se ke ra hwa.”

₁₀Modimo a bona seo ba se dirilego, gore ba tlogetše tše mpe tše ba bego ba di dira. Ka fao a buša pelo a se ke a ba otla, le ge a be a itše o tla ba otla.