2 DIKGOŠI 14

₁Ngwageng wa bobedi wa ge Joase, morwa wa Joahase, e le kgoši ya Israele, Amatsia, morwa wa Joase, e ile ya ba kgoši ya Juda ₂a na le mengwaga ye masome a mabedi a metšo ye e fetšago seatla, gomme a buša a le Jerusalema mengwaga ye masome a mabedi a metšo ye senyane. Mmagwe e be e le Joadane wa Jerusalema. ₃O be a dira tše di kgahlago Morena, eupša a se ke a swana le Kgoši Dafida, rakgolokhukhu wa gagwe, fela yena a itirela tše di bego di dirwa ke Joase, tatagwe. ₄A se ke a phušola dintotoma tšeo go tšona go bego go khunamelwa medimo ya diswantšho, gomme batho ba no tšwela pele le go dira dihlabelo le go tšhuma diorelo moo.

₅Ge Amatsia a seno tielela bogošing, o ile a bolaya bahlankedi bale ba go bolaya tatagwe. ₆Fela a se ke a bolaya bana ba bona, eupša a phetha se Morena a se laetšego setšhaba melaong ya Moshe ge a re: “Batswadi ba se ke ba bolaelwa melato ye e obilwego ke bana ba bona, le bana ba se ke ba bolaelwa melato ye e obilwego ke batswadi ba bona; motho a bolaelwe fela molato wo o obilwego ke yena mong.”

₇Amatsia o ile a bolaya bahlabani ba dikete tše lesome ba Baedomo kua Moeding wa Letswai; a thopa motse wa Sela ntweng gomme a o rea leina la Jokotiele, leina le e sa lego la wona le lehono.

₈Ka morago Amatsia a roma batseta go Kgoši Joase wa Israele, a mo hlohla gore ba lwe. ₉Eupša Kgoši Joase a mo fetola ka go re: “Mohlašana wa mošwana wa dithaba tša Lebanone o kile wa romela molaetša go mosedere wa moo wa re: ‘Faa morwa wa ka morwediago gore a mo nyale.’ Gwa tla phoofolo ya naga gomme ya gatakanya mošwana wola. ₁₀Bjale Amatsia, o tloga o fentše Baedomo, ka gona o na le makoko, o a ikgogomoša. Ipshine ka setumo sa gago mme o itulele moo lapeng la gago. Ke ka lebaka lang o tsoša mpherefere wo o tlago tlišetša wena le batho ba gago mahlomola?”

₁₁Eupša Amatsia a di tšeiša phefo, ka gona Kgoši Joase a tšwa dira le banna ba gagwe gomme a lwa le yena Bethe-Shemeshe kua Juda. ₁₂Bajuda ba fenywa, gomme bahlabani ba bona ka moka ba tšhabela malapeng a bona. ₁₃Joase a thopa Amatsia, a fetela Jerusalema, a kgereša morako wa motse go tloga lesorong la Efraime go fihla Lesorong la Sekhutlong, sebaka sa dimetara tše e ka bago tše makgolo a mabedi. ₁₄A tšea silibera le gauta ka moka ye a e hweditšego, ditlabakelo ka moka tša ka Tempeleng, le mahumo ka moka a mošate, gomme a di iša Samaria. A tšea le mathopša.

₁₅Tše dingwe tše Joase a di dirilego, gotee le bogale bja gagwe ge a elwa le Kgoši Amatsia wa Juda, di ngwadilwe mo go Ditaba tša magoši a Israele. ₁₆Joase o ile a ithobalela le botatagwe, mme a bolokwa mabitleng a mošate motseng wa Samaria, gomme morwa wa gagwe, Jerobeamo, a mo hlatlama bogošing.

₁₇Kgoši Amatsia wa Juda a phela mengwaga ye mengwe ye lesome le ye mehlano ka morago ga lehu la Kgoši Joase wa Israele. ₁₈Tše dingwe tše Amatsia a di dirilego di ngwadilwe mo go Ditaba tša magoši a Juda.

₁₉Jerusalema go ile gwa logwa maanomabe a go bolaya Amatsia, ka gona a tšhabela motseng wa Lakishe, eupša manaba a gagwe a mo lata moo gomme a mmolaya. ₂₀Setopo sa gagwe sa rwalwa ka koloi ya dipere sa boetšwa Jerusalema, mme a bolokwa mabitleng a botatagwe motseng wa Dafida. ₂₁Ya ba gona batho ba Juda ba beago Usia, morwagwe wa mengwaga ye lesome le ye e selelago, kgoši. ₂₂Usia a thopa motse wa Elate gomme a o tsošološa ge tatagwe a hwile.

₂₃Ngwageng wa lesome le metšo ye mehlano wa ge Amatsia, morwa wa Joase, e le kgoši ya Juda, Jerobeamo, morwa wa Joase wa Israele, e ile ya ba kgoši ya Israele, gomme a buša a le Samaria mengwaga ye masome a mane a motšo o tee. ₂₄A dira dibe pele ga Morena, a se ke a tlogela dibe tša Kgoši Jerobeamo, morwa wa Nebate, yoo a dirišitšego Israele dibe. ₂₅A thopa naga ka moka ye e bego e kile ya ba ya Israele, go tloga sefateng sa Hamate go fihlela Lewatleng le le Hwilego. Se e be e le se Morena Modimo wa Israele a se boletšego ka mohlanka wa gagwe, moprofeta Jona, morwa wa Amithai, yo a tšwago Gathe-Hefere.

₂₆Morena a bona tlaišego ye kgolokgolo ya Baisraele; ka moka ga bona ba be ba tshwenyega gomme go se motho le o tee yo a ka ba thušago. ₂₇Fela Morena o be a se a rera go fedišetša Baisraele sa ruri, ka gona a ba hlakodiša ka Kgoši Jerobeamo, morwa wa Joase.

₂₈Tše dingwe tše Jerobeamo a di dirilego, dintwa tša bogale bja gagwe, le ka mokgwa woo a ilego a boetša motse wa Damaskose le wa Hamate go naga ya Israele, ka moka di ngwadilwe mo go Ditaba tša magoši a Israele. ₂₉Jerobeamo a ithobalela le botatagwe, mme a bolokwa mabitleng a mošate, gomme morwa wa gagwe, Sakaria, a mo hlatlama bogošing.