To The Word – Day 119

₁Ya re ge Athalia, mmagoKgoši Ahasia, a ekwa gore morwa wa gagwe o bolailwe, a laela gore meloko ka moka ya lapa la mošate e bolawe. ₂Ya ba fela Joase, morwa wa Ahasia, yo a phologago. O be a tlile go bolawa le ba bangwe, eupša Josheba, rakgadiagwe, yo e bego e le morwedi wa Kgoši Joramo le kgaetšedi ya Ahasia ka malapa, a mo tšhabiša ka sephiri. Mosadi yoo a mo tšea le mofepi wa gagwe a mo iša ka phapošing ya go bolokela malao ka Tempeleng, gomme a mo uta gore Athalia a se ke a mmona, ka gona a se ke a bolawa. ₃Josheba a hlokomela mošemane yoo mengwaga ye e selelago a mo utile ka Tempeleng, ge go sa buša Mohumagadi Athalia.

₄Eupša ka ngwaga wa bošupa moprista Joyada a laela gore go bitšwe balaodi ba baleti ba Athalia le ba mošate, gomme a ba botša gore ba tle Tempeleng, moo a ilego a dira kwano le bona gomme a ba eniša gore ba dire se a bego a ikemišeditše go se dira. A ba laetša Joase, morwa wa Kgoši Ahasia, ₅gomme a ba laela a re: “Ge le fihla modirong ka letšatši la Sabatha, le ikaroleng dihlopha tše tharo. Sehlopha sa mathomo se lete mošate; ₆sa bobedi se eme lesorong la Sure, mme sa boraro se eme lesorong ka morago ga baleti ba bangwe. Tempele yona e letwe ka mokgwa wo: ₇Dihlopha tše pedi tše di tlogago modirong ka Sabatha di lete Tempele gore di šireletše kgoši. ₈Le leteng Kgoši Joase le ntšhitše ditšhoša, mme le yeng le yena mo gongwe le mo gongwe mo a yago gona. Yo a ka le batamelago a bolawe.”

₉Balaodi ba phetha ditaelo tša Joyada gomme ba tliša banna ba bona go yena – ba ba tlogago modirong ka Sabatha le ba ba tsenago ka letšatši leo. ₁₀A neela balaodi bao marumo le dikotse tše e bego e le tša Kgoši Dafida mme di bolokilwe ka Tempeleng, ₁₁gomme a bea banna bao ba ntšhitše ditšhoša ba teile lenaka ka pele ga Tempele ba goma ka aletare, gore ba šireletše kgoši. ₁₂Ka morago Joyada a ntšha Joase ka Tempeleng, a mo rweša mphapahlogo, gomme a mo fa puku ya melao ye e laolago bogoši. Ke moka Joase a tlotšwa mme a bewa kgoši. Batho ba tia magoswi ba goa ba re: “A kgoši a re phelele!”

₁₃Mohumagadi Athalia a kwa lešata le le bego le tladitšwe ke baleti le batho, ka gona a hlaganela Tempeleng moo lešaba le bego le kgobokane gona. ₁₄Moo a bona kgoši ye mpsha e eme kgauswi le kokwane ya mojakong wa Tempele, bjalo ka ge e be e le setlwaedi. Balaodi le baletši ba diphala ba be ba eme le yena, gomme batho ka moka ba tia mekgolokwane ba letša diphala. Athalia a gagola diaparo tša gagwe mme a goelela a re: “Ke go uša mmušo! Ke go uša mmušo!”

₁₅Joyada o be a sa nyake gore Athalia a bolaelwe ka kgorong ya Tempele, ka gona a laela balaodi ba madira a re: “Mo ntšhetšeng ntle a fete ka gare ga melokoloko ya baleti, gomme le bolayeng yo mongwe le yo mongwe yo a ka lekago go mo phološa.” ₁₆Ba mo swara, ba mo iša mošate, gomme ba mmolaela moo Lesorong la Dipere.

₁₇Moprista Joyada a diriša Kgoši Joase le setšhaba kgwerano le Morena ya gore e tla ba setšhaba sa Morena; a ba a diriša kgoši le setšhaba ye nngwe kgwerano. ₁₈Ka morago setšhaba sa ya tempeleng ya Baale gomme sa e phušola; ba pšhatlaganya dialetare le medimo ya diswantšho, gomme ba bolaya Mathane, moprista wa Baale, pele ga dialetare tšeo.

Joyada a bea baleti Tempeleng, ₁₉gomme yena le balaodi le baleti ba kgoši le baleti ba mošate ba felegetša kgoši go tloga Tempeleng go ya mošate, ba latelwa ke setšhaba ka moka. Joase a tsena ka Lesoro la Baleti gomme a dula setulong sa bogoši. ₂₀Setšhaba ka moka sa thaba mme motse bjale wa iketla ka ge Athalia a be a bolailwe mošate.

₁Joase e bile kgoši ya Juda a na le mengwaga ye e šupago ₂ngwageng wa bošupa wa pušo ya Kgoši Jehu wa Israele, gomme a buša a le Jerusalema mengwaga ye masome a mane. Mmagwe e be e le Tsibia wa motse wa Beresheba. ₃Bophelong bja gagwe ka moka o be a dira tše di kgahlago Morena, ka gobane moprista Joyada o be a mo laya. ₄Le ge go le bjalo o ile a se ke a phušola dintotoma tšeo go tšona go bego go khunamelwa medimo ya diswantšho, gomme batho ba no tšwela pele le go dira dihlabelo le go tšhuma diorelo moo.

₅Joase a bitša baprista gomme a ba laela gore ba boloke tšhelete ye batho ba e lefago ge ba tliša dihlabelo ka Tempeleng, e lego tšhelete ye e lefiwago ke motho ge a tliša sehlabelo sa mehleng le ye e ntšhwago e le mpho ya boithaopo. ₆Moprista yo mongwe le yo mongwe o be a swanetše go amogela tšhelete ye e tlišwago ke bao a ba thušago go dira dihlabelo, gomme ka tšhelete yeo go be go swanetše go lokišwa Tempele mo e senyegilego gona.

₇Eupša le ngwageng wa masome a mabedi a metšo ye meraro wa pušo ya Joase baprista ba be ba se ba tšwa ba lokiša Tempele. ₈Ka gona Joase a bitša Joyada le baprista ba bangwe, a ba botšiša a re: “Ke ka lebaka lang le sa lokiše Tempele? Go tloga bjale le se ke la amogela tšhelete go bao ba e tlišago ge eba ka yona le ka se lokiše Tempele.” ₉Baprista ba dumela gore ba ka se amogele tšhelete yeo ka ge ba sa lokiše Tempele.

₁₀Ke moka Joyada a betla polokelo ya tšhelete a phula sekhurumelo sa yona lešoba, gomme a e bea ka thoko ga aletare, ka go la go ja ge motho a tsena ka Tempeleng. Baprista ba ba bego ba diša mojako wa Tempele ba be ba tšea tšhelete ka moka ye e ntšhwago ke batho ba ba tlago Tempeleng, gomme ba e lokele ka moo polokelong. ₁₁Ge baprista bao ba bona gore tšhelete ke ye ntši ka polokelong, mongwaledi wa mošate le Moprista yo Mogolo ba be ba etla, ba e tlemelele ka mekotleng, ba ye go e bala. ₁₂Ge ba e badile, ba be ba e neela banna ba ba bego ba hlokometše modiro wa ka Tempeleng, gomme bona ba lefe babetli, baagi, ₁₃le ba go lokiša merako ya Tempele, le babetli ba maswika, ba be ba reke dikota le maswika a a betlilwego a a bego a šomišwa go lokiša Tempele le tšohle tše di bego di nyakega. ₁₄Le ge go le bjalo ga se gwa ka gwa tološwa ye nngwe ya tšhelete yeo gore go dirwe meruswana ya silibera, meruswi, ditimamabone, diphala, goba sebjana se sengwenyana sa silibera goba sa gauta. ₁₅Tšhelete yeo ka moka ya lefa bašomi, ya ba ya reka tša go lokiša Tempele. ₁₆Banna ba ba bego ba hlokometše modiro ba be ba tshephega, ka gona go be go sa nyakege gore ba hlwe ba botšišwa ka ditšhelete tšeo. ₁₇Tšhelete ya dihlabelo tša tefelo ya dibe le ya dihlabelo tša tshwarelo ya dibe e be e sa lokelwe ka moo polokelong; e be e le ya baprista.

₁₈Mehleng yeo Kgoši Hasaele wa Siria a hlasela motse wa Gathe gomme a o thopa; a napa a ikemišetša go yo hlasela Jerusalema. ₁₉Kgoši Joase wa Juda a tšea dikabelo tše ba ba bušitšego pele ga gagwe, e lego Joshafate le Joramo le Ahasia, ba bego ba di abetše Morena, a di oketša ka tša gagwe le ka gauta ka moka ye e bego e le ka dipolokelong tša Tempele le tša mošate, gomme a di romela ka moka ya ba seloba sa Kgoši Hasaele. Hasaele a napa a tloga Jerusalema le madira a gagwe.

₂₀Tše dingwe tše Kgoši Joase a di dirilego di ngwadilwe mo go Ditaba tša magoši a Juda.

_21-22Bahlankedi ba Kgoši Joase ba ile ba loga maano a go mmolaya, gomme ba babedi ba bona, e lego Josakare, morwa wa Shimate, le Josabade, morwa wa Shomere, ba mmolaya ngwakong wo o agilwego setsheng se se lekelelantšwego, ka thoko ya bohlabela bja Jerusalema, tseleng ye e theogelago Sila. Joase a bolokwa le botatagwe motseng wa Dafida, gomme Amatsia, morwa wa gagwe, a mo hlatlama bogošing.

₁Ngwageng wa masome a mabedi a metšo ye meraro wa ge Joase, morwa wa Ahasia, a buša Juda, Joahase, morwa wa Jehu, e ile ya ba kgoši ya Israele, gomme a buša a le Samaria mengwaga ye lesome le ye e šupago. ₂Go no swana le Kgoši Jerobeamo o ile a dira dibe pele ga Morena, a diriša le Baisraele dibe, mme a fela a di kgomaretše. ₃Ka gona Morena a tukela Baisraele bogale, gomme a ba gafela diatleng tša Kgoši Hasaele wa Siria le morwa wa gagwe, Benhadade, mehleng ya pušo ya Joahase. ₄Eupša Joahase a kgopela kgaugelo go Morena, gomme Morena, ka ge a be a bona bošoro bjo kgoši ya Siria e bego e gateletše Baisraele ka bjona, a kwa thapelo ya gagwe. ₅Morena a romela Baisraele mohlakodiši yo a ilego a ba lokolla go Basiria, gomme Baisraele ba phela ka khutšo go swana le pele. ₆Eupša ba se ke ba tlogela dibe tšela Kgoši Jerobeamo a bego a ba diriša tšona, gomme ba no fela ba di dira; le gona kota ya borapedi ye e bego e le Samaria ba se ke ba e rema.

₇Joahase o be a se na le madira ao a šetšego ntle le banamedi ba dipere ba masome a mahlano, le dikoloi tša ntwa tše lesome, le banna ba go sepela ka maoto ba dikete tše lesome, ka gobane kgoši ya Siria o be a bolaile ba bangwe, a ba gataketše fase bjalo ka lerole.

₈Tše dingwe tše Joahase a di dirilego, gotee le ditiro tša bogale bja gagwe, di ngwadilwe mo go Ditaba tša magoši a Israele. ₉O ile a ithobalela le botatagwe, mme a bolokwa Samaria, gomme morwa wa gagwe, Joase, a mo hlatlama bogošing.

₁₀Ngwageng wa masome a mararo a metšo ye e šupago wa pušo ya Kgoši Joase wa Juda, Joase, morwa wa Joahase, e ile ya ba kgoši ya Israele, gomme a buša a le Samaria mengwaga ye lesome le ye e selelago. ₁₁Le yena a dira dibe pele ga Morena go swana le Kgoši Jerobeamo yo a dirišitšego Baisraele dibe. ₁₂Tše dingwe tše Joase a di dirilego, gotee le bogale bja gagwe ge a elwa le Kgoši Amatsia wa Juda, di ngwadilwe mo go Ditaba tša magoši a Israele. ₁₃Joase o ile a ithobalela le botatagwe, mme a bolokwa mabitleng a mošate Samaria, gomme morwa wa gagwe, Jerobeamo, a mo hlatlama bogošing.

₁₄Moprofeta Elisha o ile a swarwa ke bolwetši bjo bo bego bo tlile go mmolaya, gomme Kgoši Joase wa Israele a tla go mmona. A lla a re go yena: “Tate! Tate! O be o šireleditše Israele bjalo ka dikoloi tša ntwa le banamedi ba dipere!”

₁₅Elisha a mmotša a re: “Tšea bora le mesebe.” Joase a di tšea ₁₆gomme Elisha a mo laela gore a itokišetše go thunya. Kgoši a dira bjalo, gomme Elisha a bea diatla tša gagwe godimo ga diatla tša kgoši. ₁₇Elisha a mo laela gore a bule lefasetere le le lebeletšego ka thoko ya Siria. Kgoši a le bula, gomme Elisha a re go yena: “Thunya mosebe woo!” Ge kgoši a seno o thunya, moprofeta a goa a re: “Ke wena mosebe wa Morena, woo ka wona a tlago fenya Siria. O swanetše go lwa le Basiria kua Afeke go fihlela o ba fediša.”

₁₈Ke moka Elisha a botša kgoši gore a tšee mesebe yela ye mengwe a tie fase ka yona. Kgoši a tia fase ka yona gararo, gomme a lesa. ₁₉Taba yeo ya befediša Elisha, gomme a re go yena: “O be o swanetše go ba o teile fase gahlano goba gatshela, ke moo o bego o tla fenyetša Basiria sa ruri; eupša bjale o tla ba fenya gararo fela.”

₂₀Elisha a hwa gomme a bolokwa.

Ngwaga wo mongwe le wo mongwe makoko a bahlakodi ba Bamoaba a be a šwahlela naga ya Israele. ₂₁Ya re ka letšatši le lengwe batho ba bangwe ba Israele ba sa boloka mohu, ba bona le lengwe la makoko ao. Ba lahlela setopo sela ka lebitleng la Elisha gomme ba tšhaba. Ge setopo sela se seno kgwatha mašapo a Elisha, monna yola a boela a phela gomme a emelela.

₂₂Kgoši Hasaele wa Siria o ile a gatelela Baisraele nakong ka moka ya pušo ya Joahase, ₂₃eupša Morena a ba šokela mme a ba gaugela. A se ke a ba lesa ba fedišwa, gomme a ba thuša ka lebaka la kgwerano ya gagwe le Abrahama le Isaka le Jakobo. Ga se a ka a lahla setšhaba sa gagwe go fihlela le bjale.

₂₄Ge Kgoši Hasaele wa Siria a hwile, morwa wa gagwe, Benhadade, a mo hlatlama bogošing. ₂₅Ke moka Kgoši Joase wa Israele a fenya Benhadade gararo, gomme a thopolla metse yela e bego e thopilwe ke Benhadade nakong yela ya pušo ya Joahase, tatagoJoase.

₁Ngwageng wa bobedi wa ge Joase, morwa wa Joahase, e le kgoši ya Israele, Amatsia, morwa wa Joase, e ile ya ba kgoši ya Juda ₂a na le mengwaga ye masome a mabedi a metšo ye e fetšago seatla, gomme a buša a le Jerusalema mengwaga ye masome a mabedi a metšo ye senyane. Mmagwe e be e le Joadane wa Jerusalema. ₃O be a dira tše di kgahlago Morena, eupša a se ke a swana le Kgoši Dafida, rakgolokhukhu wa gagwe, fela yena a itirela tše di bego di dirwa ke Joase, tatagwe. ₄A se ke a phušola dintotoma tšeo go tšona go bego go khunamelwa medimo ya diswantšho, gomme batho ba no tšwela pele le go dira dihlabelo le go tšhuma diorelo moo.

₅Ge Amatsia a seno tielela bogošing, o ile a bolaya bahlankedi bale ba go bolaya tatagwe. ₆Fela a se ke a bolaya bana ba bona, eupša a phetha se Morena a se laetšego setšhaba melaong ya Moshe ge a re: “Batswadi ba se ke ba bolaelwa melato ye e obilwego ke bana ba bona, le bana ba se ke ba bolaelwa melato ye e obilwego ke batswadi ba bona; motho a bolaelwe fela molato wo o obilwego ke yena mong.”

₇Amatsia o ile a bolaya bahlabani ba dikete tše lesome ba Baedomo kua Moeding wa Letswai; a thopa motse wa Sela ntweng gomme a o rea leina la Jokotiele, leina le e sa lego la wona le lehono.

₈Ka morago Amatsia a roma batseta go Kgoši Joase wa Israele, a mo hlohla gore ba lwe. ₉Eupša Kgoši Joase a mo fetola ka go re: “Mohlašana wa mošwana wa dithaba tša Lebanone o kile wa romela molaetša go mosedere wa moo wa re: ‘Faa morwa wa ka morwediago gore a mo nyale.’ Gwa tla phoofolo ya naga gomme ya gatakanya mošwana wola. ₁₀Bjale Amatsia, o tloga o fentše Baedomo, ka gona o na le makoko, o a ikgogomoša. Ipshine ka setumo sa gago mme o itulele moo lapeng la gago. Ke ka lebaka lang o tsoša mpherefere wo o tlago tlišetša wena le batho ba gago mahlomola?”

₁₁Eupša Amatsia a di tšeiša phefo, ka gona Kgoši Joase a tšwa dira le banna ba gagwe gomme a lwa le yena Bethe-Shemeshe kua Juda. ₁₂Bajuda ba fenywa, gomme bahlabani ba bona ka moka ba tšhabela malapeng a bona. ₁₃Joase a thopa Amatsia, a fetela Jerusalema, a kgereša morako wa motse go tloga lesorong la Efraime go fihla Lesorong la Sekhutlong, sebaka sa dimetara tše e ka bago tše makgolo a mabedi. ₁₄A tšea silibera le gauta ka moka ye a e hweditšego, ditlabakelo ka moka tša ka Tempeleng, le mahumo ka moka a mošate, gomme a di iša Samaria. A tšea le mathopša.

₁₅Tše dingwe tše Joase a di dirilego, gotee le bogale bja gagwe ge a elwa le Kgoši Amatsia wa Juda, di ngwadilwe mo go Ditaba tša magoši a Israele. ₁₆Joase o ile a ithobalela le botatagwe, mme a bolokwa mabitleng a mošate motseng wa Samaria, gomme morwa wa gagwe, Jerobeamo, a mo hlatlama bogošing.

₁₇Kgoši Amatsia wa Juda a phela mengwaga ye mengwe ye lesome le ye mehlano ka morago ga lehu la Kgoši Joase wa Israele. ₁₈Tše dingwe tše Amatsia a di dirilego di ngwadilwe mo go Ditaba tša magoši a Juda.

₁₉Jerusalema go ile gwa logwa maanomabe a go bolaya Amatsia, ka gona a tšhabela motseng wa Lakishe, eupša manaba a gagwe a mo lata moo gomme a mmolaya. ₂₀Setopo sa gagwe sa rwalwa ka koloi ya dipere sa boetšwa Jerusalema, mme a bolokwa mabitleng a botatagwe motseng wa Dafida. ₂₁Ya ba gona batho ba Juda ba beago Usia, morwagwe wa mengwaga ye lesome le ye e selelago, kgoši. ₂₂Usia a thopa motse wa Elate gomme a o tsošološa ge tatagwe a hwile.

₂₃Ngwageng wa lesome le metšo ye mehlano wa ge Amatsia, morwa wa Joase, e le kgoši ya Juda, Jerobeamo, morwa wa Joase wa Israele, e ile ya ba kgoši ya Israele, gomme a buša a le Samaria mengwaga ye masome a mane a motšo o tee. ₂₄A dira dibe pele ga Morena, a se ke a tlogela dibe tša Kgoši Jerobeamo, morwa wa Nebate, yoo a dirišitšego Israele dibe. ₂₅A thopa naga ka moka ye e bego e kile ya ba ya Israele, go tloga sefateng sa Hamate go fihlela Lewatleng le le Hwilego. Se e be e le se Morena Modimo wa Israele a se boletšego ka mohlanka wa gagwe, moprofeta Jona, morwa wa Amithai, yo a tšwago Gathe-Hefere.

₂₆Morena a bona tlaišego ye kgolokgolo ya Baisraele; ka moka ga bona ba be ba tshwenyega gomme go se motho le o tee yo a ka ba thušago. ₂₇Fela Morena o be a se a rera go fedišetša Baisraele sa ruri, ka gona a ba hlakodiša ka Kgoši Jerobeamo, morwa wa Joase.

₂₈Tše dingwe tše Jerobeamo a di dirilego, dintwa tša bogale bja gagwe, le ka mokgwa woo a ilego a boetša motse wa Damaskose le wa Hamate go naga ya Israele, ka moka di ngwadilwe mo go Ditaba tša magoši a Israele. ₂₉Jerobeamo a ithobalela le botatagwe, mme a bolokwa mabitleng a mošate, gomme morwa wa gagwe, Sakaria, a mo hlatlama bogošing.

₁Ngwageng wa masome a mabedi le metšo ye e šupago wa pušo ya Kgoši Jeroboamo wa Israele, Usia, morwa wa Amatsia, e ile ya ba kgoši ya Juda ₂a na le mengwaga ye lesome le ye e selelago, gomme a buša a le Jerusalema mengwaga ye masome a mahlano a metšo ye mebedi. Mmagwe e be e le Jekolia wa Jerusalema. ₃O be a dira tše di kgahlago Morena, go no swana le tatagwe. ₄Eupša dintotoma tšeo go tšona go bego go khunamelwa medimo ya diswantšho a se di phušole, gomme batho ba no tšwela pele le go dira dihlabelo le go tšhuma diorelo fao. ₅Morena a otla Usia ka bolwetši bja letlalo bja go mo tšhilafatša bjo bo ilego bja mo swara go fihlela a ehwa. O be a dula ka ngwakong wa thokwana a lesišitšwe mediro ka moka ya bogoši, Jotamo, morwagwe, e le mohlokomedi wa mošate, a bile a buša naga.

₆Tše dingwe tše Usia a di dirilego di ngwadilwe mo go Ditaba tša magoši a Juda. ₇Usia a ithobalela le botatagwe, mme a bolokwa mabitleng a bona motseng wa Dafida, gomme Jotamo, morwagwe, a mo hlatlama bogošing.

₈Ngwageng wa masome a mararo a metšo ye seswai wa pušo ya Kgoši Usia wa Juda, Sakaria, morwa wa Jeroboamo, ya ba kgoši ya Israele, gomme a buša a le Samaria dikgwedi tše di selelago. ₉Yena, go no swana le ba ba bušitšego pele ga gagwe, a dira dibe pele ga Morena. A se ke a tlogela dibe tša Kgoši Jerobeamo, morwa wa Nebate, yo a dirišitšego Baisraele dibe. ₁₀Shalume, morwa wa Jabeshe, a loga maanomabe a go bolaya Kgoši Sakaria, gomme a mo hlasela a mmolaya kua Jibleamo, mme a mo hlatlama bogošing.

₁₁Tše dingwe tše Sakaria a di dirilego di ngwadilwe mo go Ditaba tša magoši a Israele.

₁₂Ka gona gwa phethega se Morena a bego a se holofeditše Kgoši Jehu ge a re: “Ditlogolo tša gago e tla ba dikgoši tša Israele go fihlela molokong wa bone.”

₁₃Ngwageng wa masome a mararo a metšo ye senyane wa pušo ya Kgoši Usia wa Juda, Shalume, morwa wa Jabeshe, ya ba kgoši ya Israele, gomme a buša a le Samaria kgwedi e tee.

₁₄Menaheme, morwa wa Gadi, a tloga Tirtsa a ya Samaria, a hlasela Shalume a mmolaya, gomme a mo hlatlama bogošing. ₁₅Tše dingwe tše Shalume a di dirilego, gotee le ditaba tša maanomabe a gagwe, di ngwadilwe mo go Ditaba tša magoši a Israele. ₁₆Ge Menaheme a le tseleng a etšwa Tirtsa, o ile a thuba motse wa Tapuage a fediša badudi ba wona, a ba a senya naga ye e o dikologilego, ka gobane motse woo o ile wa se ke wa ineela go yena. A ba a phula baimana ba gona ka moka dimpa.

₁₇Ngwageng wa masome a mararo a metšo ye senyane wa pušo ya Kgoši Usia wa Juda, Menaheme, morwa wa Gadi, ya ba kgoši ya Israele gomme a buša a le Samaria mengwaga ye lesome. ₁₈A dira dibe pele ga Morena, a se ke a tlogela dibe tša Kgoši Jerobeamo, morwa wa Nebate, yo a dirišitšego Baisraele dibe. Mehleng ya gagwe ₁₉Tiglate-Pilesere, kgoši ya Asiria, a hlasela Israele, gomme Menaheme a mo neela silibera ya dikilokramo tše dikete tše masome a mararo gore a mo thuše go tiiša mmušo wa Menaheme mo nageng. ₂₀Menaheme a kgobokanya tšhelete yeo ka go gapeletša mohumi yo mongwe le yo mongwe wa Israele go ntšha dipapetlana tša silibera tše masome a mahlano. Ka gona Tiglate-Pilesere a ipoelela nageng ya gabo.

₂₁Tše dingwe tše Menaheme a di dirilego di ngwadilwe mo go Ditaba tša magoši a Israele. ₂₂O ile a ithobalela le botatagwe, gomme morwa wa gagwe, Pekagia, a mo hlatlama bogošing.

₂₃Ngwageng wa masome a mahlano wa pušo ya Kgoši Usia wa Juda, Pekagia, morwa wa Menaheme, ya ba kgoši ya Israele, gomme a buša a le Samaria mengwaga ye mebedi. ₂₄A dira dibe pele ga Morena, a se ke a tlogela dibe tša Kgoši Jerobeamo, morwa wa Nebate, yo a dirišitšego Baisraele dibe. ₂₅Molaodi wa madira a Pekagia, e lego Pekage, morwa wa Remalia, a loga maanomabe, a hlasela Pekagia ka sebong sa ka gare sa mošate kua Samaria, a thušwa ke banna ba masome a a fetšago seatla ba Gileade, a mmolaya, gomme a mo hlatlama bogošing.

₂₆Tše dingwe tše Pekagia a di dirilego di ngwadilwe mo go Ditaba tša magoši a Israele.

₂₇Ngwageng wa masome a mahlano a metšo ye mebedi wa pušo ya Kgoši Usia wa Juda, Pekage, morwa wa Remalia, ya ba kgoši ya Israele, gomme a buša a le Samaria mengwaga ye masome a mabedi. ₂₈A dira dibe pele ga Morena, gomme a se ke a tlogela dibe tša Kgoši Jerobeamo yo a dirišitšego Baisraele dibe.

₂₉Ke ge Pekage e le kgoši ge Tiglate-Pilesere, kgoši ya Asiria, a thopa motse wa Iyone, le wa Abele-Bethe-Maaka, le wa Janoage, le wa Kedeshe, le wa Hatsore, le naga ya Gileade le ya Galilea le naga yohle ya Naftali, gomme a thopa batho ba moo a ba iša Asiria.

₃₀Ngwageng wa masome a mabedi wa ge Jotamo, morwa wa Usia, e le kgoši ya Juda, Hosea, morwa wa Ela, a logela Kgoši Pekage maanomabe, a mo hlasela, a mmolaya, gomme a mo hlatlama bogošing. ₃₁Tše dingwe tše Pekage a di dirilego di ngwadilwe mo go Ditaba tša magoši a Israele.

₃₂Ngwageng wa bobedi wa pušo ya Pekage, morwa wa Remalia, Jotamo, morwa wa Usia, ya ba kgoši ya Juda ₃₃a na le mengwaga ye masome a mabedi a metšo ye e fetšago seatla, gomme a buša a le Jerusalema mengwaga ye lesome le ye e selelago. Mmagwe e be e le Jerusha, morwedi wa Tsadoko. ₃₄Jotamo a dira tše di kgahlago Morena, go no swana le Usia, tatagwe. ₃₅Eupša dintotoma tšeo go tšona go bego go khunamelwa medimo ya diswantšho a se ke a di phušola, mme batho ba no tšwela pele le go dira dihlabelo le go tšhuma diorelo moo go tšona. Ke Jotamo yoo a ilego a aga kgoro ye e lebeletšego leboa ya Tempele.

₃₆Tše dingwe tše Jotamo a di dirilego di ngwadilwe mo go Ditaba tša magoši a Juda. ₃₇Mehleng ya gagwe Morena o ile a romela Kgoši Retsine wa Siria le Kgoši Pekage, morwa wa Remalia, go tlo hlasela Juda. ₃₈Jotamo a ithobalela le botatagwe, gomme a bolokwa mabitleng a bona motseng wa Dafida, mme morwa wa gagwe, Ahase, a mo hlatlama bogošing.