JONA 2

₂“Ge ke le tlalelong, Morena,

ke go biditše,

mme wa nkaraba.

Ke lletše go wena ke le fasefase bodulabahu,

mme wa nkwa.

₃O be o ntahletše fasefase maleng a lewatle,

mme ka dikanetšwa ke meetse,

ka ribegetšwa ke maphoto a gago.

₄Ka ba ka gopola gore ke raketšwe sa ruri pele ga sefahlego sa gago,

mme nka se tsoge ke bone

Tempele ya gago ye kgethwa gape.

₅Meetse a nkhupetša a mpeta;

lewatle la mpipetša,

mme malele a ntata hlogo.

₆Ke be ke theogetše fasefase medung ya dithaba,

nageng yeo ke ilego ka tswalelelwa sa ruri ka gare ka mapheko.

Eupša wena, Morena, Modimo wa ka,

o nntšhitše moo fasefase ke sa phela.

₇Ge ke ekwa gore moya wa ka o nyaka go tšwa nameng,

ka go gopola, Morena,

ka go rapela,

mme wa nkwa o le ka Tempeleng ya gago ye kgethwa.

₈Bao ba khunamelago medimo ya diswantšho ya lefeela

ba tlogetše go go botegela.

₉Eupša nna ke tla go opelela ditumišo;

ke tla go direla sehlabelo,

mme ka phetha seo ke go tshephišitšego sona.

Tlhakodišo e tšwa go Morena.”